□□□□□
Ang mga Halad sang mga Pangulo
1 Sang adlaw nga natapos ni Moises ang pagpatindog sang Tolda nga Tilipunan, ginhaplas kag ginahalad niya ang Tolda kag ang tanan nga mga gamit sini.
2 Dayon ang mga pangulo sang mga kabaranggayan nga nagadumala sang mga tribo sang Israel, nga amo man ang gintugyanan sang pagsenso,
3 nagdala sang ila mga halad sa Ginoo: anom ka mga karo kag 12 ka bilog nga mga baka, isa ka karo para sa tagsa ka duha ka pangulo, kag isa ka bilog nga baka para sa tagsa ka pangulo. Sa tapos nila mahalad ini,
4 ang Ginoo nagsiling kay Moises,
5 "Batona ini nga mga dulot agod gamiton sa obra nga pagahimuon sa Tolda nga Tilipunan; ihatag ini sa mga Levita, suno sa obra nga ila pagahimuon.”
6 Gani ginhatag ni Moises ang mga karo kag ang mga baka sa mga Levita.
7 Ginhatagan niya sing duha ka karo kag apat ka mga baka ang mga Gersonhon,
8 kag apat ka mga karo kag walo ka mga baka ang mga Mirarinhon. Ang tanan nila nga mga obra pagahimuon sa idalom sang pagdumala ni Itamar nga anak nga lalaki ni Aaron.
9 Pero wala paghatagi ni Moises sing mga karo ukon mga baka ang mga Coatnon, kay ang balaan nga mga butang nga ila pagadal-on pagapas-anon nila sa ila mga abaga.
10 Ang mga pangulo nagdala man sing mga halad sa pagsaulog sang paghalad sang altar. Sang handa na sila sa paghalad sang ila mga dulot sa altar,
11 ang GINOO nagsiling kay Moises, "Singgana sila nga sa tagsa ka adlaw sa sulod sang 12 ka adlaw ang isa sang mga pangulo maghalad sang iya mga dulot para sa paghalad sang altar."
12-83 Naghalad sila sa ila mga dulot sa sini nga pagpaagisod:
Adlaw Tribo Pangulo
Nahauna Juda Naason nga
anak ni Aminadab
Ikaduha Isacar Natanael nga
anak ni Zuar
Ikatlo Zabulon Eliab nga
anak ni Helon
Ikap-at Ruben Elizur nga
anak ni Sedeur
Ikalima Simeon Selumiel nga
anak ni Zurisadai
Ikan-om Gad Eleasaf nga
anak ni Devel
Ikapito Efraim Elisama nga
anak ni Amiud
Ikawalo Manases Gamaliel nga
anak ni Pedazur
Ikasiam Benjamin Abidan nga
anak ni Gideoni
Ikanapulo Dan Ahiezer nga
anak ni Amisadai
Ikaonse Aser Pagiel nga
anak ni Ocran
Ikadose Neftali Ahira nga
anak ni Enan
Ang mga dulot nga gindala sang tagsatagsa palareho: isa ka yahong nga pilak nga nagabug-at sing 50 ka onsas kag isa ka bilog nga labador nga pilak nga nagabug-at sing 30 ka onsas, suno sa opisyal nga talaksan, ini sila puno sing arina nga nasamoan sing lana para sa mga halad nga kalan-on; isa ka bilog nga pinggan nga bulawan nga nagabug-at sing apat ka onsas, nga puno sing insyenso; isa ka bilog nga baka nga toro, isa ka bilog nga karnero nga lalaki, kag isa ka bilog nga kordero nga nagaedad sing isa ka tuig, para sa halad nga sinunog; isa ka kanding para sa halad tungod sa sala; duha ka toro nga baka, lima ka mga karnero nga lalaki, lima ka mga kanding, kag lima ka kordero nga nagaedad sing tag-isa ka tuig para sa halad sa paghiambit.
84-88 Ang kadamuon sang mga dulot nga gindala sang 12 ka mga pangulo para sa paghalad sang altar amo ang masunod:
—12 ka mga yahong nga pilak kag 12 ka mga labador nga pilak nga ang bug-os nila nga kabug-aton 60 ka libra.
—12 ka mga pinggan nga bulawan nga ang bug-os nila nga kabug-aton 48 ka onsas, nga puno sing insyenso.
—12 ka mga baka nga toro, 12 ka mga karnero nga lalaki, kag 12 ka mga kordero nga nagaedad sing isa ka tuig, lakip ang mga halad nga kalan-on nga nagaupod sini, para sa mga halad nga sinunog.
—12 ka mga kanding para sa halad tungod sa sala.
—24 ka mga baka nga toro, 60 ka mga karnero nga lalaki, 60 ka mga kanding, 60 ka mga kordero nga nagaedad sing tag-isa ka tuig, para sa mga halad sa paghiambit.
89 Sang pagsulod ni Moises sa Tolda nga Tilipunan sa pagpakighambal sa Ginoo, nabatian niya ang Ginoo nga nagahambal sa iya halin sa takop sang Kaban sang Kasugtanan, sa gin-utlan sang duha ka mga sapat nga may mga pakpak.b
bmga sapat nga may mga pakpak: Tan-awa ang Lista sang mga Pulong . . .
No comments:
Post a Comment