"Ginhigugma gid sang Dios ang Kalibutan sa Bagay nga Ginhatag Niya ang Iya Bugtong nga Anak"

Liturhiya sang Pulong

(Miyerkules, Abril 22, 2020)

Miyerkules sang Ikaduha nga Semana sang Pagkabanhaw

Ang Pagbasa gikan sa:

Binuhatan sang mga Apostoles 5:17-26

   Karon ang Pinakamataas nga Pari kag ang tanan niya nga mga kaupdanan nga mga katapo sang partido sang mga Saduceo nahisa gid sa mga apostoles. Gani gindakop nila ang mga apostoles kag ginpriso sila sa bilangguan sang banwa. Pero sa amo gid nga gab-i ginbuksan sang anghel sang Ginoo ang mga puwertahan sang bilangguan, kag ginpagwa sila. Dayon nagsiling ang anghel sa ila, “Lakat kamo kag magtindog sa templo, kag sugiri ang mga tawo nahanungod sining bag-o nga kabuhi.” Gintuman nila ang ginsiling sa ila sang anghel kag sang pagbutlak sang adlaw nagsulod sila sa templo kag nagsugod sa pagpanudlo. 

   Ang Pinakamataas nga Pari kag ang iya kaupdanan nagpatawag sang tanan nga mga katigulangan sang mga Judio agod magsapol ang bug-os nga Konsilyo. Dayon nagsugo sila nga kuhaon ang mga apostoles sa bilangguan kag ipaatubang sa ila. Pero sang pag-abot sang mga pangulo sang mga gwardya didto, wala na sa bilangguan ang mga apostoles. Gani nagbalik sila sa Konsilyo kag nagsugid, “Sang pagsampot namon sa bilangguan, nasapwan namon nga nakandaduhan pa ini kag ang tanan nga mga gwardya nagabantay sa mga puwertahan, pero sang pag-abri namon sang puwertahan wala kami sing may nakita nga tawo didto!” Sang pagkabati sini sang pangulo sang mga gwardya sang templo kag sang pangulo nga mga pari, natingala sila kon ano ang natabo sa mga apostoles. Dayon may isa ka tawo nga nag-abot kag nagsiling sa ila, “Pamati kamo anay, ang mga tawo nga ginbilanggo ninyo, didto na sa templo kag nagapanudlo sa mga tawo!” Gani nagkadto didto sa gilayon ang pangulo sang mga gwardya upod sa iya mga tinawo kag nagbalik sila nga dala ang mga apostoles. Wala nila gindala sa pakusog ang mga apostoles kay nahadlok sila basi batuhon sila sang mga tawo.

Salmo sa Pagsabat:

Mga Salmo 34:2-3, 4-5, 6-7, 8-9

(S) Ang mga makalulooy nagpanawag sa Ginoo, kag nagsabat sia sa ila. 

Dayawon ko sia tungod sang iya mga binuhatan; kabay nga ang mga ginapigos magpamati kag magkalipay! Isugid ta ang pagkadaku sang Ginoo; dayawon ta sing tingob ang iya ngalan. (S) 

Nagpangamuyo ako sa Ginoo kag ginsabat niya ako; ginkuha niya ang tanan ko nga mga kahadlok. Ang mga ginapigos nagasalig sa iya kag nagakalipay sila; indi gid sila mapaslawan. (S) 

Ang mga makalulooy nagpanawag sa iya, kag nagasabat sia sa ila; ginaluwas niya sila sa tanan nila nga kalalat-an. Ang anghel sang Ginoo nagabantay sa tanan nga nagapasidungog sa iya, kag iya sila ginaluwas sa katalagman. (S) 

Tilawi kag tan-awon ninyo kon daw ano kaayo ang Ginoo! Malipayon ang tawo nga nagadangop sa iya! Pasidunggi ninyo ang Ginoo, tanan kamo nga iya mga tawo, kay ang mga nagatuman sa iya indi mawad-an sang tanan nila nga kinahanglanon. (S)

Aleluya:

Juan 3:16

   Ginhigugma gid sang Dios ang kalibutan sa bagay nga ginhatag Niya ang Iya bugtong nga Anak, agod nga ang tagsatagsa nga nagatuo sa Iya indi na mapatay, kundi may kabuhi nga wala sing katapusan.

Ang Pagbasa sang Santos nga Ebanghelyo suno kay:

San Juan 3:16-21

   Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang tagsatagsa nga nagatuo sa iya indi na mapatay, kundi may kabuhi nga wala sing katapusan. Kay ang Dios wala magpadala sang iya Anak sa kalibutan sa paghukom sang kalibutan, kundi sa pagluwas sang kalibutan. 

   Ang bisan sin-o nga nagatuo sa Anak indi pagkondenahon, pero ang bisan sin-o nga wala nagatuo nakondenar na, bangod kay wala sia magtuo sa bugtong nga Anak sang Dios. Amo ini ang kabangdanan sang pagkondenar: ang kapawa nagkari sa kalibutan, pero ang mga tawo naghigugma sang kadudolman sa baylo sang kapawa, kay malaut ang ila ginahimo. Kag ang bisan sin-o nga nagahimo sing malaut nagakontra sa kapawa kag indi magpalapit sa kapawa, kay indi sia luyag nga masapwan ang iya malain nga binuhatan. Pero ang bisan sin-o nga nagaginawi suno sa kamatuoran nagapalapit sa kapawa, agod mapahayag sang kapawa ang tanan nga iya ginhimo sa pagtuman sa Dios.

Abril 21 | Abril 23