Ang Pagkamatay ni Haring Saul
(1 Sam. 31:1-13)
1 Ang mga Filistinhon nagpakig-away batok sa mga Israelinhon sa bukid sang Gilboa. Madamo sang mga Israelinhon ang nagkalamatay didto, kag ang iban nagpalalagyo.2 Nalambot sang mga Filistinhon si Saul kag ang iya mga anak nga lalaki, kag ginpamatay ang iya mga anak nga sanday Jonatan, Abinadab, kag Malquisua.
3 Ang inaway malapuyot sa palibot ni Saul, kag naigo sia sang baslay sang kaaway kag malubha ang iya pilas.
4 Nagsiling sia sa pamatan-on nga nagadala sang iya mga hinganiban, "Gabuta ang imo espada kag patya ako, agod indi ako pagpintasan kag yagutaon sining mga di-diosnon nga mga Filistinhon." Pero ang pamatan-on hinadlukan gid sa paghimo sini. Gani, ginkuha ni Saul ang iya kaugalingon nga espada, ginpaatubang niya sa iya kaugalingon kag ginhap-an.
5 Nakita sang pamatan-on nga patay na si Saul, gani amo man ang iya ginhimo sa kaugalingon nga espada kag napatay man sia.
6 Gani si Saul kag ang iya tatlo ka mga anak nga lalaki nagkalamatay sing dungan kag natapos ang iya paghari.
7 Sang pagkabati sang mga Israelinhon nga nagpuyo sa kapatagan sang Jezreel nga ang mga hangaway nagpalalagyo kag si Saul kag ang iya mga anak nga lalaki nagkalamatay, ginbayaan nila ang ila mga banwa kag nagpalagyo. Dayon nag-abot ang mga Filistinhon kag gingamhan nila ang mga banwa.
8 Sang madason nga adlaw, ang mga Filistinhon nag-ati sang mga bangkay, kag nakita nila ang bangkay ni Saul kag sang iya mga anak nga nagahamyang sa bukid sang Gilboa.
9 Ginpugotan nila sing ulo si Saul, ginhublasan nila sia, kag nagpadala sila sing mga mensahero sa pagdala sang iya ulo kag mga hinganiban palibot sa bug-os nga Filistia sa pagsugid sang maayong balita sa ila mga diosdios kag sa ila mga kasimanwa.
10 Ginbutang nila ang iya mga hinganiban sa templo sang ila mga dios, kag ginpakabit ang iya ulo sa templo sang ila dios nga si Dagon.
11 Sang pagkahibalo sang mga pumoluyo sa Jabes nga sakop sang Galaad sang ginhimo sang mga Filistinhon sa kay Saul,
12 ang mga isganan nga mga lalaki naglakat kag ginkuha nila ang bangkay ni Saul kag ang mga bangkay sang iya mga anak nga lalaki, kag gindala nila ini sa Jabes. Ginlubong nila ang mga tul-an sa idalom sang kahoy nga terebinto, kag nagpuasa sila sing pito ka adlaw.
13 Si Saul napatay tungod kay nagmalalison sia sa Ginoo. Wala sia magtuman sang mga sugo sang Ginoo, Nagtinguha sia nga matuytoyan paagi sa pagpamangkot sa mga espiritu sang mga patay
14 sa baylo nga magpamangkot sia sa Ginoo. Gani ginpatay sia sang GINOO, kag ginhatag ang gahom sang ginharian sa kay David nga anak ni Jesse.
No comments:
Post a Comment