1 MGA CRONICA - Kapitulo 14

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ang mga Ginhimo ni David sa Jerusalem 

(2 Sam. 5:11-16) 

1 Si Hiram nga hari sang Tiro nagpadala sing mga tinawo sa kay David sa pagpanalawsaw tuhoy sa negosyo. Nagpadala sia sa kay David sing mga troso nga sedro upod sa mga kantero kag mga panday sa pagpatindog sing palasyo.
2 Kag nahibal-an ni David nga ang Ginoo nagpamatuod sa paghimo sa iya nga hari sang Israel, kag nagpauswag sang iya ginharian tungod sa mga tawo sang Ginoo.
3 Didto sa Jerusalem, si David nagdugang sing mga asawa kag nagdamo ang iya mga anak nga lalaki kag babayi.
4 Amo ini ang mga ngalan sang iya mga anak nga lalaki nga nagkalatawo sa Jerusalem: sanday Samua, Sobab, Natan, Salomon,
5 Ibar, Elisua, Elpelet,
6 Noga, Nefeg, Jafia,
7 Elisama, Beeliada^a kag Elifelet.

Pagdaog batok sa mga Filistinhon 

(2 Sam. 5:17-25) 

8 Sang pagkabati sang mga Filistinhon nga si David amo na ang hari sang bug-os nga pungsod sang Israel, ang ila mga hangaway naglakat sa pagdakop sa iya. Naggwa si David sa pagsugata sa ila.
9 Nag-abot ang mga Filistinhon sa kapatagan sang mga Higante kag nagsugod sa pagpang-ati.
10 Nagpamangkot si David sa Dios, "Salakayon ko bala ang mga Filistinhon? Padag-on mo bala ako?" Ang Ginoo nagsabat, "Sigi, salakaya, kay padag-on ko ikaw!”
11 Gani ginsalakay sila ni David sa Baal Perazim kag ginlutos sila. Nagsiling sia, "Ang Dios naggamit sa akon sa pag-bulwang sang mga kaaway kaangay sang isa ka baha.” Gani yadto nga duog gintawag Baal Perazim.^b
12 Didto ginbayaan sang mga Filistinhon ang ila mga diosdios, kag nagmando si David nga sunogon sila.
13 Sa wala madugay ang mga Filistinhon nagbalik sa kapatagan kag nagsugod sa pag-ati sini liwat.
14 Sa liwat si David nagpamangkot sa Dios, kag ang Dios nagsabat, “Indi sila pagsalakaya sa atubangan, kundi maglibot ka sa pihak kag liputa sila malapit sa kahoy nga balsamo.
15 Kon mabatian mo ang lapaklapak sang mga tiil sa ibabaw sang mga kahoy, magsalakay ka dayon, kay ako magauna sa imo sa pagsalakay sang mga hangaway nga mga Filistinhon."
16 Gintuman ni David ang ginsiling sang Dios, kag gintabog ang mga Filistinhon pabalik sa Gabaon tubtob sa alagyan pakadto sa Gezer.
17 Ang pagkabantog ni David naglapnag bisan diin, kag ginhimo sang Ginoo, nga ang tagsa ka pungsod makahadlok sa iya.


^aBeeliada; ginatawag man nga Eliada sa 3:8.
^bBAAL PERAZIM: Ini nga ngalan sa Hebreo nagakahulogan “Ginoo sang Pagbulwang.”

1 MGA CRONICA - Kapitulo 13 <<<   >>> 1 MGA CRONICA - Kapitulo 15