□□□□□
Mga Kasugoan nahanungod sang Halad
1 Ang Ginoo naghatag kay Moises
2 sang masunod nga mga pagsulondan para sa mga tawo sang Israel nga pagatumanon sa duta nga iya pagaihatag sa ila.
3 Ang isa ka toro nga baka, isa ka karnero nga lalaki, isa ka obeja, ukon isa ka kanding sarang madulot sa Ginoo subong isa ka halad nga sinunog ukon isa ka halad sa pagtuman sang isa ka saad ukon subong isa ka halad nga kinabubot-on ukon isa ka dulot sa inyo natalana nga mga piesta; ang baho sining mga halad nga kalan-on mahamot sa Ginoo.
4-5 Ang bisan sin-o nga magdulot sing karnero ukon isa ka kanding subong isa ka halad nga sinunog sa Ginoo kinahanglan magdala upod sa tagsa ka sapat sing duha ka libra nga arina nga nasamoan sing duha ka tasa nga lana sang olivo subong isa ka halad nga kalan-on, lakip ang duha ka tasa nga bino.
6 Kon ang isa ka karnero nga lalaki ang ihalad, ang apat ka libra nga arina nga nasamoan sang tatlo ka tasa nga lana sang olivo amo ang idulot subong isa ka halad nga kalan-on,
7 lakip ang tatlo ka tasa nga bino. Ang baho sini nga mga halad mahamot sa Ginoo.
8 Kon ang toro nga baka ang ihalad sa Ginoo subong isa ka halad sa paghiambit,
9 ang isa ka halad nga kalan-on nga anom ka libra nga arina nga nasamoan sing apat ka tasa nga lana sang olivo amo ang idulot,
10 lakip ang apat ka tasa nga bino. Ang baho sini nga halad mahamot sa Ginoo.
11 Amo ini ang idulot lakip sa tagsa ka toro nga baka, karnero nga lalaki, obeja, ukon kanding.
12 Kon sobra sa isa ka bilog nga sapat ang ihalad, kinahanglan ang ginalakip nga dulot pagadugangan man sing nagakaigo.
13 Ang tagsa ka tumandok nga Israelinhon kinahanglan maghimo sini kon magdulot sia sing halad nga kalan-on, isa ka baho nga mahamot sa Ginoo.
14 Kag kon sa bisan ano nga tion, ang isa ka dumoluong nga nagapuyo upod sa inyo, bisan umalagi lang ukon permanente, magdulot sing halad nga kalan-on, isa ka baho nga mahamot sa Ginoo, kinahanglan tumanon niya ang amo man nga mga pagsulondan.
15 Sa tanan nga palaabuton nga panahon, amo man inil nga mga pagsulondan ang inyo kinahanglan pagasundon kag sang mga dumoluong nga nagapuyo upod sa inyo. Kamo kag sila pareho sa atubangan sang Ginoo.
16 Ini nga mga kasugoan kag mga pagsulondan para sa inyo kag para man sa ila.
17 Ang Ginoo naghatag kay Moises
18 sang masunod nga mga pagsulondan para sa mga tawo sang Israel nga pagatumanon sa duta nga ihatag sang Ginoo sa ila.
19 Kon magkaon kamo sang patubas sang duta, magpain kamo sang bahin sini subong isa ka pinasahi nga dulot sa Ginoo.
20 Kon magluto kamo sing tinapay, ang nahauna nga tinapay nga nahimo sa bag-o nga trigo pagaihalad subong isa ka pinasahi nga dulot sa Ginoo. Pagaidulot ini pareho man sang pinasahi nga dulot nga inyo ginhimo gikan sa trigo nga inyo ginlinas.
21 Sa tanan nga panahon nga palaabuton, ining pinasahi nga dulot pagaihatag sa Ginoo gikan sa tinapay nga inyo ginluto.
22 Pero kon may isa nga sa indi hungod wala makatuman sini nga mga pagsulondan nga ginhatag sang Ginoo kay Moises,
23 abi sa ulihi ang katilingban wala na nagatuman sang tanan nga ginsugo sang Ginoo paagi kay Moises,
24 kon ini nga sayop nahimo sa indi hungod, kinahanglan maghalad sila sang isa ka toro nga baka subong isa ka halad nga sinunog, isa ka baho nga mahamot sa Ginoo, lakip ang nagakaigo nga halad nga kalan-on kag halad nga bino. Wala labot sini, magdulot sila sing kanding nga lalaki subong isa ka halad tungod sa sala.
25 Ang pari magahimo sang tulomanon sa pagpaninlo para sa katilingban, kag pagapatawaron sila, kay ang ila sayop indi hungod kag gindala nila ang ila halad tungod sa sala subong isa ka halad nga kalan-on sa Ginoo.
26 Ang bug-os nga katilingban sang Israel kag ang mga dumoluong nga nagapuyo upod sa inyo pagapatawaron, kay ang tagsatagsa nagadalahig sa amo nga sala.
27 Kon ang isa ka tawo makasala sing indi hungod, maghalad sia sing kanding nga babayi nga nagaedad sing isa ka tuig subong isa ka halad tungod sa sala.
28 Sa altar ang pari magahimo sang tulomanon sa pagpaninlo sa pagtinlo sang amo nga tawo sa iya sala, kag pagapatawaron sia.
29 Amo man ini nga pagsulondan ang para sa tagsatagsa nga nakasala sing indi hungod, bisan sia isa ka tumandok nga Israelinhon ukon isa ka permanente nga dumoluong.
30 Pero ang bisan sin-o nga nagapakasala sing hungod, bisan sia isa ka tumandok ukon dumoluong, nagapasipala sa Ginoo, kag pagapatyon sia,
31 kay ginlapas niya ang ginsiling sang Ginoo kag ginsupak sing hungod ang isa sang iya mga sugo. Sia ang may salabton sang iya kaugalingon nga kamatayon.
Ang Tawo nga Naglapas sang Adlaw nga Inugpahuway
32 Sang didto pa sa desierto ang mga Israelinhon, may isa ka tawo nga nasapwan nga nagapangahoy sa Adlaw nga Inugpahuway.
33 Gindala sia kay Moises, kay Aaron, kag sa bug-os nga katilingban,
34 kag ginpabilanggo, kay wala pa mahibal-i kon ano ang dapat himuon sa iya.
35 Dayon ang Ginoo nagsiling kay Moises, "Ang amo nga tawo dapat patyon; batohon sia sang bug-os nga katilingban sa gwa sang kampamento tubtob mapatay sia.”
36 Gani gindala sia sang bug-os nga katilingban sa gwa sang kampamento kag ginbato sia tubtob mapatay, suno sa ginsugo sang Ginoo.
Ang mga Pagsulondan nahanungod sang mga Plikos
37 Ang Ginoo nagmando kay Moises
38 nga singganon ang mga tawo sang Israel: "Maghimo kamo sing mga plikos sa sidsid sang inyo mga bayu kag butangan sing lubid nga asol ang tagsa ka plikos. Kinahanglan himuon ninyo ini sa tanan nga panahon nga palaabuton.
39 Ang mga plikos manginpagpahanumdom, kag sa tagsa ka tion nga makita ninyo ini, magadumdom kamo sang tanan ko nga mga sugo kag tumanon ninyo ini; dayon indi kmo magbiya sa akon kag magsunod sang inyo kaugalingon nga mga handom kag tinutuyo.
40 Ang mga plikos magapahanumdom sa inyo sa pagtuman sang tanan ko nga mga sugo, kag kamo mangin-akon sing bug-os.
41 Ako ang Ginoo nga inyo Dios; ginpagwa ko kamo sa Egipto agod ako mangin-inyo Dios. Ako amo ang Ginoo.”
lSa iban nga dumaan nga mga pagbadbad amo man ini; sa Hebreo ang katilingban amo man ini.
No comments:
Post a Comment