1 MGA CRONICA - Kapitulo 13

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29

Ang Kaban sang Kasugtanan Ginkuha sa Siyudad sang Jearim 

(2 Sam. 6:1-11) 

1 Si David nagpakigsapol sa tanan nga mga pangulo sang mga guban sang tag-1,000 kag tag-100 ka mga tawo.
2 Dayon nagpahibalo sia sa mga tawo sang Israel nga nagtipon didto, “Kon luyag kamo kag kon amo ini ang kabubot-on sang Ginoo nga aton Dios, magpadala kita sing mga mensahero sa iban naton nga mga kasimanwa, kag sa mga pari kag mga Levita sa ila mga banwa, kag singganon sila sa pagtipon diri upod sa aton.
3 Dayon malakat kita kag kuhaon naton ang Kaban sang Kasugtanan sang Dios nga ginpatumbayaan sang si Saul pa ang hari.”
4 Naluyagan ini sang mga tawo, kag nagpasugot sila.
5 Gani, gintipon ni David sing tingob ang mga tawo sang Israel gikan sa bug-os nga pungsod halin sa dulonan sang Egipto sa nabagatnan pakadto sa taklaran sang Hamat sa naminhan. Nagtipon sila sa pagdala sang Kaban sang Kasugtanan halin sa siyudad sang Jearim.
6 Si David kag ang mga tawo sang Israel nagkadto sa siyudad sang Baala, nga amo ang siyudad sang Jearim, sa kadutaan sang Juda, sa pagkuha sang Kaban sang Ginoo, nga nagarepresentar sang langitnon nga trono sang Ginoo.
7 Ginkuha nila sa balay ni Abinadab ang Kaban sang Kasugtanan kag ginbutang ini sa isa ka bag-o nga karo. Si Uza kag si Ahio nagpaguyod sang karo,
8 samtang si David kag ang tanan nga mga tawo sang Israel nagsaot sa kasadya sa pagpadungog sa Dios. Nagkanta sila kag nagtukar sang mga arpa, mga bumbo, mga platilyos, kag mga trumpeta.
9 Sang makaabot sila sa linasan ni Quidon, nadusmo ang baka, kag gindab-ot ni Uza ang Kaban sang Kasugtanan kag gin-uyatan.
10 Sa gilayon naakig ang Ginoo kay Uza, kag ginpatay sia sang GINOO, tungod kay gintandog niya ang Kaban. Didto napatay sia sa atubangan sang Dios.
11 Naakig gid si David, kay sa iya kaakig ginsilutan sang Ginoo si Uza. Gani, halin sadto gintawag niya yadto nga lugar nga Perez Uza.^z
12 Dayon si David hinadlukan sa Dios kag nagsiling, "Karon, ano na lang ang pagdala ko sang Kaban sang Kasugtanan?"
13 Gani wala ini pagdalha ni David sa Jerusalem. Sa baylo, ginbilin niya ini sa balay sang isa ka tawo nga si Obed Edom, nga taga-siyudad sang Gat.
14 Nagpabilin ini didto sing tatlo ka bulan, kag ang Ginoo nagbendisyon sang panimalay ni Obed Edom kag sang tanan niya nga pagkabutang.


^zPEREZ UZA: Ini nga ngalan sa Hebreo nagakahulogan "Pagsilot kay Uza."

1 MGA CRONICA - Kapitulo 12 <<<   >>> 1 MGA CRONICA - Kapitulo 14