Ang Nahauna nga mga Sumolunod ni David sa Tribo ni Benjamin
1 Madamo nga mga tawo ang nag-upod kay David sang nagapuyo sia sa Ziclag, sa iya pagpanago sa kay Haring Saul nga anak ni Cis. Sila tanan mga batid kag masaligan nga mga hangaway,2 mga katapo sang tribo ni Benjamin, nga amo man ang tribo ni Saul. Sarang sila makapana ukon makalabyog sing bato sang ila tuo ukon wala nga kamot.
3-7 Ang ila mga pangulo amo sila ni Ahiezer kag Joas, mga anak ni Semaa, nga taga-Gabaa. Amo ini ang mga soldado:
Jeziel kag Pelet, mga anak ni Azmavet
Beraca kag Jehu, nga taga-Anatot
Ismaias, nga taga-Gabaon, isa ka isganan nga soldado kag isa sang mga pangulo sang "Katluan”
Jeremias, Jahaziel, Johanan, kag Jozabad, nga taga-Gedera
Eluzai, Jerimot, Bealias, Semarias, Sefatias, nga taga-Haruf
Elcana, Isias, Azarel, Joezer, kag Jasobeam, gikan sa kabaranggayan ni Core
Joela kag Zebadias, mga anak ni Jeroham nga taga-Gedor.
Ang mga Sumolunod ni David halin sa Tribo ni Gad
8 Amo ini ang mga ngalan sang isganan kag batid nga mga hangaway halin sa tribo ni Gad nga nag-upod sa guban ni David sang didto sia sa pamakod sa desierto. Mga sampaton sila sa pag-uyat sing taming kag bangkaw, subong sila kaisog sang mga leon, kag subong kadasig sang usa.9-13 Suno sa ila rangko amo ini ang masunod halin sa ibabaw paidalom: Ezer, Obadias, Eliab, Mismana, Jeremias, Atai, Eliel, Johanan, Elzabad, Jeremias, Macbanai.
14 Ang iban sini nga mga tawo nga halin sa tribo ni Gad mataas nga mga opisyal nga may 1,000 ka mga tinawo, kag ang iban mga kabulig nga mga opisyales nga may 100 ka mga tinawo.
15 Sa nahauna nga bulan sang tuig sang pag-awas sang suba sang Jordan, nagtabok sila, kag ginpaaplaag nila ang mga tawo nga nagpuyo sa mga kapatagan sa nasidlangan kag nakatundan sang suba.
Ang mga Sumolunod halin sa Tribo ni Benjamin kag ni Juda
16 Isa ka tion may grupo sang mga tawo halin sa mga tribo nanday Benjamin kag Juda nga nagkadto sa pamakod sa diin nagatener si David.17 Ginsugata sila ni David kag ginsingganan, "Kon nagakari kamo subong mga abyan sa pagbulig sa akon, ginaabiabi ko kamo. Mag-upod kamo sa amon. Pero kon ang inyo tuyo amo ang pagtugyan sa akon sa akon mga kaaway, bisan wala ako magtinguha sa pagsakit sa inyo, ang Dios sang aton mga katigulangan magasilot gid sa inyo.”
18 Ang isa sa ila, si Amasai, nga san ulihi nanginpangulo sang “Katluan,” gingamhan sang espiritu halin sa Dios, kag nagsinggit sia, “O David, nga anak ni Jesse, imo kami! Kabay nga magmadinalag-on ka kag ang mga nagaupod sa imo!” Gin-abiabi sila ni David kag ginhimo nga mga opisyales sang iya mga hangaway.
Ang mga Sumolunod halin sa Tribo ni Manases
19 Ang iban nga mga hangaway halin sa tribo ni Manases nagbuylog sa guban ni David sang paglakat niya up od sa mga Filistinhon sa pagpakig-away batok sa kay Haring Saul. (Ang matuod nga wala gid man sia magbulig sa mga Filistinhon, tungod kay ang ila mga pangulo nagpapauli sa iya sa kahadlok nga basi itugyan niya sila sa iya anay agalon nga si Saul.)20 Ang masunod amo ang mga hangaway nga nag-upod kay David sang pagkadto niya sa Ziclag: Adna, Jozabad, Jediael Micael, Jozabad, Eliu, kag Zilletai. Sa Manases kadaisa sa ila nagpangulo sang 1,000 ka mga tinawo.
21 Nag-alagad sila sa kay David subong mga pangulo sang iya mga hangaway, tungod kay sila tanan mga bantog nga mga hangaway. Sang ulihi nangin-opisyales sila sang mga hangaway sang Israel.
22 Halos adlaw-adlaw may bag-o nga mga tawo nga nagadugang sa mga hangaway ni David, sa bagay nga nagdamo na gid ang iya mga soldado.
Ang Listahan sang mga Hangaway ni David
23-37 Madamo nga batid nga mga soldado ang nag-upod sa hangaway ni David sa Hebron sa pagbulig sa iya nga manginhari sa pagbulos kay Saul suno sa ginsaad sang Ginoo. Amo ini ang ila kadamuon:Juda: 6,800 ka mga tawo nga lupit sa hinganiban nga may mga taming kag mga bangkaw;
Simeon: 7,100 ka batid nga mga hangaway;
Levi: 4,600 ka mga tawo;
Ang mga sumolunod ni Joiada nga kaliwat ni Aaron: 3,700 ka mga tawo;
Ang mga himata ni Sadoc, isa ka pamatan-on kag isganan nga hangaway: 22 ka mga pangulo;
Benjamin (ang tribo ni Saul): 3,000 ka mga tawo (ang kalabanan nga tinawo ni Benjamin nag-unong kay Saul);
Efraim: 20,800 ka mga hangaway nga bantog sa ila kaugalingon nga mga kabaranggayan;
Nakatundan nga Manases: 18,000 ka mga tawo nga ginpili sa paglakat kag sa paghimo kay David nga hari;
Isacar: 200 ka mga pangulo, upod sa mga tinawo sa idalom sangi la pagmando (amo ini nga mga tawo ang nakahibalo kon ano ang dapat himuon sang Israel kag kon ano ang labing maayo nga tion sa paghimo sini);
Zabulon: 50,000 ka mga tawo nga mainunongon kag masaligan nga handa sa pagpakig-away, nga batid sa paggamit sang tanan nga sahi sang hinganiban.
Neftali: 1,000 ka mga pangulo upod sang 37,000 ka mga nga may mga taming kag mga bangkaw;
Dan: 28,600 ka batid nga mga hangaway;
Aser: 40,000 ka mga tawo nga handa sa pagpakig-away;
Mga tribo sa sidlangan sang Jordan—Ruben, Gad, kag ang nasidlangan nga Manases: 120,000 ka mga tawo nga nahanas sa paggamit sang bisan ano nga sahi sang hinganiban.
38 Ini tanan nga mga hangaway nga handa sa pagpakig-away, nagkadto sa Hebron, nga nagpamat-od sa paghimo kay David nga hari sa bug-os nga Israel. Ang tanan nga mga tawo sang Israel nag-ugyon sa amo nga tinutoyo.
39 Nagpabilin sila didto sing tatlo ka adlaw upod sa kay David, nga nagakinasadya sa pagkinaon kag pag-ininom sang ginhanda sang ila mga kasimanwa para sa ila.
40 Halin sa pinakamalayo nga naaminhan nga mga tribo nanday Isacar, Zabulon, kag Neftali, may mga tawo nga nag-abot nga nagadala sing mga asno, mga kamelyo, mga mula, kag mga baka nga nakargahan sing mga kalan-on—arina, mga pasas, mga higos, bino, kag lana sang olivo. Nagdala man sila sang mga baka kag mga karnero nga ilihawon. Ini tanan nagpakita sang pagkinasadya nga nabatyagan sa bug-os nga pungsod.
No comments:
Post a Comment