"Lakat ka kag Himoa ang subong man"

Liturhiya sang Pulong

(Lunes, Oktubre 7, 2019)

Ang Mahal nga Birhen Maria sang Rosaryo

Ang Pagbasa gikan sa Libro ni:

Jonas nga Propeta 1:1 - 2:1-2, 11

   Isa ka adlaw, ang Ginoo nagsiling kay Jonas nga anak ni Amitai, “Magkadto ka sa Nineve, inang daku nga siyudad, kag magwali batok sa sini nga siyudad kay nahibaluan ko kon daw ano kalaut sang iya pumoluyo.” Pero sa baylo, si Jonas nagpadulong sa lain nga duog sa pagpalagyo sa Ginoo. Nagkadto sia sa Jope sa diin may nakita sia nga sakayan nga manugtulak sa España. Nagbayad sia sang iya plete kag nagsakay sia upod sa mga sakayanon padulong sa España, sa diin makapahilayo sia sa Ginoo.
   Pero ang Ginoo nagpadala sing mabaskog nga hangin sa dagat. Tama gid kabaskog ang bagyo sa bagay nga daw maguba ang sakayan. Hinadlukan gid ang mga sakayanon kag ang tagsatagsa nagpangayo sing tabang sa iya kaugalingon nga dios, kag agod mahaganhagan ang katalagman, gintagbong nila ang kargamento sang sakayan sa dagat. Pero si Jonas yadto didto sa idalom sa bodega sang sakayan, kag mahamuok gid ang iya katulogon.
   Nakit-an sia didto sang kapitan sang sakayan kag nagsiling sa iya, “Hoy, ngaa nagatulog ka pa? Magbangon ka kag magpangayo sing tabang  sa imo Dios. Ayhan maluoy sia sa aton kag luwason niya kita.”
   Dayon nagsiliningay ang mga sakayanon, “Maggabutgabot kita agod nga mahibaluan naton kon sin-o ang kabangdanan nga naabtan kita sining katalagman.” Ginhimo nila ini, kag nagabutan ang ngalan ni Jonas. Gani nagsiling sila sa iya, “Karon sugiri kami! Ikaw bala ang kabangdanan sini? Ano ang ginahimo mo diri? Taga-diin ka? Taga-diin ka nga pungsod?”
   Nagsabat si Jonas, “Isa ako ka Hebreo. Ako nagasimba sa Ginoo, ang Dios sa langit, nga nagtuga sang dagat kag sang duta.” Si Jonas nagsugid sa ila nga nagapalagyo sia sa Ginoo.
   Hinadlukan ang mga sakayanon kag nagsiling sila sa iya, “Tama gid kalain ang imo ginhimo!” Nagbaskog nga nagbaskog ang bagyo gani ang mga sakayanon nagsiling sa iya, “Ano ang himuon namon sa imo agod nga mag-untat ang bagyo?”
   Nagsabat si Jonas, “Itagbong ninyo ako sa dagat, kag magauntat ang bagyo. Nahibaluan ko nga ako ang kabangdanan nga nag-abot ining mabaskog nga bagyo sa inyo.”
   Sa baylo, gintudohan sang mga sakayanon ang paggaod agod nga magpahigad ang sakayan, pero ang bagyo nagbaskog pa gid kag indi sila makahalin. Gani nagpanawag sila sa Ginoo, “Nagapangamuyo kami, O Ginoo, indi kami pagpatya tungod sang amon pagpatay sini nga tawo! Ikaw, O Ginoo, ang may salabton sini tanan, kag ikaw ang nagahimo sini.” Dayon ginhakwat nila si Jonas kag gintagbong sia sa dagat kag sa gilayon naglinaw. Tungod sini ang mga sakayanon hinadlukan gid sa Ginoo gani nagdulot sila sing halad kag nagpanaad sa pag-alagad sa iya.
   Ang Ginoo nagsugo sang isa ka daku nga isda sa paglamon kay Jonas, kag didto sia sa tiyan sang isda sa sulod sang tatlo ka adlaw kag tatlo ka gab-i.

   Dayon si Jonas nga yara sa tiyan sang isda nagpangamuyo sa Ginoo nga iya Dios: "Sa akon pag-antos, nagpanawag ako sa imo, O Ginoo, kag ginsabat mo ako. Gikan sa kadadalman, sa kalibutan 

sang mga patay nagpangayo ako sing tabang kag ginpamatian mo ako. 

   Dayon ang Ginoo nagmando sa isda nga iluad si Jonas sa hunasan. Kag gintuman ini sang isda.

Kalantahon sa Pagsabat:

Jonas 2:3, 4, 5, 8

(S) Sa imo balaan nga Templo ginpamatian mo ako.

Sa akon pag-antos, nagpanawag ako sa imo, O Ginoo, kag ginsabat mo ako. Gikan sa kadadalman, sa kalibutan sang mga patay nagpangayo ako sing tabang kag ginpamatian mo ako. (S)
Gintagbong mo ako sa kadadalman, sa kadadalman gid sang dagat, sa diin nalikupan ako sang mga tubig, kag ang tanan mo nga mga balod nga dalagku nag-agi sa ibabaw ko. (S)
Nagdumdom ako nga gintabog ako sa imo atubangan, kag indi na ako makakita liwat sang imo balaan nga Templo. Ginlapawan ako sang tubig kag indi ako makaginhawa, gintabunan ako sang dagat, ang akon ulo ginputos sang mga lumot. (S)
Ang mga nagasimba sa wala pulos nga mga diosdios wala magpadayon sa pag-unong sa imo. (S)

Aleluya:

Juan 13:34

   Ginahatag ko sa inyo ang isa ka bag-o nga sugo; siling sang Ginoo, maghigugmaanay kamo subong nga ako nagahigugma sa inyo.

Ang Pagbasa sang Santos nga Ebanghelyo suno kay:

San Lucas 10:25-37

   Dayon may isa ka manunodlo sang Kasugoan nga nagtindog sa pagdakupdakop kay Jesus paagi sa isa ka pamangkot, “Manunodlo, ano bala ang himuon ko agod maangkon ko ang kabuhi nga wala sing katapusan?”
   Si Jesus nagsabat, “Ano bala ang ginasiling sang mga Kasulatan? Ano bala ang kahulogan sini sa imo?”
   Ang tawo nagsabat, “ ‘Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, sa bug-os mo nga kusog, kag sa bug-os mo nga hunahona,’ kag, ‘Higugmaa ang imo isigkatawo subong sang imo kaugalingon.’ ”
   Si Jesus nagsabat, “Husto ang imo sabat. Himoa ini kag magakabuhi ka.”
   Pero ang manunodlo sang Kasugoan buot magpakamatarong sang iya kaugalingon, gani ginpamangkot niya si Jesus, “Sin-o bala ang akon isigkatawo?”
   Si Jesus nagsabat, “May isa ka tawo nga nagdulhog pakadto sa Jerico halin sa Jerusalem nga ginbanggaan sang mga buyong. Ginkuha nila ang iya tanan nga pagkabutang pati ang iya bayu, ginbakol sia kag ginbayaan nga daw sa patay na. May nag-agi nga isa ka pari sa sina nga dalan. Sang pagkakita niya sang tawo, naglikaw sia sa pihak sang dalan. Sa amo man nga dalan may nag-agi nga isa ka Levita, kag sang pagkakita niya sang tawo iya lang gintan-aw kag naglikaw sia sa pihak sang dalan. Pero may isa ka Samariahanon nga nakaagi sa amo nga dalan. Sang pagkakita niya sang tawo naluoy gid sia.

Sang pagkakita niya sang tawo naluoy gid sia. (10:33)

Ginpalapitan niya ang tawo, ginhaplasan niya sing lana kag bino ang iya sini mga pilas kag ginbugkosan. Dayon ginpasakay niya sia sa iya kaugalingon nga asno, gindala sa dalayunan kag gin-atipan niya sia. Sang madason nga adlaw nagkuha sia sing P40 kag ginhatag niya ini sa tag-iya sang dalayunan. Nagsiling sia sa iya, ‘Tatapa sia, kag sa akon pagbalik bayaran ko ikaw sang tanan nga magasto mo sa iya.’ ”
   Dayon si Jesus nagpamangkot, “Ti, sa imo abi, sin-o bala sa sining tatlo, ang nangin-isigkatawo sining tawo nga ginbanggaan sang mga buyong?”
   Nagsabat sia, “Yadtong nagkaluoy gid sa iya.”
   Si Jesus nagsiling, “Ti, lakat ka kag himoa ang subong man.”

Oktubre 6 | Oktubre 8