Ang mga Pagdaog ni David sa Inaway
(2 Sam. 8:1-18)
1 Sang ulihi ginsalakay ni David ang mga Filistinhon kag ginlutos sila. Gin-agaw niya ang siyudad sang Gat kag ang iya mga kabaryuhanan sa palibot gikan sa ila paggahom.2 Iya man ginlutos ang mga Moabnon, kag nangin-iya sila mga sakop nga nagabayad sing buhis sa iya.
3 Dayon, ginsalakay ni David si Haring Hadarezer sang Soba, malapit sa kadutaan sang Hamat, kay si Hadarezer nagtinguha sa paggahom sang nailaya nga suba sang Eufrates.
4 Gin-agaw ni David ang iya 1,000 nga mga karuwahi, 7,000 nga mga soldado nga nagasakay sa kabayo, kag 20,000 nga mga soldado nga nagalakat lang. Nagbilin sia sing mga kabayo nga para sa 100 ka mga karuwahi kag ginpamiang niya ang iban.
5 Ang mga Sirianhon sang Damasco nagpadala sing hangaway sa pagbulig kay Haring Hadarezer; ginsalakay sila ni David kag ginpamatay ang 22,000 ka mga soldado.
6 Dayon naghimo sia sing mga kampamento sa ila duta para sa mga hangaway, kag nanginsakop niya sila nga nagabayad sing buhis sa iya. Ginpadaog sang Ginoo si David bisan diin sia magkadto.
7 Gin-agaw ni David ang mga taming nga bulawan nga ginadala sang mga opisyales ni Hadarezer kag gindala niya ini sa Jerusalem.
8 Nagkuha man sia sing madamo nga mga saway halin sa mga siyudad sang Tibha kag Cun nga gingamhan ni Haring Hadarezer. Sang ulihi gingamit ni Salomon ini nga saway sa paghimo sing daku nga kawa, mga haligi, kag mga gamit nga saway para sa Templo.
9 Si Haring Toi sang Hamat nakabati nga si David naglutos sang bug-os nga hangaway ni Hadarezer.
10 Gani ginpadala niya ang iya anak nga si Horam sa pag-abiabi sa kay Haring David kag sa pagpangibulahan sa iya tungod sang iya pagdaog batok kay Hadarezer, nga nag-away kay Toi sa madamo nga beses. Si Horam nagdala sa kay David sing mga regalo nga nahimo sa bulawan, pilak, kag saway.
11 Ginhalad ini ni Haring David agod gamiton sa pagsimba, lakip ang mga pilak kag bulawan nga iya ginkuha sa mga pungsod nga iya ginpangdaog nga amo ang masunod: Edom, Moab, Amon, Filistia, kag Amalec.
12 Si Abisai nga anak ni Sarvia, naglutos sang mga taga-Edom sa kapatagan sang Asin kag nagpamatay sang 18,000 sa ila.
13 Naghimo sia sing mga kampamento para sa mga hangaway sa bug-os nga Edom, kag ang mga tawo didto nanginsakop ni Haring David. Ang Ginoo nagpadaog kay David bisan diin sia magkadto.
14 Si David naggahom sa bug-os nga Israel kag ginpat-od nga ang iya mga sakop ginatratar sing nagakaigo kag matarong.
15 Si Joab nga anak ni Sarvia amo ang pangulo sang mga hangaway. Si Josafat nga anak ni Ahilud amo ang gintugyanan sang maragtas.
16 Si Sadoc nga anak ni Ahitub kag si Abimelec nga anak ni Abiatar, amo ang mga pari. Si Seraya amo ang sekretaryo sang korte.
17 Si Benaya nga anak ni Joiada amo ang pangulo sang mga gwardya ni David nga mga Keretnon kag mga Peletnon, kag ang mga anak nga lalaki ni David may mataas nga mga palangakuan sa iya ginharian.
cSeraya (tan-awa ang 2 Sam. 8:17); sa Hebreo Savsa.
No comments:
Post a Comment