Numeros

Panguna
Ang libro sang Numeros nagasugid sang maragtas sang mga Israelinhon sa sulod sang mga 40 ka tuig sugod sang paghalin nila sa bukid sang Sinai tubtob nakalambot sila sa nasidlangan nga dulonan sang duta nga ginsaad sang Dios nga ihatag sa ila. Ang ngalan sang libro may kaangtanan sa pinasahi nga bagay sa libro nga amo ang pagpanglista nga ginhimo ni Moises sang tanan nga mga Israelinhon sa bukid sang Sinai sa wala pa sila maghalin didto. Dayon sang magtaliwan ang isa ka kaliwatan may pagpanglista na man nga ginhimo sa Moab sa sidlangan sang Jordan. Halin sa una nga pagpanglista tubtob sa ikaduha nga pagpanglista nagkadto sila sa Cades Barnea sa nabagatnan nga dulonan sang Canaan kag sang wala sila makasulod sa ginsaad nga duta gikan didto nagtener sila sa malawig nga mga tinuig didto. Sang ulihi naghalin sila sa Cades kag nagkadto sila sa nasidlangan nga duog sang Suba sang Jordan, sa diin ang iban nagpuyo kag ang iban naghanda sa pagtabok sang Jordan pakadto sa Canaan sa pagpuyo didto.
Ang libro sang Numeros maragtas sang mga tawo nga masunson naluyahan kag nahadlok sa pag-atubang sang kabudlayan, kag nagsupak sa Dios kag kay Moises, ang tawo nga ginpili sang Dios sa pagpangulo sa ila. Maragtas ini sang katutom sang Dios kag sang iya mapinadayunon nga pag-atipan sa iya mga tawo, bisan nga sila masinalaypon kag di-matinumanon. Nagasugid ini sang mainunongon nga pag-alagad ni Moises sa Dios kag sa iya katawohan.

Balayan sang Kaundan
Ang mga Israelinhon nagahanda sa paghalin sa Bukid sang Sinai 1:1—9:23
a. Ang nahauna nga pagsenso sang mga tawo 1:1—4:49
b. Ang nagkalainlain nga mga kasugoan kag mga pagsulondan 5:1—8:26
c. Ang ikaduha nga Pascua 9:1-23
Halin sa Bukid sang Sinai pakadto sa Moab 10:1—21:35
Ang mga hitabo sa Moab 22:1—32:42
Ang malip-ot nga panugiron sang pagpanglakaton halin sa Egipto pakadto sa Moab 33:1-49
Ang mga tugon sa wala makatabok sa Jordan 33:50—36:13

☆☆☆ NUMEROS ☆☆☆

1 2 3 4 5 6 7 8 9 10
11 12 13 14 15 16 17 18 19 20
21 22 23 24 25 26 27 28 29 30
31 32 33 34 35 36

☆☆☆ NUMEROS ☆☆☆

LEVITICO 《 | 》 DEUTERONOMIO

NUMEROS - Kapitulo 36

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang Panublion sang mga Babayi nga Nakapamana

1 Ang mga pangulo sang mga panimalay sa kabaranggayan ni Galaad, nga anak ni Maquir kag apo ni Manases nga anak ni Jose, nagkadto kay Moises kag sa iban nga mga pangulo.

2 Nagsiling sila, "Ang Ginoo nagsugo sa imo sa pagpartida sang duta sa mga tawo sang Israel paagi sa pagabotgabot. Nagsugo man sia sa imo sa paghatag sang pagkabutang sang amon himata nga si Zelofehad sa iya mga anak nga babayi.

3 Pero dumdoma, nga kon magpamana sila sang mga lalaki sa iban nga tribo, ang ila pagkabutang mangin-iya sadto nga tribo, kag ang parti nga ginhatag sa amon magadiutay.

4 Sa Tuig sang Pag-uli, kon ang tanan nga pagkabutang nga ginbaligya iuli sa nahauna nga mga tag-iya, ang pagkabutang sang mga anak nga babayi ni Zelofehad pagaidugang sa tribo sa diin sila nakapamana kag madulaan sini ang amon tribo."

5 Gani ginhatag ni Moises sa mga tawo sang Israel ang masunod nga sugo halin sa Ginoo. Nagsiling sia, “Husto ang ginsiling sang tribo ni Manases,

6 kag ang Ginoo nagasiling nga ang mga anak nga babayi ni Zelofehad hilway sa pagpamana sang bisan sin-o nga luyag nila, pero sa ila lamang kaugalingon nga tribo.

7 Ang pagkabutang sang tagsa ka Israelinhon magapabilin sa iya kaugalingon nga tribo.

8 Ang tagsa ka babayi nga nakapanubli sing pagkabutang sa isa ka tribo sang Israel kinahanglan magpamana sang isa ka lalaki nga katapo sina nga tribo. Sa sini nga paagi ang tagsa ka Israelinhon magapanubli sang pagkabutang sang iya mga katigulangan,

9 kag ang pagkabutang indi magsaylo halin sa isa ka tribo pakadto sa isa. Ang tagsa ka tribo magapadayon sa pagpanag-iya sang iya kaugalingon nga pagkabutang.”

10-11 Gani, sanday Maala, Tirza, Hogla, Milca, kag Noa, ang mga anak nga babayi ni Zelofehad, nagtuman suno sa ginsugo sang Ginoo kay Moises kag nagpamana sila sang ila mga pakaisa.

12 Nagpamana sila sa mga kabaranggayan sang tribo ni Manases nga anak ni Jose, kag ang ila pagkabutang nagpabilin sa tribo sang ila ginikanan.

13 Amo ini ang mga kasugoan kag mga pagsulondan nga ginhatag sang Ginoo sa mga Israelinhon paagi kay Moises sa mga kapatagan sang Moab sa tabok sang suba sang Jordan halin sa Jerico.

NUMEROS - Kapitulo 35 <<<   >>> DEUTERONOMIO - Kapitulo 1

NUMEROS - Kapitulo 35

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang mga Siyudad nga Ginhatag sa mga Levita

1 Sa kapatagan sang Moab sa tabok sang Jordan halin sa Jerico, ang Ginoo nagsiling kay Moises,

2 "Singgana ang mga Israelinhon nga gikan sa pagkabutang nga ila nabaton, kinahanglan hatagan nila ang mga Levita sing mga siyudad nga ila pagapuy-an kag mga duta nga palahalban sa palibot sang mga siyudad.

3 Ini nga mga siyudad mangin-iya sang mga Levita kag didto sila magapuyo. Ang duog sa palibot nga manginpalahalban sang ila mga kabakahan kag iban nila nga mga kasapatan.

4 Ang palahalban magalambot sing 500 ka yarda pagwa halin sa mga pader sang siyudad sa bug-os nga palibot.

5 Kinahanglan nga takson ini agod nga sa tagsa ka kilid may yara nga kwadrado nga duta nga ang kalaparon 1,000 ka yarda, kag ang siyudad yara sa tunga sini.

6 Hatagan ninyo ang mga Levita sing anom ka mga siyudad nga dalangpan sa diin ang isa ka tawo makapalagyo kon makapatay sia sing tawo sa indi hungod. Wala labot sini, hatagi ninyo sila sing 42 ka mga siyudad,

7 nga ang bug-os nga kadamuon 48 tanan, lakip ang ila mga palahalban,

8 ang kadamuon sang mga siyudad sang mga Levita sa tagsa ka tribo manginsuno sa kadakuon sang iya kadutaan."

Ang mga Siyudad nga Dalangpan

(Deut. 19:1-13; Josue 20:1-9)

9 Ang Ginoo nagsugo kay Moises

10 nga singganon ang mga tawo sang Israel: “Kon makatabok kamo sa suba sang Jordan kag makasulod sa duta sang Canaan,

11 kinahanglan magpili kmo sing mga siyudad nga dalangpan sa diin ang isa ka tawo makapalagyo kon makapatay sia sing isa ka tawo sa indi hungod.

12 Didto manginhilway sia sa katalagman sa pagtimalos sang pariente sang tawo nga napatay. Ang tawo nga ginsumbong sa pagpatay indi pagpatyon nga wala mahukmi sa atubangan sang katilingban.

13 Magpili kamo sing anom ka mga siyudad,

14 tatlo sa sidlangan sang Jordan, kag tatlo sa duta sang Canaan.

15 Ini mangin dalangpan nga mga siyudad para sa mga Israelinhon kag mga dumoluong nga permanente nga mga pumoluyo ukon umalagi lamang. Ang bisan sin-o nga makapatay sing indi hungod makadangop sa isa sining mga siyudad.

16-18 "Pero kon may isa ka tawo nga maggamit sing salsalon, ukon bato ukon kahoy sa pagpatay sing tawo, may salabton sia sa pagpatay, kag pagapatyon sia.

19 Ang pinakamalapit nga himata sang tawo nga nakapatay may katungdanan sa pagpatay sang tawo nga nakapatay. Kon makita niya sia, iya dayon sia patyon.

20 "Kon may isa ka tawo nga tungod sa iya dumot nakapatay sing tawo paagi sa pagtikwang sa iya, ukon paagi sa paghaboy sa iya sing bisan ano nga butang,

21 kon paagi sa pagsumbag sa iya, may salabton sia sa pagpatay, kag pagapatyon sia. Ang pinakamalapit nga himata sang tawo nga napatay may katungdanan sa pagpatay sang tawo nga nakapatay. Kon makita niya sia, iya sia dayon patyon.

22 “ Pero, abi, may isa ka tawo nga sa indi hungod nakapatay sing tawo nga wala niya ginadumti, ayhan paagi sa pagtikwang sa iya ukon paghaboy sa iya sang bisan ano nga butang.

23 Ukon, abi, samtang wala sia nagatan-aw, may isa ka tawo nga nakahaboy sing bato nga nakapatay sang tawo nga wala man sia sing tuyo sa paghalit, kag indi man niya kaaway.

24 Sa sini nga mga kahimtangan, ang katilingban magahukom sa pag-apin sang tawo nga nakapatay kag indi sa himata sang tawo nga napatay nga nagahandom sa pagtimalos.

25 Ang katilingban kinahanglan magtabang sang tawo nga nakapatay sa himata sang tawo nga napatay, kag ibalik sia nila sa siyudad nga dalangpan sa diin sia nagpalagyo. Kinahanglan didto sia magpuyo tubtob sa kamatayon sang tawo nga amo ang Pinakamataas nga Pari sadto nga tion.

26 Kon ang tawo nga nakapatay maggwa sa siyudad nga dalangpan sa diin sia nagpalagyo,

27 kag kon makita sia sang himata sang tawo nga napatay kag patyon sia, ini nga pagtimalos wala sing silot.

28 Ang tawo nga nakapatay kinahanglan magpabilin sa siyudad nga dalangpan tubtob sa kamatayon sang Pinakamataas nga Pari, pero sa tapos sini, mahimo na sia makapauli.

29 Ini nga mga pagsulondan para sa inyo kag sa inyo mga kaliwat bisan diin kamo nagapuyo.

30 "Ang tawo nga ginsumbong sa pagpatay mahimo nga mapamatud-an kag mapapatay sa tapos ang pagpamatuod sa duha ukon tatlo ka mga saksi; ang pagpamatuod sang isa ka saksi indi tuman sa pagsakdag sang panumbongon sa pagpatay.

31 Ang nakasala sa pagpatay kinahanglan patyon. Indi sia makalikaw sini nga silot paagi sa pagbayad sing kuwarta.

32 Kon ang isa ka tawo nakapalagyo sa siyudad nga dalangpan, indi sia pagtugoti nga makapauli paagi sa pagbayad sing kuwarta sa wala pa ang kamatayon sang Pinakamataas nga Pari.

33 Kon himuon ninyo ini pagadagtaan ninyo ang duta sa diin kamo nagapuyo. Ang pagpatay nagadagta sang duta, kag wala sing paagi sa paghimo sang tulomanon sa pagpaninlo para sa duta sa diin ang isa ka tawo ginpatay, luwas sa kamatayon sang tawo nga nagpatay.

34 Indi ninyo pagdagtai ang duta sa diin kamo nagapuyo, kay ako amo ang Ginoo, kag nagapuyo ako upod sa mga tawo sang Israel.”

NUMEROS - Kapitulo 34 <<<   >>> NUMEROS - Kapitulo 36

NUMEROS - Kapitulo 34

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang mga Dulonan sang Duta

1 Ang Ginoo naghatag kay Moises

2 sang masunod nga mga sugo para sa mga tawo sang Israel: "Kon magsulod kamo sa duta sang Canaan, ang duta nga akon ginahatag sa inyo, amo ini ang mga dulonan sa inyo mga kadutaan:

3 Ang dulonan sa nabagatnan magagikan sa desierto sang Zin sa ubay sang dulonan sang Edom. Magasugod ini sa sidlangan nga bahin sang nabagatnan nga punta sang Patay nga Dagat.

4 Dayon magaliko ini pa bagatnan padulong sa taklaran sang Acrabim, kag magapadayon nga nagaagi sa Zin, tubtob sa Cades Barnea sa nabagatnan. Dayon magaliko ini pakadto sa aminhan nakatundan pakadto sa Hazar Addar kag tubtob sa Azmon,

5 sa diin magaliko ini pakadto sa suba sa dulonan sang Egipto, kag ang katapusan sini amo ang Mediteraneo.

6 "Ang dulonan sa nakatundan amo ang Dagat sang Mediteraneo.

7 “Ang dulonan sa aminhan nagagikan sa Mediteraneo pakadto sa bukid sang Hor,

8 kag gikan didto padulong sa taklaran sang Hamat. Magapadayon ini pakadto sa Zedad,

9 kag pakadto sa Zifron, kag ang katapusan amo ang Hazar Enan.

10 "Ang dulonan sa sidlangan magagikan sa Hazar Enan pakadto sa Sepam.

11 Dayon magapadulong ini sa bagatnan pakadto sa Harbel, sa sidlangan sang Ain, kag padulong sa mga kabakuloran sa sidlangan nga baybayon sang linaw sang Galilea,

12 dayon pakadto sa bagatnan sa ubay sang suba sang Jordan pakadto sa Patay nga Dagat. Amo ini ang apat ka mga dulonan sang inyo duta.”

13 Si Moises naghambal sa mga Israelinhon, "Amo ini ang duta nga inyo pagabatunon paagi sa pagabotgabot, ang duta nga gintigana sa siyam kag tunga ka mga tribo.

14 Ang tribo ni Ruben kag ni Gad, kag ang nasidlangan nga katunga sang Manases nakabaton na sang ila parti, nga ginparti suno sa ila mga panimalay,

15 sa nasidlangan nga bahin sang Jordan.”

Ang mga Pangulo nga Nagparti sang Duta

16 Ang Ginoo nagsiling kay Moises,

17 "Si Eleazar nga pari kag si Josue nga anak ni Nun magabulig sa imo sa pagparti sang duta.

18 Kag halin sa tagsa ka tribo magkuha ka man sing isa ka pangulo nga magabulig sa imo sa pagparti sini.

19-28 Amo ini ang mga lalaki nga ginpili sang Ginoo:

Tribo                 Pangulo

Juda                  Caleb nga anak ni Jefone

Simeon             Semuel nga anak ni Amiud

Benjamin         Elidad nga anak ni Cislon

Dan                   Buqui nga anak ni Jogli

Manases          Haniel nga anak ni Efod

Efraim              Kemuel nga anak ni Siftan

Zabulon           Elisafan nga anak ni Parnac

Isacar               Paltiel nga anak ni Azan

Aser                 Ahiud nga anak ni Selomi

Neftali             Pedahel nga anak ni Amiud

29 Amo ini ang mga lalaki nga ginpili sang Ginoo sa pagparti sang duta para sa mga tawo sang Israel sa duta sang Canaan. 

NUMEROS - Kapitulo 33 <<<   >>> NUMEROS - Kapitulo 35

NUMEROS - Kapitulo 33

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang Pagpanglakaton Halin sa Egipto Pakadto sa Moab

1 Ang masunod nga mga nasulat nagahatag sang mga ngalan sang mga duog sa diin ang mga Israelinhon naghimo sing kampamento sa tapos sila makahalin sa Egipto sa ila mga tribo sa idalom sang pagdumala ni Moises kag ni Aaron.

2 Sa sugo sang Ginoo, ginsulat ni Moises ang ngalan sang duog sa tagsa ka paghimo nila sing kampamento.

3 Ang mga tawo sang Israel naghalin sa Egipto sa ika-15 nga adlaw sang nahauna nga bulan sang tuig, ang adlaw sa tapos ang nahauna nga Pascua. Sa idalom sang pag-apin sang Ginoo, naghalin sila sa siyudad sang Rameses samtang nagatan-aw ang mga Egiptohanon,

4 nga nagalubong sang mga panganay nga mga anak nga lalaki nga ginpamatay sang Ginoo. Paagi sa paghimo sini, ginpakita sang Ginoo nga labi pa sia ka gamhanan sang sa mga dios sang Egipto.

5 Ang mga tawo sang Israel naghalin sa Rameses kag naghimo sing kampamento sa Sucot.

6 Ang madason nila nga kampamento amo ang Etam, sa higad sang desierto.

7 Halin didto nagliko sila pakadto sa Pihahirot, sa sidlangan sang Baalzepon, kag naghimo sila sing kampamento malapit sa Migdol.

8 Naghalin sila sa Pihahirot kag nag-agi sila sa Dagat nga Mapula pakadto sa desierto sang Sur; sa tapos ang tatlo ka adlaw nga paglakat, naghimo sila sing kampamento sa Mara.

9 Halin didto nagkadto sila sa Elim, sa diin naghimo sila sing kampamento, kay didto may 12 ka mga tuboran sang tubig kag 70 ka mga palma.

10 Naghalin sila sa Elim kag naghimo sila sing kampamento malapit sa baybayon sang Suez.

11 Ang ila madason nga kampamento amo ang desierto sang Sin.

12 Dayon naghimo sila sing kampamento sa Dofca,

13 kag pagkatapos didto sa Alus.

14 Madason didto sa Refidim, sa diin wala sing tubig sila nga sarang mainom.

15-37 Halin sa Refidim pakadto sa Bukid sang Hor naghimo sila sing kampamento sa masunod nga mga duog: desierto sang Sinai, Kibrot Hataava (ukon, "Mga Lulobngan sang Pagkaibog"), Hazerot, Ritma, Rimonfarez, Libna, Rissa, Keelata, bukid sang Sefer, Harada, Maquelot, Tahat, Tera, Mitca, Asmona, Moserot, Benejaakan, Horhagidgad, Jotebata, Abrona, Eziongeber, desierto sang Zin (nga amo ang Cades), kag sa bukid sang Hor, sa higad sang duta sang Edom.

38-39 Sa mando sang Ginoo, si Aaron nga pari nagtaklad sa bukid sang Hor. Didto sia napatay, sa edad nga 123 ka tuig sa nahauna nga adlaw sang ikalima nga bulan sang ika-40 ka tuig sa tapos makahalin ang mga Israelinhon sa Egipto.

40 Ang hari sang Arad sa nabagatnan nga Canaan nakabati nga ang mga Israelinhon nagapakari.

41-49 Halin sa bukid sang Hor pakadto sa mga kapatagan sang Moab ang mga Israelinhon naghimo sing kampamento sa masunod nga mga duog: Zalmona, Punon, Obot, sa mga ginub-an sang Abarim sa kadutaan sang Moab, Dibon Gad, Almon Diblataim, sa bukid sang Abarim malapit sa bukid sang Nebo, kag sa mga kapatagan sang Moab sa tabok sang Jordan halin sa Jerico, sa gin-utlan sang Betjesimot kag kapatagan sang Acasya.

Ang mga Tugon sa Wala pa Makatabok sa Jordan

50 Didto sa mga kapatagan sang Moab sa tabok sang Jordan halin sa Jerico ang Ginoo naghatag kay Moises

51 sang masunod nga mga tugon para sa Israel: "Kon makatabok kamo sa Jordan pakadto sa duta sang Canaan,

52 kinahanglan tabugon ninyo ang tanan nga mga pumoluyo sang duta. Laglagon ninyo ang tanan nila nga mga diosdios nga bato kag metal, kag ang tanan nga mga duog nga ila ginasimbahan.

53 Agawa ninyo ang duta kag magpuyo kamo sa sini, kay ginahatag ko ini sa inyo.

54 Partiha ninyo ang duta sa nagakalainlain nga mga tribo kag mga kabaranggayan, paagi sa pagabotgabot, nga nagahatag sing daku nga parti sa daku nga baranggay, kag ang diutay nga parti sa diutay nga baranggay.

55 Pero kon indi ninyo matabog ang mga pumoluyo sang duta, ang mga nabilin manginkaangay sang puling sa inyo mga mata kag mga tunok sa inyo mga kilid, kag magapakig-away sila batok sa inyo.

56 Kon indi ninyo sila pagtabogon, laglagon ko kamo subong sang akon tuyo sa paglaglag sa ila." 

NUMEROS - Kapitulo 32 <<<   >>> NUMEROS - Kapitulo 34

NUMEROS - Kapitulo 32

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang mga Tribo sa Sidlangan sang Jordan

(Deut. 3:12-22)

1 Ang mga tribo ni Ruben kag ni Gad may madamo kaayo nga mga kabakahan. Sang makita nila nga ang duta sang Jazer kag Galaad maayo para sa mga kabakahan,

2 nagkadto sila kanday Moises, Eleazar, kag sa iban nga mga pangulo sang katilingban, kag nagsiling,

3-4 "Ining kadutaan nga ginpanag-iyahan sang mga Israelinhon sa bulig sang GINOO—ang mga banwa sang Atarot, Dibon, Jazer, Nimra, Hesbon, Eleale, Sebam, Nebo, kag Beon—maayo nga duta para sa mga kabakahan, kag madamo ang aton mga kabakahan.

5 Kon mahimo, ihatag sa amon ini nga duta subong amon kaugalingon nga pagkabutang, kag indi kami pagpataboka sa suba sang Jordan kag didto magpuyo."

6 Nagsabat si Moises, "Luyag bala kamo magpabilin diri samtang ang inyo kapareho nga mga Israelinhon magakadto sa inaway?

7 Sa ano kamo makapangahas sa pagpatalaw sang mga tawo sang Israel sa pagtabok sang Jordan pakadto sa duta nga ginhatag sang Ginoo sa ila?

8 Amo ini ang ginhimo sang inyo mga ginikanan sang pagpadala ko sa ila halin sa Cades Barnea sa pag-usisa sang duta.

9 Nakalambot sila tubtob sa kapatagan sang Escol kag nakita nila ang duta, pero sang pagbalik nila, ginpatalaw nila ang mga tawo sa pagsulod sa duta nga ginhatag sang Ginoo sa ila.

10 Ang Ginoo naakig sadto nga adlaw, kag nagpanumpa:

11 'Ginasumpa ko nga tungod kay wala sila magpadayon sa pagkamatutom sa akon, wala sing bisan isa sang mga kalalakin-an nga nagaedad sing 20 ka tuig paibabaw nga naggwa sa Egipto nga makasulod sa duta nga akon ginsaad sa kay Abraham, kay Isaac, kag kay Jacob.’

12 Ini nagalakip sang tagsatagsa, wala labot kay Caleb nga anak ni Jefone nga Cenisnon kag si Josue nga anak ni Nun, kay nagpadayon sila nga matutom sa Ginoo.

13 Ang Ginoo naakig sa mga tawo kag nagpadalangdalang sa ila sa desierto sa sulod sa 40 ka tuig, tubtob yadtong bug-os nga kaliwatan nga wala magtuman sa Ginoo nagkalamatay.

14 Kag karon nagbulos kamo sa inyo mga ginikanan, isa ka bag-o nga kaliwatan sang makasasala nga mga tawo nga handa sa pagdala liwat sang Israel sa nagabalingaso nga kaakig sang Dios.

15 Kon kamo nga mga tawo ni Ruben kag ni Gad indi magsunod sa iya karon, iya liwat patumbayaan ini tanan nga mga tawo sa desierto, kag kamo ang manabat sa ila kalaglagan.”

16 Nagpalapit sila kay Moises kag nagsiling, "Tugoti kami anay sa paghimo sing mga kudal nga bato sa amon mga karnero, kag mga banwa nga napamakuran para sa amon mga salaguron.

17 Dayon manginhanda kami sa pag-upod sa amon kapareho nga mga Israelinhon pakadto sa inaway kag magauna kami sa pagsalakay tubtob mapapuyo namon sila sa duta nga mangin-ila kaugalingon. Sa pihak nga bahin, ang amon nga salaguron makapuyo diri sa napamakuran nga mga banwa, nga wala sing katalagman sa mga pumoluyo sini nga duta.

18 Indi kami magpauli tubtob ang iban nga mga Israelinhon wala pa makapanag-iya sang duta nga ginhatag sa ila.

19 Indi kami magpanag-iya sang bisan ano nga pagkabutang upod sa ila sa tabok sang Jordan, kay nabaton na namon ang amon parti diri sa sidlangan sang Jordan."

20 Nagsabat si Moises, "Kon matuod ang inyo ginasiling, maghanda kamo diri sa atubangan sang Ginoo, sa pagkadto sa inaway.

21 Ang tanan ninyo nga mga hangaway kinahanglan magtabok sa Jordan, kag sa idalom sang pagmando sang Ginoo, salakayon ninyo ang aton mga kaaway tubtob malutos niya sila

22 kag maagaw ang duta. Sa tapos sini, sarang na kamo makabalik, kay natuman na ninyo ang inyo katungdanan sa Ginoo kag sa inyo kapareho nga mga lsraelinhon. Dayon pagakilalahon sang Ginoo nga ining duta sa sidlangan sang Jordan inyo.

23 Pero kon indi ninyo pagtumanon ang inyo panaad, ginapaandaman ko kamo nga magapakasala kamo batok sa Ginoo. Indi kamo magsayop nahanungod sini, kay pagasilotan kamo tungod sang inyo sala.

24 Gani magpatindog kamo sang inyo mga banwa sang mga kudal para sa inyo mga karnero, pero tumana ninyo ang inyo panaad!”

25 Ang mga lalaki sang tribo ni Gad kag ni Ruben nagsiling, "Sir, tumanon namon ang imo mando!

26 Ang amon mga asawa kag mga kabataan, kag ang amon mga kabakahan kag mga karnero magapabilin diri sa mga banwa sang Galaad.

27 Pero kami tanan handa sa pagkadto sa inaway sa idalom sang pagmando sang Ginoo. Matabok kami sa Jordan kag magapakig-away suno sa imo ginsiling.”

28 Gani ginhatag ni Moises ini nga mga sugo kay Eleazar, kay Josue, kag sa iban nga mga pangulo sang Israel:

29 "Kon ang mga kalalakin-an sang tribo ni Gad kag ni Ruben magtabok sa Jordan nga handa sa pagpakig-away sa mando sang Ginoo, kag kon sa bulig nila maagaw ninyo ang duta, dayon ihatag sa ila ang duta sang Galaad subong ila pagkabutang.

30 Pero kon indi sila magtabok sa Jordan kag mag-upod sa inyo sa pagkadto sa inaway, magabaton sila sang ila parti sang pagkabutang sa duta sang Canaan pareho sa inyo.”

31 Ang mga kalalakin-an sang tribo ni Gad kag ni Ruben nagsabat, "Sir, tumanon namon ang ginsugo sang GINOO.

32 Sa idalom sang iya pagmando, magatabok kami pakadto sa duta sang Canaan kag magakadto kami sa inaway, agod magapabilin nga amon pagkabutang ining duta sa nasidlangan sang Jordan.”

33 Gani ginhatag ni Moises sa tribo ni Gad kag ni Ruben kag sa katunga nga tribo ni Manases ang tanan nga kadutaan ni Haring Sihon sang mga Amornon kag ni Haring Og sang Basan, lakip ang mga kabanwahanan kag ang mga kaumhan sa palibot nila.

34 Ang tribo ni Gad nagpatindog liwat sang napamakuran nga mga banwa sang Dibon, Atarot, Aroer,

35 Atrosofan, Jazer, Jogbena,

36 Betnimra, kag Betharan.

37 Ang tribo ni Ruben nagpatindog liwat sang Hesbon, Eleale, ang Kiryataim,

38 Nebo, Baalmeon, (gin-islan ini nga ngalan), kag Sibma. Ginhimoan nila sing bag-o nga mga ngalan ang mga banwa nga ila ginpatindog liwat.

39 Ang baranggay ni Maquir nga anak ni Manases naggubat sang duta sang Galaad, gin-agaw ini, kag gintabog ang mga Amornon nga yadto didto.

40 Gani ginhatag ni Moises ang Galaad sa baranggay ni Maquir, kag nagpuyo sila didto.

41 Si Jair, gikan sa tribo ni Manases, nagsalakay kag nag-agaw sang iban nga mga kabaryohanan kag ginhingalanan ini nga "Mga Baryo ni Jair."

42 Si Noba nagsalakay kag nag-agaw sang Kenat kag sang iya mga kabaryohanan, kag ginhingalanan ini liwat sing Noba suno sa iya ngalan. 

NUMEROS - Kapitulo 31 <<<   >>> NUMEROS - Kapitulo 33

NUMEROS - Kapitulo 31

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang Inaway Batok sa Midian tungod sa Pagtuloohan

1 Ang Ginoo nagsiling kay Moises,

2 “Siluti ang mga Midianhon tungod sang ila ginhimo sa mga tawo sang Israel. Sa tapos mo mahimo ini mapatay ka."

3 Gani ginsingganan ni Moises ang mga tawo, "Maghanda kamo para sa inaway, agod masalakay ninyo ang Midian kag masilutan sila tungod sang ila ginhimo sa Ginoo.

4 Gikan sa tagsa ka tribo sang Israel magpadala ka sing isa ka libo ka mga tawo para sa inaway.”

5 Gani ginpili ang isa ka libo ka mga tawo halin sa tagsa ka tribo, 12,000 tanan ka mga lalaki nga handa sa pagpakig-away.

6 Ginpadala sila ni Moises sa inaway, sa idalom sang pagmando ni Finees nga anak ni Eleazar nga pari, nga gintugyanan sang balaan nga mga butang kag sang mga trumpeta sa paghatag sing mga paandam.

7 Ginsalakay nila ang Madian, suno sa mando sang Ginoo kay Moises, kag ginpamatay nila ang tanan nga mga lalaki,

8 lakip ang 5 ka mga hari sang Madian nga amo sanday Evi, Requem, Zur, Hur, kag Reba. Ginpatay man nila si Balaam nga anak ni Beor.

9 Ang mga tawo sang Israel nagbihag sang mga kababayin-an kag mga kabataan nga Madianhon, ginkuha nila ang ila mga kabakahan kag mga panong, gin-ati ang ila manggad,

10 kag ginsunog ang tanan nila nga mga siyudad kag mga kampamento.

11 Gindala nila ang tanan nila nga mga naagaw, kag ang mga bihag kag mga kasapatan,

12 kag gindala nila ini tanan kay Moises kag kay Eleazar, kag sa katilingban sang mga tawo sang Israel, nga yara sa kampamento sa mga kapatagan sang Moab sa tabok sang Jordan halin sa Jerico.

Ang mga Hangaway Nagbalik

13 Si Moises, si Eleazar, kag ang tanan nga mga pangulo sang katilingban naggwa sa kampamento sa pagsugata sang mga hangaway.

14 Naakig si Moises sa mga opisyales, sa mga pangulo sang mga batalyon kag mga kompaniya, nga nagbalik halin sa inaway.

15 Ginpamangkot niya sila, "Ngaa bala ginbilin ninyo nga buhi ang tanan nga mga kababayin-an?

16 Dumdoma ninyo nga ang mga babayi amo ang nagsunod sang mga gintudlo ni Balaam, kag gindala ang mga tawo sa pagkadimatutom sa Ginoo didto sa Peor. Amo ini ang kabangdanan sang pagkalamatay sang mga tawo sang Ginoo.

17 Gani, karon pamatya ninyo ang tagsa ka bata nga lalaki, kag pamatya ang tagsa ka babayi nga nagaagi sing pagpakighilawas,

18 pero ibilin para sa inyo kaugalingon ang tanan nga mga dalaga kag tanan nga mga babayi nga mga ulay.

19 Karon tanan kamo nga nakapatay ukon nakatandog sang isa ka bangkay kinahanglan magpabilin sa gwa sang kampamento sa sulod sang pito ka adlaw. Sa ikatlo kag sa ikapito nga adlaw magpaninlo kamo sang inyo kaugalingon kag ang mga babayi nga inyo ginbihag.

20 Kinahanglan inyo man tinloan ang tagsa ka pidaso sang panapton kag ang tagsa ka butang nga nahimo sa panit, bulbol sang kanding, ukon kahoy."

21 Si Eleazar nga pari nagsiling sa mga tawo nga nagbalik halin sa inaway, "Amo ini ang mga pagsulondan nga ginhatag sang Ginoo kay Moises.

22-23 Ang tagsa ka butang nga indi masunog, kaangay sang bulawan, pilak, saway, salsalon, lata, ukon tingga, kinahanglan pagapurawon paagi sa kalayo. Ang iban nga butang pagatinloan paagi sa tubig.

24 Sa ikapito nga adlaw kinahanglan labhan ninyo ang inyo mga bayo; dayon manginmatinlo kamo kag sarang na makasulod sa kampamento."

Ang Pagpartida sang mga Inagaw

25 Ang Ginoo nagsiling kay Moises,

26 "Ikaw kag si Eleazar, upod sang iban nga mga pangulo sang katilingban, mag-isip sang tanan nga mga inagaw, lakip ang mga bihag kag ang mga kasapatan.

27 Partidaha sing palareho ang mga inagaw, isa para sa mga hangaway, kag isa para sa bug-os nga katilingban.

28 Gikan sa parti nga natuon sa mga hangaway, maghawid subong isa ka buhis para sa Ginoo sing isa sa tagsa ka lima ka gatos nga mga bihag, kag amo man nga kadamuon sa mga kabakahan, mga asno, mga karnero, kag mga kanding.

29 Ihatag mo ini kay Eleazar nga pari subong isa ka pinasahi nga dulot sa GINOO.

30 Gikan sa parti nga natuon sa bug-os nga katilingban, magkuha ka sing isa sa tagsa ka 50 ka mga bihag, kag amo man nga kadamuon sa mga kabakahan, mga asno, mga karnero, kag mga kanding. Ihatag mo ini sa mga Levita nga gintugyanan sang Tolda nga Tilipunan sang Ginoo."

31 Gintuman ni Moises kag ni Eleazar ang sugo sang Ginoo.

32-35 Ang masunod amo ang lista sang mga naagaw sang mga hangaway wala labot sang ila gintago para sa ila kaugalingon: 675,000 ka mga karnero, 72,000 ka mga baka, 61,000 ka mga asno, kag 32,000 ka mga ulay.

36-40 Ang katunga nga parti sang mga hangaway 337,500 ka mga karnero kag mga kanding, kag ang buhis para sa Ginoo 675; 36,000 ka mga baka para sa mga hangaway, kag 72 subong nga buhis para sa Ginoo; 30,500 ka mga asno para sa mga hangaway, kag 61 subong nga buhis para sa Ginoo; kag 16,000 ka mga ulay para sa mga hangaway, kag 32 subong nga buhis para sa Ginoo.

41 Gani, ginhatag ni Moises kay Eleazar ang buhis subong isa ka pinasahi nga dulot sa Ginoo, suno sa ginsugo sang Ginoo.

42-46 Ang parti sang katilingban pareho man kadamo sang iya mga hangaway: 337,500 ka mga karnero kag mga kanding, 36,000 ka mga baka, 30,500 ka mga asno, kag 16,000 ka mga ulay.

47 Gikan sa sini nga parti nagkuha si Moises sing isa sa tagsa ka 50 ka mga bihag kag mga kasapatan, kag suno sa ginsugo sang Ginoo, ginhatag niya ini sa mga Levita nga amo ang gintugyanan sang mga Tolda nga Tilipunan sang Ginoo.

48 Dayon ang mga opisyales nga nagpangulo sang mga hangaway nagkadto kay Moises,

49 kag nagsugid, "Sir, gin-isip namon ang mga hangaway sa idalom sang amon pagmando kag wala gid sing isa sa ila nga kulang.

50 Gani gindala namon diri ang mga alahas nga bulawan, mga hapin sa butkon, mga pulseras, mga singsing, mga aritos, kag mga kulintas nga nakuha sang kada isa sa amon. Ginahalad namon ini sa Ginoo subong nga bayad sang amon mga kabuhi, agod iya kami apinan."

51 Ginbaton ni Moises kag ni Eleazar ang tanan nga bulawan nga mga alahas.

52 Ang bug-os nga kadamuon sang mga dulot sang mga opisyales nagabug-at sing sobra sa apat ka gatos ka libra.

53 Ang indi mga opisyales nagtago sang mga inagaw nga ila nakuha.

54 Gani gindala ni Moises kag ni Eleazar ang bulawan sa Tolda nga Tilipunan, agod nga ang Ginoo magaapin sang mga tawo sang Israel. 

NUMEROS - Kapitulo 30 <<<   >>> NUMEROS - Kapitulo 32

NUMEROS - Kapitulo 30

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Mga Kasugoan Nahanungod sang mga Saad

1 Ginhatag ni Moises ang masunod nga mga pagsulondan sa mga pangulo sang mga tribo sang Israel.

2 Kon ang isa ka tawo magsaad sa paghatag sa Ginoo ukon magsumpa sia nga indi maghimo sang isa ka butang, kinahanglan indi niya paglapason ang iya saad, kundi kinahanglan tumanon niya ang tanan nga iya ginsiling nga himuon.

3 Kon ang isa ka dalaga nga yara pa nagapuyo sa balay sang iya amay, magsaad sa paghatag sa Ginoo ukon magsaad nga indi maghimo sang isa ka butang,

4 kinahanglan tumanon niya ang tanan nga iya ginsumpaan ukon ginsaad, luwas kon ang iya amay nagpamalabag sang mabatian niya ini.

5 Pero kon ang iya amay indi magtugot sa iya sa pagtuman sang iya panumpa sang mabatian niya ini, indi sia kinahanglan magtuman sini. Pagapatawaron sia sang Ginoo, kay ang iya amay indi magtugot sa iya sa pagtuman sini.

6 Kon ang isa ka babayi nga wala sing bana maghimo sing isa ka panumpa, bisan ini hungod ukon pasapayan lamang, ukon magsaad nga indi maghimo sang isa ka butang, kag sang ulihi magpamana,

7 kinahanglan tumanon niya ang tanan nga iya ginsumpaan ukon ginsaad, luwas kon ang iya bana magpamalabag sang mabatian niya ini.

8 Pero kon ang iya bana indi magtugot sa iya sa pagtuman sang iya ginsumpaan sang mabatian niya ini, indi sia kinahanglan magtuman sini. Ang Ginoo magapatawad sa iya.

9 Ang isa ka babayi nga balo ukon ang babayi nga ginbulagan sang iya bana kinahanglan magtuman sang tagsa ka panumpa nga iya ginhimo kag sang tagsa ka saad niya sa paglikaw sa bisan ano nga butang.

10 Kon ang isa ka babayi nga may bana magsumpa ukon magsaad sa paglikaw sa isa ka butang,

11 kinahanglan tumanon niya ang tagsa niya ka panumpa ukon panaad, Iuwas kon ang iya bana magpamalabag sang mabatian niya ini.

12 Pero kon ang iya bana magdumili sa iya sa pagtuman sang iya panumpa sang pagkabati niya sini, indi sia kinahanglan magtuman sini. Ang Ginoo magapatawad sa iya, tungod kay ang iya bana indi magtugot sa iya sa pagtuman sang iya panumpa.

13 Ang iya bana may kinamatarong sa pagpalig-on ukon sa pagpakawalay pulos sang bisan ano nga panumpa ukon panaad nga iya nahimo.

14 Pero sa tapos sang isa ka adlaw nga nabatian niya ang panaad, kag wala man sia magpamalabag, kinahanglan tumanon sang asawa ang tanan niya nga mga panumpa kag mga panaad. Ginpalig-on niya ang sumpa paagi sa iya dipagpamalabag sini sang mabatian niya ini.

15 Pero kon sa ulihi iya pakawalay puloson ang panumpa, magaantos sia sang silot tungod sa dipagtuman sang sumpa.

16 Amo ini ang mga pagsulondan nga ginhatag sang Ginoo kay Moises nahanungod sang mga panumpa nga ginhimo sang babayi nga wala pa sing bana nga nagapuyo sa balay sang iya amay ukon sang isa ka babayi nga may bana.

NUMEROS - Kapitulo 29 <<<   >>> NUMEROS - Kapitulo 31

NUMEROS - Kapitulo 29

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang mga Halad sa Piesta sa Bag-o nga Tuig

(Lev. 23:23-35)

1 Sa nahauna nga adlaw sang ikapito nga bulan magtipon kamo sa pagsimba, kag indi kamo maghimo sang bisan ano nga obra. Sa amo nga adlaw patunogon ang mga trumpeta.

2 Magdulot kamo sing halad nga sinunog sa GINOO, nga mahamot sa iya: isa ka torite nga baka, isa ka karnero nga lalaki, kag pito ka kordero nga lalaki nga tag-isa ka tuig ang edad nga wala sing bisan ano nga depekto.

3 Magdulot kamo sang nagakaigo nga halad nga kalan-on nga nahimo sa arina nga nasamoan sing lana sang olivo: anom ka libra nga arina upod sa torite nga baka, apat ka libra upod sa karnero nga lalaki,

4 kag duha ka libra upod sa tagsa ka kordero.

5 Magdulot man kamo sing toro nga kanding subong isa ka halad tungod sa sala, kag sa sini nga paagi mahimo ninyo ang mga tulumanon sa pagpaninlo sang mga tawo.

6 Ihalad ninyo ini tanan lakip ang kinaandan nga halad nga sinunog para sa nahauna nga adlaw sang bulan upod ang iya mga halad nga kalan-on, kag ang adlaw-adlaw nga halad nga sinunog lakip ang iya halad nga kalan-on kag halad nga ilimnon. Ining mga halad nga kalan-on paagi sa kalayo mahamot sa Ginoo.

Ang mga Halad sa Adlaw sang Pagtubos

(Lev. 23:26-32)

7 Magtipon kamo sa pagsimba sa ikanapulo nga adlaw sang ikapito nga bulan; indi kamo magkaon ukon mag-obra.

8 Magdulot kamo sing isa ka halad nga sinunog sa Ginoo, isa ka mahamot nga dulot sa iya: isa ka torite nga baka, isa ka karnero nga lalaki, kag pito ka kordero nga nagaedad sing tag-isa ka tuig, nga wala sing bisan ano nga depekto.

9 Magdulot kamo sing nagakaigo nga halad nga kalan-on nga nahimo sa arina nga nasamoan sing lana sang olivo: anom ka libra nga arina upod sa torite nga baka, apat ka libra upod sa karnero nga lalaki,

10 kag duha ka libra upod sa tagsa ka kordero.

11 Magdulot man kamo sang isa ka kanding subong isa ka halad tungod sa sala, wala labot sang kanding nga ginahalad sa pagpaninlo sang mga tawo, kag ang adlaw-adlaw nga halad nga sinunog lakip ang iya halad nga kalan-on kag halad nga ilimnon.

Ang mga Halad sa Piesta sang mga Tolda

(Lev. 23:33-44)

12 Magtipon kamo sa pagsimba sa ika-15 nga adlaw sang ikapito nga bulan. Sauloga ninyo ang piesta sa pagpadungog sa Ginoo sa sulod sang pito ka adlaw kag indi kamo mag-obra.

13 Sa sining nahauna nga adlaw magdulot kamo sing halad nga kalan-on paagi sa kalayo sa Ginoo, nga mahamot sa iya: 13 ka bilog nga torite nga mga baka, duha ka karnero nga lalaki, kag 14 ka mga kordero nga nagaedad sing tag-isa ka tuig, nga wala sing bisan ano nga depekto.

14 Magdulot kamo sang nagakaigo nga halad nga kalan-on nga nahimo sa arina nga nasamoan sing lana sang olivo: anom ka libra nga arina upod sa tagsa ka torite nga lana sang olivo: anom ka libra nga arina upod sa tagsa ka torite nga baka, apat ka libra upod sa tagsa ka karnero nga lalaki,

15 kag duha ka libra upod sa tagsa ka kordero, lakip ang mga kinahanglanon nga mga halad nga ilimnon.

16 Magdulot man kamo sing isa ka toro nga kanding subong isa ka halad tungod sa sala. Ihalad ninyo ini wala labot sa adlaw-adlaw nga halad nga sinunog lakip ang iya halad nga kalan-on kag halad nga ilimnon.

17 Sa ikaduha nga adlaw maghalad kamo sing 12 ka torite nga mga baka, duha ka karnero nga lalaki, kag 14 ka mga kordero nga nagedad sing tag-isa ka tuig, nga wala sing bisan ano nga depekto.

18-19 Upod sini tanan magdulot kamo sang iban nga mga halad nga ginakinahanglan sa nahauna nga adlaw.

20 Sa ikatlo nga adlaw, maghalad kamo sing 11 ka torite nga mga baka, duha ka karnero nga lalaki, kag 14 ka mga kordero nga nagaedad sing tag-isa ka tuig, nga wala sing bisan ano nga depekto.

21-22 Upod sini tanan magdulot kamo sang iban nga mga halad nga ginakinahanglan sa nahauna nga adlaw.

23 Sa ikap-at nga adlaw, maghalad kamo sing 10 ka torite nga mga baka, duha ka karnero nga lalaki, kag 14 ka mga kordero nga nagaedad sing tag-isa ka tuig, nga wala sing bisan ano nga depekto.

24-25 Upod sini tanan magdulot kamo sang iban nga mga halad nga ginakinahanglan sa nahauna nga adlaw.

26 Sa ikalima nga adlaw, maghalad kamo sing siam ka torite nga mga baka, duha ka karnero nga lalaki kag 14 ka mga kordero nga nagaedad sing tag-isa ka tuig, nga wala sing bisan ano nga depekto.

27-28 Upod sini tanan magdulot kamo sang iban nga mga halad nga ginakinahanglan sa nahauna nga adlaw.

29 Sa ikan-om nga adlaw, maghalad kamo sing walo ka torite nga mga baka, duha ka karnero nga lalaki, kag 14 ka mga kordero nga nagaedad sing tag-isa ka tuig, nga wala sing bisan ano nga depekto.

30-31 Upod sini tanan magdulot kamo sang iban nga mga halad nga ginakinahanglan sa nahauna nga adlaw.

32 Sa ikapito nga adlaw, maghalad kamo sing pito ka torite nga mga baka, duha ka karnero nga lalaki, kag 14 ka mga kordero nga nagaedad sing tag-isa ka tuig, nga wala sing bisan ano nga depekto.

33-34 Upod sini tanan magdulot kamo sang iban nga mga halad nga ginakinahanglan sa nahauna nga adlaw.

35 Sa ikawalo nga adlaw, magtipon kamo sa pagsimba kag indi kamo mag-obra.

36 Maghalad kamo sing isa ka halad nga sinunog subong isa ka halad nga kalan-on paagi sa kalayo sa Ginoo, nga mahamot sa iya: isa ka torite nga baka, isa ka karnero nga lalaki, kag pito ka mga kordero nga nagaedad sing tag-isa ka tuig, nga wala sing bisan ano nga depekto.

37-38 Upod sini tanan magdulot kamo sang iban nga mga halad nga ginakinahanglan sa nahauna nga adlaw.

39 Amo ini ang mga pagsulondan nahanungod sang mga halad nga sinunog, mga halad nga kalan-on, mga halad nga ilimnon, kag mga halad sa paghiambit nga inyo pagaihalad sa Ginoo sa inyo natalana nga mga piesta. Wala labot ini sa mga halad nga inyo ginadulot sa pagtuman sang isa ka panaad ukon subong nga halad nga kinabubot-on.

40 Gani ginsugiran ni Moises ang mga tawo sang Israel sang tanan nga ginsugo sang Ginoo sa iya. 

NUMEROS - Kapitulo 28 <<<   >>> NUMEROS - Kapitulo 30

NUMEROS - Kapitulo 28

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang mga Halad Adlaw-adlaw

(Ex. 29:38-46)

1 Ang Ginoo nagsugo kay Moises

2 nga singganon ang Israel nga indi magkalipat nga sa natalana nga mga panahon maghalad sila sa Dios sang ginakinahanglan nga mga halad nga kalan-on paagi sa kalayo nga mahamot para sa iya.

3 Amo ini ang mga halad nga kalan-on paagi sa kalayo nga pagaihalad sa GINOO: para sa adlaw-adlaw nga halad nga sinunog, duha ka kordero nga nagaedad sing isa ka tuig nga wala sing mga depekto.

4 Ihalad ang nahauna nga kordero sa aga, kag ang ikaduha sa hapon.

5 Ang kadaisa lakipan sing halad nga kalan-on nga duha ka libra nga arina, nga nasamoan sing tatlo ka tasa sang labing maayo nga lana sang olivo.

6 Amo ini ang adlaw-adlaw nga halad nga ginasunog sing bug-os, nga ginhalad sing una sa bukid sang Sinai subong isa ka halad nga kalan-on paagi sa kalayo, nga mahamot sa Ginoo.

7 Subong nga halad nga ilimnon upod sa nahauna nga kordero, iula sa altar ang tatlo ka kupa nga bino.

8 Sa hapon ihalad ang ikaduha nga kordero sa amo man nga paagi subong sang halad sa aga lakip ang iya halad nga bino. Isa man ini ka halad nga kalan-on paagi sa kalayo, nga mahamot sa Ginoo.

Mga Halad sa Adlaw nga Inugpahuway

9 Sa adlaw nga Inugpahuway maghalad sing duha ka kordero nga wala sing mga depekto, apat ka libra nga arina nga nasamoan sing lana sang olivo subong isa ka halad nga kalan-on, kag ang halad nga ilimnon.

10 Ini nga halad nga sinunog pagaidulot sa tagsa ka adlaw nga Inugpahuway wala labot sa adlaw-adlaw nga halad lakip ang iya halad nga ilimnon.

Ang mga Halad sa Nahauna nga Adlaw sang Bulan

11 Magdulot sing isa ka halad nga sinunog sa Ginoo sa pagsugod sang tagsa ka bulan: duha ka torite nga mga baka, isa ka karnero nga lalaki, pito ka kordero nga nagaedad sing tag-isa ka tuig, nga wala sing mga depekto.

12 Subong isa ka halad nga kalan-on, magdulot sing arina nga nasamoan sang lana sang olivo: ilakip sa tagsa ka torite ang anom ka libra nga arina, upod sa karnero nga lalaki, apat ka libra nga arina,

13 kag sa tagsa ka kordero, duha ka libra nga arina. Ini nga mga halad nga sinunog amo ang mga halad nga kalan-on nga paagi sa kalayo, nga mahamot sa Ginoo.

14 Ang nagakaigo nga halad nga ilimnon amo ang anom ka kupa nga bino upod sa tagsa ka torite nga baka, apat ka kupa kag tunga upod sa karnero nga lalaki, kag tatlo ka kupa upod sa tagsa ka kordero. Amo ini ang pagsulondan para sa halad nga sinunog sa nahauna nga adlaw sang tagsa ka bulan sa bug-os nga tuig.

15 Wala labot sang adlaw-adlaw nga halad nga sinunog lakip ang iya halad nga ilimnon, maghalad sing isa ka kanding nga lalaki subong isa ka halad tungod sa sala.

Ang mga Halad sa Piesta sang Tinapay nga Wala sing Lebadora

(Lev. 23:5-14)

16 Ang Piesta sang Pascua sa pagpadungog sa Ginoo ginahiwat sa ika-14 nga adlaw sang nahauna nga bulan.

17 Sa ika-15 nga adlaw, magasugod ang piesta para sa Ginoo nga magalawig sing pito ka adlaw, kag sa sini nga panahon ang pagakaunon amo lamang ang tinapay nga wala sing lebadora.

18 Sa nahauna nga adlaw sang piesta, magtipon kamo sa pagsimba, kag indi kamo maghimo sang bisan ano nga obra.

19 Maghalad kamo sing isa ka halad nga sinunog subong isa ka halad nga kalan-on paagi sa kalayo sa Ginoo: duha ka torite nga mga baka, isa ka karnero nga lalaki, kag pito ka kordero nga nagaedad sing tag-isa ka tuig nga wala sing bisan ano nga depekto.

20 Maghalad sang nagakaigo nga halad nga kalan-on nga nahimo sa arina nga nasamoan sing lana sang olivo: anom ka libra sa tagsa ka torite nga baka, apat ka libra upod sa karnero nga lalaki,

21 kag duha ka libra sa tagsa ka kordero.

22 Maghalad man kamo sing toro nga kanding subong isa ka halad tungod sa sala, kag sa sini nga paagi mahimo ninyo ang mga tulomanon sa pagpaninlo sang mga tawo.

23 Ihalad ninyo ini, wala labot sang kinaandan nga halad sa aga.

24 Sa amo man nga paagi maghalad sa Ginoo sing halad nga kalan-on paagi sa kalayo, nga mahamot sa Ginoo, sa sulod sang pito ka adlaw. Ihalad ninyo ini lakip ang adlaw-adlaw nga halad nga sinunog kag halad nga ilimnon.

25 Magtipon kamo sa pagsimba sa ikapito nga adlaw kag indi kamo mag-obra.

Ang mga Halad sa Piesta sang Pag-ani

(Lev. 23:15-22)

26 Sa nahauna nga adlaw sang Piesta sa Pag-ani, kon magdulot kamo sang halad nga bag-o nga kalan-on sa Ginoo, magtipon kamo sa pagsimba, kag indi kamo maghimo sang bisan ano nga obra.

27 Magdulot kamo sing halad nga sinunog nga mahamot sa Ginoo: duha ka torite nga baka, isa ka karnero nga lalaki, kag pito ka mga kordero nga nagaedad sing tag-isa ka tuig, nga wala sing bisan ano nga depekto,

28 lakip sa nagakaigo nga halad nga kalan-on nga nahimo sa arina nga nasamoan sing lana sang olivo: anom ka libra sa tagsa ka torite nga baka, apat ka libra upod sa karnero nga lalaki,

29 kag duha ka libra sa tagsa ka kordero.

30 Maghalad man kamo sing isa ka toro nga kanding subong isa ka halad tungod sa sala, kag sa sini nga paagi mahimo ninyo ang mga tulumanon sa pagpaninlo sang mga tawo.

31 Ihalad ninyo ini tanan, kag ang halad nga ilimnon, lakip ang adlaw-adlaw nga halad nga sinunog kag ang halad nga kalan-on. 

NUMEROS - Kapitulo 27 <<<   >>> NUMEROS - Kapitulo 29

NUMEROS - Kapitulo 27

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Ang mga Anak nga Babayi ni Selofehad

1 Sanday Mala, Noa, Hogla, Milca, kag Tirsa amo ang mga anak nga babayi ni Selofehad nga anak ni Hefer, anak ni Galaad, anak ni Maquir, anak ni Manases, anak ni Jose.

2 Nagkadto sila kag nagtindog sa atubangan ni Moises, ni Eleazar nga pari, sang mga pangulokag sang bug-os nga katilingban sa puwertahan sang Tolda nga Tilipunan kag nagsiling,

3 "Ang amon amay napatay sa desierto nga wala sing ginbilin nga anak nga lalaki. Wala sia malakip sa grupo ni Core nga nagrebelde batok sa Ginoo; napatay sia tungod sang iya kaugalingon nga sala.

4 Ngaa bala panason ang ngalan sang amon amay sa Israel tungod lamang kay wala sia sing mga anak nga lalaki? Hatagi kami sang amon parti pareho sang mga himata sang amon amay."

5 Gindala ni Moises ang ila pangayo sa Ginoo,

6 kag ang Ginoo nagsiling sa iya,

7 "Husto ang ginapangayo sang mga anak ni Zelofehad; hatagi sila sing parti pareho sang mga himata sang ila amay. Ihatag sa ila ang panublion sang ila amay.

8 Singgana ang mga tawo sang Israel nga kon ang isa ka tawo mapatay nga wala sing anak nga lalaki, ang iya anak nga babayi amo ang magapanubli sang iya pagkabutang.

9 Kon wala sia sing anak nga babayi, ang iya mga utod nga lalaki amo ang magapanubli sini.

10 Kon wala sia sing mga utod nga lalaki, ang mga utod nga lalaki sang iya amay amo ang magapanubli sini.

11 Kon wala sia sing mga utod nga lalaki ukon mga tiyo, dayon ang labing malapit niya nga himata amo ang magapanubli sini kag magapanag-iya sini subong iya kaugalingon nga pagkabutang. Ang mga tawo sang Israel dapat magsunod sini nga kasugoan, subong nga ako, ang Ginoo nagmando sini sa inyo.”

Si Josue Ginpili sa Pagbulos kay Moises

(Deut. 31:1-8)

12 Ang Ginoo nagsiling kay Moises, "Taklad ka sa bukid sang Abarim kag lantawa ang duta nga akon ginahatag sa mga Israelinhon.

13 Sa tapos mo makita ini mapatay ka pareho sang imo utod nga si Aaron,

14 kay kamo nga duha naglapas sang akon sugo sa desierto sang Zin. Sang magreklamo batok sa akon ang bug-os nga katilingban, didto sa Meriba, wala ninyo pagkilalaha ang akon balaan nga gahom sa atubangan nila.” (Ang Meriba amo ang tuboran sa Cades sa desierto sang Zin.)

15 Si Moises nagpangamuyo,

16 “O Ginoo nga Dios, nga ginahalinan sang tanan nga kabuhi, nagapangamuyo ako nga magpili ka sang isa ka tawo nga makasarang sa pagdumala sang mga tawo

17 kag makapangulo sa ila sa inaway, agod ang imo katilingban indi manginkaangay sang karnero nga wala sing manugbantay.”

18 Ang Ginoo nagsiling kay Moises, "Kuhaa si Josue nga anak ni Nun, isa ka tawo nga may ikasarang, kag itungtong ang imo mga kamot sa iya ulo.

19 Patindoga sia sa atubangan ni Eleazar nga pari kag sang bug-os nga katilingban, kag didto sa atubangan nila tanan ipakilala nga sia amo ang magabulos sa imo.

20 Hatagi sia sang imo gahom, agod nga ang bug-os nga katilingban sang Israel magatuman sa iya.

21 Magasalig sia sa kay Eleazar nga pari, nga magahibalo sang akon kabubot-on paagi sa paggamit sang Urim kag Tumim.^x Sa sini nga paagi si Eleazar magatudlo kay Josue kag sang bug-os nga katilingban sang Israel sang tanan nila nga pagahimuon."

22 Ginhimo ni Moises ang ginsugo sang Ginoo sa iya. Ginpatindog niya si Josue sa atubangan ni Eleazar nga pari kag sang bug-os nga katilingban.

23 Suno sa ginsugo sang Ginoo, gintungtong ni Moises ang iya mga kamot sa ulo ni Josue, kag ginpakilala sia nga amo ang magabulos sa iya. 

Gintungtong ni Moises ang iya mga kamot sa ulo ni Josue, kag ginpakilala sia nga amo ang magabulos sa iya. (27:23)

^xURIM KAG TUMIM: Duha ka butang nga ginagamit sang pari sa paghibalo sang kabubot-on sang Dios. Indi gid mapat-od kon paano ini gingamit.

NUMEROS - Kapitulo 26 <<<   >>> NUMEROS - Kapitulo 28