"Indi Sila Magpati sa kay Jesus"

Liturhiya sang Pulong

(Biyernes, Agosto 2, 2019)

San Eusebio de Vercelli, Obispo

Ang Pagbasa gikan sa Libro sang:

Levitico 23:1, 4-11, 15-16, 27, 34-37

   Ginhatag sang Ginoo kay Moises. Ibantala ninyo ang masunod nga mga piesta sa natalana nga mga panahon.

   Ang Pascua, nga ginasaulog sa pagpadungog sa Ginoo, nagasugod sa pagtunod sa ika-14 nga adlaw sang nahauna nga bulan. Sa ika-15 nga adlaw nagasugod ang Piesta sang Tinapay nga wala sing Lebadora, kag sa sulod sang pito ka adlaw magkaon kamo sang tinapay nga wala sing tapay. Sa nahauna nga adlaw magatipon kamo sa pagsimba kag indi kamo maghimo sang inyo adlaw-adlaw nga mga buluhaton. Magdulot kamo sing halad nga kalan-on paagi sa kalayo sa Ginoo sa sulod sang pito ka adlaw. Sa ikapito nga adlaw magtipon kamo liwat sa pagsimba kag indi kamo maghimo sang inyo adlaw-adlaw nga mga buluhaton.

   Kon mag-abot kamo sa duta nga ginahatag sang Ginoo sa inyo kag mag-ani kamo sang inyo mga patubas, ihatag ninyo ang nahauna nga inupong sa pari. Ihalad niya ini subong isa ka pinasahi nga dulot sa Ginoo, agod nga batonon kamo. Ang pari magahalad sini sa adlaw pagkatapos sang Adlaw nga Inugpahuway.

   Mag-isip kamo sing pito ka semana halin sa adlaw sa tapos ang Adlaw nga Inugpahuway sa diin nagdala kamo sing inupong sang mga uhay nga idulot sa Ginoo. Sa ika-50 nga adlaw, sa tapos ang ikapito nga Adlaw nga Inugpahuway magdulot kamo sa Ginoo sing isa ka bag-o nga halad nga kalan-on.

   Ang ikanapulo nga adlaw sang ikapito nga bulan amo ang adlaw nga pagasaulogon ang tuigtuig nga tulumanon sa pagkuha sang mga sala sang mga tawo. Sa amo nga adlaw indi gid kamo magkaon sang bisan ano; magtipon kamo sing tingob sa pagsimba, kag magdulot kamo sa GINOO sing halad nga kalan-on paagi sa kalayo.

   Ang Piesta sang mga tolda nagasugod sa ika-15 nga adlaw sang ikapito nga bulan kag nagapadayon ini sa sulod sang pito ka adlaw. Sa nahauna nga adlaw magtipon kamo sing tingob sa pagsimba kag indi kamo maghimo sang inyo adlaw-adlaw nga hilikuton. Sa sulod sang pito ka adlaw magdulot kamo sing halad nga kalan-on paagi sa kalayo kada adlaw. Sa ikawalo nga adlaw magtipon kamo liwat sing tingob sa pagsimba kag magdulot sing halad nga kalan-on paagi sa kalayo. Isa ini ka adlaw sa pagsimba kag indi kamo maghimo sang bisan ano nga obra. 
   (Ini nga mga piesta para sa Ginoo sa diin ginapadunggan ninyo ang Ginoo paagi sa pagtipon sing tingob sa pagsimba kag pagdulot sing mga halad nga kalan-on paagi sa kalayo, mga halad nga sinunog, mga halad nga kalan-on, mga halad, kag mga halad nga bino, suno sa ginakinahanglan adlaw-adlaw.

Salmo sa Pagsabat:

Mga Salmo 81:3-4, 5-6, 10-11

(S) Maghinugyaw kamo sa Dios nga aton mangangapin.

Patunuga ang trumpeta para sa piesta, kon ang bulan lati, kag kon ang bulan ugsad. Amo ini ang kasugoan sa Israel, isa ka sugo gikan sa Dios ni Jacob. (S)

Ginmando niya ini sa mga tawo sang Israel, sang paggubat niya sang duta sang Egipto. Nabatian ko ang tingog nga wala ko makilala nga nagasiling, “Ginkuha ko ang mabug-at nga karga sa imo likod, ginpabutang ko sa imo ang imo mga alat. (S)

Ako ang Ginoo nga imo Dios, nga nagpagwa sa imo sa duta sang Egipto. Ngangaha ang imo baba, kag ako magahungit sa imo. “Pero ang akon mga tawo indi magpamati sa akon; ang Israel wala magtuman sa akon. (S)

Aleluya:

1 Pedro 1:25

Ang pulong sang Ginoo nagapadayon sa gihapon. Amo ini ang pulong nga gindala sa inyo sang Maayong Balita.

Ang Pagbasa sang Santos nga Ebanghelyo suno kay:

San Mateo 13:54-58

   Nagpauli sia sa iya kaugalingon nga banwa. Nagpanudlo sia sa ila sinagoga, kag ang mga nakabati sa iya natingala. Nagpamangkot sila, “Diin bala ini sia nagkuha sining pinasahi nga kaalam kag ngaa makahimo sia sining mga milagro? Indi bala sia ang anak sang panday? Indi bala si Maria ang iya iloy, kag ang iya mga utod amo sanday Santiago, Jose, Simon kag Judas? Indi bala ang iya mga utod nga babayi nagapuyo diri? Diin bala niya ginkuha ini tanan?” Gani indi sila magpati sa iya. 
   Si Jesus nagsiling sa ila, “Ang propeta ginatahod kag ginapati bisan diin, luas lamang sa iya kaugalingon nga banwa kag sa iya panimalay.” Wala sia maghimo didto sing madamo nga mga milagro tungod sang ila pagkadimatinuohon.

Agosto 1 | Agosto 3