"Nakabaton Kamo nga Wala sing Bayad - Maghatag Kamo nga Indi Magpabayad"

Liturhiya sang Pulong

(Huwebes, Hulyo 11, 2019)

San Benito, Abad

Ang Pagbasa gikan sa Libro sang:

Genesis 44:18-21, 23-29; 45:1-5

   Si Juda nagkadto kay Jose kag nagsiling, “Kon mahimo, sir, tugoti ako sa pagsugid sa imo sang tanan. Indi ka magkaakig sa akon kay ikaw subong gid sa hari. Sir, nagpamangkot ka sa amon, ‘May amay pa kamo ukon utod?’ Nagsabat kami, ‘May amay kami nga tigulang na, kag utod nga bata pa nga natawo sa iya sang tigulang na sia. Ang utod sang bata patay na, kag sia na lang ang bata ni nanay niya ang nabilin nga buhi. Palangga gid sia sang iya amay.’ Sir, nagsiling ka sa amon,‘Dalha sia diri agod makita ko sia.’ Dayon, sir, nagsiling ka, ‘Indi na kamo magpakita sa akon kon indi ninyo madala upod sa inyo ang inyo kamanghuran nga utod.’

   “Sang pagbalik namon sa amon amay ginsugiran namon sia sang imo ginsiling. Dayon nagsiling sia, ‘Balik kamo kag magbakal sing diutay nga pagkaon para sa aton.’ Nagsabat kami, ‘Indi kami makalakat. Indi kami makapakita sa tawo kon indi kaupod namon ang amon kamanghuran nga utod. Malakat lamang kami kon upod sa amon ang amon kamanghuran nga utod.’ Ang amon amay nagsiling sa amon, ‘Nakahibalo kamo nga ang akon asawa nga si Raquel nagbata sing duha lang ka anak nga lalaki sa akon. Ang isa sa ila wala na sa akon. Ayhan ginkusnit sia sang talunon nga mga sapat, kay wala ko na gid sia makita. Karon kon kuhaon ninyo ining isa sa akon, kag kon may matabo sa iya, pakaghaon ninyo ako sing tuman sa akon katigulangon kag mapatay na lang ako.’

   Si Jose indi na makapugong sang iya kaugalingon sa atubangan sang tanan nga nagaalagad sa iya, gani, ginmanduan niya sila tanan sa paggowa. Gani, wala sing iban nga tawo nga nagatambong sang pagsugid ni Jose sa iya mga utod kon sin-o sia. Tudo gid ang iya urahab sa bagay nga ang mga Egiptohanon nakabati sini kag ginsugid nila ini sa palasyo sang hari. Si Jose nagsiling sa iya mga utod, “Si Jose ako. Buhi pa bala ang akon amay?” Pero ang iya mga utod hinadlukan gid sa iya, gani indi sila makasabat. Dayon si Jose nagsiling sa ila, “Kon mahimo magpalapit kamo sa akon.” Nagpalapit sila, kag nagsiling sia, “Utod ninyo ako nga si Jose, nga inyo ginbaligya sa Egipto. Karon, indi kamo magkalisod ukon magpakalain sang inyo kaugalingon kay ginbaligya ninyo ako diri. Ang Dios amo ang nagpauna sa akon diri sa pagluwas sang inyo mga kabuhi.

Salmo sa Pagsabat:

Mga Salmo 105:16-17, 18-19, 20-21

(S) Dumduma ang mga katingalahan nga ginhimo sang Ginoo.

Sang pagpadala sang Ginoo sing gutom sa ila pungsod, kag pagkuha niya sang tanan nila nga kalan-on, una nga ginpadala niya sa ila si Jose, nga ginbaligya subong isa ka ulipon. (S)
Ginkadenahan ang iya mga tiil, kag gintakdan sia sang salsalon sa liog, tubtob napamatud-an ang iya gintagna. Ang pulong sang Ginoo nagpamatuod nga matarong sia. (S)

Dayon ang hari sang Ehipto nagsugo nga buy-an; ang pangulo sang mga pungsod naghilway sa iya. Gintugyan sa iya sang hari ang pagdumala sang iya ginharian, kag ginhimo sia nga pangulo sa bug-os nga duta. (S)

Aleluya:

Marcos 1:15

Ang Ginharian smg Dios malapit na, bayai ninyo ang inyo mga sala, kag magpati sang Maayong Balita.

Ang Pagbasa sang Santos nga Ebanghelyo suno kay:

San Mateo 10:7-15

   Lakat kamo kag ibantala nga ang Ginharian sang langit malapit na! Ayuha ninyo ang mga masakiton, banhawa ang mga patay, ayuha ang mga aruon, kag tabuga ninyo ang mga yawa. Nakabaton kamo nga wala sing bayad, gani maghatag man kamo nga indi magpabayad. Indi kamo magdala sing bulawan, pilak ukon bisan saway nga sinsilyo sa inyo bulsa. Indi kamo magdala sing puyo sa inyo pagpanglakaton, ukon ilislan, ukon sandalyas, ukon sungkod, kay ang nagapangabudlay dapat gid hatagan sang iya mga kinahanglanon.

   “Kon magsulod kamo sa bisan diin nga banwa ukon baryo, pangitaa ninyo ang luyag magbaton sa inyo, kag didto kamo magdayon sa iya tubtob sa inyo paghalin sa sadto nga duog. Sa inyo pagsulod sa isa ka balay magsiling kamo, ‘Ang paghidait sa inyo.’ Kon ginabaton kamo sang mga tawo sa sina nga balay, paluntara ang inyo paghidait sa sina nga panimalay. Pero kon indi sila magbaton sa inyo, bawia ninyo ang inyo pag-abiabi. Kag kon may mga panimalay ukon banwa nga indi magbaton ukon magpamati sa inyo, bayai ina nga duog kag taktaka ang yab-ok sa inyo mga tiil. Dumdoma ninyo ini! Sa Adlaw sang Paghukom, sobra pa ang silot nga pagabatunon sadto nga banwa sang sa Sodoma kag Gomorra!”

Hulyo 10 | Hulyo 12