"Kon Mag-abot ang Mananabang, ang Espiritu sang Kamatuoran"

Liturhiya sang Pulong

(Lunes, Mayo 18, 2020)

San Juan, Santo Papa kag Martir

Ang Pagbasa gikan sa:

Binuhatan sang mga Apostoles 16:11-15

   Nagsakay kami sa sakayan halin sa Troas kag nagpadulong kami sa Samotracia, kag sang madason nga adlaw nagdungka kami sa Neapolis. Gikan didto nagkadto kami sa Filipos, ang labing daku nga siyudad sang Macedonia nga ginagamhan sang mga taga-Roma. Nagtener kami sing pila ka adlaw sa amo nga siyudad. Sang Adlaw nga Inugpahuway naggwa kami sa siyudad kag nagkadto sa pangpang sang suba kay naghunahona kami nga may duog didto nga ginatipunan sang mga Judio sa pagpangamuyo. Naglingkod kami kag nagsugilanon sa mga babayi nga nagtipon didto. Ang isa nga nagpamati sa amon amo si Lidia nga taga-Tiatira, isa ka manugbaligya sang tela nga granate nga malahalon. Isa sia ka babayi nga nagasimba sa Dios kag ginbuksan sang Ginoo ang iya painuino sa pagbaton sang mga ginhambal ni Pablo. Ginbautisohan sia kag ang tanan nga sakop sang iya panimalay. Kag gin-agda niya kami nga nagasiling, “Didto kamo dayon sa balay kon nagapati kamo nga isa na ako ka matuod nga tumoluo sang Ginoo.” Napilitan niya kami sa pag-upod sa iya.

Salmo sa Pagsabat:

Mga Salmo 149:1-2, 3-4, 5-6, 9

(S) Ang Ginoo nagakalipay sa Iya mga tawo.

Magkanta sing bag-o nga ambahanon sa Ginoo, dayawa ninyo sia sa pagtilipon sang iya matutom nga mga tawo! Magkasadya ka, O Israel, tungod sang imo manunoga; maghinugyaw kamo, O mga pumoluyo sang Sion, tungod sang inyo hari! (S)

Dayawa ninyo nga may pagsinaut ang iya ngalan; magtukar kamo sing mga bumbo kag mga arpa sa pagdayaw sa iya. Ang Ginoo nagakalipay sa iya mga tawo; ginapadunggan niya ang mga mapainuboson sing pagdaog. (S)

Maghinugyaw ang mga tawo sang Dios sa ila pagdaog, kag mag-amba sing masinadyahon sa ila mga piesta. Magsinggit sila sing mabaskog sa ila pagdayaw sa Dios, nga may mga espada nga matalom sa ila mga kamot. Amo ini ang pagdaog sang mga tawo sang Dios! (S)

Aleluya:

Juan 15:26, 27

   Ang Espiritu sang kamatuoran nga ipadala ko gikan sa Amay, sia magasaksi nahanungod sa akon. Kag kamo man magapanaksi para sa akon kay kamo kaupod ko halin sa ginsugoran.

Ang Pagbasa sang Santos nga Ebanghelyo suno kay:

San Juan 15:26–16:4

   “Pero kon mag-abot ang Mananabang, ang Espiritu sang kamatuoran nga ipadala ko gikan sa Amay, sia magasaksi nahanungod sa akon. Kag kamo man magapanaksi para sa akon kay kamo kaupod ko halin sa ginsugoran.

   “Ginsugid ko ini sa inyo agod indi malingkang ang inyo pagtuo. Tabugon nila kamo sa mga sinagoga; kag magaabot ang tion nga ang makapatay sa inyo magahunahona nga nagaalagad sia sa Dios sa iya paghimo sini. Himuon nila ini sa inyo, kay wala sila makakilala sa Amay ukon sa akon. Pero ginasugid ko ini sa inyo, agod nga kon mag-abot ang tion nga himuon nila ini sa inyo, madumdoman ninyo nga ginsugiran ko na kamo sini.”

Mayo 17 | Mayo 19