Si Jesus Gindala pa Langit

Liturhiya sang Pulong

(Domingo, Hunyo 2, 2019)

Ang Pagkayab sang Ginoo

1. Ang Pagbasa gikan sa mga:

Binuhatan sang mga Apostoles 1:1-11

   Halangdon nga Teofilo, sa una nga libro nga akon ginsulat, ginsaysay ko ang tanan nga mga butang nga ginhimo kag gintudlo ni Jesus, halin sang pagsugod niya sang iya mga bulohaton tubtob sang adlaw nga gindala sia pa langit. Sa wala pa sia madala pa ibabaw may ginbilin sia nga mga tulomanon, paagi sa gahom sang Espiritu Santo, sa iya ginpili nga mga apostoles. Sa sulod sang 40 ka adlaw sa tapos sang iya pagkamatay, nagpakita sia sa ila sa madamo nga beses, sa indi mapanghiwala nga mga pagpamatuod nga buhi sia. Nakita nila sia kag naghambal sia sa ila nahanungod sang Ginharian sang Dios. Sang pagtipon nila, ginmanduan sila ni Jesus, “Indi kamo maghalin sa Jerusalem, kundi hulaton ninyo ang ginsaad sang akon Amay sa inyo nga ginsiling ko na sa inyo. Si Juan nagpangbautiso sa tubig, pero sa pila ka adlaw pagabautisohan kamo sa Espiritu Santo.”

   Sang pagtipon sang mga apostoles kaupod ni Jesus nagpamangkot sila sa iya, “Ginoo, amo na bala ini ang tion nga patindugon mo liwat ang Ginharian sang Israel?”

   Nagsabat si Jesus sa ila, “Indi para sa inyo ang paghibalo kon san-o ini mahanabo, kay ang akon Amay amo lamang ang may gahom sa pagtalana sang mga panahon kag sang magakahanabo. Pero sa pag-abot sang Espiritu Santo sa inyo magabaton kamo sing gahom kag manginsaksi ko kamo sa Jerusalem, sa bug-os nga Judea kag Samaria, kag sa bug-os nga kalibutan.” Sa tapos niya mahambal ini gindala sia pa langit samtang nagatan-aw sila sa iya, kag ginlikupan sia sang panganod.

   Sang nagatangla pa sila sa langit, samtang nagapaibabaw sia, sa hinali may nagtindog sa luyo nila nga duha ka tawo nga nagabayu sing puti kag nagsiling sa ila, “Mga taga-Galilea, ngaa bala nagatindog kamo dira kag nagatangla sa langit? Ining Jesus nga ginkuha sa inyo kag gindala pa langit, magabalik liwat sa amo man nga paagi nga nakita ninyo sia nga nagpalangit.”

Salmo sa Pagsabat:

Mga Salmo 47:2-3, 6-7, 8-9

(S) Ang Dios nagsaka sa iya trono nga may sininggit sang kalipay kag tunog sang mga trumpeta. 

Magpamalakpak kamo tungod sa kalipay, tanan nga mga katawohan dayawa ninyo ang Dios sa mabaskog nga mga ambahanon! Ang Ginoo, ang labing mataas, dapat kahadlukan gamhanan sia nga hari, nga nagagahom sa bug-os nga kalibutan. (S)
Ang Dios nagsaka sa iya trono nga may mga sininggit sang kalipay kag tunog sang mga trumpeta, samtang nagasaka ang Ginoo! Magkanta kamo sing mga pagdayaw sa Dios, mag-amba sing pagdayaw sa aton hari! (S)
Ang Dios hari sa bug-os nga duta, dayawa ninyo sia sa mga ambahanon! Ang Dios nagalingkod sa iya balaan nga trono, nagagahom sia sa mga kapungsoran. (S)

2. Ang Pagbasa gikan sa Sulat sa mga:

Hebreo 9:24-28; 10:19-23

   Kay si Cristo wala magkadto sa isa ka balaan nga duog nga ginhimo sang mga tawo, nga amo ang larawan sang isa nga matuod. Nagsulod sia didto gid sa langit, sa diin nagapangatubang sia sa Dios tungod sa aton. Ang Pinakamataas nga Pari nga Judio nagasulod sa Balaan nga Duog sa tagsa ka tuig nga nagadala sang dugo sang sapat. Pero si Cristo wala magsulod sa paghalad sang iya kaugalingon sing madamo nga beses. Kay kon amo ini, kinahanglan mag-antos sia sing madamo nga beses halin sa pagtuga sang kalibutan. Sa baylo, nagkari sia sing makaisa gid lang, sa katapusan sining mga panahon, sa pagkuha sang sala paagi sa paghalad sang iya kaugalingon. Gintalana sa tagsa ka tawo nga mapatay sing makaisa, kag sa tapos sini pagahukman sia sang Dios. Sa amo man nga bagay, si Cristo ginhalad sing makaisa sa pagkuha sang mga sala sang madamo. Magakari sia liwat, indi sa pagkuha sang sala, kundi sa pagluwas sang mga nagahulat sa iya.

   Gani, mga kautoran, may bug-os kita nga kahilwayan sa pagsulod sa Labing Balaan nga Duog paagi sa kamatayon ni Jesus. Ginbuksan niya para sa aton ang isa ka bag-o kag buhi nga dalan, paagi sa kurtina, nga amo ang iya kaugalingon nga lawas. May gamhanan kita nga pari nga nagadumala sa balay sang Dios. Gani magpalapit kita sa Dios, nga may sinsero nga tagipusoon kag malig-on nga pagtuo, nga may konsyensya nga natinluan sa malaut nga panghunahona, kag mga lawas nga nahugasan sang tubig nga matinlo. Magmalig-on kita sa paglaom nga aton ginahuptan, kay masaligan naton ang Dios sa pagtuman sang iya saad.

Aleluya:

Mateo 28:19, 20

Gani, kadtoi ninyo ang tanan nga mga tawo sa bug-os nga kalibutan siling sang Ginoo, kag tudloi ninyo sila sa pagtuman sang tanan nga ginsugo Ko sa inyo. Magaupod Ako sa inyo sa gihapon tubtob sa katapusan sang panahon. 

Ang Pagbasa sang Santos nga Ebanghelyo suno kay:

San Lucas 24:46-53

   Nagsiling sia sa ila, “Amo ini ang nasulat: ang Cristo dapat mag-antos kag pagabanhawon sa ikatlo nga adlaw, kag sa iya ngalan ang mensahi nahanungod sang paghinulsol kag kapatawaran sang sala dapat iwali sa tanan nga kapungsoran, sugod sa Jerusalem. Kamo ang mga saksi sini nga mga butang. Kag ako akon magapadala sa inyo sang ginsaad sang akon Amay. Pero maghulat kamo anay sa Jerusalem tubtob nga ang gahom gikan sa ibabaw mag-abot sa inyo.”

   Dayon gindala niya sila sa gwa sang siyudad tubtob sa Betania sa diin ginbayaw niya ang iya mga kamot kag ginbendisyunan sila. Samtang nagabendisyon sia sa ila, nagbulag sia sa ila kag gindala sia pa langit.

Nagsimba sila sa iya kag nagbalik sila sa Jerusalem nga puno sang daku nga kalipay, kag didto sila pirme sa templo nga nagapasalamat sa Dios.

Hunyo 1 | Hunyo 3