♤♤♤♤♤
Ang mga Siyudad nga Dalangpan
(Num. 35:9-28; Jos. 20:1-9)
1 "Sa tapos malaglag sang Ginoo nga inyo Dios ang mga pumoluyo sa duta nga iya ginhatag sa inyo, kag naagaw na ninyo ang ila mga siyudad kag mga balay kag nagapuyo na kamo didto,
2 dayon painon ninyo ang tatlo ka mga siyudad.
3 Partiha sa tatlo ka distrito ang duta nga ginahatag sa inyo sang Ginoo nga may isa sining mga siyudad sa tagsa ka distrito, agod ang tawo nga makapatay makadangop sa isa sining mga siyudad agod indi sia maano.
4 Kon ang isa ka tawo makapatay sang indi hungod sang bisan sin-o nga indi niya kaaway, makadangop sia sa isa sining mga siyudad kag indi sia maano.
5 Abi kon may duha ka tawo nga magkadto sa kagulangan sa pagpulod sang kahoy, kag samtang ang isa sa ila nagapulod sang kahoy, ang ulo sang wasay napalos kag naigo ang isa kag napatay, sarang sia makadangop sa isa sining mga siyudad kag indi sia maano.
6 Kon isa lamang ang siyudad nga dalangpan, ayhan malayo ang iya kadtuan kag malambot sia sang tawo nga nagatimalos kag sa iya kaakig mapatay niya ang tawo nga wala sing sala. Sa bagay, napatay niya sa indi hungod ang isa ka tawo nga indi niya kaaway.
7 Gani ginasugo ko kamo sa pagpain sang tatlo ka mga siyudad.
8 "Kon ang Ginoo nga inyo Dios magpasangkad sang inyo kadutaan, suno sa iya ginsaad sa inyo mga katigulangan, kag mahatag sa inyo ang tanan nga duta nga iya ginsaad,
9 dayon magpili kamo sing tatlo pa gid ka mga siyudad. Ihatag niya ini nga duta, kon tumanon ninyo ang tanan nga akon ginasugo sa inyo karon kag kon inyo higugmaon ang Ginoo nga inyo Dios kag magkabuhi suno sa iya mga ginatudlo.
10 Himoa ninyo ini agod ang wala sala nga mga tawo indi mapatay kag indi kamo makapatay sang tawo nga wala sing sala sa duta nga ginahatag sa inyo sang Ginoo.
11 "Pero kon ang isa ka tawo magpatay sing hungod sang iya kaaway kag dayon magpalagyo sia sa isa sining mga siyudad nga dalangpan,
12 ang mga pangulo sang iya kaugalingon nga banwa magakuha sa iya kag itugyan sia sa tawo nga nagatimalos sang iya pagpatay agod nga ipapatay sia.
13 Indi sia pagkaluoyi. Kuhaa ninyo ini nga sala sa pagpatay sa Israel, agod ang tanan manginmaayo para sa inyo.
Ang Daan nga mga Dulonan
14 "Indi paghalina ang muhon sang imo kaingod, nga dugay na nga ginbutang sa duta nga ginahatag sa imo sang Ginoo nga imo Dios.
Ang Kasugoan Nahanungod sa mga Saksi
15 "Ang isa ka saksi indi tuman sa pagpamatuod nga ang isa ka tawo nakasala. Kinahanglan may duha ka mga saksi sa pagpamatuod nga nakasala ang isa ka tawo.
16 Kon ang isa ka tawo nagatinguha sa paghalit sang isa ka tawo paagi sa pagbutangbotang sa iya sing isa ka sala,
17 sila nga duha magatindog sa duog nga ginasimbahan kag hukman sila sang mga pari kag mga hukom nga nagaalagad sadto nga tion.
18 Ang mga hukom magausisa sing maid-id sini nga kaso, kag kon ang tawo masapwan nga nagabutangbotang sia sa iya kapareho nga Israelinhon,
19 pamatbatan sia sing silot nga amo kuntani ang silot sa iya ginasumbong. Sa sini nga paagi makuha ini nga kalautan.
20 Dayon ang tagsatagsa nga makabati sini magaandam kag wala na sing may magahimo sining malaut nga butang.
21 Indi kamo magkaluoy. Ang silot amo ang kabuhi para sa kabuhi, mata para sa mata, ngipon para sa ngipon, kamot para sa kamot, kag tiil para sa tiil.
No comments:
Post a Comment