Paghanda sa Paghalin sang Kaban sang Kasugtanan
1 Si David nagpatindog sing mga balay sa Jerusalem nga iya pagagamiton. Naghanda man sia sing duog para sa Kaban sang Kasugtanan sang Dios, kag nagpatindog sia sing tolda para sa sini.2 Dayon nagsiling sia, "Ang mga Levita lamang amo ang dapat magdala sang Kaban sang Kasugtanan sang Dios, kay sila amo ang ginpili niya sa pagdala sini kag sa pag-alagad sa iya sa walay katapusan."
3 Gani gintipon ni David ang tanan nga mga tawo sang Israel sa Jerusalem sa pagdala sang Kaban sang Kasugtanan pakadto sa duog nga iya gin-aman para sa sini.
4 Dayon ginpatawag niya ang mga kaliwat ni Aaron kag ang mga Levita.
5 Halin sa kabaranggayan ni Coat nag-abot si Uriel, nga pangulo sang 120 ka mga katapo sang iya baranggay.
6 Halin sa kabaranggayan ni Merari nag-abot si Asaya, nga pangulo sang 220.
7 Halin sa kabaranggayan ni Gersom nag-abot si Joel, nga pangulo sang 130.
8 Halin sa kabaranggayan ni Elizafan nag-abot si Semaya, nga pangulo sang 200.
9 Halin sa kabaranggayan ni Hebron nag-abot si Eliel, nga pangulo sang 80.
10 Kag sa kabaranggayan ni Uziel nag-abot si Aminadab, nga pangulo sang 112.
11 Ginpatawag ni David ang mga pari nga amo sanday Sadoc kag Abiatar, kag ang mga Levita nga amo sanday Uriel, Asaya, Joel, Semaya, Eliel, kag Aminadab.
12 Ginsingganan niya sila, "Kamo ang mga pangulo sang mga kabaranggayan sang mga Levita. Pakabalaana ang inyo kaugalingon kag ang inyo kapareho nga mga Levita, agod sarang kamo makadala sang Kaban sang Kasugtanan sang Ginoo nga Dios sang Israel sa duog nga akon gin-aman para sa sini.
13 Wala kamo didto sang nahauna nga tion, gani ginsilutan kita sang Ginoo nga aton Dios, tungod kay wala kita magsimba sa iya suno sa dapat naton himuon.
14 Dayon ang mga pari kag mga Levita nagpakabalaan sang ila kaugalingon sa paghalin sang Kaban sang Kasugtanan sang Ginoo nga Dios sang Israel.
15 Ginyayungan ini sang mga Levita, suno sa ginsugo sang Ginoo kay Moises nga pagahimuon.
16 Ginsugo ni Moises ang mga pangulo sang mga Levita sa pagpili sing mga Levita sa pagkanta kag sa pagtukar sang mga arpa kag mga platilyos.
17-21 Halin sa mga kabaranggayan sang mga manug-amba, ginpili nila si Heman nga anak ni Joel, ang iya paryente nga si Asaf nga anak ni Berequias, kag si Etan nga anak ni Cusaias, sa kabaranggayan ni Merari sa pagtukar sang mga platilyos nga saway. Sa pagbulig sa ila ginpili nila ang masunod nga mga Levita sa pagtukar sang mataas sing bagay nga mga arpa: sanday. Zacarias, Jaazal, Semiramot, Jehiel, Uni, Eliab, Maasias kag Benaya. Sa pagtukar sang mga arpa nga manubo sing bagay ginpili nila ang mga Levita nga amo sanday Matitias, Elifelehu, Micnias, Azazias, kag ang mga gwardya sa Templo, Obed Edom kag Jeiel.
22 Si Kenanias ginpili nga magadumala sang mga musikero nga Levita tungod sang iya pagkasampaton sa musika.
23 Si Berequias kag si Elcana ang ginpili nga mangingwardya sang Kaban sang Kasugtanan.
24 Ang mga pari nga sanday Sebanias, Josafat, Natanael, Amasai, Zacarias, Benaya, kag Eliezer ginpili sa pagtukar sang mga trumpeta sa atubangan sang Kaban sang Kasugtanan. Si Obed Edom kag Jehias ginpili man sa pagbantay sang Kaban sang Kasugtanan.
Ang Kaban sang Kasugtanan Gindala sa Jerusalem
(2 Sam. 6:12-22)
25 Gani si David, ang mga pangulo sang Israel, kag ang mga pangulo sang mga hangaway nagkadto sa balay ni Obed Edom sa pagkuha sang Kaban sang Kasugtanan nga may daku nga pagkinasadya.26 Naghalad sila sing pito ka toro nga mga baka kag pito ka mga karnero, kay ang bendisyon sang Dios yara sa mga Levita nga nagadala sang Kaban sang Kasugtanan.
27 Si David nagasuksok sang malaba nga bayu nga lino nga malahalon, kag amo man ang mga musikero, si Kenanias nga ila pangulo, kag ang mga Levita nga nagdala sang Kaban. Si David nagasuksok man sang balaan nga paha nga lino.
28 Gani, ang tanan nga mga Israelinhon nagdala sang Kaban sang Kasugtanan pakadto sa Jerusalem nga may paghinugyaw, mga tunog sang trumpeta, mga budyong, kag mga platilyos kag mga tinukar sang arpa.
 |
| . . . nga may paghinugyaw. (15:28) |
No comments:
Post a Comment