Ang Nahauna nga Libro sang MGA CRONICA

Panguna
   Ang kalabanan sang Nahauna kag lkaduha nga Cronica nagasulit sang mga hitabo sa mga libro sang Samuel kag Mga Hari, bisan nga sa lain na man nga pagsulat sini nga mga hitabo. Ang duha ka mga tinutuyo amo ang palasandigan sang pagsulat sang maragtas sang Israelinhon nga ginharian sa mga libro sang Mga Cronica:
   1) Sa pagpakita nga bisan may mga kalalat-an nga nag-abot sa ginharian sang Juda kag Israel, ang Dios nagatuman gihapon sang iya mga saad sa pungsod kag nagatuman sang iya plano para sa iya mga tawo paagi sa ila nga nagakabuhi sa Juda. Subong nga sadsaran sini nga kasigurohan, ang manunolat nagapasandig sang iya pagsalig sa dalagku nga mga binuhatan ni David kag ni Salomon, sa matarong nga mga ginhimo ni Josafat, Ezequias, kag Josias, kag sa mga tawo nga nagpadayon nga matutom sa Dios.
   2) Sa pagsugid sang ginsugoran sang pagsimba sa Dios sa Templo sa Jerusalem, kag labi na gid ang paghimo sang katilingban sang mga pari kag mga Levita, nga paagi sa ila ang pagsimba ginapadayon. Si David ginasiling diri nga mo ang nagplano sa pagpatindog sang Templo kag ang mga hilikuton sa sini, bisan nga si Salomon gid amo ang nagpatindog sang Templo.

Balayan sang Kaundan
   Mga kaliwatan kag mga lista 1:1—9:44
   Ang pagkapatay ni Saul 10:1-14
   Ang paghari ni David 11:1—29:30
     a. Mga katublagan kag maayo nga mga hinimoan 11:1—22:1
     b. Mga paghanda para sa pagpatindog sang Templo 22:2—29:30

☆☆☆ 1 MGA CRONICA ☆☆☆

1 2 3 4 5 6 7 8 9 10 
11 12 13 14 15 16 17 18 19 20 
21 22 23 24 25 26 27 28 29

☆☆☆ 1 MGA CRONICA ☆☆☆

2 MGA HARI 《 | 》 2 MGA CRONICA

1 MGA CRONICA - Kapitulo 29

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ang mga Dulot sa Pagpatindog sang Templo

1 Si Haring David nagsiling sa bug-os nga katilingban, “Ang akon anak nga si Salomon amo ang ginpili sang Dios, pero pamatan-on kag linghod pa sia. Ang bulohaton tama ka daku, kay ini indi palasyo para sa mga tawo, kundi isa ka templo para sa Ginoo nga Dios.

"Ang akon anak nga si Salomon amo ang ginpili sang Dios." (29:1)

2 Ginhimo ko ang akon masarangan sa pag-aman sing mga galamiton para sa Templo—bulawan, pilak, saway, salsalon, kahoy, malahalon nga mga bato kag mga perlas, mga bato nga may nanarisari nga duag, kag madamo nga mga marmol. 

3 Wala labot sining akon mga ginhanda, naghatag pa ako sing pilak kag bulawan halin sa akon kaugalingon nga pagkabutang, tungod sang akon daku nga kabalaka para sa Templo sang Dios. 

4 Naghatag ako sing 3,300,000 ka onsas nga puraw nga bulawan kag 7,700,00 ka onsas nga puraw nga pilak nga ihaklap sa mga dingding sang Templo 

5 kag para sa tanan nga mga gamit nga himuon sang mga platero. Karon sin-o pa ang luyag maghatag sing maalwan nga dulot sa Ginoo?" 

6 Dayon ang mga pangulo sang mga kabaranggayan, ang mga opisyales sang mga tribo, ang mga pangulo sang mga hangaway, kag ang mga gintugyanan sang mga pagkabutang sang hari naghatag sing kinabubot-on 

7 para sa pagpaobra sang Templo. Naghatag sila sing 5,500,000 ka onsas nga bulawan, 11,000,000 ka onsas nga mga pilak, 675 ka tonilada nga saway, kag 3,750 ka tonilada nga salsalon.

8 Ang may malahalon nga mga bato naghatag sini sa talaguan sang manggad sang Templo, nga gintugyan kay Jehiel nga Levita sa kabaranggayan ni Gerson.

9 Ang mga tawo naghatag sing kinabubot-on sa Ginoo, kag nalipay gid sila nga madamo ang nahatag. Si Haring David man tama gid ka malipayon. 

Si David Nagdayaw sa Dios

10 Didto sa atubangan sang bug-os nga katilingban gindayaw ni David ang Ginoo. Nagsiling sia, “O Ginoo nga Dios sang amon ginikanan nga si Jacob, kabay nga dayawon ka sa walay katubtoban!

11 Daku ka kag gamhanan, mahimayaon, halangdon, kag dalayawon. Ang tagsa ka butang sa langit kag sa duta imo, kag ikaw hari, nga labi ka gamhanan sa tanan.

12 Ang tanan nga kamanggaran kag kadungganan nagagikan sa imo; ginagamhan mo ang tagsa ka butang sa imo kusog kag gahom; kag mahimo mo nga gamhanan kag makusog ang bisan sin-o.

13 Karon, O Dios namon, nagapasalamat kami kag nagadayaw sa imo mahimayaon nga ngalan. 

14 “Pero ang akon mga tinawo kag ako wala gid sing bisan ano nga mahatag sa imo, kay ang tanan nga butang nagagikan sa imo kag ginapabalik lamang namon sa imo ang imo na nga daan. 

15 Nakahibalo ikaw, O Ginoo, nga nagaagi kami sa sini nga kabuhi kaangay sang nagadalangdalang nga mga dumoluong, subong sang amon mga katigulangan. Ang amon mga inadlaw kaangay sang landong nga umalagi, kag indi kami makalinaw sa kamatayon. 

16 O Ginoo, nga Dios namon, gintipon namon ini tanan nga manggad sa pagpatindog sang isa ka templo sa pagpadungog sang imo balaan nga ngalan, pero ini tanan nagikan sa imo kag ang tanan imo. 

17 Nakahibalo ako nga ikaw nagausisa sang tagsa ka tagipusoon, kag nalipay ikaw sa mga tawo nga sinsero. Hugot sa akon tagipusoon ginahatag ko ini tanan sa imo sing kinabubot-on, kag nakita ko ang kalipay sang imo mga tawo nga nagtipon diri sa pagdala sa imo sini nga mga dulot. 

18 O Ginoo nga Dios sang amon mga katigulangan nga si Abraham, si Isaac, kag si Jacob, tipigi ini nga gugma sing dayon sa tagipusoon sang imo mga tawo, kag buligi sila nga magmatutom sila sa gihapon sa imo.

19 Hatagan mo ang akon anak nga si Salomon sing handom sa bug-os niya nga tagipusoon sa pagtuman sang tagsa ka butang nga imo ginasugo, kag sa pagpatindog sang templo nga gin-amanan ko sini nga mga galamiton.” 

20 Dayon si David nagmando sa mga tawo, "Dayawa ang Ginoo nga inyo Dios!” Kag ang bug-os nga katilingban nagdayaw sa Ginoo, ang Dios sang ila mga katigulangan, kag nagluhod sila sa pagpadungog sa GINOO kag sa hari man. 

21 Sang madason nga adlaw nag-ihaw sila sing mga sapat subong mga halad sa Ginoo kag nagdulot sing mga halad nga sinunog sa iya. Naghalad sila sing 1,000 ka mga baka nga torite, 1,000 ka mga karnero, kag 1,000 ka mga cordero, wala labot sang mga dulot nga bino kag sang madamo nga mga sapat nga halad agod kaunon sang mga tawo sang Israel. 

22 Gani sadto nga adlaw malipayon sila samtang nagakaon sila kag nagaininom sa atubangan sang Ginoo. Sa liwat ginpakilala nila si Salomon subong hari. Sa ngalan sang Ginoo ginhaplasan nila sia subong ila hari kag si Sadoc subong ila pari. 

23 Gani si Salomon nagbulos sa iya amay nga si David sa trono nga ginpalig-on sang Ginoo. Nagmadinalag-on sia nga hari, kag ang bug-os nga pungsod sang Israel nagtuman sa iya. 

24 Ang tanan nga mga opisyales kag mga soldado, kag bisan ang iban nga mga anak nga lalaki ni David nagsaad sa pag-unong sa kay Salomon subong hari.

25 Ginbuot sang Ginoo nga ang bug-os nga pungsod magtahod kay Salomon, kag ginhimo niya nga mahimayaon ang iya paghari labi pa sang sa bisan sin-o nga hari nga naggahom sa Israel. 

Ang Pagkapatay ni Haring David 

26 Si David nga anak ni Jesse naggahom sa bug-os nga Israel 

27 sa sulod sang 40 ka tuig. Naggahom sia sa Hebron sa sulod sang pito ka tuig kag sa Jerusalem sa sulod sang 33 ka tuig. 

28 Napatay sia nga tigulang na gid kaayo, manggaranon kag ginatahod, kag ang iya anak nga si Salomon nagbulos sa iya subong hari. 

29 Ang maragtas ni Haring David halin sa ginsugoran tubtob sa katapusan nasulat sa mga libro sang tatlo ka mga propeta nga amo sanday Samuel, Natan, kag Gad. 

30 Ginasugid nila kon daw ano ang iya paggahom, kon daw ano ang iya pagkagamhanan, kag ang tanan nga mga butang nga nahanabo sa iya, sa Israel, kag sa palibot nga mga ginharian.

1 MGA CRONICA - Kapitulo 28 <<<   >>> 2 MGA CRONICA - Kapitulo 1

1 MGA CRONICA - Kapitulo 28

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ang mga Sugo ni David nahanungod sang Templo 

1 Ginmanduan ni David ang tanan nga mga opisyales sang Israel sa pagtipon sa Jerusalem. Gani ang mga opisyales sang mga tribo, ang tanan nga mga opisyales nga nagadumala sang mga bulohaton sang ginharian, ang mga pangulo sang mga kabaranggayan, ang mga nagatatap sang mga pagkabutang kag mga kahayupan sang hari kag sang iya mga anak nga lalaki, ang tanan nga mga opisyales sa palasyo, ang mga pangulo sang mga hangaway, kag ang mga isganan nga mga tawo nagtipon sa Jerusalem. 

2 Si Haring David nagtindog sa atubangan nila kag naghambal, "Mga kasimanwa ko, pamatii ninyo ako. Luyag ako magpatindog sing balay nga permanente para sa Kaban sang Kasugtanan, ang trono sang Ginoo nga aton Dios. Nakahanda na ako sa pagpatindog sang isa ka templo sa pagpadungog sa Dios,

3 pero wala sia magtugot sa akon, kay ako isa ka soldado kag madamo nga dugo ang akon ginpaagay.

4 Ang Ginoo, ang Dios sang Israel, nagpili sa akon kag sang akon mga kaliwat sa paggahom sa Israel sa walay katapusan. Ginpili niya ang tribo ni Juda nga pagagikanan sang pangulo, kag gikan sa Juda ginpili niya ang panimalay sang akon amay. Gikan sa sinang panimalay ginkalipay niya ang pagpili sa akon nga manginhari sa bug-os nga Israel.

5 Ginhatagan niya ako sing madamo nga mga anak nga lalaki, kag gikan sa ila ginpili niya si Salomon sa paggahom sa Israel, ang ginharian sang Ginoo. 

6 "Ang Ginoo nagsiling sa akon, 'Ang imo anak nga si Salomon amo ang magapatindog sang akon Templo. Ginpili ko sia nga mangin-akon anak, kag ako mangin-iya amay. 

7 Himuon ko ang iya ginharian nga wala sing katapusan, kon padayunon niya ang pagtuman sang akon mga kasugoan kag mga mando subong sang iya ginahimo karon.' 

8 "Gani karon, mga tawo ko, sa atubangan sang aton Dios kag sining katilingban sang bug-os nga Israel, ang mga tawo sang Ginoo, ginalaygayan ko kamo sa pagtuman sang tanan nga ginasugo sang Ginoo nga aton Dios sa aton, agod magapadayon kamo sa pagpanag-iya sining maayo nga duta, kag inyo mabilin nga panublion sa masunod nga mga kaliwatan sa walay katubtoban. 

9 “Kag ikaw, Salomon nga anak ko, ginalaygayan ko ikaw sa pagkilala sang Dios sang imo amay kag sa pag-alagad sa iya sing kinabubot-on sa bug-os mo nga tagipusoon. Nahibaluan niya ang tanan naton nga mga panghunahona kag mga handom. Kon magdangop ka sa iya, sia magabaton sa imo; pero kon ikaw magbiya sa iya, sia magabiya sa imo sa walay katapusan.

10 Dapat mo kilalahon nga ang Ginoo nagpili sa imo sa pagpatindog sang iya balaan nga Templo. Karon himoa ini, kag indi ka magpakaluya." 

11 Ginhatag ni David kay Salomon ang mga plano sang tanan nga mga bahin sang Templo, sang mga kuwarto nga talaguan, kag sang iban nga mga kuwarto, kag sang Labing Balaan nga Duog, sa diin ang mga sala ginapatawad. 

12 Ginhatag man niya kay Salomon ang mga plano sang tanan nga iya ginapanghunahona para sa mga pasiyuhan kag mga kuwarto sa palibot sini, kag para sa mga kuwarto nga talaguan sang mga galamiton sa Templo kag sang mga dulot nga ginhalad sa Ginoo.

13 Ginhatag man ni David sa iya ang mga plano sa pagpartida sang mga pari kag mga Levita sa ila mga katungdanan, sa paghimo sang ila bulohaton sa Templo, kag sa pagtatap sang tanan nga mga gamit sa Templo. 

14 Nagsiling sia kon daw ano kadamo nga pilak kag bulawan ang gamiton sa paghimo sang mga gamit, 

15 para sa tagsa ka suga kag kandileruhan,

16 para sa mga lamisa nga pilak, kag para sa tagsa ka lamisa nga bulawan nga ginabutangan sang mga tinapay nga ginhalad sa Dios. 

17 Nagsiling man sia kon daw ano kadamo nga puraw nga bulawan ang gamiton sa paghimo sing mga tenedor, mga yahong, kag mga pitsil, daw ano kadamo nga pilak kag bulawan ang gamiton sa paghimo sing mga pinggan, 

18 kag daw ano kadamo nga puraw nga bulawan ang gamiton sa paghimo sang altar nga ginasunogan sang insyenso, kag sang karuwahi para sa mga sapat nga may pakpak nga nagahumlad sang ila mga pakpak sa ibabaw sang Kaban sang Kasugtanan sang Ginoo.

19 Si Haring David nagsiling, "Ini tanan yara sa plano nga ginhimo suno sa sugo sang Ginoo nga iya ginhatag sa akon nga himuon." 

20 Si Haring David nagsiling kay Salomon nga iya anak, "Magpakabakod ka kag indi magpakaluya. Sugori ang pagpaobra kag indi mag-untat bisan ano ang matabo. Ang Ginoo nga Dios nga akon ginaalagad, magaupod sa imo. Indi sia magbiya sa imo, kundi magaupod sia sa imo tubtob matapos mo ang pagpaobra sang Templo.

21 Ang mga pari kag ang mga Levita ginhatagan sing mga katungdanan sa Templo. Ang sampaton nga mga tawo sa bisan ano nga bulohaton handa sa pagbulig sa imo, kag ang tanan nga mga tawo kag ang ila mga pangulo yara sa idalom sang imo pagmando.”

1 MGA CRONICA - Kapitulo 27 <<<   >>> 1 MGA CRONICA - Kapitulo 29

1 MGA CRONICA - Kapitulo 27

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ang mga Manugdumala ni David sa Hangaway kag Gubyerno 

1 Amo ini ang lista sang mga Israelinhon nga mga pangulo sang mga panimalay kag mga pangulo sang mga kabaranggayan, kag sang ila mga opisyales nga nagdumala sang bulohaton sa ginharian. Sa tagsa ka bulan sang tuig ang isa ka grupo nga may 24,000 ka mga tawo nagaalagad sa idalom sang isa ka panguIo sa sina nga bulan. 

2-15 Ang masunod amo ang mga pangulo sa tagsa ka bulan: 

   Nahauna nga bulan: si Jasobeam nga anak ni Zabdiel. (Katapo sia sang kabaranggayan ni Perez sang tribo ni Juda.) 

   Ikaduha nga bulan: si Dodai, kaliwat ni Ahohi. (Ang pangulo nga madason sa iya amo si Miclot.) 

   Ikatlo nga bulan: si Benaya nga anak nga lalaki ni Joiada nga pari. Sia amo ang pangulo sang "Katluan ka Isganan." (Ang iya anak nga Ialaki nga si Amisabad nagbulos sa iya subong pangulo sini nga grupo.) 

   Ikap-at nga bulan: si Azael nga utod ni Joab. (Ang iya anak nga si Zebadias nagbulos sa iya.) 

   Ikalima nga bulan: si Samhut, kaliwat ni Izhar. 

   Ikan-om nga bulan: si Ira, anak nga lalaki ni Iques nga taga-Tekoa. 

   Ikapito nga bulan: si Helez, isa ka Efraimnon, nga taga-Pelet. 

   Ikawalo nga bulan: si Sibecai, gikan sa banwa sang Husa. (Katapo sia sang kabaranggayan ni Zera nga gikan sa tribo ni Juda.) 

   Ikasiyam nga bulan: si Abiezer nga taga-Anatot sa tribo ni Benjamin. 

   Ika-10 nga bulan: si Maharai nga taga-Netofa. (Katapo sia sang kabaranggayan ni Zera.) 

   Ika-11 nga bulan: si Benaya nga taga-Piraton sa tribo ni Efraim. 

   Ika-12 nga bulan: si Heldai nga taga-Netofa. (Kaliwat sia ni Otniel.) 

16-22 Amo ini ang lista sang mga pangulo sang mga tribo sang Israel: 

   Tribo               Pangulo 

   Ruben             si Eliezer nga anak ni Sicri; 

   Simeon           si Sepatias nga anak ni Maaca; 

   Levi                 si Hasabias lrga anak ni Kemuel; 

   Aaron             si Sadoc; 

   Juda                si Eliu, isa sang mga utod nga lalaki ni 

                           Haring David;

   Isacar             si Omri nga anak ni Micael; 

   Zabulon         si Ismaias nga anak ni Obadias; 

   Neftali           si Jerimot nga anak ni Azriel; 

   Efraim           si Oseas nga anak ni Azarias; 

   Nakatundan si Joel nga anak ni Pedaya;

   nga Manases 

   Nasidlangan si Iddo nga anak ni Zacarias;

   nga Manases 

   Benjamin      si Jaasiel nga anak ni Abner; 

   Dan                si Azarel nga anak ni Jeroham. 

23 Wala ginsenso ni Haring David ang mga tawo nga wala pa nagaedad sing 20 ka tuig, tungod sang saad sang Ginoo nga padamuon niya ang mga tawo sang Israel subong kadamo sang mga bituon sa kalangitan.

24 Ang pagsenso ginsugoran ni Joab nga anak ni Sarvia, pero wala niya ini matapos. Ginsilutan sang Dios ang Israel tungod sini nga pagsenso, gani ang kadamuon wala malista sa maragtas ni Haring David. 

Ang mga Gintugyanan sang mga Pagkabutang sang Hari 

25-31 Amo ini ang lista sang mga gintugyanan sang mga pagkabutang sang hari:

   Ang talaguan sang hari: si Asmavet nga anak ni Adiel; 

   Ang mga talaguan sa iban nga mga duog: si Jonatan nga anak ni Uzias; 

   Ang pagpaobra sa uma: si Ezri nga anak ni Kelub; 

   Ang talamnan sang mga ubas: si Simei nga taga-Rama; 

   Ang talaguan sang bino: si Zabdi nga taga-Sefam; 

   Ang mga kahoy nga olivo kag sikomoro (sa nakatundan nga kunsaran sang mga bakulod): si Baalhanan nga taga-Geder; 

   Ang talaguan sang lana sang olivo: si Joas; 

   Ang kabakahan sa kapatagan sang Saron: si Sitrai nga taga-Saron; 

   Ang kabakahan sa mga kapatagan: si Safat nga anak ni Adlai; 

   Ang mga kamelyo: si Obil, kaliwat ni Ismael; 

   Ang mga asno: si Jedeias nga taga-Meronot;

   Ang mga karnero kag mga kanding: si Jaziz, kaliwat ni Hagar. 

Ini tanan nga mga tawo amo ang nagtatap sang mga pagkabutang sang hari. 

Ang mga Palamangkutan ni David

32 Si Jonatan nga tiyo ni Haring David, isa ka maalam kag mahinangpanon nga manuglaygay. Sia kag si Jehiel nga anak ni Hacmoni amo ang gintugyanan sa pagtudlo sang mga anak nga lalaki sang hari. 

33 Si Ahitofel isa ka palamangkutan sang hari, kag si Husai nga Arquinhon amo ang amigo kag manuglaygay sang hari. 

34 Sang mapatay si Ahitofel, ginbuslan sia ni Abiatar kag ni Joiada nga anak nga lalaki ni Benaya. Si Joab amo ang pangulo sang mga hangaway sang hari.

1 MGA CRONICA - Kapitulo 26 <<<   >>> 1 MGA CRONICA - Kapitulo 28

1 MGA CRONICA - Kapitulo 26

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ang mga Gwardya sa Templo 

1 Amo ini ang mga bulohaton nga natuon sa mga gwardya sang Templo. Halin sa kabaranggayan ni Core, si Meselemias nga anak nga lalaki ni Core, halin sa panimalay ni Asaf.

2 May pito sia ka mga anak nga lalaki nga amo sanday Zacarias, Jediael, Zebadias, Jatniel, 

3 Elam, Jehanan, kag Elioenai. 

4 Yara man si Obed Edom, nga ginbugayan sang Dios sing walo ka mga anak nga lalaki nga amo sanday Semaya, Jozabad, Joa, Sacar, Nataniel, 

5 Amiel, Isacar, kag Peulletai. 

6 Ang kamagulangan nga anak nga lalaki ni Obed Edom nga si Semaya, may mga anak nga lalaki nga gamhanan sa ila kabaranggayan tungod sang ila daku nga kinaadman.

7 Sila amo sanday Otni, Rafael, Obed, Elzabad, Eliu, kag Samaquias. (Ang duha nga naulihi amo ang may labing daku nga kinaadman.) 

8 Gikan sa panimalay ni Obed Edom may 62 ka labing sampaton nga mga tawo para sa sini nga bulohaton. 

9 Gikan sa panimalay ni Meselemias may 18 ka mga sampaton nga mga tawo. 

10 Gikan sa panimalay ni Merari yara si Hosa, nga may apat ka mga anak nga lalaki nga amo sanday Simri (ang iya amay naghimo sa iya nga pangulo, bisan indi sia amo ang kamagulangan nga anak),

11 Helcias, Tebalias, kag Zacarias. May 13 tanan ka mga katapo sang panimalay ni Hosa nga mga gwardya sang Templo. 

12 Ang mga gwardya sang Templo ginpartida sa mga grupo, suno sa mga panimalay, kag ginhatagan sila sing mga katungdanan sa Templo pareho sang iban nga mga Levita.

13 Ang tagsa ka panimalay, wala sapayan sang ila kadakuon, nagpagabutgabot sa paghibalo kon diin nga puwerta ang ila pagabantayan. 

14 Ang nagabutan ni Selemias amo ang nasidlangan nga puwerta, kag ang iya anak nga si Zacarias, isa ka maalam nga manuglaygay, amo ang nakagabot sang naaminhan nga puwerta. 

15 Si Obed Edom gintugyanan sa pagbantay sang nabagatnan nga puwerta, kag ang iya mga anak nga lalaki gintugyanan sa pagbantay sang bodega.

16 Si Supim kag si Hosa gintugyanan sang nakatundan nga puwerta kag sang puwerta sang Sallequet, sa alagyan nga nagapaibabaw. Ang pagbantay bulosbulos. 

17 Sa sidlangan may anom ka mga gwardya sa tagsa ka adlaw, sa aminhan, apat, sa bagatnan, apat. May apat ka mga gwardya nga ginbutang sa mga bodega adlaw-adlaw, duha sa tagsa ka bodega.

18 Malapit sa daku nga balay sa nakatundan, may apat ka mga gwardya sa alagyan kag duha sa balay mismo. 

19 Amo ini ang katungdanan sang mga panimalay ni Core kag ni Merari sa pagbantay. 

Ang Iban nga mga Katungdanan sa Templo 

20 Ang iban sang ila kapareho nga mga Levita^f gintugyanan sang talaguan sang manggad sang Templo kag sang talaguan sang mga dulot nga nahalad sa Dios. 

21 Si Ladan, isa ka katapo sang kabaranggayan ni Gerson, amo ang ginhalinan sang pila ka grupo sang mga panimalay, lakip ang panimalay ni Jehiel. 

22 Ang duha ka katapo sini nga panimalay, si Zetam kag ang iya utod nga si Joel, amo ang gintugyanan sang manggad sang Templo kag sang talaguan sang mga dulot. 

23 May mga bulohaton man nga gintugyan sa kanday Amram, Izhar, Hebron, kag Uziel. 

24 Si Sebuel, gikan sa kabaranggayan ni Gersom nga anak ni Moises, amo ang pangulo nga opisyal nga gintugyanan sang talaguan sang manggad sang Templo.

25 Paagi sa utod ni Gersom nga si Eliezer, may kaangtanan sia kay Selomot. Si Eliezer amo ang amay ni Rehabias, si Rehabias amay ni Isaias, si Isaias amay ni Joram, si Joram amay ni Sicri, si Sicri amay ni Selomot. 

26 Si Selomot kag ang mga katapo sang iya panimalay amo ang gintugyanan sang tanan nga mga dulot nga ginhalad sa Dios ni Haring David, sang mga pangulo sang mga panimalay, sang mga pangulo sang mga kabaranggayan, kag sang mga opisyales sang mga hangaway. 

27 Ginkuha nila ang iban nga ila naagaw sa inaway kag ginhalad nila ini para gamiton sa Templo. 

28 Si Selomot kag ang iya panimalay amo ang gintugyanan sang tagsa ka butang nga ginhalad agod gamiton sa Templo, lakip ang mga dulot nga gindala ni Samuel nga propeta, ni Haring Saul, ni Abner nga anak ni Ner, kag ni Joab nga anak ni Sarvia. 

Ang mga Katungdanan sang Iban nga mga Levita 

29 Sa mga kaliwat ni Izhar, si Kenanias kag ang iya mga anak nga lalaki amo ang gintugyanan sang mga papeles kag sa paghukom sang mga kaawayon sang mga tawo sa Israel. 

30 Sa mga kaliwat ni Hebron, si Hasabias kag ang iya 1,700 ka mga paryente nga mga isganan nga mga lalaki, amo ang gintugyanan sang tanan nga mga bulohaton sa Israel nahanungod sa Dios kag sa gubyerno sa nakatundan sang suba sang Jordan.

31 Si Jerias amo ang pangulo sang mga kaliwat ni Hebron. Sa ika-40 nga tuig sang paghari ni David, may pag-usisa nga ginhimo nahanungod sang mga kaliwat sang panimalay ni Hebron, kag nasapwan nga ang mga isganan nga mga soldado nga katapo sini nga panimalay, nagapuyo sa Jazer sa kadutaan sang Galaad.

32 Si Haring David nagpili sing 2,700 ka mga isganan nga mga pangulo sang mga panimalay gikan sa mga paryente ni Jerias kag gintugyan sa ila ang pagdumala sang tanan nga mga bulohaton nahanungod sa Dios kag sa gubyerno sa kadutaan nanday Ruben, Gad, kag sang Nasidlangan nga Manases. 

^fAng isa ka dumaan nga pagbadbad kapareho nga mga Levita; sa Hebreo mga Levita, si Ahias.

1 MGA CRONICA - Kapitulo 25 <<<   >>> 1 MGA CRONICA - Kapitulo 27

1 MGA CRONICA - Kapitulo 25

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ang mga Musikero sa Templo

1 Si David kag ang mga pangulo sang mga Levita nagpili sang masunod nga mga kabaranggayan sa pagdumala sang mga panimbahon: sanday Asaf, Heman, kag Jedutun. Kinahanglan iwali ang mga mensahi sang Dios nga ginaupdan sang lanton sang mga arpa kag mga platilyos. Amo ini ang lista sang mga tawo nga ginpili sa pagdumala sang pagsimba, suno sa ila mga bulohaton: 

2 Ang mga anak nga lalaki ni Asaf nga amo sanday Zacur, Jose, Netanias, kag Asarela. Ginadumalahan sila ni Asaf, nga nagwali sang mensahi sang Dios kon magsugo ang hari.

3 Ang anom ka mga anak nga lalaki ni Jedutun nga amo sanday Gedalias, Zeri, Isaias, Simei, Hasabias, kag Matatias. Sa pagdumala sang ila amay nagwali sila sang mensahi sang Dios nga ginaupdan sang lanton sang mga arpa, kag nagkanta sila sa pagdayaw kag pagpasalamat sa Ginoo. 

4 Ang mga anak nga lalaki ni Heman amo sanday Bukias, Matanias, Uziel, Sebuel, Jerimot, Hananias, Hanani, Eliata, Gidalti, Romamti Ezer, Josbecasa, Malloti, Hotir, kag Mahaziot. 

5 Ginhatagan sang Dios si Heman, ang propeta sang hari, sing 14 ka mga anak nga lalaki kag tatlo ka mga anak nga babayi, suno sa iya ginsaad, sa paghatag sing gahom sa kay Heman.

6 Tanan sila nagtukar sing mga platilyos kag mga arpa sa pagdumala sang ila amay sa panimbahon sa Templo. Sanday Asaf, Jedutun, kag Heman yara sa idalom sang pagmando sang hari. 

7 Ini tanan nga mga tawo, kag ang ila kapareho nga mga Levita mga sampaton nga mga musikero. Mga 288 sila tanan. 

8 Sa paghibalo sang ila naiguan nga mga bulohaton nagpagabutgabot sila, pamatan-on ukon tigulang, mga sampaton ukon nagatuon pa lang. 

9-31 Amo ini ang mga pangulo sa 24 ka mga grupo nga may 12 ka mga katapo suno sa paagisod sang ila mga bulohaton: (1) si Jose sa kabaranggayan ni Asaf; (2) Gedalias; (3) Zacur; (4) Izri; (5) Netanias; (6) Bukias; (7) Jesarela; (8) Isaias; (9) Matanias; (10) Simei; (11) Asarel; (12) Hasabias; (13) Subael; (14) Matitias; (15) Jeremot; (16) Hananias; (17) Josbecasa; (18) Hanani; (19) Malloti; (20) Eliata; (21) Hotir; (22) Gidalti; (23) Mahaziot; (24) Romamti Ezer.

1 MGA CRONICA - Kapitulo 24 <<<   >>> 1 MGA CRONICA - Kapitulo 26

1 MGA CRONICA - Kapitulo 24

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ang Bulohaton sang mga Pari 

1 Amo ini ang mga grupo nga ginhalinan sang mga kaliwat ni Aaron. Si Aaron may apat ka mga anak nga lalaki nga amo sanday Nadab, Abiu, Eleazar, kag Itamar. 

2 Si Nadab kag si Abiu napatay sing una sa ila amay, nga wala sing mga kaiiwat, gani ang ila mga utod nga lalaki nga sanday Eleazar kag Itamar nanginpari.

3 Ginpartida ni Haring David ang mga kaliwat ni Aaron sa mga grupo, suno sa ila mga katungdanan. Ginbuligan sia ni Sadoc nga kaliwat ni Eleazar, kag ni Ahimelec nga kaliwat ni Itamar. 

4 Ang mga kaliwat ni Eleazar ginpartida sa 16 ka grupo, samtang ang mga kaliwat ni Itamar ginpartida sa walo ka grupo. Amo ini ang ginhimo, kay may madamo nga mga lalaki nga pangulo sang mga panimalay sa mga kaliwat ni Eleazar.

5 Tungod kay may mga opisyales kag espirituhanon nga mga pangulo sa mga kaliwat ni Eleazar kag ni Itamar, ang ila mga katungdanan ginhatag paagi sa pagabutgabot. 

6 Dayon ginlista sila ni Semaya nga anak ni Natanael, nga isa ka sekretaryo nga Levita. Ang hari, ang iya mga opisyales, ang pari nga si Sadoc, si Ahimelec nga anak ni Abiatar, kag ang mga pangulo sang mga panimalay sang mga pari kag mga Levita, mga saksi tanan. Ang mga kaliwat ni Eleazar kag ni Itamar nagbulosbulos sa pagabutgabot. 

7-18 Amo ini ang pag-alagisod sang 24 ka grupo sang mga panimalay nga nagkuha sang ila katungdanan paagi sa pagabutgabot: (1) Joiarib; (2) Jedaya; (3) Harim; (4) Seorim; (5) Malquias, (6) Mijamin; (7) Haccoz; (8) Abias; (9) Jesua; (10) Secania; (11) Eliasib; (12) Jaquim; (13) Upa; (14) Jesebeab; (15) Bilga; (16) Imer; (17) Hezir; (18) Hapizez; (19) Petaya; (20) Hezequiel; (21) Jaquin; (22) Gamul; (23) Delaya; (24) Maazia;

19 Ini  nga mga tawo ginlista suno sa ila mga katungdanan sa pagkadto sa Templo sa paghimo sang ila mga bulohaton nga ginhatag ni Aaron nga ila ginhalinan sa pagtuman sa mga sugo sang GINOO nga Dios sang Israel. 

Ang Lista sang mga Levita 

20 Amo ini ang iban nga mga pangulo sang mga panimalay nga kaliwat ni Levi: Si Jehedias, isa ka kaliwat ni Amram paagi sa kay Subael; 

21 Si Isias, isa ka kaliwat ni Rehabias; 

22 Si Jahat, isa ka kaliwat ni Izhar paagi kay Selomot; 

23 Ang mga kaliwat ni Hebron suno sa ila gahom: sanday Jeria, Amarias, Jehaziel, kag Jecameam; 

24 Si Samir, isa ka kaliwat ni Uzel paagi kay Mica; 

25 kag si Zacarias, isa ka kaliwat ni Uziel paagi kay Isias, utod nga lalaki ni Mica; 

26 Ang mga kaliwat ni Merari: sanday Mali, Musi, kag Jaazias. 

27 Si Jaazias may tatlo ka mga anak nga lalaki nga amo sanday Soham, Zacur, kag Ibri. 

28-29 Si Mali may duha ka anak nga lalaki nga amo sanday Eleazar kag Cis. Si Eleazar wala sing mga anak nga lalaki, pero si Cis may isa ka anak nga lalaki nga si Jerameel.

30 Si Musi may tatlo ka mga anak nga lalaki nga amo sanday Mali, Eder, kag Jerimot. Amo ini sila ang mga panimalay sang mga Levita. 

31 Ang pangulo sang tagsa ka panimalay kag ang iya manghod nga lalaki naggabutgabot sa paghibalo sang ila mga bulohaton, subong sang ginhimo sang ila mga paryente, ang mga pari nga kaliwat ni Aaron. Sanday Haring David, Sadoc, Ahimelec, kag ang mga pangulo sang mga panimalay sang mga pari kag sang mga Levita amo ang mga saksi.

1 MGA CRONICA - Kapitulo 23 <<<   >>> 1 MGA CRONICA - Kapitulo 25

1 MGA CRONICA - Kapitulo 23

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

1 Sang tigulang na gid kaayo si David, ginhimo niya ang iya anak nga si Salomon nga hari sang Israel. 

Ang Bulohaton sang mga Levita 

2 Gintipon sing tingob ni Haring David ang tanan nga mga pangulo sang Israel kag ang tanan nga mga pari kag mga Levita. 

3 Gin-isip niya ang tanan nga mga Levita nga lalaki nga nagaedad halin sa 30 paibabaw. Ang bug-os nila nga kadamuon 38,000.

4 Ang 24,000 sa ila iya ginpadumala sang mga bulohaton sa Templo, kag ang 6,000 sa pagtago sang mga papeles kag sa paghukom.

5 Ginhimo niya ang 4,000 nga mga gwardya, kag ang 4,000 sa pagdayaw sa GINOO paagi sa mga instrumento sa musika nga iya ginpahimo para sa sini nga tinutoyo. 

6 Ginpartida ni David ang mga Levita sa tatlo ka grupo, suno sa mga kabaranggayan nanday Gerson, Coat, kag Merari. 

7 Si Gerson may duha ka anak nga lalaki nga amo sanday Ladan kag Simei. 

8 Si Ladan may tatlo ka mga anak nga lalaki nga amo sanday Jehiel, Zetan, kag Joel,

9 nga mga pangulo sang mga kabaranggayan nga mga kaliwat ni Ladan. (Si Simei may tatlo ka mga anak nga lalaki nga amo sanday Selomit, Haziel, kag Haran.)^e

10-11 Si Simei may apat ka mga anak nga lalaki nga amo sanday Jahat, Zina, Jeus, kag Berias, halin sa kamagulangan pakadto sa kamanghuran. Si Jeus kag si Berias wala sing madamo nga mga kaliwat, gani gin-isip sila nga isa lang ka baranggay. 

12 Si Coat may apat ka mga anak nga lalaki nga amo sanday Amram, Izhar, Hebron, kag Uziel,

13 kag ang iya panganay nga anak nga si Amram amo ang amay ni Aaron kag ni Moises. Si Aaron kag ang iya mga kaliwat ginpain nga pagatugyanan sa walay katubtoban sang balaan nga mga butang, sa pagsunog sang insyenso sa pagsimba sa Ginoo, sa pag-alagad sa iya, kag sa pagbendisyon sa mga tawo sa iya ngalan.

14 Pero ang mga anak nga lalaki ni Moises, ang tawo sang Dios, mga katapo sang mga Levita. 

15 May duha sia ka anak nga lalaki nga amo sanday Gersom kag Eliezer. 

16 Ang panguIo sang mga anak nga lalaki ni Gersom amo si Sebuel.

17 Si Eliezer may isa lamang ka anak nga lalaki nga amo si Rehabias, pero si Rehabias may madamo nga mga kaliwat. 

18 Ang ikaduha nga anak nga lalaki ni Coat nga si Izhar, may anak nga lalaki nga si Selomit, ang pangulo sang baranggay.

19 Ang ikatlo nga anak nga lalaki ni Coat nga si Hebron, may apat ka mga anak nga lalaki nga amo sanday Jeria, Amarias, Jahaziel, kag Jecameam.

20 Ang ikap-at nga anak nga lalaki ni Coat nga si Uziel, may duha ka anak nga lalaki nga amo sanday Mica kag Isias.

21 Si Merari may duha ka anak nga lalaki nga amo sanday Mali kag Musi. Si Mali may duha man ka anak nga lalaki nga amo sanday Eleazar kag Cis,

22 pero si Eleazar napatay nga wala sing anak nga lalaki, kundi mga babayi lang. Ang iya mga anak nga babayi nagpamana sang ila mga pakaisa, nga mga anak nga lalaki ni Cis. 

23 Ang ikaduha nga anak nga lalaki ni Merari nga si Musi, may tatlo ka mga anak nga lalaki nga amo sanday Mali, Eder, kag Jeremot. 

24 Amo ini ang mga kaliwat ni Levi, suno sa mga kabaranggayan kag mga panimalay, nga ginlista sa tagsa nila ka ngalan. Ang tagsa niya ka mga kaliwat nga nagaedad sing 20 ka tuig paibabaw, may bahin sa bulohaton sa Templo sang Ginoo. 

25 Si David nagsiling, "Ang Ginoo nga Dios sang Israel naghatag sing kalinong sa iya mga tawo, kag sia gid magapuyo sa Jerusalem sa walay katubtoban. 

26 Karon wala na sing kinahanglan para sa mga Levita ang pagdala sang balaan nga Tolda kag sang tanan nga mga gamit sa pagsimba."

27 Tungod sining katapusan nga mga ginhambal ni David, ang tanan nga mga Levita ginlista sa pag-alagad kon makaabot sila sa edad nga 20 ka tuig. 

28 Ang ila katungdanan amo ang pagbulig sa mga pari nga mga kaliwat ni Aaron sa mga bulohaton sa pagsimba sa Templo, sa pagtinlo sang mga pasiyuhan kag mga kuwarto sang Templo, kag sa pagtipig nga indi madagtaan ang tagsa ka butang nga balaan.

29 Sila ang gintugyanan sang tinapay nga nahalad sa Dios, sang arina nga ginagamit nga mga dulot, sang manipis nga mga tinapay nga wala sing lebadora, sang mga tinapay nga naluto sa horno, kag sang arina nga nasamuan sing lana. Sila man ang gintugyanan sa pagpisar kag pagsukob sang mga dulot sa Templo.

30 Dapat sila magdayaw kag maghimaya sa Ginoo sa tagsa ka aga kag tagsa ka gab-i,

31 kag kon may mga halad nga sinunog sa Ginoo sa Adlaw nga Inugpahuway, sa Piesta sang Lati, kag iban nga mga piesta. May mga pagsulondan kon pila ka mga Levita ang magahimo sini nga obra sa tagsa ka tion sang ila turno. Ang ila katungdanan sa tanan nga tion amo ang pagsimba sa GINOO.

32 Sila ang gintugyanan sa pagtatap sang Tolda nga Tilipunan kag sang Templo, kag sa pagbulig sa ila mga paryente ang mga pari nga kaliwat ni Aaron, sa pagsimba sa Templo.

^eSIMEI . . . HARAN: Ang kaangtanan sini nga lista sa lista sang mga anak nga lalaki ni Simei sa bersikulo 10 indi maathag.

1 MGA CRONICA - Kapitulo 22 <<<   >>> 1 MGA CRONICA - Kapitulo 24

1 MGA CRONICA - Kapitulo 22

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

1 Gani si David nagsiling, "Amo ini ang lugar nga patindugan sang Templo sang Ginoo nga Dios. Amo ini ang altar sa diin ang mga tawo sang Israel magadulot sang mga halad nga sinunog. 

Ang Pag-aman sa Pagpatindog sang Templo 

2 Nagmando si Haring David nga magtipon ang tanan nga mga dumoluong nga nagapuyo sa Israel, kag ginpaobra niya sila. Ang iban sa ila nagbasbas sing mga bato nga gamiton sa pagpatindog sang Templo. 

3 Ginhatagan niya sila sing madamo nga mga salsalon nga himuon nga mga lansang kag mga bisagra para sa mga sira sang mga puwerta nga kahoy, kag madamo nga mga saway nga indi na sarang mapisar.

4 Ginpadala niya sing madamo nga mga kahoy nga sedro ang mga tawo sang Tiro kag Sidon.

5 Si David nagsiling sa iya kaugalingon, “KinahangIan nga ang Templo nga pagapatindugon sang akon anak nga si Salomon manginmatahom kag manginbantog sa bug-os nga kalibutan. Pero bata pa sia kag payaon, gani kinahanglan mag-aman ako para sa sini." Gani si David nag-aman sing madamo nga mga gamit sa wala pa sia mapatay. 

6 Ginpatawag niya ang iya anak nga si Salomon kag ginmanduan sa pagpatindog sing isa ka templo para sa Ginoo, ang Dios sang Israel. 

7 Ginsingganan sia ni David, "Noy, luyag ako magpatindog sing isa ka templo sa pagpadungog sa GINOO nga akon Dios. 

8 Pero ginsingganan ako sang Ginoo nga madamo nga mga tawo ang akon napamatay kag madamo nga mga inaway ang akon inagihan. Indi niya ako pagtugotan sa pagpatindog sing templo para sa iya, tungod sang madamo nga dugo nga akon ginpaagay.

9 Pero nagsaad sia sa akon nga nagasiling, 'May anak ikaw nga magahari nga may kalinong, kay hatagan ko sia sing kalinong sa tanan niya nga mga kaaway. Ang iya ngalan amo si Salomon,^d kay sa panahon sang iya paghari, hatagan ko ang Israel sing kalinong kag kahilwayan sa katalagman. 

10 Magapatindog sia sing templo para sa akon. Mangin-anak ko sia kag ako mangin-iya amay. Ang iya mga kaliwat magagahom sa Israel sa walay katubtoban.' " 

11 Nagpadayon si David sa pagsiling, "Karon, kabay ang Ginoo nga imo Dios mag-ubay sa imo; kag magtuman sang iya saad sa imo agod matigayon mo ang pagpatindog sang isa ka templo para sa iya. 

12 Kabay nga ang GINOO nga imo Dios maghatag sa imo sing paghangop kag kaalam, agod nga ang imo paggahom sa Israel manginsuno sa iya Kasugoan. 

13 Kon tumanon mo ang tanan nga mga kasugoan nga ginhatag sang Ginoo kay Moises para sa Israel, magamadinalag-on ka. Magpakabakod ka kag magpakaisog, kag indi ka magkahadlok sa bisan ano nga butang. 

14 Dumdoma nga sa akon masarangan nakatipon ako sing 4,000 ka tonilada nga bulawan kag malapit sa 40,000 ka tonilada nga pilak para sa pagpatindog sang Templo sang Ginoo. Wala labot sini, madamo kaayo nga mga saway kag salsalon. May nahanda man ako nga mga kahoy kag mga bato, pero kinahanglan dugangan mo ini. 

15 May madamo ikaw nga manug-obra. May mga manugbasbas sang bato, may mga kantero kag mga panday, subong nga may madamo nga mga tawo nga may abilidad sa paghimo sang bisan ano nga obra 

16 sa bulawan, pilak, saway, kag salsalon. Karon sugori ang pagpaobra, kag kabay nga ang GINOO mag-ubay sa imo.”

17 Ginmanduan ni David ang tanan nga mga pangulo sang Israel sa pagbulig sa kay Salomon.

18 Nagsiling sia, "Ang GINOO nga imo Dios nag-ubay sa imo kag naghatag sa imo sing kalinong sa bug-os mo nga palibot. Ginpalutos niya sa akon ang tanan nga mga tawo nga nagpuyo anay sa sini nga duta, kag karon yara na sila sa idalom sang imo paggahom kag sa Ginoo.

19 Karon alagad ka sa GINOO nga imo Dios sa bug-os mo nga tagipusoon kag kalag. Sugori ang pagpatindog sang Templo sa pagpadungog sa Ginoo, agod mabutang mo sa sini ang Kaban sang Kasugtanan sang Ginoo kag ang tanan nga balaan nga mga butang nga ginagamit sa pagsimba sa iya."

^dSALOMON: Ini nga ngalan nagikan sa Hebreo nga pulong "shalom" nga nagakahulogan "paghidait kag kalig-onan.”

1 MGA CRONICA - Kapitulo 21 <<<   >>> 1 MGA CRONICA - Kapitulo 23

1 MGA CRONICA - Kapitulo 21

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Gin-isip ni David ang mga Tawo

(2 Sam. 24:1-25)

1 Luyag ni Satanas gamuhon ang mga tawo sang Israel, gani ginsudyot niya si David sa pag-isip sang mga tawo. 

2 Ginmanduan ni David si Joab kag ang iban nga mga pangulo, "Libuta ninyo ang bug-os nga Israel, kag isipa ang mga tawo. Luyag ko mahibaluan ang ila kadamuon.”

3 Si Joab nagsabat, "Kabay nga padamuon sang Ginoo ang mga tawo sang Israel sing 100 ka pilo sang sa ila kadamuon karon! Mahal nga hari, sila tanan imo mga alagad. Ngaa nga himuon mo ini nga butang kag dalahigon mo ang bug-os nga pungsod sa pagpakasala?" 

4 Pero ginpatuman gid sang hari ini nga mando sa kay Joab. Naglakat si Joab, ginlibot niya ang bug-os nga pungsod sang Israel, kag dayon nagbalik sia sa Jerusalem. 

5 Ginsugid niya sa kay Haring David ang bug-os nga kadamuon sang mga tawo nga sarang makaentra sa pagkasoldado: 1,100,000 sa Israel, kag 470,000 sa Juda. 

6 Tungod kay wala maIuyagi ni Joab ang mando sang hari, wala niya pag-isipa ang mga tribo ni Levi kag ni Benjamin. 

7 Ang Dios wala maluyag nahanungod sang pag-isip sang mga tawo, gani ginsilutan niya ang Israel. 

8 Si David nagsiling sa Dios, "Daku gid ang akon pagpakasala tungod sang akon nahimo. Kon mahimo patawara ako, kay binuang ang akon ginhimo.”

9 Dayon ginsingganan sang Ginoo si Gad, ang palamangkutan ni David, 

10 "Lakat kag singgana si David nga papilion ko sia sining tatlo ka butang. Himuon ko ang bisan ano nga iya pilion." 

11 Ginkadtuan ni Gad si David kag ginsugiran sang ginsiling sang Ginoo, kag ginpamangkot sia, "Diin ang imo pilion sa sining tatlo ka butang?

12 Tatlo ka tuig nga gutom, ukon tatlo ka bulan nga pagpalagyo sa imo mga kaaway, ukon tatlo ka adlaw nga pagsalakay sang Ginoo sa inyo paagi sa iya espada kag magapadala sia sing pamalatian sa inyo duta, nga nagagamit sang iya anghel sa pagpamatay sa bug-os nga Israel? Ano ang imo isabat sa Ginoo?” 

13 Si David nagsabat sa kay Gad, "Nabutang ako sa ital-ital! Pero indi ako gusto nga silutan ako sang mga tawo. Ang Ginoo amo ang magsilot sa akon, kay maluloy-on sia.”

14 Gani ang Ginoo nagpadala sing pamalatian sa mga tawo sang Israel, kag 70,000 sa ila ang nagkalamatay. 

15 Ang Dios nagpadala sing anghel sa paglaglag sang Jerusalem, pero nagbaylo ang iya hunahona kag ginsingganan niya ang anghel, “Untati na! Husto na ina!” Ang anghel nagatindog sa Iuyo sang linasan ni Arauna, nga isa ka Jebusnon. 

16 Nakita ni David ang anghel nga nagatindog sa hangin, nga nagauyat sang iya espada, nga handa sa paglaglag sang Jerusalem. Dayon si David kag ang mga pangulo sang mga tawo—sila tanan nga nagabayu sing sako—naghapa sa duta. 

17 Nagpangamuyo si David, “O Dios, ako ang nakasala. Ako ang nagmando sa pag-isip sang mga tawo. Ano ang nahimo sining makalulooy nga mga tawo? O GINOO nga akon Dios, ako kag ang akon panimalay amo ang siluti, kag indi ang imo mga tawo.” 

18 Ang anghel sang Ginoo nagsugo sa kay Gad sa pagmando kay David sa paglakat kag sa pagpatindog sang isa ka altar para sa Ginoo sa may linasan ni Arauna. 

19 Gintuman ni David ang mando sang Ginoo, kag naglakat sia suno sa ginsiling sa iya ni Gad. 

20 Si Arauna kag ang iya apat ka mga anak nga lalaki nagalinas sang trigo. Sang makita nila ang anghel, ang iya mga anak nga lalaki nagpalagyo kag nagpanago.

21 Sang pagkakita ni Arauna nga nagapalapit si Haring David, naghalin sia sa linasan kag naghapa sa duta.

22 Si David nagsiling sa iya, "Ibaligya sa akon ang duog sa diin yara ang imo linasan, agod patindugan ko sing altar para sa Ginoo, sa pagpa-untat sang pamalatian. Bayaran ko ikaw sang iya bug-os nga bili." 

23 Si Arauna nagsiling, "Mahal nga hari, imo na lang ina, kag himoa ang luyag mo. Yari ang mga baka nga imo ihalad subong mga halad nga sinunog sa altar, kag yari ang mga gamit sang linasan nga imo gamiton subong mga gatong, kag trigo nga imo idulot. Ginahatag ko ini tanan sa imo.”

24 Pero ang hari nagsabat, "Indi mahimo, bayaran ko ikaw sang iya bug-os nga bili. Indi ako maghatag subong isa ka dulot sa Ginoo sang bisan ano nga imo kag sang butang nga wala ko mabayari."

25 Kag ginbayaran niya si Arauna sing 600 ka bilog nga bulawan.

26 Nagpatindog sia didto sing altar para sa GINOO kag nagdulot sing mga halad nga sinunog kag mga halad sa paghiambit. Nagpangamuyo sia kag ang Ginoo nagsabat sa iya paagi sa pagpadala sing kalayo halin sa langit sa pagsunog sang mga halad sa altar. 

27 Ang Ginoo nagsugo sa anghel sa pagbutang sang iya espada, kag nagtuman ang anghel.

28 Nakita ni David nga paagi sini, ang Ginoo nagsabat sang iya pangamuyo, gani nagdulot sing mga halad sa altar sa duog sang linasan ni Arauna. 

29 Ang balaan nga tolda sang GINOO, nga ginhimo ni Moises sa desierto, kag ang altar sa diin ang mga halad ginsunog, yara pa sadto nga tion sa duog nga ginasimbahan sa Gabaon. 

30 Pero si David wala makakadto didto sa pagsimba sa Dios, kay hinadlukan sia sang espada sang anghel sang Ginoo.

1 MGA CRONICA - Kapitulo 20 <<<   >>> 1 MGA CRONICA - Kapitulo 22

1 MGA CRONICA - Kapitulo 20

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Gin-agaw ni David ang Raba

(2 Sam. 12:26-31)

1 Sang madason nga tuig, sa panahon nga ang mga hari nagakadto sa inaway, ginpangulohan ni Joab ang mga hangaway kag gingubat ang duta sang Amon. Ginkibon nila ang siyudad sang Raba, pero si David nagpabilin sa Jerusalem. Ginsalakay ni Joab ang Raba kag ginlaglag ini.
2 Ang diosdios sang mga Amonhon nga si Milcom may korona nga bulawan nga nagabug-at sing 75 ka libra. May tampok ini nga isa ka malahalon nga bato, nga ginkuha ni David kag ginbutang sa iya korona. Nagkuha sia sing madamo nga mga pagkabutang sa siyudad.
3 Gindala niya ang mga tawo sang siyudad kag ginpaobra sila nga nagagamit sing lagari, sadol, kag wasay. Amo man ini ang iya ginhimo sa mga tawo sa tanan nga mga banwa sang Amon. Dayon sia kag ang iya mga tinawo nagbalik sa Jerusalem.

Ang Inaway batok sa mga Higante nga Filistinhon

(2 Sam. 21:15-22) 

4 Sang ulihi, nagsugod liwat ang inaway batok sa mga Filistinhon sa Gezer. Natabo ini sang pagpatay ni Sibecai nga taga-Husa, sang isa ka higante nga si Sipai, kag nalutos ang mga Filistinhon.
5 May isa pa ka inaway batok sa mga Filistinhon, kag si Elhanan nga anak ni Jair nagpatay kay Lami, utod nga lalaki ni Goliat nga taga-Gat, nga ang kadaku sang iya bangkaw pareho sang balayan sang tiral sang manughabol.
6 May isa pa gid ka inaway sa Gat, sa diin may isa ka higante nga may anom ka mga tudlo sa tagsa ka kamot kag anom ka mga tudlo sa tagsa ka tiil. Kaliwat sia sang mga higante sang una.
7 Ginhangkat niya ang mga Israelinhon, kag ginpatay sia ni Jonatan, anak sang utod nga lalaki ni David nga si Sama.

8 Ining tatlo nga ginpamatay ni David kag sang iya mga tinawo, mga kaliwat sang mga higante sa Gat.

1 MGA CRONICA - Kapitulo 19 <<<   >>> 1 MGA CRONICA - Kapitulo 21

1 MGA CRONICA - Kapitulo 19

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ginlutos ni David ang mga Amonhon kag ang mga Sirianhon

(2 Sam. 10:1-19)

1 Sang ulihi si Nahas nga hari sang Amon napatay kag ang iya anak nga si Hanun amo ang nanginhari.
2 Si David nagsiling, "Dapat gid ako magpakita sing kaayo sa kay Hanun subong sang ginhimo sang iya amay nga si Nahas sa akon." Gani si David nagpadala sing mga mensahero sa pagpabutyag sang iya pagbuylog sa iya kasubo. Sang pag-abot nila sa duta sang Amon kag nagpakigkita kay Haring Hanun,
3 ang mga panguIo sang mga Amonhon nagsiling sa hari, "Indi ka maghunahona nga si David nagpadala sini nga mga tawo sa pagpadungog sa imo amay kag sa pagbuylog sa imo kasubo. Ginpadala niya sila subong mga espiya sa pag-usisa sang duta, agod ila ini maagaw!”
4 Ginpadakop ni Hanun ang mga mensahero ni David, ginbarbasan ang ila mga bungot, gin-utod ang ila mga bayu tubtob sa balikawang, kag ginpalakat sila.
5 Nahuya gid sila magbalik pauli. Sang pagkabati ni David sang nahanabo, gintugonan niya sila sa pagpabilin sa Jerico kag indi magbalik tubtob maglaba liwat ang ila mga bungot.
6 Natalupangdan ni Haring Hanun kag sang mga Amonhon nga nanginkaaway nila si David, gani nagbayad sila sing 7,800,000 ka onsas nga pilak agod isuhol sa mga hangaway halin sa naibabaw nga Mesopotamia, kag halin sa Maaca kag Soba nga sakop sang Siria.
7 Ang 32,000 ka mga karuwahi nga ila ginhinakayan kag ang mga hangaway sang hari sang Maaca nag-abot kag naghimo sing kampamento malapit sa Medeba. Ang mga Amonhon naggwa man sa ila mga siyudad kag naghanda sa pagpakig-away.
8 Sang pagkahibalo ni David sang nagakahanabo, ginpadala niya si Joab kag ang bug-os nga hangaway.
9 Ang mga Amonhon naggwa kag nagpahamtang sang ila mga hangaway sa alagyan sang Raba nga amo ang kapital nga siyudad, kag ang mga hari nga nag-abot sa pagbulig nagpahamtang sang ila mga hangaway sa latagon.
10 Nakita ni Joab nga ang mga kaaway magasalakay sa ila sa atubangan kag sa likod, gani ginpili niya ang labing maayo nga mga soldado sang Israel kag ginpaatubang sila sa mga Sirianhon.
11 Gintugyan niya ang iban sang iya mga hangaway sa pagmando sang iya utod nga si Abisai, nga nagpahamtang sa ila sa pag-atubang sa mga Amonhon.
12 Ginsingganan sia ni Joab, "Kon makita ninyo nga ginalutos ako sang mga Sirianhon, magkari kamo kag buligi ako, kag kon ginalutos kamo sang mga Amonhon, makadto ako sa pagbulig sa inyo.
13 Magpakabakod kag magpakaisog kamo! Magpakig-away kita sing tudotudo para sa aton mga tawo kag para sa mga siyudad sang aton Dios. Kag kabay nga matuman ang kabubot-on sang Ginoo.”
14 Si Joab kag ang iya mga tinawo nagsalakay, kag ang mga Sirianhon nagpalagyo.
15 Sang makita sang mga Amonhon nga nagpalagyo ang mga Sirianhon, nagpalagyo sila sa kay Abisai pakadto sa siyudad. Dayon si Joab nagbalik sa Jerusalem.
16 Natalupangdan sang mga Sirianhon nga nalutos sila sang mga Israelinhon, gani nagdala sila sing mga hangaway halin sa mga probinsya sang Siria sa nasidlangan sang Eufrates kag gintugyan sila sa pagmando ni Sofac, ang pangulo sang mga hangaway ni Hadarezer.
17 Sang pagkahibalo sini ni David, gintipon niya ang mga hangaway sang Israel, nagtabok sila sa Jordan, kag ginpahamtang niya sila sa pag-atubang sa mga Sirianhon. Nagsugod ang inaway,
18 kag ginlutos kag ginpanglagas sang mga Israelinhon ang mga hangaway sang Siria. Ginpamatay ni David kag sang iya mga hangaway ang 7,000 ka Sirianhanon nga mga soldado nga nagasakay sa karuwahi, kag 40,000 ka mga soldado nga nagalakat lang. Ila man ginpatay si Sofac, ang panguIo sang mga hangaway sang Siria.
19 Sang matalupangdan sang mga hari nga sakop ni Hadarezer nga nalutos sang Israel, nagpakighidait sila kay David kag nagpaidalom sila sa iya paggahom.

20 Sugod sadto indi na gid magbulig ang mga Sirianhon sa mga Amonhon.

1 MGA CRONICA - Kapitulo 18 <<<   >>> 1 MGA CRONICA - Kapitulo 20