"Magpakabakod ka, ang imo Pagtuo Nag-ayo sa Imo"

Liturhiya sang Pulong

(Lunes, Hulyo 8, 2019)

 

Ang Pagbasa gikan sa Libro sang:

Genesis 28:10-22

   Naghalin si Jacob sa Beerseba kag nagpakadto sa Haran. Sa pagtunod sang adlaw nag-abot sia sa isa ka duog kag nagdulog didto. Naghigda sia sa pagtulog kag nag-ulon sia sa isa ka bato. Nagdamgo sia nga nakita niya ang isa ka hagdan nga nagalambot sa langit halin sa duta. Ang mga anghel sang Dios nagasaka kag nagapanaog sa sini nga hagdan. Dayon nakita niya ang Ginoo nga nagatindog sa luyo niya kag nagsiling, “Ako amo ang Ginoo, ang Dios ni Abraham kag ni Isaac. Pagaihatag ko sa imo kag sa imo mga kaliwat ining duta nga imo ginahigdaan. Ang imo mga kaliwat manginsubong kadamo sang yab-ok sa duta. Magalapad ang ila mga kadutaan pa aminhan, pa bagatnan, pa sidlangan kag pa nakatundan. Ang tanan nga mga pungsod sa duta magapangayo sa akon nga bendisyunan ko man sila subong sang akon pagbendisyon sa imo kag sa imo mga kaliwat. Dumdoma nga magaupod ako sa imo kag magabantay sa imo bisan diin ikaw makadto, kag pabalikon ko ikaw sa sini nga duta. Indi ko ikaw pagbayaan tubtob mahimo ko ang tanan nga ginasiling ko sa imo.”

   Si Jacob nagmata kag nagsiling, “Matuod gid, ang Ginoo yari diri. Yari sia sa sini nga duog, kag wala ko ini mahibaloi.” Hinadlukan sia kag nagsiling, “Daw ano ka makahaladlok ini nga duog! Sa walay duhadoha balay ini sang Dios kag puwertahan sang langit.”

   Si Jacob nagbangon sing aga pa gid. Ginkuha niya ang bato nga iya gin-unlan kag ginpatindog subong isa ka haligi nga handumanan. Dayon ginbuboan niya ini sang lana kag ginhalad ini sa Dios. Ginhingalanan niya ang duog Betel. (Luz ang ngalan sina nga banwa sang una.) Dayon si Jacob nagsumpa sa Ginoo nga Dios, “Kon mag-upod ka sa akon kag magbantay sa akon pagpanglakaton, kag maghatag sa akon sing pagkaon kag mga bayu, kag kon makabalik ako nga indi maano sa puloy-an sang akon amay, ikaw mangin-akon Dios. Ining bato nga akon ginpatindog subong isa ka haligi nga handumanan mangin-imo puloy-an, kag pagaihatag ko sa imo ang ikapulo sang tanan nga igahatag mo sa akon.”

Salmo sa Pagsabat:

Mga Salmo 91:1-2, 3-4, 14-15

(S) Ikaw ang akon Dios, sa imo nagasalig ako.

Ang bisan sin-o nga nagadangop sa Labing Mataas,ang bisan sin-o nga nagapabilin sa idalom sang pagpangapin sang Labing Makagagahom, makasiling sa Ginoo, “Ikaw ang akon palalipdan kag mangangapin! Ikaw ang akon Dios, sa imo nga akon nagasalig ako.” (S)

Sia magaluwas gid sa imo sa tago nga mga katalagman, kag sa tanan nga makamamatay nga mga balatian. Sia magatabon sa imo sang iya mga pakpak; indi ikaw maano sa idalom sang iya pagtatap; ang iya pagkatutom magaapin kag magatabang sa imo. (S)

Ang Dios nagasiling, “Luwason ko ang mga nagahigugma sa akon, kag apinan ko ang mga nakakilala sa akon. Kon magpanawag sila sa akon, ako magasabat sa ila, kon yara sila sa kalisod, ako magaupod sa ila. (S)

Aleluya:

2 Timoteo 1:10

Si JesusCristo nga aton Manlulowas nagdula sang gahom sang kamatayon, kag paagi sa Maayong Balita iya ginpahayag ang kabuhi nga wala sing katapusan.

Ang Pagbasa sang Santos nga Ebanghelyo suno kay:

San Mateo 9:18-26

   Sang si Jesus nagahambal sini sa ila, may isa ka pangulo nga Judio nga nagpalapit sa iya, nagluhod sa iya atubangan kag nagsiling, “Ang akon anak nga babayi bag-o gid lang mapatay, pero kadtoi kag tanduga kag mabuhi sia.”

   Gani si Jesus nagtindog kag nagsunod sa iya, kag nag-upod man ang iya mga gintuton-an.

   May isa ka babayi nga nagaantos tungod sang pagpanggwa sang dugo sa sulod sang dose ka tuig nga nagpalapit sa likod nayon ni Jesus kag gintandog ang sidsid sang iya kunop. Ang babayi nagsiling sa iya kaugalingon, “Kon matandog ko lang ang iya kunop magaayo ako.”

"Kon matandog ko lang ang iya kunop . . . " (9:21)

   Nagliso si Jesus kag nakita niya ang babayi kag nagsiling, “Anak magpakabakod ka! Ang imo pagtuo nag-ayo sa imo.” Sa gilayon nag-ayo sia.

   Dayon nagsulod si Jesus sa balay sang pangulo nga Judio. Sang makita niya ang mga musikero para sa lubong kag ang mga tawo nga nagaginahod, nagsiling sia, “Gwa kamo anay! Ang dalagita indi patay, kundi nagakatulog lang!” 

   Kag nagkadlaw sila sa pagyaguta sa iya. Sang nakagwa ang mga tawo, si Jesus nagsulod sa kuwarto sang dalagita kag gin-uyatan niya sia sa kamot, kag nagbangon sia. Ang balita nahanungod sini naglapnag sa sadto nga lugar.

Hulyo 7 | Hulyo 9