Ang Libro ni Rut

Panguna
   Sa tunga sang magamo nga mga panahon nga ginasugid sang Libro sang mga Hukom yari ang may kalinong nga sugilanon ni Rut. Si Rut isa ka babayi nga taga-Moab nga nakapamana sang isa ka taga-Israel. Sang mapatay ang iya bana, si Rut nagpakita sang iya pag-unong sa iya ugangan nga babayi kag pagkatutom sa Dios sang Israel. Sang ulihi nakakita sia sing bag-o nga bana sa mga paryente sang iya una nga bana, kag tungod sini nga pag-asawahay nangin-isa sia sang mga katigulangan ni David, ang labing gamhanan nga hari sang Israel.

   Ang mga hitabo sa Mga Hukom nagapakita nga ang kalaglagan nagaabot kon ang mga tawo sang Dios magtalikod sa iya. Ang Rut nagapakita sang kaayuhan sa dumoluong nga magadangup sa Dios sang Israel, kag nanginbahin sang iya matutom nga mga tawo.

Balayan sang Kaundan
   Si Noemi nagbalik sa Bethlehem upod kay Rut 1:1-22
   Si Rut kag si Boaz nagkitaay 2:1—3:18
   Si Boaz nagpangasawa kay Rut 4:1-22

☆☆☆ RUT ☆☆☆

1 2 3 4

☆☆☆ RUT ☆☆☆

MGA HUKOM 《 | 》 1 SAMUEL

RUT - Kapitulo 4

1 2 3 4

♧♧♧♧♧

Ginapangasawa ni Boaz si Rut

1 Si Boaz nagkadto sa duog nga tilipunan nga nahamtang sa puwerta sang banwa, kag didto nagpungko sia. Dayon ang labing malapit nga paryente ni Elimelec naglabay. Amo ini sia ang ginhinambitan ni Boaz kay Rut. Gintawag sia ni Boaz, “Paryente, dali anay kag magpungko.” Naghapit sia kag nagpungko.

2 Sa gilayon nagtipon si Boaz sing napulo ka mga pangulo sang banwa kag ginapapungko didto upod sa ila. Sang nakapungko na sila,

3 nagsiling sia sa iya paryente, “Karon nga nakabalik na si Noemi halin sa Moab, luyag niya ibaligya ang uma nga iya sang aton paryente nga si Elimelec,

4 kag dapat ikaw makahibalo sini. Gani, kon luyag mo, bakla ini sa atubangan sining mga tawo nga nagapungko diri. Pero kon wala ka sing luyag sini, magsiling ka, kay ikaw ang may una nga kinamatarong sa pagbakal sini kag ako ang madason.” Ang tawo nagsabat, “Baklon ko ini.”

5 Si Boaz nagsiling, “Karon, kon baklon mo ang uma kay Noemi, dayon si Rut, ang balo nga Moabnon, mangin-imo asawa, agod ang uma magpabilin sa pamilya sang napatay.”

6 Ang tawo nagsabat, “Kona mo ina, indi ako maggamit sang akon kinamatarong sa pagbakal sang uma kay basi manginkasablagan ini sa akon panublion. Ikaw na lang ang bakal, indi na lang ako.”

7 Sadto nga panahon, kon may pagkabutang nga ginabaligya ukon ginabayluhan, kinabatasan sang manugbaligya sa pag-uba sang iya sandalyas kag ginahatag ini sa manugbakal. Amo ini ang ginahimo sang mga Israelinhon sa pagpamatuod nga natapos na ang pagbaklanay ukon pagbayluhanay.

. . . kinabatasan sang manugbaligya sa pag-uba sang iya sandalyas. (4:7)

8 Gani, sang pagsiling sang taw okay Boaz, “Ikaw na lang ang bakal,” gin-uba niya ang iya sandalyas kag ginhatag ini kay Boaz.

9 Dayon si Boaz nagsiling sa mga pangulo kag sa tanan nga yadto didto, “Tanan kamo saksi karon nga adlaw nga ginbakal ko kay Noemi ang tanan nga pagkabutang ni Elimelec, ni Quelion kag ni Mahalon.

10 Wala labot sini, si Rut nga Moabnon, nga balo ni Mahalon, mangin-asawa ko. Tungod sini ang pagkabutang sang napatay magapabilin sa iya pamilya kag magapadayon ang iya ngalan sa iya mga kasimanwa kag sa iya banwa. Kamo ang mga saksi sini karon nga adlaw.”

11 Ang mga pangulo kag ang iban nagsiling, “Huo, mga saksi kami. Kabay nga ang GINOO magahimo sini nga babayi nga magapuyo sa imo balay kaangay kay Raquel kag kay Lea nga nagbata sing madamo nga mga anak kay Jacob. Kabay nga magmanggaranon ka sa kabaranggayan sa Efrata, kag manginbantog sa Bethlehem.

12 Kabay nga ang mga kabataan nga ihatag sa imo sang GINOO paagi sini nga babayi magahimo sang imo panimalay kaangay sang panimalay ni Perez, ang anak ni Juda kag ni Tamar.”

Si Boaz kag ang Iya mga Kaliwat

13 Gani gindala ni Boaz si Rut pauli nga mangin-iya asawa. Ang GINOO nagbendisyon sa iya, kag nagbusong sia kag nagbata sing lalaki.

14 Ang mga babayi nagsiling kay Noemi, “Dayawon ang GINOO! Ginhatagan niya ikaw sing apo karon nga adlaw sa pag-atipan sa imo. Kabay nga ang bata manginbantog sa Israel!

15 Ang imo umagad nagahigugma sa imo, kag ang iya nahimo para sa imo labaw pa sa pito ka anak nga lalaki. Kag karon ginhatagan niya ikaw sing apo nga magahatag sa imo sing bag-o nga kabuhi kag magasagod sa imo kon tigulang ka na.”

16 Ginkuha ni Noemi ang bata, ginkugos kag gin-atipan niya.

17 Ang kaingod nga mga kababayin-an naghingalan sa bata kay Obed. Ginsugiran nila ang bisan sin-o, “Natawo kay Noemi ang isa ka bata nga lalaki!” Si Obed amo ang nangin-amay ni Jese kag si Jese amo ang amay ni David.

Ang mga Katigulangan ni David

18-22 Amo ini ang mga katigulangan halin kay Perez tubtob kay David: Perez, Hesron, Ram, Aminadab, Naason, Salmo, Boaz, Obed, Jese, David.

RUT - Kapitulo 3 <<<   >>> 1 SAMUEL - Kapitulo 1

RUT - Kapitulo 3

1 2 3 4

♧♧♧♧♧

Si Rut Nakapamana

1 Isa ka adlaw si Noemi nagsiling kay Rut, “Kinahanglan pangitaan ko ikaw sing bana, agod may kaugalingon ka nga puloy-an.

2 Dumdoma nga ining tawo nga si Boaz nga imo ginaobrahan upod sa iya mga suloguon nga babayi aton himata. Tandai ini, karon sa gab-i malinas sia sang sebada.

3 Gani magpaligos ka kag magpangagwa kag magsuksok ka sang pinakamatahom mo nga bayu. Dayon kadto ka sa iya linasan, pero indi ka magpakita sa iya tubtob makatapos sia sing kaon kag inom.

4 Kon magtulog sia, tan-awa kon diin sia magahigda. Kon matulogan na gani sia, kadto ka kag tukisa ang habol kag maghigda sa iya tiilan. Singganon niya ikaw kon ano ang himuon mo.”

5 Si Rut nagsabat, “Himuon ko ang tanan nga ginasiling mo.”

6 Gani si Rut nagkadto sa linasan kag ginhimo niya ang tanan nga ginsiling sa iya sang iya ugangan.

7 Sang makatapos sing kaon kag inom si Boaz maayo gid ang iya panimuot. Nagkadto sia sa tinumpi sang sebada kag naghigda sa pagtulog. Si Rut nagpalapit nga nagatiid, gintukis niya ang habol kag naghigda sa tiilan niya.

8 Sang gab-i hinali lang nakamata si Boaz, nagliso sia, kag natingala sia nga may babayi nga nagahigda sa tiilan niya.

9 Nagpamangkot sia, “Sin-o ka?” Si Rut nagsabat, “Si Rut ako, sir. Tungod kay malapit ikaw nga himata, may katungdanan ikaw sa pag-atipan sa akon. Gani, kon mahimo pangasaw-a ako.”

10 Nagsabat si Boaz, “Ang GINOO magbendisyon sa imo. Nagapakita ka sing labaw pa nga pag-unong sa imo pamilya sa sining imo ginhimo karon sang sa tanan nga imo nahimo sa imo ugangan. Wala ka magpangita sing isa ka manggaranon ukon imol nga pamatan-on nga lalaki.

11 Rut, indi ka magpalibog. Ang tanan nga mga tawo sa banwa nakahibalo nga maayo ikaw nga babayi. Himuon ko ang tanan nga pangayuon mo.

12 Matuod nga isa ako ka suod nga himata, kag may katungdanan ako sa imo, pero may isa pa diri ka tawo nga mas malapit pa nga himata sa imo sang sa akon.

13 Diri ka na lang tulog karon nga gab-i, kag pagkaaga usisaon ta kon ini nga tawo mangako sang iya katungdanan sa imo. Kon magsugot sia, maayo man. Kon indi sia, ginasumpa ko sa ngalan sang Dios nga buhi nga batunon ko ang akon kadungganan. Karon maghigda ka kag magpabilin diri tubtob mag-aga.”

14 Gani naghigda si Rut sa tiilan ni Boaz tubtob mag-aga, pero nagbangon si Rut sang madulomdulom pa agod indi sia makit-an, kay indi maluyag si Boaz nga may makahibalo nga si Rut nagkadto didto.

15 Si Boaz nagsiling sa iya, “Kuhaa ang imo kunop kag humlada diri.” Gintuman niya ini kag ginbuboan ini ni Boaz sing mga tunga sa sako nga sebada. Ginduhol niya ini kay Rut kag nagpauli si Rut sa banwa.

16 Sang pag-abot niya, ginpamangkot sia ni Noemi, “Kamusta ang lakat mo, anak ko?” Ginsugiran sia ni Rut sang tanan nga ginhimo ni Boaz para sa iya.

17 Dayon nagsiling pa gid si Rut, “Ginsingganan niya ako nga indi ako magbalik sa imo nga wala sing dala, gani ginhatagan niya ako sining sebada.”

18 Si Noemi nagsiling sa iya, “Karon maghulat ka, anak ko, tubtob mahibaloan mo kon ano ang maabutan sini. Si Boaz indi mag-untat tubtob matapos niya ini nga butang karon nga adlaw.”

RUT - Kapitulo 2 <<<   >>> RUT - Kapitulo 4

RUT - Kapitulo 2

1 2 3 4

♧♧♧♧♧

Si Rut sa Uma ni Boaz

1 Si Noemi may isa ka himata nga ginhingalanan kay Boaz. Isa sia ka manggaranon kag kinilala nga tawo nga katapu sang panimalay sang bana ni Noemi nga si Elimelec.

2 Si Rut nagsiling kay Noemi, “Tugoti ako sa pagkadto sa uma sa pagpanaghaw. Mangita ako sing tawo nga magatugot sa akon sa pagpanaghaw sang biya niya.” Si Noemi nagsabat, “Sigi, maglakat ka, anak ko.”

3 Gani si Rut nagkadto sa uma kag nagsunod sia sa agi sang mga mangangani. Ginpanaghaw niya ang mga uhay nga nabiyaan nila. Natabuan sadto nga nakakadto sia sa uma nga iya si Boaz, ang paryente ni Elimelec.

4 Sang ulihi, si Boaz nag-abot halin sa Bethlehem kag gintamyaw niya ang mga mangangani, “Ang GINOO magaupod sa inyo.” Nagsabat sila, “Ang GINOO magbendisyon sa imo!”

5 Dayon si Boaz nagpamangkot sa iya alagad nga iya ginpadumala sa mga mangangani, “Sin-o inang pamatan-on nga babayi?”

6 Ang iya alagad nagsabat, “Sia ang dumoluong nga babayi nga nag-upod kay Noemi halin sa Moab.

7 Naglisensya sia sa akon sa pagsunod sa mga mangangani sa pagpanaghaw. Aga pa sia nagsugod sa pagpanaghaw kag karon lang sia nag-untat sa pagpahuway sa payag.”

8 Dayon si Boaz nagsiling kay Rut, “Amo ini ang masiling ko sa imo, indi ka na magpanaghaw sa iban nga uma, kundi diri lang. Mag-obra ka diri upod sa mga babayi.

9 Bantayi sila kag tan-awa kon diin sila magaani kag mag-upod ka sa ila. Ginsingganan ko ang akon mga tinawo nga indi ka nila pag-anhon. Kon uhawon ka, kadto ka lang kag mag-inom sa mga banga nga ila ginasudlan sing tubig.”

10 Si Rut nagluhod nga ang iya nawong nagalambot tubtob sa duta, kag nagsiling kay Boaz, “Ngaa bala nga ginakabalak-an mo gid ako? Ngaa bala nga ginaayuhan mo gid ang isa ka dumoluong?”

11 Si Boaz nagsabat, “Ginsugiran ako sang tanan nga imo ginhimo sa imo ugangan nga babayi halin pa sang pagkapatay sang imo bana. Nakahibalo ako nga ginbayaan mo ang imo amay kag iloy kag ang imo pungsod kag magpuyo upod sa mga tawo nga wala gid nimo makilala sang una.

12 Kabay ang GINOO magbalos sa imo tungod sang imo ginhimo. Kabay nga makabaton ka sing bug-os nga balos gikan sa GINOO nga Dios sang Israel nga imo gindangpan!”

13 Si Rut nagsabat, “Sir, kaayo gid sa imo. Ginhatagan mo ako sing kaisog paagi sa imo paghambal sa akon sing malulo, bisan nga indi gani ako makatupong sa imo mga suloguon.”

14 Sang tion na sa pagkaon si Boaz nagsiling kay Rut, “Kari kag magkuha sing isa ka bilog nga tinapay, kag itusmaw ini sa bino.” Gani nagpungko sia upod sa mga mangangani, kag ginduholan sia ni Boaz sang sinanlag nga trigo. Nagkaon si Rut tubtob nabusog sia, kag may nabilin pa sang pagkaon.

15 Sang nakalakat na sia sa pagpanaghaw, si Boaz nagsiling sa mga mangangani, “Pabay-i ninyo sia nga magpanaghaw bisan sa mga tinumpi kag indi ninyo sia pagsawaya.

16 Bugnota ninyo ang iban nga mga uhay sa inupong kag ibilin ini agod nga pamuloton niya. Kag indi ninyo sia pagsabdunga.”

17 Gani nagpanaghaw si Rut sa uma tubtob sa hapon, kag sang malinas niya ini, mga tunga sa sako ang nasupot niya.

18 Gindala niya ang iya uyas sa banwa kag ginpakita niya ini sa iya ugangan. Ginhatag man niya kay Noemi ang nabilin nga pagkaon.

19 Si Noemi nagpamangkot sa iya, “Diin ka magpanaghaw kaina? Kay sin-o uma ikaw nagpanaghaw? Kabay nga ang Dios magbendisyon sang tawo nga nagkabalaka sa imo!” Gani si Rut nagsugid kay Noemi nga didto sia nagpanaghaw sa uma ni Boaz.

20 Si Noemi nagsiling sa iya, “Kabay nga ang GINOO nga nagatuman gid sang iya mga saad sa mga buhi kag mga minatay, magbendisyon sa iya.” Kag nagsiling pa gid sia, “Ina nga tawo suod naton nga himata, kag may katungdanan sia sa pag-atipan sa aton.”

21 Dayon si Rut nagsiling, “Luas sa iban nga mga butang, ginsingganan niya ako nga sigihon ko lang ang pagpanaghaw upod sa iya mga mangangani tubtob maubos ang alanyon.”

22 Si Noemi nagsiling kay Rut, “Huo, anak ko, basi himoan ka pa sing malain kon magkadto ka sa uma sang iban. Maayo pa nga mag-obra ka upod sa mga babayi sa uma ni Boaz.”

23 Gani si Rut nag-obra upod sa ila, kag nagpanaghaw sia tubtob natapos ang pag-ani sang trigo kag sebada. Kag nagpadayon sia sa pagpangabuhi upod sa iya ugangan.

RUT- Kapitulo 1 <<<   >>> RUT - Kapitulo 3

RUT - Kapitulo 1

1 2 3 4

♧♧♧♧♧

Si Elimelec kag ang Iya Panimalay Nagpuyo sa Moab

1 Sa panahon nga ang Israel wala pa sing hari, may tiggulotom nga nag-abot sa pungsod. Gani ang isa ka tawo nga taga-Betlehem nga sakop sang Juda nagdala sang iya asawa kag duha ka anak nga lalaki sa Moab sa pagpuyo didto sing pila ka tuig.

2 Ang ngalan sini nga tawo amo si Elimelec, ang iya asawa amo si Noemi kag ang ila duha ka anak amo si Mahalon kag si Quelion. Ini sila katapu sang kabaranggayan ni Efrata. Samtang nagapuyo sila sa Moab,

3 si Elimelec napatay, kag si Noemi na lang kag ang iya duha ka anak ang nabilin.

4 Nagpangasawa sila sang mga dalaga nga taga-Moab nga ang isa ginahingalanan kay Orpa kag ang isa kay Rut. Sa tapos nakapuyo sila didto sing napulo ka tuig,

5 si Mahalon kag si Quelion napatay man, kag si Noemi isahanon na lang nga wala na sing bana ukon kabataan.

Si Noemi kag si Rut Nagbalik sa Bethlehem

6 Samtang didto pa sila sa Moab, si Noemi nakabati nga ang GINOO naghatag sing maayo nga patubas sa iya mga tawo. Gani, nagpanghimos sia sa paghalin sa Moab upod sa iya mga umagad nga babayi.

7 Upod sila naglakat pabalik sa Juda, pero sa dalanon

8 nagsiling sia sa ila, “Pauli kamo kag magpuyo upod sa inyo iloy. Kabay nga ang GINOO magmaayo sa inyo subong nga nanginmaayo gid kamo sa akon kag sa ila nga nagtaliwan.

9 Kag kabay nga buligan kamo sang GINOO agod makapamana kamo liwat kag mapahamtang sa kalinong sa inyo panimalay.” Gani si Noemi naghalok sa ila sa pagpaalam sa ila, pero naghibi sila

10 kag nagsiling sa iya, “Indi kami magpauli, kundi maupod kami sa imo pakadto sa imo mga kasimanwa.”

11 Si Noemi nagsabat, “Mga anak ko, magpuli kamo. Ngaa bala mag-upod pa kamo sa akon? Makabata pa bala ako sing mga lalaki nga inyo mapamana?

12 Magpauli kamo. Indi na ako makapamana kay tigulang na ako. Bisan kon maghunahona ako nga may paglaom pa, kag magpamana karon nga gab-i kag magpamata sing mga lalaki,

13 hulaton bala ninyo nga magdalagku sila kag pamanahon? Punggan bala ninyo ang inyo kaugalingon sa pagpamana sa iban? Mga anak ko, nakahibalo kamo nga indi mahimo ina. Ang GINOO nagsilot sa akon, kag naluoy gid ako sa inyo.”

14 Sa liwat naghibi sila. Dayon si Orpa naghalok sa iya ugangan sa pagpaalam sa iya kag naglakat sa pagpauli, pero si Rut indi maghalin.

15 Gani si Noemi nagsiling sa iya, “Rut, ang imo bilas nagbalik sa iya mga kasimanwa kag sa iya dios. Pauli ka upod sa iya.”

16 Pero si Rut nagsabat, “Indi ako pagpilita sa pagbiya sa imo. Paupda ako sa imo. Maupod ako bisan diin ka makadto; bisan diin ka magpuyo didto man ako magapuyo. Ang imo mga tawo mangin-akon nga tawo, kag ang imo Dios mangin-akon Dios.

17 Kon diin ka mapatay, didto man ako mamatay, kag didto ako ilubong. Kabay nga ang labing mabug-at nga silot sang Dios mangin sa akon kon ako magbiya sa imo sa iban nga kabangdanan luas sa kamatayon.”

18 Sang Makita ni Noemi nga maupod gid si Rut sa iya, wala na sia maghambal pa.

19 Nagpadayon sila sa paglakat tubtob nakaabot sila sa Bethlehem. Sang pag-abot nila ang bug-os nga banwa nagkinagula, kag ang mga babayi nagsiling, “Si Noemi gid bala ini?”

Nagpadayon sila sa paglakat. (1:19)

20 Nagsabat sia, “Indi ninyo ako pagtawga nga Noemi ang Malipayon, kundi tawga ninyo ako kay Mara,^a ang Masinulob-on kay ang Dios nga Makagagahom nagpaantos sa akon.

21 Bugana ako sang paghalin ko diri, pero karon ginbalik ako sang GINOO diri nga wala wala gid. Ngaa tawgon pa ninyo ako nga Malipayon nga ang GINOO nga Makagagahom nagpakalain sa akon kag nagsilot sa akon?”

22 Gani, amo ini ang pagbalik ni Noemi halin sa Moab nga upod si Rut, ang iya umagad nga babayi nga taga-Moab. Sang pag-abot nila sa Bethlehem nagasugod gid ang tig-alani sang sebada.

^aNOEMI . . . MARA: Sa Hebreo ang Noemi nagakahulogan "manami" kag ang Mara "mapait."

MGA HUKOM - Kapitulo 21 <<<   >>> RUT - Kapitulo 2