◇◇◇◇◇
Ang Bug-os nga Pagkalutos sang mga Midianhon
1 Nagsiling ang mga tawo sang Efraim sa kay Gideon, "Ngaa nga wala ninyo kami pagtawga sang inyo paglakat sa pagpakig-away sa mga Midianhon? Ngaa amo ini ang ginhimo ninyo sa amon?" Ginbasol nila sia sing tudo gid tungod sini.2 Pero nagsiling si Gideon saila, "Ang akon ginhimo diutay gid lang kon ipaanggid sa inyo ginhimo. Bisan ang diutay nga ginhimo ninyo nga mga kalalakin-an sang Efraim, sobra pa sang tanan nga ginhimo sang akon mga kabaranggayan.
3 Ang Dios nagtugyan sa inyo sang mga pangulo sang mga Midianhon nga amo sanday Oreb kag Seeb. Ano bala ang nahimo ko nga makatupong sini!" Sang makasiling sini si Gideon naghaganhagan ang ila kaakig.
4 Si Gideon kag ang iya 300 ka mga tinawo nakaabot sa Suba sang Jordan kag nagtabok sila. Kapoy na gid sila kaayo, pero ginalagas pa nila ang ila mga kaaway.
5 Nagpangayo si Gideon sa mga tawo sang Sucot, "Kon mahimo, hatagi ninyo ang akon mga tinawo sing tinapay. Kapoy na gid sila, kag ginalagas ko si Seba kag si Salmuna, mga hari nga Midianhon."
6 Pero nagsiling ang mga pangulo sang Sucot, "Ngaa maghatag kami sing mga pagkaon sa imo mga hangaway? Wala pa gani nimo madakop si Seba kag si Salmuna."
7 Gani nagsiling si Gideon, "Kon amo ina, kon matugyan na sang Ginoo sa akon sanday Seba kag Salmuna, pagatuhoktuhokon ko gid ang inyo mga unod sang mga tunokon nga mga kahuykahoy sa disierto!"
8 Nagpadayon si Gideon sa Penuel, kag nagpangabay sing amo man sa mga tawo didto, pero ang mga tawo sang Penuel nagsabat pareho man sang mga tawo sa Sucot.
9 Gani nagsiling si Gideon sa ila, "Magabalik ako nga indi maano, kag kon magbalik ako, rumpagon ko ini nga tore!"
10 Sanday Seba kag Salmuna yadto didto sa Karkor upod sa ila mga hangaway. Sa bug-os nga mga hangaway sang mga tribo sa desierto, mga 15,000 ang nabilin, kay ang 120,000 nagkalamatay.
11 Nagpadayon si Gideon sa dalan sa higad sang desierto sa sidlangan sang Noba kag Hogbea, kag ginsalakay sing kibot ang mga hangaway nila.
12 Ang duha ka hari nga Midianhon, sanday Seba kag Salmuna nagpalagyo, pero ginlagas sila ni Gideon kag gindakop. Ginpasalasala niya ang ila bug-os nga hangaway.
13 Si Gideon, nga anak ni Joas, nagbalik halin sa inaway kag nag-agi sa Taklaran sang Heres.
14 Gindakop ni Gideon ang isa ka pamatan-on nga lalaki nga taga-Sucot kag ginpamangkot sia. Ginsulat sang pamatan-on-para kay Gideon ang mga ngalan sang 77 ka mga pangulo kag mga katigulangan sang Sucot.
15 Dayon nagkadto si Gideon sa mga tawo sang Sucot kag nagsiling, "Nadumdoman bala ninyo ang inyo pag-uligyat sa akon? Nagsiling kamo nga indi kamo maghatag sing pagkaon sa akon kapoy nga mga soldado, kay wala pa nakon madakop sanday Seba kag Salmuna. Karon, yari na sila!”
16 Nagkuha sia sing mga tunokon nga mga kahuykahoy sa desierto, kag gingamit niya ini sa pagsilot sa mga pangulo sang Sucot.
17 Ginrumpag niya ang tore sa Penuel kag ginpamatay ang mga kalalakin-an sang siyudad.
18 Dayon ginpamangkot niya si Seba kag si Salmuna, "Daw ano bala ang hitsura sang mga lalaki nga inyo ginpamatay?" Nagsabat sila, "Pareho sa imo. Ang tagsatagsa sa ila daw anak nga lalaki sang hari."
19 Nagsiling si Gideon, "Mga kautoran ko sila, mga anak nga lalaki sang akon kaugalingon nga iloy. Nagpanumpa ako nga kon wala ninyo sila pagpatya, indi ako magpatay sa inyo."
20 Nagsiling sia sa kay Jeter, ang panganay niya nga anak, "Tindog kag pamatya sila." Pero ang bata nga lalaki wala maggabot sang iya espada. Nahadlok sia, kay bata pa sia.
21 Pero si Seba kag si Salmuna nagsiling kay Gideon, "Sigi, ikaw ang magpatay sa amon. Kinahanglan isa ka lalaki ang maghimo sini." Gani ginpatay ni Gideon si Seba kag si Salmuna, kag ginkuha niya ang mga adorno sa liog sang ila mga kamelyo.
22 Nagsiling ang mga tawo sang Israel sa kay Gideon, "Ikaw na lang ang magpangulo sa amon—ikaw, kag ang imo anak nga lalaki, kag ang imo apo nga lalaki. Ginluwas mo kami sa mga Midianhon.”
23 Nagsabat si Gideon, “Indi ako ang magpangulo sa inyo, ukon ang akon anak nga lalaki. Ang Ginoo amo ang magapangulo sa inyo.”
24 Pero nagpadayon sia sa pagsiling, "Amo lang ini ang akon ginapangayo sa inyo. Ang kada isa sa inyo maghatag sa akon sang mga aritos nga inyo naagaw." (Ang mga Midianhon may mga aritos nga bulawan, kay sila mga taga-desierto.
25 Nagsabat sila, "Ihatag namon ini sa imo sing kinabubot-on." Naghumlad sila sing bayu kag ang tagsatagsa ka tawo nagbutang sang mga aritos nga bulawan nga iya naagaw.
26 Ang mga aritos nga bulawan nga ginpangayo ni Gideon nagabug-at sing sobra sa 18 ka kilo. Wala Iabot ini sang mga adorno, mga kulintas, kag ang mga bayu nga granate nga ginsuksok sang mga hari nga Midianhon, kag sang mga baliog sang ila mga kamelyo.
27 Naghimo si Gideon sing diosdios gikan sa bulawan, kag ginbutang niya ini sa iya banwa sa Opra. Ang tanan nga mga Israelinhon nagsikway sa Dios, kag nagkadto didto sa pagsimba sa diosdios. Nanginkaangay ini sang siod sa kay Gideon kag sa iya panimalay.
28 Ang Midian ginlutos sang mga Israelinhon, kag indi na sila nanginmakatalagam. May kalinong sa duta sa sulod sang 40 ka tuig, samtang buhi pa si Gideon.
Ang Pagkapatay ni Gideon
29 Nagpauli si Gideon kag nagpuyo sa iya kaugalingon nga balay.30 May 70 sia ka mga anak nga lalaki, kay madamo ang iya mga asawa.
31 May babayi sia sa Sikem, kag may anak sia nga lalaki kay Gideon, kag ginhingalanan sia ni Gideon kay Abimelec.
32 Si Gideon, ang anak ni Joas napatay nga tigulang na, kag ginlubong sa lulobngan sang iya amay nga si Joas sa Opra, ang siyudad sang mga kabaranggayan ni Abieser.
33 Sang mapatay si Gideon, ang mga tawo sang Israel nangindi-matutom naman sa Dios kag nagsimba sa mga Baal. Ginhimo nila ang Baal-sang-Kasugtanan nga ila dios.
34 Wala na sila mag-alagad sa Ginoo nga ila Dios, nga nagluwas sa ila sa ila mga kaaway sa palibot nila.
35 Kag wala gid sila magbatyag sing kabalaslan sa panimalay ni Gideon, sa tanan nga mga kaayuhan nga ginhimo niya para sa Israel.
No comments:
Post a Comment