♤♤♤♤♤
1 "Kon may isa ka propeta ukon manugsaysay sang kahulogan sang mga damgo magpakita sa inyo sang isa ka tanda ukon katingalahan,
2 sa paghaylo sa inyo sa pagsimba sa mga dios nga wala ninyo anay ginsimba, bisan matuod pa ang iya ginasiling,
3 indi kamo magpati sa iya. Ang Ginoo nga inyo Dios nagagamit sa iya sa pagtilaw sa inyo kon bala ginahigugma ninyo ang Ginoo sa bug-os ninyo nga tagipusoon kag kalag.
4 Sunda ninyo kag tahura ang Ginoo. Tumana ninyo sia kag bantayi ang iya mga sugo. Simbaha ninyo sia kag magmatutom kamo sa iya.
5 Pero patya ninyo ang propeta ukon ang manugsaysay sang mga damgo nga nagasugo sa inyo sa pagsupak sa Ginoo nga nagluwas sa inyo sa Egipto sa diin gin-ulipon kamo. Ina nga tawo malaut, kag nagatinguha sia sa pagpahilayo sa inyo sa pagginawi nga ginsugo sa inyo sang Ginoo, gani dapat sia patyon. Sa sini nga paagi mapahilayo kamo sa sini nga kalautan.
6 "Bisan ang imo utod nga lalaki, ukon ang imo anak nga lalaki ukon babayi, ukon ang imo pinalangga nga asawa, ukon ang imo labing suod nga abyan magsiling sa imo sa sekreto nga magsimba sa iban nga mga dios, mga dios nga wala mo anay ginsimba kag sang imo mga katigulangan,
7 ayhan ang isa sa ila magasiling sa imo sa pagsimba sa mga dios sang mga tawo nga nagapuyo malapit sa inyo ukon sa mga dios sang mga tawo nga nagapuyo malayo sa inyo,
8 pero indi kamo magpadala ukon magpamati sa iya. Indi ka magkaluoy ukon mag-apin sa iya.
9 Patya sia! Ikaw ang mauna nga magbato sa iya, kag dayon ipabato sia sa tagsatagsa.
10 Batuha sia tubtob mapatay! Nagtinguha sia sa pagpahilayo sa inyo sa Ginoo nga inyo Dios nga nagluwas sa inyo sa Egipto sa diin gin-ulipon kamo.
11 Dayon ang tanan nga mga tawo sang Israel makabati sang nahanabo. Magakahadlok sila kag wala na sing may maghimo sing malaut.
12 "Kon magpuyo na kamo sa mga banwa nga ginahatag sang Ginoo nga inyo Dios sa inyo, mabatian ninyo
13 nga may mga huroshuros nga mga tawo sa tunga ninyo nga nagpatalang sang mga pumoluyo sa ila banwa sa pagsimba sa mga dios nga wala ninyo anay ginsimba.
14 Kon makabati kamo sini nga sugid, usisaa ninyo sing maayo. Kon matuod ini nga sugid nga may malaut nga natabo,
15 dayon pamatya ninyo ang tanan nga mga tawo sa sina nga banwa kag ang ila mga kahayupan man. Laglaga ina nga banwa sing bug-os.
16 Tipuna ang tanan nga mga pagkabutang sang mga pumoluyo sina nga banwa kag tumpoka ini sa plasa. Dayon sunoga ang banwa kag ang tanan nga yara sa sulod sini subong isa ka dulot sa Ginoo nga inyo Dios. Kinahanglan magapabilin ini sa kalaglagan sa walay katapusan, kag indi na pagpatindugon liwat.
17 Indi kamo magtago para sa inyo kaugalingon sang bisan ano nga ginpakamalaut, kag dayon magaugdaw ang kaakig sang Ginoo kag magakaluoy sia sa inyo. Sa iya kaluoy magapabuad sia sa inyo suno sa iya ginsaad sa inyo mga katigulangan,
18 kon inyo tumanon ang tanan niya nga mga sugo nga akon ginahatag sa inyo karon nga adlaw kag maghimo sang matarong.
No comments:
Post a Comment