"Ang bisan sin-o nga Nagasunod sa Akon Indi na gid Maglakat sa Kadudolman"

Liturhiya sang Pulong

(Lunes, Abril 8, 2019)

Ang Pagbasa gikan sa Libro ni:

Daniel nga Propeta 13:1-9, 15-17, 19-30, 33-62

Sadto nga mga inadlaw; didto sa Babilonia, may isa ka tawo nga ginahingalanan kay Joaquim nga nakapangasawa kay Susana nga anak ni Hilkias. Matahom ini si Susana kag matinuohon sa Dios. Ang iya mga ginikanan mga hudiyo nga diosnon, kag ila gin-atipan ang ila mga anak kag ginpadaku sa pagpangabuhi suno sa Kasugoan ni Moises. Manggaranon gid si Joaquim. May malapad kag matahom nga hardin si Joaquim. May malapad kag matahom nga hardin sa palibot sang iya balay, kag sing masunson, ang iban nga mga Hudiyo nagatalabuay didto sa ila pagsinapol tungod kay daku gid ang ila pagtahod kay Joaquim. Ang tanan nga may mga panumbongon nagakadto man sa balay ni Joaquim sa diin ang duha ka hukom nagabista sining mga panumbongon. Ining duha ka mga hukom bag-o pa lamang sa ila palangakuan. Tuhoy sa ila nga duha, ang Ginoo nagsiling, "May kalautan sa Babilonia; ang mga hukom nakulangan sa ila paghatag sing pagtuytoy sa mga tawo." Kinabatasan ni Susana ang paglakat-lakat sa hardin sa tagsa ka ugtong adlaw sa tapos makapauli ang tanan agod magpaniaga. Ang duha ka hukom nabihag sang katahom ni Susana kag gani nagpaulihi sila sa pagpauli agod ila makita si Susana. Daku gid ang kaluyag nila kay Susana nga sang ulihi nadulaan sila sing gana sa pagpangadi kag sa ila mga tulomanon subong mga hukom. Gani nagbantay sila sang nagakaigo nga kahigayunan. Sang isa ka adlaw, si Susana nga naupdan sang duha niya ka suloguon, nagkadto sa hardin suno sa iya kinabatasan. Wala na didto sing tawo luwas lamang sa duha ka mga hukom nga nagpanago sa pagbantay sa iya. Magin-ot yadto nga adlaw kag gani ginpakamaayo ni Susana ang pagpaligo. Iya ginsilingan ang iya mga suloguon, “Dalhi ninyo ako diri sang lana kag agwa para sa akon pagpaligo, kag siraduhi ninyo ang mga ganhaan agod nga indi ako matublag diri." Sang makahalin ang mga suloguon, ang duha ka mga hukom naggwa sa ila ginpanaguan kag nagdalagan padulong kay Susana kag nagsiling sila, “Sirado ang mga ganhaan kag wala sing may makakita sa aton. Nagabalingaso kami sa pagpakighilawas sa imo, gani ihatag sa amon ang amon ginahandom. Kon indi ka magpasugot, magakadto kami sa korte kag magasumpa nga nakita ka namon nga ginpapauli mo ang imo mga suloguon agod nga mag-isahanon ka upod sa isa ka pamatan-on.” Naghibubon-ot si Susana kag nagsiling, "Wala ako sing pasingadtuan. Kon magpasugot ako sa inyo sarang ako mapatay tungod sa sala nga adulteryo. Kon indi ako magpasugot, inyo ako gihapon maangkon. Pero mas maayo nga indi ako magpasugot maskin maangkon ninyo ako sang sa magpakasala ako batok sa Ginoo. Dayon nagsinggit sia sa mabaskog nga tingog kag ang duha ka mga hukom nagsinggit man sang mga panumbungon batok sa iya samtang ang isa sa ila nagdalagan sa pagbukas sang mga ganhaan. Sang pagkabati sang mga suloguon sa balay sang singgit, gilayon nga nagdalagan sila sa hardin paagi sa likod nayon nga ganhaan agod ila masayasat kon ano ang natabo kay Susana. Ang mga hukom nagsaysay sang ila istorya kag ang mga suloguon nakibot kag nagbatyag sing kahuya. Ina nga mga butang wala gid natabo batok kay Susana. Sang madason nga adlaw sa tapos nga makatipon ang mga tawo sa balay ni Joaquim, nag-abot ang duha ka mga hukom nga nagpamat-od sing lubos sa pagdangat sang ila malaut nga tinutuyo sa pagpatay kay Susana. Sa atubangan sang tanan, nagsiling sila, "Pakadtoa diri si Susana nga anak ni Hilkias kag asawa ni Joaquim." Sang mag-abot si Susana, kaupod niya ang iya mga ginikanan, kabataan kag ang tanan niya nga mga kaparyentihan. Naghibi ang mga ginikanan ni Susana kag ang tanan nga yadto didto. Dayon nagtindog ang duha ka hukom sa atubangan sang mga tawo, gintungtong nila ang ila mga kamot sa ulo ni Susana kag nagpamuno sa ila mga panumbungon batok sa iya. Naghibi si Susana pero nagtangla sia sa langit tungod kay nagsalig sia sa Ginoo. Ang duha ka mga hukom naghatag sining panaksihon: "Nagalakat kami sa hardin sang magsulod ini nga babayi kaupod ang duha niya ka mga suloguon. Ginsiraduhan niya ang mayor nga ganhaan kag iya ginmanduan ang iya mga suloguon sa pagpauli. Dayon ang pamatan-on nga nagapanago sa hardin nagkadto sa iya kag naghulid sila nga duha. Sa pamusod kami sing hardin, kag sang makita namon ang nagakatabo, nagdalagan kami padulong sa ila kag nadakpan gid namon sila. Gindakop namon ang pamatan-on, pero makusog sia sang sa amon. Nagdalagan sia kag gin-abrihan ang ganhaan kag nagpalagyo, pero amon ginhawiran ini nga babayi. Ginpamangkot namon sia kon sin-o yadtong lalaki pero indi sia magsugid. Nagasumpa kami nga matuod ang amon panaksihon.” Tungod kay ang duha dili lamang mga lider sang komunidad kundi subong man nga hukom, ang mga tawo nagpati sa ila istorya kag ginpamatbatan nila nga patyon si Susana. Dayon si Susana nagsinggit sa mabaskog nga tingog, “O  walay katapusan nga Dios, wala sing sarang matago sa imo; imo nahibaluan ang tanan sa wala pa ini matabo. Yari ako nga palatyon, pero ikaw nakahibalo nga wala ako sing sala, nga ining mga tawo nagabinutig. Ngaa bala nga kinahanglan nga patyon ako?” Nabatian sang Ginoo ang pangamuyo ni Susana kag ginpadala niya ang pamatan-on nga si Daniel sa paghambal samtang nga gindala si Susana agod patyon. Nagsinggit si Daniel, “Wala ako sing labot sa kamatayon sina nga babayi!” Nagbalikid ang tanan sa pagtulok sa iya kag nagpamangkot sila, “Ano ang buot mo silingon?” Nagtindog si Daniel sa atubangan nila kag nagsiling, “Mga tawo sang Israel, ano mga buang kamo? Ginpanginmalaut ninyo ining Israelinhon nga babayi tungod lamang sa panaksihon nga subong sina? Wala gani ninyo gintinguhai ang pagtukib sang kamatuoran. Bistahon liwat ini nga kaso. Ining mga tawo naghatag sang bulig nga panaksihon.” Gani ang tanan nga mga tawo nagbalik sa duog sa diin ginhiwat ang pagbista kag ang mga opisyal nagsiling kay Daniel, “Ang Dios naghatag sa imo sang kaalam nga labaw sa masarangan sang imo edad, gani kari ka sa pag-upod sa amon kag isaysay sa amon ang luyag mo isiling.” Si Daniel nagsiling sa ila, “Separaha ninyo ang duha ka mga hukom kay usisaon ko sila sing tag-isaisa.” Dayon si Daniel nagtawag sang nahauna nga hukom kag nagsiling, “Ikaw malaut nga tigulang, karon pagasabton mo ang tanan nga mga sala nga imo nabuhat. Nagpamatbat ka sang wala nagakaigo nga mga paghukom. Imo ginsilutan ang mga wala sing sala kag ginhilway mo ang mga may sala walay sapayan nga ang Ginoo nagsiling, ‘Indi pag-ipapatay ang mga inosente.’ Karon kon imo nakita sing matuod ang paghulid sang duha, isugid sa akon kon sa idalom sang ano nga kahoy sila nagbuhat sini?” Ang hukom nagsabat, “Sa idalom sang kahoy nga ang duga ginabuhat nga goma.” Si Daniel nagsiling, “Maayo! Ina nga pagbinutig pagabayaran sang imo kabuhi. Ang anghel sang Ginoo namanduan na sa pagpihak sa imo.” Dayon ginpalayo ang nahauna nga hukom kag gindala ang ikaduha sa atubangan ni Daniel. Si Daniel naghambal sa hukom, “Ikaw daw taga-Canaan ka kag indi taga-Judea. Ang katahom sining babayi nagpadulom sang imo paghukom, kag ang kaibog nga lawasnon nagpagarok sang imo panghunahona. Natuman mo ang imo mga handom sa mga babayi sang Israel tungod kay nahadlok sila sa imo, pero yari karon ang babayi sang Juda nga wala nagpasugot sa imo. Karon, isugid sa akon kon sa idalom sang ano nga kahoy sila naghulid.” Nagsabat sia, “Sa idalom sang isa ka daku nga akasya.” Si Daniel nagsiling, “Maayo! Ang imo pagbinutig pagabayaran sang imo kabuhi. Ang anghel sang Ginoo nagahulat nga nagauyat sang espada sa pagpihak sa imo. Dayon madula kamo nga duha.” Dayon ang tanan nagsinggit kag nagdayaw sa Dios nga nagluwas sa yadtong nagasalig sa iya. Naakig sila batok sa duha ka mga hukom kay ginpamatud-an ni Daniel nga nagbutig sila sa idalom sang pagsumpa. Ang Kasugoan ni Moises nagasiling nga ang tawo nga nagahatag sang binutig nga panaksihon magabaton sang silot nga ginpamatbat sa tawo nga ginsumbong. Gani ang duha ka hukom ginpapatay kag naluwas ang kabuhi sang babayi nga wala sing sala.

Salmo sa Pagsabat:

Mga Salmo 23:1-3, 3-4, 5, 6

(S) Bisan pa nagaagi ako sa dalan nga tama kadulom, indi gid ako mahadlok, O Ginoo kay ikaw nagaupod sa akon!

Ang Ginoo amo ang akon manugbantay; yara ang tanan nga ginakinahanglan ko. Iya ako ginapapahuway sa mga latagon nga may malagtom nga hilamon, kag iya ako ginatuytoyan sa mga linaw sang matin-aw nga tubig. Ginahatagan niya ako sing bag-o nga kusog. (S)
Ginatuytoyan niya ako sa husto nga dalan suno sa iya ginsaad. Bisan pa nagaagi ako sa dalan nga tama kadulom, indi gid ako mahadlok, O Ginoo, kay ikaw nagaupod sa akon! Ang imo baston kag ang imo sungkod nagaapin sa akon. (S)

Bisan pa nagaagi ako sa dalan nga tama kadulom. (23:4)

Ginabutangan mo ako sa lamesa sing madamo nga pagkaon sa diin makit-an ako sang tanan ko nga mga kaaway, ginhisuan mo sing lana ang akon ulo sa pag-abiabi sa akon, kag ginpaawas mo ang akon kupa. (S)
Sa pagkamatuod, ang imo kaayo kag gugma mangin akon samtang nga nagakabuhi pa ako, kag ang imo balay mangin akon puloy-an sa walay katubtoban. (S)

Sa Wala pa ang Ebanghelyo:

Ezequiel 33:11

Wala ako nagakalipay sa kamatayon sang makasasala, siling sang Ginoo, kundi nga mag-untat sia sa pagpakasala kag magkabuhi.

Ang Pagbasa sang Santos nga Ebanghelyo suno kay:

San Juan 8:12-20

Si Jesus naghambal liwat sa mga tawo, “Ako amo ang kapawa sang kalibutan. Ang nagasunod sa akon indi na gid maglakat sa kadudolman, kundi may kapawa sang kabuhi.” Ang mga Fariseo nagsiling sa iya, “Karon nagapanaksi ikaw sa imo man lang kaugalingon. Gani ang imo ginasiling indi mapatihan.” Si Jesus nagsabat, “Bisan pa nga ako nagapanaksi sa akon man lang kaugalingon, ang akon ginasiling matuod, kay nahibaluan ko kon diin ako nagikan kag kon diin ako makadto. Kamo inyo wala makahibalo kon diin ako nagikan kag kon diin ako makadto. Ang inyo mga paghukom tawuhanon lamang. Ako akon wala nagahukom bisan kay sin-o. Pero kon maghukom gid man ako, ang akon paghukom matarong, kay indi lamang ako ang nagahukom, kundi duha kami sang Amay nga nagpadala sa akon. Nasulat sa inyo Kasugoan nga kon magsinanto ang panaksihon sang duha ka tawo, ang ila pagpanaksi matuod. Ako nagapanaksi sa akon kaugalingon, kag ang Amay nga nagpadala sa akon nagasaksi man sa akon.” Ginpamangkot nila si Jesus, “Diin bala ang imo amay?” Si Jesus nagsabat, “Wala kamo makakilala sa akon ukon sa akon Amay. Kuntani kon nakilala ninyo ako, makilala man ninyo ang akon Amay.” Ini tanan ginsiling ni Jesus sa kuwarto nga ginataguan sang mga kolekta, sang nagpanudlo sia sa templo. Kag wala sing may nagdakop sa iya, kay wala pa mag-abot ang iya tion.

Abril 7 | Abril 9