Liturhiya sang Pulong
(Martes, Nobyembre 19, 2019)
Ang Pagbasa gikan sa Ikaduha nga Libro sang mga:
Macabeo 6:18-31
Sadto anay may nagapanguna nga manunodlo sang kasugoan, nga si Eleazar, isa ka tigulang kag dungganon sing pamatasan. Ginpilit nila sia nga buksan ang iya baba agod pakaunon sang unod sang baboy. Pero ginpasulabi niya nga mapatay nga dungganon sang sa magkabuhi nga ginakangil-aran, gani ginluad niya ang unod sang baboy kag kinabubot-on nga nagkadto sa lugar sa diin siya pagasilutan. Amo ini ang katungdanan sang isa ka tawo nga may kaisog sa pagsikway sang ginadumilian nga pagkaon, bisan pa nga ginapakamahal niya ang iya kabuhi. Tungod kay mag-abyan sila halin sang una, ining mga opisyales nga tinugyanan sining malaut nga bangkite, nagtawag sa iya sa sekrito kag nagsiling nga magdala sia sang pagkaon nga ginatugot sa pagkaon nga sia ang naghanda, kag magpakunokuno lang nga nagakaon sang pagkaon nga ginmando sang hari. Sa sini nga paagi, malikawan niya ang kamatayon kag mapuslan niya ang kaalwan nga bunga sang ila dugay na nga pag-abyanay.
Pero si Eleazar nagpamat-od nga takos sang iya panuigon sa dignidad sang iya katigulangon, takus sa talahuron nga uban sang iya buhok, takos man sia sang iya wala madagtaan nga pagkabuhi halin sang lamharon pa sia kag labi sa tanan bangod sang balaan nga kasugoan nga ginhatag mismo sang Dios, ginbuyagyag niya sa publiko ang iya pamat-od, kag ginsingganan pa niya sila nga ipapatay na lang sia. Nagpaathag sia. “Sa sining panuigon indi angay nga magpakunokuno pa kita. Madamo nga mga lamharon ang magsiling nga si Eleazar nga nagapanuigon na sing nobenta (90) ka tuig nagsaylo sa iban nga pagtuluohan. Kon magpakunokuno ako agod maluwas ang akon kabuhi sa malip-ot nga tion, mapatalang ko sila kag mahuy-an kag madagtaan ang akon katigulangon. Ayhan, sa malip-ot nga panahon, akon malikawan ang silot sang tawo, pero buhi ukon patay, indi gid ako makaluwas sa kamot sang Makagagahom nga Dios. Gani kon maisog ako nga ihalad ang akon kabuhi mangintakos pa ako sa akon katigulangon, kag mahatagan ko pa ang mga pamatan-on sing dungganon nga sulondan sing kinabubot-on kag mainalwanon nga pagkamatay tungod sang talahuron kag balaan nga kasugoan."
Sang makasiling siya sini, nagkadto sia gilayon sa lugar sa diin sia pagasilutan. Ang mga tawo nga nag-ubay sa iya kag mainabyanon sa iya sang bag-o pa lamang, karon nanginmabangis batok sa iya kay ang iya ginsiling isa ka kabuangan para sa ila. Sang daw mapatay na sia tungod sang hanot, nag-ugayong sia kag nagsiling, "Ang Ginoo, sa iya balaan nga kaalam nakahibalo gid nga nakaluwas ako kuntani sa kamatayon, kag bisan daw ano ka sakit ang ginabatyag sang akon lawas sa sining paghanot, sa akon kalag akon ginaantos sing malipayon tungod sang akon pagtahod sa iya.”
Amo ini ang iya pagkapatay. Sa iya kamatayon nagbilin sia sang isa ka sulondan sang kaisog kag indi malimtan nga handumanan indi lamang para sa mga pamatan-on kundi para man sa bug-os nga pungsod.
Salmo sa Pagsabat:
Mga Salmo 3:2-3, 4-5, 6-7
(S) O Ginoo, tamda kami nga may kaluoy.
O Ginoo, madamo gid ang akon mga kaaway, madamo gid ang nagakontra sa akon! Ginalibak nila ako kag nagasiling, “Ang Dios indi magbulig sa iya!” (S)
Pero ikaw, O Ginoo, ang nagabantay sa akon sa katalagman; ginahatagan mo ako sang kadalag-an kag ginapabalik mo ang akon kaisog. Nagapangayo ako sing bulig sa Ginoo, kag gikan sa iya balaan nga bukid ginasabat niya ako. (S)
Nagahigda ako kag nagatulog, kag nagamata ako nga wala maano, kay ginabantayan ako sang Ginoo. Wala ako mahadlok sa linibo nga mga kaaway nga nagalibot sa akon. (S)
Aleluya:
1 Juan 4:10
Ang Dios naghigugma sa aton kag nagpadala sa aton sang iya Anak agod nga paagi sa iya, mapatawad ang aton mga sala.
Ang Pagbasa sang Santos nga Ebanghelyo suno kay:
San Lucas 19:1-10
Si Jesus nagsulod sa banwa sang Jerico kag nag-agi man lang sia didto. May pangulo sang manugsokot sang buhis didto nga manggaranon nga ginahingalanan kay Zaqueo. Nagtinguha sia sa pagtan-aw kon sin-o ini si Jesus, ugaling indi sia makakita tungod sang madamo nga mga tawo kay putot sia. Gani nagdalagan sia una sa mga tawo kag nagsaka sa kahoy nga sikomoro, agod makakita sia kay Jesus nga magaagi sa sadto nga dalan. Sang pag-abot ni Jesus sa sadto nga duog nagtangla sia kag nagsiling, “Zaqueo, panaog ka sing dalidali, kay madayon ako sa imo balay karon nga adlaw.”
Nagpanaog si Zaqueo sing dalidali kag ginbaton niya si Jesus sa daku nga kalipay. Ang tanan nga mga tawo nga nakakita sini nagkulomuron, “Ini nga tawo nagdayon sa balay sang isa ka makasasala.”
Si Zaqueo nagtindog kag nagsiling sa Ginoo, “Karon, Sir, ihatag ko sa mga imol ang katunga sang akon pagkabutang kag kon may gindayaan ako, bayaran ko sia sing apat ka pilo.”
Si Jesus nagsiling sa iya, “Ang kaluwasan nag-abot sa sining panimalay karon nga adlaw, kay ini sia kaliwat man ni Abraham. Kay ang Anak sang Tawo nagkari sa pagpangita kag sa pagluwas sang nadula.”
No comments:
Post a Comment