"Halin sa Tagipusoon Nagagikan ang Malain nga mga Painuino"

Liturhiya sang Pulong

(Miyerkules, Pebrero 12, 2020)

 Ang Pagbasa gikan sa Nahauna nga Libro sang:

Mga Hari 10:1-10

   Ang rayna sang Saba nakabati sang kabantugan ni Salomon, gani nagkadto sia sa Jerusalem sa pagtilaw sa iya sang mabudlay nga mga pamangkot. Nag-abot sia nga ginaupdan sang madamo nga mga suloguon, kag may mga kamelyo sia nga kargado sang mga pahamot, mga alahas kag madamo nga mga bulawan. Sang pagkitaay nila ginpamangkot niya si Salomon sang tanan lang nga mgapamangkot nga iya madumdoman. Ginsabat ni Salomon sang tanan niya nga mga pamangkot kag wala sing bisan ano nga butang nga indi niya masaysay sa iya. Nagdayaw gid sia sang daku nga kaalam ni Salomon, sang palasyo nga iya ginpatindog, sang pagkaon nga iya ginbutang, sang mga opisyales sa iya korte, sang abilidad kag matahom nga panapton sang iya mga alagad, sang iya manugtagay sang bino kag sang mga halad nga iya gindulot sa Templo. Ang katahom sini tanan nagpahalawhaw sa iya. Nagsiling sia kay Haring Salomon, “Matuod gid ang nabatian ko sa akon pungsod nahanungod sa imo kaalam. Pero indi ako makapati sini tubtob nagkari ako kag nakita ko gid ini tanan. Pero wala gani sing katunga ang akon nabatian. Ang imo kaalam kag manggad labaw katama sang sa ginsugid sa akon. Daw ano ka mapalaron sang imo mga asawa! Kag daw ano ka mapalaron sang imo mga ulipon nga yara pirme sa imo atubangan kag nagapamati sang imo ginahambal nga may kaalam! Dayawon ang Ginoo nga imo Dios! Ginpakita niya nga nalipay gid sia sa imo sa iya paghimo sa imo nga hari sang Israel. Tungod kay ang iya gugma sa Israel mapinadayunon, ginhimo niya ikaw nga hari, sa paggahom sing matarong kag wala sing pinasulabi.”

   Dayon ang rayna sang Saba naghatag kay Salomon sing malapit sa lima ka tonelada nga bulawan, kag madamo nga pahamot kag mga alahas. Ang kadamuon sang pahamot nga ginhatag sang rayna sa iya amo ang labing madamo nga iya nabaton halin sang una.

Salmo sa Pagsabat:

Mga Salmo 37:5-6, 30-31, 39-40

(S) Ang tinaga sang matarong nga tawo may kaalam.

Itugyan ang imo kaugalingon sa Ginoo; magsalig ka sa iya, kag sia magabulig sa imo; Iya pasigahon ang imo kaayo subong kapawa, kag ang imo pagkamatarong subong saudto nga adlaw. (S)

Ang mga tinaga sang matarong nga tawo may kaalam, kag nagahambal sia sing matarong; ginahuptan niya ang kasugoan sang iya Dios sa iya tagipusoon, kag wala gid sia nagalapas sini. (S)

Ang Ginoo nagaluwas sang matarong nga mga tawo, kag iya sila ginaapinan sa tion sang kagamo. Iya sila ginabuligan kag ginatabangan, ginaluwas niya sila sa mga malaut, kay nagadangop sila sa iya agod apinan. (S)

Aleluya:

Juan 17:17

   O Ginoo ang imo pulong kamatuoran, pakabalaana sila paagi sa kamatuoran.

Ang Pagbasa sang Santos nga Ebanghelyo suno kay:

San Marcos 7:14-23

   Dayon ginpanawag liwat ni Jesus ang mga tawo kag ginsingganan niya sila, “Pamati kamo tanan sa akon, kag hangpa ninyo. Wala sing butang nga nagasulod sa tawo nga makadagta sa iya, kundi ang nagagwa sa iya. Gani, kon sin-o ang luyag magpamati, magpamati sia!” 

   Sang mabayaan ni Jesus ang mga tawo nagsulod sia sa isa ka balay. Dayon ang iya mga gintuton-an nagpamangkot sa iya sang kahulogan sining palaanggiran. Si Jesus nagsiling sa ila, “Wala gid kamo sing kinalis sa iban nga indi makahangop! Wala sing bisan ano nga nagasulod sa tawo nga makadagta sa iya, tungod kay wala ini nagakadto sa iya tagipusoon kundi sa iya tiyan kag dayon nagagwa sa lawas.” (Ini nagakahulogan nga si Jesus nagakabig nga ang tanan nga pagkaon bagay kaunon.) 

   Kag nagpadayon sia sa pagsiling, “Ang nagagwa sa tawo amo ang nagadagta sa iya. Kay halin sa tagipusoon sang tawo nagagikan ang malain nga mga painuino nga amo ang nagatulod sa iya sa paghimo sang mga imoralidad, pagpangawat, pagpatay, pagpanginbabayi ukon pagpanginlalaki, pag-ibog, pagbuhat sang tanan nga sahi sang malain nga mga butang, pagdaya, pagbinastos, paghimo sang butang nga malaw-ay, paghisa, pagpasipala, pagpabugal, kag pagbinuang. Ini tanan nga kalainan nagahalin sa sulod sang tawo kag amo ang nagadagta sa iya.”

Pebrero 11 | Pebrero 13