Ang Tawo nga Nagahalad sang Iya Kabuhi tungod sa Akon Maluwas Niya Ini

Liturhiya sang Pulong

(Biyernes, Pebrero 21, 2020)

San Pedro Damian, Obispo kag Doktor

Ang Pagbasa gikan sa Sulat ni:

Santiago nga Apostol 2:14-24, 26

   Mga utod ko! Ano bala ang makuha sang tawo sa iya pagsiling, “May pagtuo ako,” kon ang iya mga binuhatan wala nagapamatuod sini? Makaluwas bala sa iya ina nga pagtuo? Abi may mga utod nga lalaki ukon babayi nga nagakinahanglan sing bayu kag ginakulang sa ila pagkaon, ano bala ang pulos kon magsiling ka lang sa ila, “Kabay pa nga mag-ayo ang imo kahimtangan! Magpainit-init ka kag magkaon sing madamo,” kag wala mo man sila ginahatagi sang ila mga kinahanglanon? Amo man ini sa pagtuo: kon wala ini ginaupdi sing maayo nga mga buhat, ini nga pagtuo patay.

   Pero ayhan may magasiling, “Ikaw may pagtuo kag ako may mga binuhatan.” Sabton ko sia, “Ipakita sa akon kon paano nga makatuo ka nga wala sing mga binuhatan kag ipakita ko sa imo ang akon pagtuo paagi sa akon mga binuhatan.” Nagatuo ka nga may isa lamang ka Dios! Maayo gid! Ang mga yawa nagatuo man sina kag nagakurog sa kahadlok. Buangboang! Luyag ka bala nga ipakita ko sa imo nga ang pagtuo nga wala sing binuhatan wala sing pulos? Paano bala ginpakamatarong sang Dios ang aton amay nga si Abraham? Paagi sa iya mga binuhatan, sang paghalad niya sang iya anak nga si Isaac sa altar. Wala mo bala matalupangdi? Ang iya pagtuo kag ang iya mga binuhatan nagaupdanay sa ila pagpanghikot. Ang iya pagtuo nanginhimpit paagi sa iya mga binuhatan. Kag napamatud-an ang kasulatan nga nagasiling, “Si Abraham nagtuo sa Dios, kag tungod sini ginbaton sia sang Dios subong matarong nga tawo.” Gani si Abraham gintawag nga abyan sang Dios. Gani, inyo makita nga ang isa ka tawo ginapakamatarong sang Dios paagi sa iya mga ginahimo, kag indi lang tungod sang iya pagtuo.

   Gani, subong nga ang lawas nga wala sing espiritu patay, amo man ang pagtuo kon wala sing mga binuhatan.

Salmo sa Pagsabat:

Mga Salmo 112:1-2, 3-4, 5-6

(S) Bulahan ang tawo nga nagakalipay sa pagtuman sang mga sugo sang Ginoo.

Bulahan ang tawo nga nagatahod sa Ginoo, nga nagakalipay sa pagtuman sang iya mga sugo. Ang iya mga kabataan mangingamhanan sa duta; ang kaliwat sang maayo nga tawo pagabendisyunan. (S)

Ang iya panimalay magaayuhan kag magamanggaranon, kag magamainuswagon sia sa walay katapusan. Ang kapawa nagasilak sa kadudolman para sa maayo nga mga tawo, para sa mga maalwan, maluloy-on kag matarong. (S)

Bulahan ang tawo nga maalwan sa iya mga pagpahulam, nga wala nagadaya sa iya negosyo. Ang maayo nga tawo indi gid mapaslawan, indi gid sia malimtan. (S)

Aleluya:

Juan 15:15

   Ginatawag ko kamo nga mga abyan, siling sang Ginoo, kay ginsugid ko sa inyo ang tanan ko nga nabatian gikan sa akon Amay.

Ang Pagbasa sang Santos nga Ebanghelyo suno kay:

San Marcos 8:34–9:1

   Dayon gintawag ni Jesus ang mga tawo kag ang iya mga gintuton-an sa pagpalapit. Nagsiling sia sa ila, “Kon sin-o ang luyag mag-upod sa akon, kinahanglan nga kalimtan niya ang iya kaugalingon, magpas-an sang iya krus kag magsunod sa akon. Kay ang tawo nga buot magluwas sang iya kaugalingon nga kabuhi madula niya ini, pero ang tawo nga nagahalad sang iya kabuhi tungod sa akon kag sa Maayong Balita maluwas niya ini. Ano bala ang makuha sang isa ka tawo kon maangkon niya ang bug-os nga kalibutan, pero madula niya ang iya kabuhi? Wala gid! Kay wala sing mahimo ang tawo sa pagpabalik sang iya kabuhi. Gani kon ginakahuya ako kag ang akon mga pagtulon-an sang isa ka tawo sa sining di-diosnon kag malaut nga panahon, igakahuya man sia sang Anak sang Tawo kon mag-abot sia sa himaya sang iya Amay upod sang iya balaan nga mga anghel.”

   Kag nagpadayon sia sa pagsiling, “Dumdoma ninyo ini! May mga yari diri nga indi mapatay tubtob nga makita nila ang pagkari sang Ginharian sang Dios nga may gahom.”

Pebrero 20 | Pebrero 22