Si David Nanginhari sang Israel kag Juda
(2 Sam. 5:1-10)
1 Ang tanan nga mga tawo sang Israel nagkadto kay David sa Hebron kag nagsiling sa iya, "Kadugo mo kami.2 Sang una, sang si Saul pa ang aton hari, ginpangulohan mo ang mga tawo sang Israel sa inaway, kag ang Ginoo nga imo Dios nagsaad sa imo nga ikaw magapangulo sang iya mga tawo kag ikaw mangin-ila hari."
3 Gani ang tanan nga mga pangulo sang Israel nagkadto kay Haring David sa Hebron. Naghimo sia sing balaan nga kasugtanan sa ila, kag ginhaplasan nila sia subong hari sang Israel, suno sa ginsaad sang Ginoo paagi kay Samuel.
4 Si Haring David kag ang tanan nga mga Israelinhon naglakat kag nagsalakay sang siyudad sang Jerusalem. (Amo ini ang Jebus sang una, kag ang mga Jebusnon nga amo ang nahauna nga mga pumoluyo sang duta nagapuyo pa didto.)
5 Ginsingganan sang mga Jebusnon si David nga indi gid sia makasulod sa siyudad, pero naagaw ni David ang ila pamakod sa Sion, kag gintawag ini nga siyudad nga "Siyudad ni David. "
6 Si David nagsiling nga ang bisan sin-o nga makapatay sang nahauna nga Jebusnon manginpangulo sang hangaway! Si Joab nga anak ni Sarvia nag-una sa pagsalakay kag nanginpangulo.
7 Tungod kay si David nagpuyo sa sini nga pamakod, gintawag ini nga "Siyudad ni David."
8 Ginpatindog niya ang siyudad sa palibot sini, sugod sa duog nga gintampukan sa nasidlangan nga bahin sang bakulod. Ginkaayo ni Joab ang nabilin nga bahin sang siyudad.
9 Si David naggamhanan nga naggamhanan, tungod kay ang GINOO nag-upod sa iya.
Ang Isganan nga mga Soldado ni David
(2 Sam. 23:8-39)
10 Amo ini ang lista sang isganan nga mga soldado ni David. Upod sa nabilin nga mga tawo sang Israel, ginbuligan nila sia nga manginhari, suno sa ginsaad sang Ginoo, kag ginhimo nila ang ila masarangan agod manginmabakod ang iya ginharian.11 Ang nahauna amo ang Jasobeam, gikan sa kabaranggayan ni Hacmon, ang pangulo sang "Tatlo."v Nagpakig-away sia batok sa 300 ka mga tawo kag ginpatay niya sila tanan sang iya bangkaw.
12 Ang madason sa isganan nga "Tatlo" amo si Eleazar nga anak ni Dodo, gikan sa kabaranggayan ni Aho.
13 Upod kay David nagpakig-away sia batok sa mga Filistinhon didto sa Pas Damin. Didto sia sa talamnan sang sebada sang magpalagyo ang mga Israelinhon,
14 gani sia kag ang iya mga tinawo wala maghalin sa tunga sang talamnan kag nagpakig-away sa mga Filistinhon. Ang Ginoo naghatag sa ila sang daku nga pagdaog.
15 Isa ka adlaw ang tatlo sang 30 ka pangulo nga mga soldado nagkadto sa isa ka daku nga bato sa diin si David nagpabilin malapit sa kuweba sang Adullam, samtang ang isa ka grupo sang mga Filistinhon naghimo sing kampamento sa kapatagan sa Refaim.
16 Sadto nga tion, si David yara sa napamakuran nga bakulod, kag ang isa ka grupo sang mga Filistinhon nag-agaw sang Betlehem.
17 Ginhidlaw gid si David kag nagsiling sia, "Kon may yara kuntani nga makadala sa akon sing tubig nga ilimnon halin sa bubon nga yara sa puwerta sang Betlehem!"
18 Ang tatlo ka mga isganan nga soldado nagsulod sa kampo sang mga Filistinhon, nagkuha sing tubig sa bubon kag gindala ini kay David. Pero indi sia mag-inom sini, kundi gin-ula niya ini subong isa ka halad sa Ginoo,
 |
| Tatlo ka mga isganan nga soldado. (11:18) |
20 Ang utod nga lalaki ni Joab nga si Abisai amo ang pangulo sang "Isganan nga Katluan."w Nagpakig-away sia sa 300 ka mga tawo kag ginpamatay niya sila sang iya bangkaw, kag nanginbantog sia "Sa Katluan.''x
21 Sia amo ang labing bantog sang "Sa Katluan," kag nanginpangulo nila sia, pero indi gid sia pareho ka bantog sang sa "Tatlo.”
22 Si Benaya, anak nga lalaki ni Joiada, nga taga-Cabzeel, isa ka isganan nga soldado. Madamo ang iya nahimo nga nagapamatuod sang iya kaisog. Lakip sini, amo ang iya pagpatay sang duha ka bantog nga hangaway nga Moabnon. Isa sadto ka adlaw nga madamo ang yelo, nagpanaog sia sa lungib kag ginpatay ang isa ka leon.
23 Ginpatay man niya ang isa ka Egiptohanon, isa ka daku nga tawo nga nagataas sing pito kag tunga ka tapak, nga may daku kaayo nga bangkaw. Ginsalakay sia ni Benaya sang baston, gin-agaw niya ang bangkaw sa kamot sang Egiptohanon, kag gingamit niya ini sa pagpatay sa iya.
24 Amo ini ang maisog nga hinimuan ni Benaya, nga isa sang "Katluan."
25 Sia amo ang labing bantog sa "Katluan," pero indi sia pareho ka bantog sang "Tatlo." Ginhimo sia ni David nga pangulo sang iya mga gwardya.
26-47 Amo ini ang bantog nga mga hangaway:
Asael, utod ni Joab
Elhanan, anak nga lalaki ni Dodo, nga taga-Betlehem
Samot nga taga-Harod
Helez nga taga-Pelet
Ira, anak ni Iques, nga taga-Tecoa
Abiezer nga taga-Anatot
Sibecai nga taga-Husa
Elai nga taga-Aho
Maharai nga taga-Netofa
Heled, anak ni Baana, nga taga-Netofa
Itai, anak ni Ribai, nga taga-Gabaa nga sakop sang Benjamin
Benaya nga taga-Piraton
Hurai nga taga-kapatagan malapit sa Gaas
Abiel nga taga-Arba
Azmavet nga taga-Bahurim
Eliaba nga taga-Saalbon
Hasemy nga taga-Gison
Jonatan, anak ni Sage, nga taga-Arar
Ahiam, anak ni Sacar, nga taga-Arar
Elifal, anak ni Ur
Hefer nga taga-Mequerat
Ahia nga taga-Pelon
Hezro nga taga-Carmel
Naarai, anak ni Ezbai
Joel, utod ni Natan
Mibar, anak ni Hagri
Zelec nga taga-Amon
Naarai nga taga-Berot (sia amo ang manugdala sang hinganiban ni Joab nga anak ni Sarvia)
Ira kag Gareb nga taga-Itri
Urias nga Hethanon
Zabad, anak ni Alai
Adina, anak ni Siza (isa sia ka kilala nga katapo sang tribo ni Ruben kag may kaugalingon sia nga grupo sang katluan ka mga hangaway)
Hanan, anak ni Maaca
Josafat nga taga-Mithan
Uzias nga taga-Astarot
Sama kag Jeiel, mga anak ni Hotam, nga taga-Aroer
Jediael kag Joha, mga anak ni Simri, nga taga-Tiz
Eliel nga taga-Mahav
Jeribai kag Josabia, mga anak ni Elnaam
Itma nga taga-Moab
Eliel, Obed, ang Jaasiel nga taga-Zoba
vAng isa ka dumaan nga pagbadbad "Ang Tatlo" (tan-awa ang 2 Sam 23:8); sa Hebreo ''Ang Katluan.”
wAng isa ka dumaan nga pagbadbad Katluan; sa Hebreo Tatlo.
xAng isa ka dumaan nga pagbadbad "Sa Katluan" (tan-awa ang 2 Sam. 23:18); sa Hebreo "Sa Tatlo."
yHasem; sa Hebreo mga anak nga lalaki ni Hasem.
No comments:
Post a Comment