"Nahibaluan ni Jesus kon ano ang ila Ginahunahona"

Liturhiya sang Pulong

(Lunes, Setyembre 30, 2019)

San Geronimo, Pari kag Doktor sang Simbahan

Ang Pagbasa gikan sa Libro ni:

Zacarias nga Propeta 8:1-8

   Ang Ginoo nga Makagagahom naghatag sini nga mensahi kay Zacarias: "Daku gid ang akon handom sa pagbulig sa Jerusalem tungod sang akon daku nga gugma para sa iya mga tawo, kag tungod sini nga gugma nagkaakig ako sa iya mga kaaway. Magabalik ako sa Jerusalem, ang akon balaan nga siyudad, kag magapuyo ako didto. Pagakilalahon ini nga isa ka siyudad nga masaligan, kag ang bukid sang GINOO nga Makagagahom pagatawgon nga balaan nga bukid. Sa liwat may mga tigulang naman didto nga lalaki kag babayi nga maluya na kag nagagamit na sing baston. Nagapungko sila sa mga kalsada kag mga plasa sang Jerusalem. Kag ang mga kalsada mapuno sing mga kabataan nga lalaki kag babayi nga nagahinampang didto.
   "Daw indi ini mahimo sa mga kapungsoran nga nabilin karon, pero nahimo ko ini. Luwason ko ang akon mga tawo halin sa mga kadutaan sa diin sila ginbihag kag dahon ko sila pabalik halin sa sidlangan kag nakatundan sa pagpuyo sa Jerusalem. Sila mangin-akon mga tawo, kag ako mangin-ila Dios nga nagagahom sa ila sing matutom kag matarong.

Salmo sa Pagsabat:

Mga Salmo 102:16-18, 19-21, 29 kag 22-23

(S) Kon ang Ginoo magpatindog liwat sang Sion, ipakita niya ang iya pagkagamhanan.

Ang mga pungsod magakahadlok sa Ginoo; ang tanan nga mga hari sang duta magakahadlok sa iya gahom. Kon ang Ginoo magpatindog liwat sang Sion, ipakita niya ang iya pagkagamhanan. Magapamati sia sa iya mga tawo nga ginpatumbayaan kag pagasabton niya ang ila pangamuyo. (S)

Isulat para sa palaabuton nga kaliwatan ang ginhimo sang Ginoo, agod ang mga tawo nga wala pa mabun-ag magadayaw sa iya. Ang Ginoo nagtamod halin sa iya balaan nga duog sa kahitaasan, nagtamod sia sa duta gikan sa langit, sa pagpamati sang mga ugayong sang mga binilanggo, kag sapaghilway sang mga ginpamatbatan sing kamatayon. (S)

Ang amon mga kabataan magakabuhi nga indi maano, kag ang ila mga kaliwat magakabuhi sa idalom sang imo pagbantay. Gani ang mga tawo magabantala sang ngalan sang Ginoo  sa Sion; magapasalamat sila sa iya sa Jerusalem, kon ang mga pungsod kag mga ginharian magtipon kag magsimba sa Ginoo. (S)

Aleluya:

Marcos 10:45

   Ang Anak sang Tawo wala magkari agod alagaron, kundi sa pag-alagad kag sa paghatag sang iya kabuhi sa pagtubos sang madamo nga mga tawo.

Ang Pagbasa sang Santos nga Ebanghelyo suno kay:

San Lucas 9:46-50

   Ang mga gintuton-an nagbinais kon sin-o sa ila ang labing daku. Nahibaluan ni Jesus kon ano ang ila ginahunahona, gani nagkuha sia sing isa ka bata nga diutay kag ginpatindog sia sa iya luyo kag nagsiling sa ila, “Ang nagabaton sining diutay nga bata sa akon ngalan nagabaton sa akon, kag ang nagabaton sa akon nagabaton man sang nagpadala sa akon. Kay ang labing kubos sa inyo amo ang labing daku.”

   Si Juan nagsiling, “Manunodlo, may nakita kami nga isa ka tawo nga nagatabog sang mga yawa sa imo ngalan, kag ginpauntat namon sia tungod kay indi sia katapo namon.”

   Si Jesus nagsiling sa iya kag sa iban nga mga gintuton-an, “Indi ninyo sia pagdumilii, kay ang indi batok sa inyo apin sa inyo.”

Setyembre 29 | Oktubre 1

Si Lazaro Gindala sa Luyo ni Abraham

Liturhiya sang Pulong

(Domingo, Setyembre 29, 2019)

San Gabriel, Michael kag Raphael, mga Arkangheles

1. Ang Pagbasa gikan sa Libro ni:

Amos nga Propeta 6:1, 4-7

   Manginkailo kamo nga nagapatawhay lang sang inyo pangabuhi sa Sion. Manginkailo kamo nga nagahigda sa malahalon nga mga katre, nga nagakalipay sa paghilayhilay sa inyo mga higdaan, kag nagapagusto sing kaon sang cordero kag sang tinday sang baka. Maluyag kamo magkumposo sing mga kalantahon, subong sang ginhimo ni David, kag magtukar sini sa mga arpa. Nagainom kamo sing bino sa mga yahong, kag nagahaplas sang inyo kaugalingon sang pinakamaayo nga mga lana, pero wala kamo nagakasubo sang kalaglagan sang Israel. Gani kamo ang nahauna nga pagabihagon. Ang inyo mga piesta kag mga bangkite magauntat.

Salmo sa Pagsabat:

Mga Salmo 146:7, 8-9, 9-10

(S) Dayawa ang Ginoo, O kalag ko!

Nagahukom sia pabor sa mga ginapigos, kag nagahatag sia sing kalan-on sa mga ginagutom.  (S) 
Kag nagaayo sang mga bulag. Ginabayaw niya ang mga ginapaubos, ginahigugma niya ang iya matarong nga mga tawo. Ginaapinan niya ang mga dumoluong nga nagapuyo sa duta. (S)
Ginabuligan niya ang mga balo nga babayi kag mga ilo, pero ginaguba niya ang mga plano sang mga malaut. Ang Ginoo magahari sa walay katubtoban! Ang imo Dios, O Sion, magagahom sa tanan nga panahon! (S)

2. Ang Pagbasa gikan sa Nahauna nga Sulat ni San Pablo nga Apostol, sa kay:

Timoteo 6:11-16

   Pero ikaw, tawo sang Dios, likawi ini nga mga butang. Himulati ang pagkamatarong, pagkadiosnon, pagtuo, paghigugma, pagbatas kag pagkalulo. Dalagan ka sing maayo sa palumba sang pagtuo kag dag-a ang kabuhi nga wala sing katapusan. Kay sa sini nga kabuhi gintawag ka sang Dios, sang pagpahayag mo sang imo pagtuo sa atubangan sang madamo nga mga saksi. Sa atubangan sang Dios nga nagahatag sing kabuhi sa tanan nga mga butang kag sa atubangan ni Cristo Jesus nga nagpanaksi sing maayo sa atubangan ni Poncio Pilato, ginamanduan ko ikaw: Tumana ang sugo kag amligi ang iya kaputli nga indi madagtaan tubtob sa Adlaw nga magapahayag ang aton Ginoong Jesu-Cristo. Igapahayag sia sang Dios sa nagakaigo nga panahon, ang bulahan kag ang isa lamang ka Makagagahom, ang Hari sang mga hari kag Ginoo sang mga ginoo. Sia lamang ang di-mamalatyon kag ang nagakabuhi sa kapawa nga wala sing bisan sin-o nga makasarang sa pagpalapit. Wala sing may nakakita sa iya kag wala gid sing bisan isa nga makakita sa iya. Sa iya ang kadungganan kag kagamhanan nga walay katapusan! Kabay pa.

Aleluya:

2 Corinto 8:9

   Kamo gid nakahibalo sang grasya sang aton Ginoong Jesu-Cristo, nga bisan manggaranon sia, nagpakaimol sia tungod sa inyo, agod nga paagi sa iya kaimulon manginmanggaranon kamo.

Ang Pagbasa sang Santos nga Ebanghelyo suno kay:

San Lucas 16:19-31

   “May isa anay ka manggaranon nga tawo nga nagabayu sing malahalon kag nagapatuyang sa iya pagkaon adlaw-adlaw. May isa man ka imol nga tawo nga ginhingalanan kay Lazaro nga puno sang katol. Ini sia pirme lang ginadala sa puwertahan sang balay sadtong manggaranon nga tawo kag nagahandom sia nga makakaon sang nagakadagdag nga mga pagkaon gikan sa lamisa sang manggaranon. Bisan pa ang mga ido nagapalapit kag nagadilap sang iya katol. Ang imol nga tawo napatay kag gindala sang mga anghel sa luyo gid ni Abraham. Ang manggaranon nga tawo napatay man kag ginlubong. Nag-antos sia didto sa Hades kag sang pagtangla niya nakita niya sa malayo si Abraham kag si Lazaro sa iya gid luyo. Gani nagpanawag sia, ‘Amay nga Abraham! Kaluoyi ako, kag ipadala si Lazaro sa pagtum-oy sang iya tudlo sa tubig kag pabugnawan ang akon dila, kay tama ang akon pag-antos sa sini nga kalayo.’ Pero si Abraham nagsabat, ‘Dumdoma, anak ko, nga sang nagakabuhi pa ikaw, imo ang tanan nga maayo nga mga butang, samtang ang kay Lazaro iya ang malain nga mga butang. Pero karon nagakalipay sia diri, samtang ikaw imo nagakasakit. Wala labot sina, sa gin-utlan naton may daku nga kadadalman, gani ang luyag magkadto dira halin diri indi makatabok, kag wala man sing may makatabok halin dira pakari diri.’ Ang manggaranon nga tawo nagsiling, ‘Amay, kon amo ina, nagapakiluoy ako sa imo nga ipadala mo si Lazaro sa balay sang akon amay, sa diin may lima pa ako ka mga utod nga lalaki. Pakadtoa sia didto sa pagpaandam sa ila agod nga sila indi man magkadto sa sining duog sang pag-antos.’ Si Abraham nagsabat, ‘Didto man si Moises kag ang mga propeta sa pagpaandam sa imo mga utod nga lalaki. Papamatia ang imo mga utod sa ginahambal nila.’ Ang manggaranon nga tawo nagsabat, ‘Amay nga Abraham, kulang pa ina. Kon may isa nga mabanhaw kag magkadto sa ila, ti, magabiya sila sa ila mga sala.’ Pero si Abraham nagsiling, ‘Kon indi sila magpamati kay Moises kag sa mga propeta, indi man ina sila magpamati bisan pa may isa nga mabanhaw.’ ”

Setyembre 28 | Setyembre 30

"Ang Tanan nga mga Tawo Natingala gid sa Daku nga Gahom sang Dios"

Liturhiya sang Pulong

(Sabado, Setyembre 28, 2019)

San Lorenzo Ruiz kag Iya mga Kaupdanan, Martires

Ang Pagbasa gikan sa Libro ni:

Zacarias nga Propeta 2:5-9, 14-15

   Sa isa na man ka palanan-awon nakita ko ang isa ka tawo nga may lubid nga inugtakos sa iya kamot. Nagpamangkot ako, "Diin ka makadto?"
   Nagsabat sia, "Takson ko ang Jerusalem agod mahibal-an ko kon daw ano ini kalaba kag kasangkad.
   Dayon nakita ko nga ang anghel nga nagpakighambal sa akon naglakat, kag ang isa pa gid ka anghel nagsugata sa iya. Ang nahauna nagsiling sa ikaduha, “Dalagan ka kag singgana inang pamatan-on nga Ialaki nga may lubid nga inugtakos nga magadamo ang mga tawo kag mga kabakahan sa Jerusalem nga indi na sila makaigo sa sulod sang pader. Ang Ginoo nagsaad nga sia mismo ang manginpader nga kalayo sa palibot sang siyudad sa pag-apin sini, kag magapuyo sia didto sa bug-os niya nga himaya.”

   Ang GINOO nagsiling, “Magkanta sa kalipay, mga tawo sang Jerusalem. Magapuyo ako upod sa inyo!" 

   Sa sadto nga tion madamo nga mga kapungsoran ang magadangop sa Ginoo kag mangin-iya mga tawo. Magapuyo sia upod sa inyo, kag makilala ninyo nga ginpadala niya ako sa inyo. 

Kalantahon sa Pagsabat:

Jeremias 31:10, 11-12, 13

(S) Ang Ginoo magabantay sa aton subong isa ka manugbantay sang iya panong.

Ang Ginoo nagasiling, “Mga kapungsoran magpamati kamo sa akon kag ibantala ang akon mga pulong sa malayo nga mga baybayon. Ginpaalaplaag ko ang akon mga tawo, pero pagatiponon ko sila, kag magabantay sa ila subong sang pagbantay sang isa ka manugbantay sa iya mga panong. (S)
Ginhilway ko ang mga tawo sang Israel, kag ginluwas sila gikan sa isa ka gamhanan nga pungsod. Magakari sila kag magaamba tungod sa kalipay sa Bukid sang Sion, kag malipay sila sang akon mga regalo, nga trigo, bino, kag lana sang olivo, nga karnero kag baka. Manginkaangay sila sang nabunyagan sing maayo nga hardin, kag indi na gid sila magkalisod liwat. (S)
Dayon ang mga dalaga magasaot kag magakinalipay, kag ang mga lalaki, pamatan-on kag tigulang, magahinugyaw. Lipayon ko sila kag bayluhan ko ang ila kalisod sa kalipay, ang ila kasubo sa kasadya. (S)

Aleluya:

2 Timoteo 1:10

   Ang aton Manlulowas nga si Cristo Jesus nagdaog sang kamatayon, kay nagsanag ang kabuhi  paagi sa Maayong Balita.

Ang Pagbasa sang Santos nga Ebanghelyo suno kay:

San Lucas 9:43-45

   Ang tanan nga mga tawo natingala gid sa daku nga gahom sang Dios. Samtang nagakatingala pa ang mga tawo sa mga butang nga ginhimo ni Jesus, nagsiling sia sa iya mga gintuton-an, “Indi kamo magkalipat sang akon isiling sa inyo. Ang Anak sang Tawo itugyan sa kamot sang mga tawo.” Pero wala sila makahibalo kon ano ang kahulogan sini. Ginlikom ini sa ila agod nga indi sila makahangop, kag nahadlok sila magpamangkot sa iya nahanungod sini.

Setyembre 27 | Setyembre 29

"Sin-o bala si Jesus suno sa imo?

Liturhiya sang Pulong

(Biyernes, Setyembre 27, 2019)

San Vicente de Paul, Pari

Ang Pagbasa gikan sa Libro ni:

Hageo nga Propeta 2:1-9

   Sa ika-21 nga adlaw sang ikapito nga bulan sang amo nga tuig, ang Ginoo naghambal paagi kay Hageo nga propeta. Ginsingganan niya si Hageo sa paghambal kay Zorobabel nga gobernador sang Juda, kay Josue nga Pinakamataas nga Pari, kag sa mga tawo. Amo ini ang isiling niya sa ila, "May yara bala sa inyo nga makadumdom pa kon daw ano ka mahimayaon sang Templo sang una? Ano bala ang pagtan-aw ninyo sini karon? Daw wala na gid ini sing pulos. Pero indi magpakaluya ang bisan sin-o sa inyo. Sugori ninyo ang pag-obra, kay ako kaupod ninyo. Sang paggwa ninyo sa Egipto, nagsaad ako nga indi ako magbiya sa inyo. Ako kaupod ninyo sa gihapon, gani indi kamo magkahadlok.
   "Sa indi madugay uyogon ko ang langit kag ang kalibutan, ang duta kag ang dagat. Uyogon ko ang tanan nga mga pungsod, kag ang ila mga manggad pagadalhon diri kag pun-on ang Templo sang manggad. Ang tanan nga pilak kag bulawan sang kalibutan akon. Ang bag-o nga templo magamahimayaon pa sang sa daan. Kag didto hatagan ko ang akon mga tawo sing kauswagan kag kalinong." Ang Ginoo nga Makagagahom naghambal sini.

Salmo sa Pagsabat:

Mga Salmo 43:1, 2, 3, 4

(S) Magalaom ako sa Dios, kag sa liwat dayon ko sia Manlulowas ko kag Dios ko.

O Dios, ipakilala man nga wala ako sing sala, kag apini ang akon kaso batok sa mga di-diosnon, luwasa ako sa butigon kag malaut nga mga tawo! (S)

Ikaw ang akon mangangapin, ngaa bala ginpatumbayaan mo ako? Ngaa bala nga magpadayon ako sa pag-antos sa kapintas sang akon mga kaaway? (S)

Ipadala ang imo kapawa kag kamatuoran, kabay nga magtuytoy ini sa akon kag dalhon ako pabalik sa Sion, ang imo balaan nga bukid, kag sa imo Templo, sa diin ikaw nagapuyo! (S)

Dayon magakadto ako sa imo altar, O Dios, kay ikaw nagahatag sa akon sang kalipay kag kasadya, magatukar ako sang akon arpa kag magaamba sing pagdayaw sa imo, O Dios nga akon Dios! (S)

Aleluya:

Marcos 10:45

   Ang Anak sang Tawo wala magkari agod alagaron, kundi sa pag-alagad kag sa paghatag sang iya kabuhi sa pagtubos sang madamo nga mga tawo.

Ang Pagbasa sang Santos nga Ebanghelyo suno kay:

San Lucas 9:18-22

   Sang isa ka adlaw sang nagapangamuyo si Jesus nga isahanon lang, ang iya mga gintuton-an nagpalapit sa iya. Si Jesus nagpamangkot sa ila, “Sin-o bala ako suno sa mga tawo?”

   Nagsabat sila, “May mga tawo nga nagasiling nga si Juan Bautista ikaw. Ang iban nagasiling nga si Elias ikaw, kag ang iban pa gid nagasiling nga isa ikaw sang mga propeta sang una nga nabanhaw.”

   Ginpamangkot niya sila, “Pero suno sa inyo, sin-o bala ako?” 
   Si Pedro nagsabat, “Ikaw ang Cristo sang Dios.”

   Dayon ginmanduan sila ni Jesus nga indi magpanugid sini sa bisan kay sin-o. Kag nagsiling pa gid sia, “Kinahanglan mag-antos gid ang Anak sang Tawo kag pagasikwayon sang mga katigulangan sang mga Judio, sang pangulo nga mga pari, kag sang mga manunodlo sang Kasugoan. Pagapatyon sia kag pagabanhawon sa ikatlo nga adlaw.”

Setyembre 26 | Setyembre 28

Naglibog ang Ulo ni Herodes

Liturhiya sang Pulong

(Huwebes, Setyembre 26, 2019)

San Cosme kag San Damian, Mga Martires

Ang Pagbasa gikan sa Libro ni:

Hageo nga Propeta 1:1-8

   Sa ikaduha nga tuig nga si Dario amo ang emperador sang Persia, sa nahauna nga adlaw sang ikan-om nga bulan, ang Ginoo naghambal paagi kay Hageo nga propeta. Ang mensahi para sa gobernador sang Juda nga si Zorobabel nga anak ni Sealtiel kag sa pinakamataas nga pari nga si Josue nga anak ni Josadac.
   Ang Ginoo nga Makagagahom nagsiling kay Hageo: “Ini nga mga tawo nagasiling nga indi pa ini ang tion sa pagpatindog liwat sang Templo.” Gani ang Ginoo naghatag sini nga mensahi sa mga tawo paagi kay Hageo nga propeta: “Mga tawo ko, ngaa bala magpuyo kamo sa matahom nga mga balay, samtang ang akon Templo nagapabilin nga guba? Tan-awa ang nagakahanabo sa inyo! Nagsab-og kamo sing madamo nga trigo, pero diutay ang inyo naani. May kalan-on kamo, pero hawuthawot. May bino kamo, pero kulangkolang. May bayu kamo, pero indi ini tuman nga makahapin sa inyo sa tugnaw. Kag ang mamumugon indi mabuhi sa iya suhol. Tan-awa ang nagakahanabo sa inyo! Karon magtaklad kamo sa mga bukid sa pagkuha sing kahoy. Patinduga ninyo liwat ang Templo, kag dayon malipay ako kag pagasimbahon suno sa nagakabagay.

Salmo sa Pagsabat:

Mga Salmo 149:1-2, 3-4, 5-6 kag 9

(S) Ang Ginoo nagakalipay sa iya mga tawo.

Magkanta sing bag-o nga ambahanon sa Ginoo, dayawa ninyo sia sa pagtilipon sang iya matutom nga mga tawo! Magkasadya ka, O Israel, tungod sang imo manunoga; maghinugyaw kamo, O mga pumoluyo sang Sion, tungod sang inyo hari! (S)

Dayawa ninyo nga may pagsinaut ang iya ngalan; magtukar kamo sing mga bumbo kag mga arpa sa pagdayaw sa iya. Ang Ginoo nagakalipay sa iya mga tawo; ginapadunggan niya ang mga mapainuboson sing pagdaog. (S)

Maghinugyaw ang mga tawo sang Dios sa ila pagdaog, kag mag-amba sing masinadyahon sa ila mga piesta. Magsinggit sila sing mabaskog sa ila pagdayaw sa Dios. Amo ini ang pagdaog sang mga tawo sang Dios! (S)

Aleluya:

Juan 14:6

   Ako amo ang dalan, ang kamatuoran, kag ang kabuhi, siling sang Ginoo; wala sing may makakadto sa Amay kon indi paagi sa akon.

Ang Pagbasa sang Santos nga Ebanghelyo suno kay:

San Lucas 9:7-9

   Si Herodes nga pangulo sang Galilea nakabati sang tanan nga nagkalatabo. Naglibog gid ang ulo niya kay may mga tawo nga nagsiling, “Nabanhaw si Juan Bautista.” Ang iban nagsiling nga si Elias nagpakita, kag ang iban pa gid nagsiling nga ang isa sang mga propeta sang una nabanhaw. Nagsiling si Herodes, “Ginpapugotan ko sing ulo si Juan, pero sin-o ining tawo nga madamo ang akon nabatian nahanungod sa iya?” Kag nagtinguha sia sa pagpakigkita sa kay Jesus.

Setyembre 25 | Setyembre 27

"Ginhatagan sila ni Jesus sang Awtoridad sa Pagtabog sang Tanan nga mga Yawa kag sang mga Balatian"

Liturhiya sang Pulong

(Miyerkules, Setyembre 25, 2019)

Ang Pagbasa gikan sa Libro ni:

Esdras 9:5-9

   Sang tion na sang paghalad sa kahapunanon, nagtindog ako sa duog diin ako nagpangasubo, nga nagabayu pa gihapon sang bayu nga kinusnit, kag nagluhod ako sa pagpangamuyo nga nagabayaw sang akon mga kamot sa Ginoo nga akon Dios. Nagsiling ako, "O Dios, nahuya gid ako sa pagbayaw sang akon ulo sa imo atubangan. Ang amon sala nagtumpok nga mataas pa sa amon; naglambot ini subong kataas sang langit. Gikan sa mga inadlaw sang amon mga katigulangan tubtob karon, kami nga imo mga tawo nagpakasala sa imo sing daku. Tungod sang amon mga sala, kami, ang amon mga hari, kag ang amon mga pari gintugyan sa kamot sang dumoluong nga mga hari, ginpamatay kami, gin-ati, ginbihag kag ginpakahuy-an, subong sini ang amon kahimtangan tubtob karon nga adlaw. Karon sa malip-ot nga tion, O Ginoo nga amon Dios, nagmaluloy-on ka sa amon kag gintugotan mo ang iban sa pagpalagyo kag sa pagkabuhi sing malinong sa sini nga balaan nga duog. Ginpalagyo mo kami gikan sa pagpaulipon kag ginhatagan mo kami sing bag-o nga kabuhi. Mga ulipon kami, pero wala mo kami pagpatumbayai sa amon pagkaulipon. Ginhimo mo ang mga emperador sang Persia nga magkaluoy kag magtugot sa amon sa pagpadayon sa pagkabuhi kag sa pagpatindog liwat sang Templo nga nagguba, kag sa pagpuyo diri sing malinong sa Juda kag sa Jerusalem.

Kalantahon sa Pagsabat:

Tobit 13:2, 3-4, 5, 8

(S) Dayawon ang walay katapusan nga Dios.

"Iya kita ginsilotan, dason iya kita ginbanhaw "Gindala niya kita sa kalibutan sang mga patay, dason iya kita ginbanhaw. "Wala sing sin-o nga makaluwas sa iya gahom. (S)
"Mga tawo sing Israel, magpasalamat kamo sa tunga sang mga kapungsoran, sa diin ginpadala niya kamo subong mga bihag; kay bisan didto ginpakita niya ang iya daku nga gahom. Buhata nga ang tanan nga mga buhi makabati sang inyo pagdayaw. "Ang Ginoo amo ang aton Dios kag amay nga walay katapusan. (S)
Bisan pa nga iya kamo ginsilutan tungod sang inyo pagkamalaut manginmaloloy-on sia, kag gikan sa duta sang kabihagan sa diin ginlalapta niya kamo, iya kamo pagadalhon pabalik sa duta nga inyo matawohan. (S)
"Pasugira ang tanan nga mga tawo sang iya pagkagamhanan kag mag-amba sa pagdayaw sa iya sa Jerusalem. (S)

Aleluya:

Marcos 1:15

   Nag-abot na ang nagakaigo nga tion, kag ang Ginharian sang Dios malapit na. Bayai ninyo ang inyo mga sala, kag magpati sa Maayong Balita.”

Ang Pagbasa sang Santos nga Ebanghelyo suno kay:

San Lucas 9:1-6

   Gintawag ni Jesus sing tingob ang iya dose ka mga apostoles kag ginhatagan sila sing gahom kag awtoridad sa pagtabog sang tanan nga mga yawa kag sa pag-ayo sang mga balatian. Dason iya sila ginpadala sa pagwali sang Ginharian sang Dios kag sa pag-ayo sang mga masakiton. Nagsiling sia sa ila, “Indi kamo magdala sing bisan ano sa inyo pagpanglakaton: bisan sungkod, puyo, tinapay, kuwarta ukon isa ka ilislan nga bayu. Kon diin kamo nga balay ginabaton, dira lang kamo dayon tubtob maghalin kamo sa sina nga banwa. Kon ang mga tawo indi magbaton sa inyo, bayai ninyo ina nga banwa kag taktaka ang yab-ok sa inyo mga tiil subong pagpaandam sa ila.”

   Ang mga gintuton-an naglakat kag nagkadto sa tanan nga kabaryuhanan sa pagwali sang Maayong Balita kag sa pag-ayo sang mga tawo sa tanan nga duog.

Setyembre 24 | Setyembre 26

"Nagapamati sang Pulong sang Dios kag Nagatuman sini"

Liturhiya sang Pulong

(Martes, Setyembre 24, 2019)

Ang Pagbasa gikan sa Libro ni:

Esdras 6:7-8, 12, 14-20

   Dayon si Dario nga emperador nagpadala sining masunod nga sabat: "Sa kay Tatnai, nga gobernador sang Nakatundan nga Eufrates, kay Setar Boznai, kag sa inyo kapareho nga mga opisyales sa Nakatundan nga Eufrates.
   "Palayo kamo sa templo. Kag indi pagbalabagi ang pagpatindog sini. Pabay-i ang gobernador sang Juda kag ang mga pangulo sang mga Judio sa pagpatindog sang templo sang Dios sa diin ini nagatindog sang una. Nagamando ako sa inyo sa pagbulig sa ila sa pagpatindog sini liwat. Ang ila kagastuhanan pagabayaran gilayon gikan sa kuwarta sang hari, nga ginkuha gikan sa mga buhis sa Nakatundan nga Eufrates, agod nga ang pagpaobra indi mauntat. Ako, si Dario, nagmando sini. Ang akon mando kinahanglan tumanon sing bug-os."
   Ang mga pangulo nga mga Judio nagpadayon sa pagpatindog sang Templo tungod sa pagpaisog sang mga propeta nga si Hageo kag si Zacarias. Ginhuman nila ang Templo suno sa mando sang Dios sang Israel paagi kay Ciro, Dario, kag kay Artajerjes, mga emperador sang Persia. Natapos nila ang Templo sa ikatlo nga adlaw sang bulan sang Adar, sa ikaanom nga tuig sang paggahom ni Dario nga emperador.
   Dayon ang mga tawo sang Israel—ang mga pari, ang mga Levita, kag ang tanan nga nagbalik halin sa kabihagan—naghalad sang Templo sing malipayon. Para sa paghalad sing Templo nagdulot sila sing 100 ka toro nga mga baka, 200 ka mga karnero, kag 400 ka mga kordero subong mga halad, kag 12 ka mga kanding subong dulot tungod sa sala, isa para sa tagsa ka tribo sang Israel. Ila ginpahamtang ang mga pari kag mga Levita sa ila pag-alagdan sa Templo sa Jerusalem, suno sa mga sugo nga yara sa libro ni Moises.
   Ang mga tawo nga nagbalik halin sa kabihagan naghiwat sang Piesta sa Pascua sa ika-14 nga adlaw sang nahauna nga bulan sang madason nga tuig. Ang tanan nga mga pari kag Levita nagpaninlo sang ila kaugalingon kag nagtinlo sila. Ang mga Levita nag-ihaw sing mga sapat para sa mga halad sa Pascua para sa tanan nga mga tawo nga nagbalik, para sa mga pari, kag para sa ila kaugalingon.

Salmo sa Pagsabat:

Mga Salmo 122:1-2, 3-4, 4-5

(S) Makadto kita nga malipayon sa balay sang Ginoo.

Nagkasadya ako sang pagsiling nila sa akon, “Dali makadto kita sa balay sang Ginoo!” Kag karon yari na kita diri, nga nagatindog sa sulod sang mga puwerta sang Jerusalem. (S)

Ang Jerusalem isa ka siyudad nga ginpatindog liwat sa diin ang mga tawo naghiliusa sing tingob! Diri nagakadto ang mga tribo. (S)
Ang mga tribo sang Israel, sa pagpasalamat sa Ginoo, suno sa iya ginsugo sa ila. Diri napahamtang ang mga hukmanan, sa diin ang hari nagahukom sang iya mga tinawo. (S)

Aleluya:

Lucas 11:28

Bulahan pa gid ang mga nagapamati sang pulong sang Dios kag nagatuman sini!

Ang Pagbasa sang Santos nga Ebanghelyo suno kay:

San Lucas 8:19-21

   Ang iloy kag mga utod ni Jesus nagkadto sa iya, pero indi sila makapalapit sa iya tungod sang madamo nga mga tawo. May nagsiling sa iya, “Ang imo iloy kag mga utod yara sa gwa nga luyag magpakigkita sa imo.” Si Jesus nagsiling sa ila tanan, “Ang akon iloy kag mga utod amo sila nga nagapamati sang pulong sang Dios kag nagatuman sini.”

Setyembre 23 | Setyembre 25

"Kada Tinago Mabuyagyag"

Liturhiya sang Pulong

(Lunes, Setyembre 23, 2019)

San Padre Pio, Pari

Ang Pagbasa gikan Kamunoan sa Libro ni:

Esdras 1:1-6

   Sa nahauna nga tuig nga si Ciro amo ang emperador sang Persia, ginbuot sang GINOO nga maghimo sia sang isa ka mando kag isulat ini agod nga basahon sing mabaskog bisan diin sa iya ginharian. Nahimo ini sa pagtuman sang ginsiling sang GINOO paagi kay Jeremias nga propeta.
   "Amo ini ang mando ni Ciro nga emperador sang Persia. Ang GINOO, ang Dios sang Langit, naghimo sa akon nga pangulo sa bug-os nga kalibutan kag naghatag sa akon sing katungdanan sa pagpatindog sing templo para sa iya sa Jerusalem sa Juda. Kabay ang Dios manginkaupod ninyo tanan nga iya mga tawo. Magkadto kamo sa Jerusalem sa pagpatindog liwat sang Templo sang GINOO, ang Dios sang Israel, ang Dios nga ginasimba sa Jerusalem. Ang bisan sin-o sang iya mga tawo sa kabihagan nga nagakinahanglan sing bulig sa pagpauli, ang ila mga kaingod magahatag sa ila sining bulig. Maghatag sila sing pilak kag bulawan, mga pagkabutang kag mga kasapatan, kag subong man sang mga halad nga idulot sa Templo sang Dios sa Jerusalem."
   Dayon ang mga pangulo sang mga kabaranggayan sang mga tribo ni Juda kag ni Benjamin, ang mga pari kag mga Levita, kag ang tagsatagsa nga ang ila tagipusoon gintandog sang GINOO, naghanda sa paglakat kag pagpatindog liwat sang Templo sa Jerusalem. Ang tanan nila nga mga kaingod nagbulig sa ila paagi sa paghatag sing madamo nga mga butang: mga gamit nga pilak, bulawan, mga pagkabutang, mga kasapatan, mga butang nga malahalon, kag mga halad nga idulot sa Templo.

Salmo sa Pagsabat:

Mga Salmo 126:1-2, 2-3, 4-5, 6

(S)  Ang Ginoo naghimo sang dalagku nga mga butang para sa aton.

Sang ginpabalik kita sang Ginoo sa Sion, daw isa lang yadto ka dalamguhanon! Daw ano ang aton pagkinadlaw kag pagkinanta sa kalipay! (S)
Dayon ang iban nga mga pungsod nagsiling nahanungod sa aton,“Ang Ginoo naghimo sing dalagku nga mga butang sa ila!” Matuod gid naghimo sia sing dalagku nga mga butang sa aton, daw ano kita sadto ka malipayon! (S)

O Ginoo, dalha kami pabalik sa amon duta, subong nga ang imo ulan nagadala sang tubig pabalik sa mamala nga mga suba. Himoa man nga yadtong nagtanom Kabay pa nga ang nagsab-og nga nagahilibion, magtipon sang patubas nga may kasadya! (S)

Yadtong mga naghibi samtang nagagowa sila nga nagadala sing binhi magabalik nga nagakanta sa kalipay, nga nagadala sang ila patubas! (S)

Aleluya:

Mateo 5:16

   Pasigaha ninyo ang inyo kapawa sa mga tawo agod makita nila ang inyo maayo nga mga binuhatan, kag magadayaw sila sa inyo Amay nga yara sa langit.

Ang Pagbasa sang Santos nga Ebanghelyo suno kay:

San Lucas 8:16-18

   “Wala sing may nagasindi sing suga kag tabunan man lang niya ini, ukon ibutang niya ini sa idalom sang higdaan, kundi ginabutang niya ini sa tulongtongan, agod nga ang mga nagasulod makakita sang kapawa. Kay wala sing natago nga indi mapahayag, ukon tinago nga indi mahibaluan kag mabuyagyag.
   “Gani maghalong kamo sa inyo pagpamati. Kay ang may iya na hatagan pa, pero ang wala iya, bisan pa ang diutay nga ginahunahona niya nga iya pagakuhaon pa.”

Setyembre 22 | Setyembre 24

"Sin-o ang Makasalig sa Pagtugyan sa Inyo sang Matuod nga Manggad?"

Liturhiya sang Pulong

(Domingo, Setyembre 22, 2019)

1. Ang Pagbasa gikan sa Libro ni:

Amos nga Propeta 8:4-7

   Pamatii ninyo ini, kamo nga nagatapak sang mga nawad-an, kag buot magpapas sang mga imol sa duta. Nagasiling kamo sa inyo kaugalingon, “San-o pa matapos ang  balaan nga mga adlaw, agod makapadalawat kita sang aton trigo. San-o pa matapos ang Adlaw nga Inugpahuway, agod mapadalawat naton ang aton trigo? Dayon mapasobrahan naton ang bili, gamitan naton sing indi husto nga sulokban, kag liwaton naton ang kiluhan sa pagdaya sa mga nagabakal. Kag sa bili sang isa ka pares nga sandalyas baklon naton ang imol nga mangin-ulipon. Ipadalawat naton ang alupinpin sa mahal nga bili.”
   Ang Ginoo, ang Dios sang Israel nagsumpa, “Indi ko gid pagkalipatan ang ila malaut nga mga buhat.

Salmo sa Pagsabat:

Mga Salmo 113:1-2, 4-6, 7-8

(S) Dayawa ang Ginoo! Ginabayaw niya ang mga nawad-an gikan sa ila kapipit-an.

Dayawa ang Ginoo! Kamo nga mga alagad sang Ginoo, dayawa ninyo ang iya ngalan! Ang iya ngalan pagadayawon, karon kag sa walay katapusan! (S)

Ang Ginoo nagagahom sa tanan nga mga kapungsoran, ang iya himaya yara sa ibabaw sang kalangitan. Wala gid sing isa nga kaangay sa Ginoo nga aton Dios, nagapuyo sia sa kahitaasan, pero nagaduko sia sa pagtan-aw sang kalangitan kag sang duta.

Ginabatak niya ang imol gikan sa yab-ok; ginabayaw niya ang nawad-an gikan sa ila kapipit-an, kag ginahatagan sila sing duog upod sa mga prinsipe, ang mga prinsipe sang iya mga tawo. (S)

2. Ang Pagbasa gikan sa Nahauna nga Sulat ni San Pablo nga Apostol, kay:

Timoteo 2:1-8

   Karon, una sa tanan, nagalaygay gid ako nga ang mga pag-ampo kag mga pagpangamuyo, ang mga pagpangabay kag mga pagpasalamat ihalad sa Dios para sa tanan nga mga tawo; para sa mga hari kag sa tanan nga yara sa awtoridad, agod nga magkabuhi kita sing matawhay kag mahidaiton sa bug-os nga pagkadiosnon kag sa nagakaigo nga pagginawi. Maayo ini kag nahamut-an sang Dios nga aton Manlulowas, nga luyag nga ang tanan nga mga tawo maluwas kag makadangat sa paghibalo sang kamatuoran. Kay may isa lamang ka Dios kag may isa lamang nga nagapahiusa sang Dios kag sang mga tawo, ang tawo nga si Cristo Jesus, nga nagtugyan sang iya kaugalingon sa pagtubos sang tanan nga mga tawo. Amo yadto ang pagpamatuod, sa nagakaigo nga panahon, nga luyag sang Dios nga ang tanan nga mga tawo maluwas. Tungod sini, ginpadala ako subong isa ka apostol kag manunodlo sang mga Gentil, sa pagbantala sang pagtuo kag kamatuoran. Wala ako nagabutig, kundi nagasugid ako sing matuod!
   Luyag ko nga ang tanan nga mga lalaki sa bisan diin nga duog magpangamuyo nga nagabayaw sang ila mga kamot sa matinlo nga tagipusoon nga wala sing kaakig kag pagsinuay.

Aleluya:

2 Corinto 8:9

   Kay kamo gid nakahibalo sang grasya sang aton Ginoong Jesu-Cristo, nga bisan manggaranon sia, nagpakaimol sia tungod sa inyo, agod nga paagi sa iya kaimulon manginmanggaranon kamo.

Ang Pagbasa sang Santos nga Ebanghelyo suno kay:

San Lucas 16:1-13

   Si Jesus nagsiling sa iya mga gintuton-an, “May isa ka manggaranon nga tawo nga may enkargado. Ini nga enkargado ginsumbong sa iya nga nagausik lang sang pagkabutang sang iya amo. Ginpatawag niya ang iya enkargado kag ginpamangkot, ‘Ano ining nabatian ko nahanungod sa imo? Hatagi ako sing husay sang akon pagkabutang nga gintugyan ko sa imo, kay pahalinon ko ikaw.’ Ang enkargado nagsiling sa iya kaugalingon, ‘Ano bala ang himuon ko, kay pahalinon ako sang akon amo? Wala ako sing kusog sa pagkutkot, kag nahuya ako magpakilimos. A, nahibaluan ko na kon ano ang akon himuon, agod nga kon wala na ako sing obra may mga abyan ako nga magabaton sa akon sa ila mga puloy-an.’ Gani ginpatawag niya ang tanan nga mga tawo nga nakautang sa iya amo. Sa nahauna nagpamangkot sia, ‘Pila ang utang mo sa akon amo?’ Nagsabat ang tawo, ‘Isa ka gatos ka barel nga lana sang olibo.’ Ang enkargado nagsiling sa iya, ‘Yari ang imo listahan. Pungko ka kag isulat nga 50 lang.’ Sa isa na man nagpamangkot sia, ‘Kag ikaw, pila ang utang mo?’ Nagsabat sia, ‘Isa ka libo ka sako nga trigo.’ Nagsiling sa iya ang enkargado, ‘Yari ang imo listahan. Isulat nga 800 lang.’ Ang amo sining di-matarong nga enkargado nagdayaw sa iya bangod sang iya pagkaabtik, kay ang mga tawo sining kalibutan maabtik pa sang sa mga tawo nga yara sa kapawa sa pagpatikang sang ila mga bulohaton.”

   Si Jesus nagpadayon sa pagsiling, “Gani nagasiling ako sa inyo, gamita ninyo ang dutan-on nga manggad sa pagpangamigo, agod nga kon ining manggad maurot na pagabatunon kamo sa puloy-an nga wala sing katapusan. 
   Ang matutom sa diutay nga mga butang magamatutom man sa dalagku nga mga butang, kag ang indi masaligan sa diutay nga mga butang indi man masaligan sa dalagku nga mga butang. Gani, kon indi kamo masaligan sa pagpatikang sang manggad nga dutan-on, sin-o ang makasalig sa pagtugyan sa inyo sang matuod nga manggad? Kag kon indi kamo masaligan sang mga pagkabutang nga iya sang iban, sin-o bala ang magahatag sa inyo sang pagkabutang nga para sa inyo?

   “Wala sing suloguon nga makaalagad sa duha ka agalon, kay pakalainon niya ang isa kag higugmaon ang isa, ukon pasulabihon niya ang isa kag tamayon ang isa. Indi kamo makaalagad sa Dios kag sa manggad!”

Setyembre 21 | Setyembre 23

"Indi Halad nga mga Sapat ang Akon Ginapangita, kundi ang Pagkamaluloy-on"

Liturhiya sang Pulong

(Sabado, Setyembre 21, 2019)

San Mateo, Apostol kag Ebanghelista

Ang Pagbasa gikan sa Sulat ni San Pablo nga Apostol, sa mga:

Taga-Efeso 4:1-7, 13

   Karon, ako nga binilanggo tungod sang akon pag-alagad sa Ginoo, nagapakiluoy sa inyo: magkabuhi kamo suno sa talaksan nga ginhatag sang Dios, sang pagtawag niya sa inyo. Magmapainuboson kamo, magmalulo, kag magmapinasensyahon sa gihapon. Ipakita ang inyo gugma paagi sa inyo pagbinuligay. Tinguhai gid ninyo ang pagtipig sang paghiliusa nga ginahatag sa inyo sang Espiritu, paagi sa paghidait nga amo ang nagahiusa sa inyo. May isa ka lawas kag isa ka Espiritu, subong nga may isa ka paglaom nga tungod sini gintawag kamo sang Dios. May isa ka Ginoo, isa ka pagtuo, isa ka bautiso, may isa ka Dios kag Amay sang tanan nga mga tawo, nga amo ang Ginoo sang tanan, nga nagapanghikot sa tanan, kag yara sa tanan.
   Ang tagsatagsa sa aton ginhatagan sing pinasahi nga bugay, suno sa talaksan nga ginhatag ni Cristo. Sia amo ang “naghatag sang mga bugay sa mga tawo,” ginpili niya ang iban nga mangin-apostoles, ang iban nga manginpropeta, ang iban nga manginmanugwali sang Maayong Balita, ang iban nga manginpastor kag manginmanunodlo. Ginhimo niya ini sa pag-aman sang tanan nga mga tumoluo para sa bulohaton sang pag-alagad sa Dios, sa pagpalig-on sang lawas ni Cristo. Kag madangat naton ang pag-isa sang aton pagtuo kag sang aton pagkilala sa Anak sang Dios, kag manginhamtong kita nga mga tawo nga nakalambot sang talaksan sang bug-os nga kataason ni Cristo.

Salmo sa Pagsabat:

Mga Salmo 19:2-3, 4-5

(S) Ang ila tingog nagatugob sa bug-os nga kalibutan.

Ang himaya sang Dios ginapahayag sing maathag sang kalangitan! Ang langit nagapakita sang iya mga binuhatan! Ang tagsa ka adlaw nagasugid sini sa madason nga adlaw, ang tagsa ka gab-i nagasulit sini sa madason nga gab-i. (S)

Wala sing pulong ukon mga tinaga nga ginagamit, wala sing gahod nga mabatian, pero ang ila tingog nagatugob sa bug-os nga kalibutan, ang ila mga pulong nagalambot sa mga ukbong sang duta. (S)

Aleluya:

   Nagadayaw kami sa imo nga Dios, nagabantala kami sa imo nga Ginoo; ang imo ginpili nga mangin martir nagadayaw sa imo, O Ginoo.

Ang Pagbasa sang Santos nga Ebanghelyo suno kay:

San Mateo 9:9-13

   Naghalin si Jesus sa sadto nga duog, kag sang nagalakat sia nakita niya ang isa ka manugsokot sang buhis nga ginahingalanan kay Mateo nga nagapungko sa iya opisina. Si Jesus nagsiling sa iya, “Sunod ka sa akon.” 
   Nagtindog si Mateo kag nagsunod sa iya.

   Sang nagakaon si Jesus didto sa balay ni Mateo, madamo nga mga manugsokot sang buhis kag mga makasasala ang nag-upod sa iya kag sa iya mga gintuton-an sa pagkaon. May mga Fariseo nga nakakita sini kag nagpamangkot sila sa iya mga gintuton-an, “Ngaa bala ang inyo manunodlo nagakaon upod sa mga manugsokot sang buhis kag sa mga makasasala?”

   Si Jesus nakabati kag nagsabat sa ila, “Ang mga tawo nga wala sing balatian wala nagakinahanglan sing manugbolong, kundi ang mga masakiton lang. Lakat kamo kag usisaa ninyo kon ano ang kahulogan sini nga kasulatan: ‘Indi halad nga mga sapat ang akon ginapangita, kundi ang pagkamaluloy-on.’ Kay wala ako magkari sa pagtawag sang mga nagapakamatarong sang ila kaugalingon kundi sang mga makasasala.”

Setyembre 20 | Setyembre 22

"Ang mga Kababayin-an Nag-amuma kay Jesus"

Liturhiya sang Pulong

(Biyernes, Setyembre 20, 2019)

San Andres Kim Taegon, Pari kag Martir
San Pablo Chang Hasang kag mga Kaupdanan, Martires

Ang Pagbasa gikan sa Nahauna nga Sulat ni San Pablo nga Apostol, kay:

Timoteo 6:2-12

   Itudlo kag iwali mo ini nga mga pagtulon-an. Ang nagapanudlo sang iban nga pagtulon-an kag wala nagahisugot sa matuod nga mga pulong sang aton Ginoong Jesu-Cristo kag sa pagtulon-an sang aton pagtuloohan, nagahabok sa pagpabugal kag wala sing may nahibaluan. Ang iya naluyagan amo ang pagsinuay kag pagbanggianay nahanungod sa mga pulong, kag ini nagadala sing kahisa, pagbinahinbahin, pagpasipala, malaut nga mga pagpangduhadoha, kag dayon nga pagsinuay sa mga tawo nga wala sa ila husto nga painuino kag nawad-an sang kamatuoran. Naghunahona sila nga ang relihiyon isa ka paagi nga makapamanggad sa ila.
   Matuod man, ang relihiyon nagahimo sang tawo nga manggaranon kaayo, kon kuntento sia sang iya pagkabutang. Ano bala ang aton gindala sa kalibutan? Wala! Ano bala ang aton madala halin sa kalibutan? Wala! Gani, kon may kalan-on kita kag bayu, tuman na ina para sa aton. Pero ang luyag magmanggaranon nagakahulog sa mga pagsulay kag ginasiod sang binuang kag makahalalit nga mga handom nga nagadala sa ila sa kamusmosan kag kalaglagan. Kay ang paghigugma sa pilak amo ang ginahalinan sang tanan nga sahi sang kalautan. May iban nga mga tawo nga naghandom gid sini, gani nagtalang sila sa pagtuo kag napuno ang ila mga tagipusoon sang mga kalisod. Pero ikaw, tawo sang Dios, likawi ini nga mga butang. Himulati ang pagkamatarong, pagkadiosnon, pagtuo, paghigugma, pagbatas kag pagkalulo. Dalagan ka sing maayo sa palumba sang pagtuo kag dag-a ang kabuhi nga wala sing katapusan. Kay sa sini nga kabuhi gintawag ka sang Dios, sang pagpahayag mo sang imo pagtuo sa atubangan sang madamo nga mga saksi.

Salmo sa Pagsabat:

Mga Salmo 49:6-7, 8-10, 17-18, 19-20

(S) Bulahan ang mga nagakilala sang kinahanglanon sang ila mga kalag, kay ila ang Ginharian sang langit.

Wala ako mahadlok sa tion sang katalagman, kon ginalibutan ako sang malaut nga mga kaaway, sang mga tawo nga nagasalig sa ila mga manggad, nga nagapabugal sang ila madamo nga mga pagkabutang. (S)

Ang tawo indi gid makatubos sang iya kaugalingon; indi sia makasarang sa pagbayad sa Dios sang bili sang iya kabuhi, tungod kay tama ka mahal ang kabuhi sang isa ka tawo. Ang iya sarang mabayad indi tuman sa pagpalikaw sa iya sa lulobngan, agod magkabuhi sia sing walay katapusan. (S)

Indi ka magkahadlok kon magmanggaranon ang isa ka tawo, kon ang iya manggad magdugang pa gid; kay indi niya madala ini kon mapatay sia; ang iya manggad indi niya mabalon sa lulobngan. (S)

Bisan pa kon sa sini nga kabuhi nakapaayaw ang isa ka tawo, kag ginadayaw sia tungod sang iya kauswagan, sa iya pagkapatay magaupod sia sa tanan niya nga mga katigulangan, sa diin wala sing katapusan ang kadudolman. Ang pagkahalangdon sang tawo indi makaluwas sa iya sa kamatayon, mapatay sia subong sang mga sapat. (S)

Aleluya:

Mateo 11:25

   Bulahan ikaw, O Amay, Ginoo sang langit kag duta kay ginpahayag mo sa mga di-maalam ang mga misteryo sang Ginharian.

Ang Pagbasa sang Santos nga Ebanghelyo suno kay:

San Lucas 8:1-3

   Sa tapos sadto si Jesus nagkadto sa mga banwa kag mga baryo sa pagwali sang Maayong Balita sang Ginharian sang Dios. Nag-upod sa iya ang dose ka mga apostoles kag subong man ang pila ka mga babayi nga gin-ayo niya sa mga balatian kag malaut nga espiritu. Ang mga babayi amo sanday Maria nga ginatawag Magdalena nga gikan sa iya gintabog ni Jesus ang pito ka yawa; si Juana, ang asawa ni Chuza nga isa ka opisyal sa korte ni Herodes; si Susana, kag iban pa nga madamo nga mga kababayin-an nga suno sa ila masarangan nag-amuma kay Jesus kag sa iya mga gintuton-an.

Setyembre 19 | Setyembre 21