"Sin-o ang Labing Daku sa Ginharian sang Dios"

Liturhiya sang Pulong

(Martes, Pebrero 25, 2020)

Ika-7 nga Semana sang Tuig

 Ang Pagbasa gikan sa Sulat ni:

Santiago nga Apostol 4:1-10

   Sa diin bala nagahalin ang tanan nga pag-ilinaway kag pagbinaisay sa tunga ninyo? Nagahalin ini sa inyo mga handom sa pagpangalipay, nga nagainaway pirme sa sulod sang inyo mga lawas. Nagahandom kamo sang madamo nga mga butang, pero indi ninyo ini maangkon, gani handa kamo sa pagpatay. Nagakaibog kamo, kag indi ninyo ini matigayon, gani nagasinuay kag nagailinaway kamo. Indi ninyo maangkon ang inyo luyag, tungod kay wala ninyo ini ginapangayo sa Dios. Kag kon nagapangayo kamo, wala kamo ginahatagi, kay ang inyo mga tinutoyo malaut. Ginapangayo ninyo ini nga mga butang para sa inyo kaugalingon nga kalipayan. Mga tawo nga di-matutom! Wala bala kamo makahibalo nga kon kamo abyan sang kalibutan kaaway kamo sang Dios? Ang nagapakig-abyan sa kalibutan nagapakig-away sa Dios. Indi kamo maghunahona nga wala sing pulos ang kasulatan nga nagasiling, “Ang espiritu nga ginhatag sang Dios sa aton puno sing kaimon.” Pero ang grasya nga ginahatag sang Dios labi pa gid kadaku. Kay ang kasulatan nagasiling, “Ginasumpo sang Dios ang bugalon, pero ginahatagan niya sing grasya ang mapainuboson.”

   Gani magpasakop kamo sa Dios. Sumponga ninyo ang Yawa, kag magapalagyo sia sa inyo. Magpalapit kamo sa Dios, kag ang Dios magapalapit sa inyo. Mga makasasala, magpanghinaw kamo sang inyo mga kamot! Mga salimpapaw, tinloi ang inyo mga tagipusoon! Magpangasubo kamo, maghibi kag magpanalambiton. Bayluhi ang inyo pagkadlaw sing paghibi, kag ang inyo kalipay sing kasubo! Magpaubos kamo sa atubangan sang Ginoo, kag iya kamo bayawon.

Salmo sa Pagsabat:

Mga Salmo 55:7-8, 9-10, 10-11, 23

(S) Itugyan ang imo mga palaligban sa Ginoo, kag iya ikaw buligan.

Nagasiling ako, "Kon may mga pakpak lang ako kuntani pareho sang pating! Magalupad ako kag magpangita sing palahuwayan! Magalupad ako sa malayo nga duog kag magpuyo sa desierto. (S)

Magadalidali ako sa pagpangita sing palasilungan gikan sa mamadlos nga hangin kag bagyo.” Laglaga sila, O Ginoo, kag pasalaha ang ila panghambal. (S)

Tungod kay may kinagamo kag pag-ilinaway sa siyudad. Adlaw kag gab-i nagalagawlagaw sila sa ibabaw sang pader sa siyudad, puno ini sang kinagamo kag pinatyanay. (S)

Itugyan ang imo mga palaligban sa Ginoo, kag iya ikaw buligan; indi gid niya pagpabay-an nga malutos ang maayo nga tawo. (S)

Aleluya:

Galacia 6:14

   Ang akon lamang mapabugal amo ang Krus sang Ginoo; tungod sa Iya, ang kalibutan patay para sa akon kag ako patay man para sa kalibutan.

Ang Pagbasa sang Santos nga Ebanghelyo suno kay:

San Marcos 9:30-37

   Naghalin sila sa sadto nga lugar kag nagpadayon sa paglakat nga nagaagi sa Galilea. Indi luyag ni Jesus nga mahibaluan kon diin sia, kay nagapanudlo sia sa iya mga gintuton-an nga nagasiling, “Ang Anak sang Tawo igatugyan sa mga tawo nga magapatay sa iya, pero sa tapos ang tatlo ka adlaw, pagabanhawon sia.”

   Wala sila makahangop kon ano ang kahulogan sini, pero nahadlok sila sa pagpamangkot sa iya.

   Nag-abot sila sa Capernaum, kag sang nakasulod na si Jesus sa balay, nagpamangkot sia sa iya mga gintuton-an, “Ano bala ang ginbaisan ninyo sa dalanon?”

   Pero wala sila magsabat sa iya kay man ang ila ginbaisan amo kon sin-o sa ila ang labing daku. Naglingkod si Jesus kag gintawag niya ang dose ka mga apostoles kag nagsiling sa ila, “Kon sin-o ang luyag mangin-una sa tanan, dapat magpaulihi sa tanan kag manginsuloguon sang tanan.”

   Nagkuha sia sing isa ka bata kag ginpatindog sa atubangan nila. Ginkugos niya ini kag nagsiling sa ila, “Ang tawo nga nagabaton sang isa sining mga bata sa akon ngalan, nagabaton sa akon, kag ang nagabaton sa akon, wala lamang nagabaton sa akon, kundi nagabaton man sang nagpadala sa akon.”

Pebrero 24 | Pebrero 26