"Kaangay Kamo sang Asin para sa mga Tawo kag Kaangay Kamo sang Kapawa para sa Kalibutan"

Liturhiya sang Pulong

(Domingo, Pebrero 9, 2020)

 1. Ang Pagbasa gikan sa Libro ni:

Isaias nga Propeta 58:7-10

   Hatagi man ninyo ang mga ginagutom sing kalan-on, kag abrihi ninyo ang inyo mga puloy-an sa mga imol nga wala sing balay. Hatagi sing bayu ang mga wala sing ginasuksok, kag indi magbalibad sa pagbulig sa inyo mga kaparyentihan.
   “Dayon ang akon kaayo magasilak sa inyo kaangay sang nagabutlak nga adlaw, kag ang inyo mga pilas magaayo gilayon. Magaupod ako pirme sa inyo kag magaluwas sa inyo; kon yara ako maapinan kamo sa bug-os ninyo nga palibot. Kon mangamuyo kamo, ako magapamati sa inyo. Kon manawag kamo sa akon, ako magasabat.
   “Kon untatan na ninyo ang pagpamigos, pagtamay kag tagsa ka hambal nga malain; kon hatagan ninyo sing kalan-on ang ginagutom, kag busgon ninyo ang mga nawad-an, dayon ang kadudolman nga yara sa inyo palibot magasanag subong sang udtong adlaw.

Salmo sa Pagsabat:

Mga Salmo 112:4-5, 6-7, 8 kag 9

(S) Ang kapawa nagasilak sa kadudolman para sa maayo nga mga tawo.

Ang kapawa nagasilak sa kadudolman para sa maayo nga mga tawo, para sa mga maalwan, maluloy-on kag matarong. Bulahan ang tawo nga maalwan sa iya mga pagpahulam, nga wala nagadaya sa iya negosyo. (S)

Ang maayo nga tawo indi gid mapaslawan, indi gid sia malimtan. Wala sia nagakahadlok sa malain nga mga balita, ang iya pagtuo malig-on, kag nagasalig sia sa Ginoo. (S)

Wala sia nagapalibog ukon nagakahadlok. Nagahatag sia sing maalwan sa mga nawad-an, kag ang iya kaayo wala sing katapusan, mangingamhanan sia kag mangintalahuron. (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 2:1-5

   Mga kautoran, sang pagkadto ko sa inyo sa pagwali sang tinago nga kamatuoran sang Dios, wala ako maggamit sang madalom nga mga pulong ukon sang mataas nga kinaalam. Kay sang dira pa ako sa inyo nagtapat ako nga kalimtan ko ang tanan, luas si Jesu-Cristo, kag labi na gid ang iya pagkamatay sa krus. Gani nga sang pagkadto ko sa inyo maluya ako kag nagakurog sa kahadlok, kag ang akon mensahi kag paghambal indi paagi sa mahayluhon nga mga pulong sang tawuhanon nga kaalam, kundi paagi sa gahom sang Espiritu sang Dios. Gani, ang inyo pagtuo wala mapasad sa kaalam sang tawo, kundi sa gahom sang Dios.

Aleluya:

Juan 8:12

   Ako amo ang kapawa sang kalibutan, siling sang Ginoo; ang nagasunod sa akon may kapawa sang kabuhi.

Ang Pagbasa sang Santos nga Ebanghelyo suno kay:

San Mateo 5:13-16

   “Kaangay kamo sang asin para sa mga tawo. Pero kon ang asin indi na maarat, wala na sing paagi nga mapaarat pa ini. Wala na ini sing pulos kundi itampok sa dalan kag tapakon sang mga tawo. 

   “Kaangay kamo sang kapawa para sa kalibutan. Ang siyudad nga napatindog sa ibabaw sang bakulod indi matago. Wala sing tawo nga nagasindi sing suga nga takluban man lang niya ini sang sulokban, kundi ginabutang niya ini sa tulongtongan agod maiwagan ang tanan nga yara sa balay. Subong man dapat ninyo pasigahon ang inyo kapawa sa mga tawo agod makita nila ang inyo maayo nga mga binuhatan, kag magadayaw sila sa inyo Amay nga yara sa langit.”

Pebrero 8 | Pebrero10