◇◇◇◇◇
Ang Anghel sang GINOO sa Bokim
1 Ang anghel sang Ginoo nagkadto sa Bokim halin sa Gilgal, kag nagsiling sa mga Israelinhon, "Ginpagwa ko kamo sa Egipto kag gindala sa duta nga ginsaad ko sa inyo mga katigulangan. Nagsiling ako, 'Indi ko gid paglapason ang akon kasugtanan sa inyo.2 Indi gid kamo maghimo sing kasugtanan sa mga pumoluyo sini nga duta. Kinahanglan panggub-on ninyo ang ila mga altar.' Pero wala ninyo pagtumana ang akon ginsiling sa inyo. Tan-awa kon ano ang ginhimo ninyo sa baylo sini!
3 Gani ginasingganan ko kamo karon nga indi ko pagtabugon ini nga mga tawo samtang nagaabanse kamo. Sila manginkaawayf ninyo, kag ang ila mga diosdios mangindaku nga mga pagsulay sa inyo."
4 Sang pagsiling sini sang anghel, naghinibi ang tanan nga mga tawo sang Israel.
5 Tungod sini, yadto nga duog gintawag Bokim.g Didto nagdulot sila sing mga halad sa Ginoo.
Ang Pagkapatay ni Josue
6 Ginpalakat ni Josue ang mga tawo sang Israel, kag ang tagsatagsa nagpanag-iya sang iya kaugalingon nga bahin sang duta.7 Ang mga tawo sang Israel nag-alagad sa Ginoo samtang buhi pa si Josue, kag sang mapatay sia, nagpadayon sila sa pag-alagad sa Ginoo samtang buhi pa ang mga pangulo nga nakahibalo sang tanan nga ginhimo sang Ginoo sa Israel.
8 Si Josue, ang anak ni Nun kag alagad sang Ginoo, napatay sa edad nga 110 ka tuig.
9 Ginlubong sia sa duta nga iya parti, sa Timnatheres, sa kabakuloran sang Efraim, sa aminhan sang Bukid sang Gaas.
10 Nagkalamatay man ang mga tawo sadto nga kaliwatan, kag ang madason nga kaliwatan nagkalimot sa Ginoo kag sang mga butang nga ginhimo sang Ginoo sa Israel.
Ang mga Israelinhon Wala na Nagasimba sa GINOO
11 Gani ang mga tawo sang Israel nagpakasala batok sa GINOO kag nag-alagad sa mga Baal.12 Nag-untat sila sa pagsimba sa GINOO, ang Dios sang ila mga katigulangan, ang Dios nga nagpagwa sa ila sa Ehipto. Nagsimba sila sa iban nga mga dios, ang mga dios sang mga katawuhan sa palibot nila. Nagyaub sila sa sini nga mga dios kag ginpaakig nila ang Ginoo.
13 Nag-untat sila sa pagsimba sa Ginoo kag nag-alagad sa mga Baal kag sa mga Astarot.
14 Naakig gid ang Ginoo sa Israel kag ginpaati sila sa mga buyong. Ginpalutos sila sang Ginoo sa tanan nila nga mga kaaway sa palibot nila, kag ang mga Israelinhon indi na makasarang sa pag-apin sang ila kaugalingon.
15 Sa tagsa ka pagpakig-away nila, ang Ginoo nagasumpong sa ila, subong sang ginsiling sang Ginoo nga iya pagahimuon. Tama gid ang ila mga pag-antos.
16 Karon ginhatagan sang Ginoo ang Israel sing isganan nga mga pangulo, nga nagluwas sa ila sa mga nagagubat sa ila.
17 Pero wala sila magsapak sa sini nga mga pangulo. Wala sila nagmatutom sa Ginoo, kag nagsimba sila sa iban nga mga dios. Ang ila mga ginikanan nagtuman sang mga ginsugo sang Ginoo, pero ini nga kaliwatan nag-untat sa pagtuman sini.
18 Kon hatagan sila sang Ginoo sing isa ka pangulo, ang Ginoo nagabulig sa iya, kag nagaluwas sang mga tawo sa ila mga kaaway tubtob buhi pa ini nga pangulo. Ang Ginoo nagkaluoy sa ila tungod sang ila mga pag-ugayong sa ila mga pag-antos kag sa mga pagpigos sa ila.
19 Pero kon mapatay ang ila pangulo, nagabalik ang mga tawo sa ila daan nga mga pagginawi, kag nagahimo sing sobra pa kalain sang sa nagligad nga kaliwatan. Nagasunod sila sa iban nga mga dios, nagaalagad kag nagasimba sila sa ila. Nagpadayon sila sa pagkabatinggilan, nga nagahimo sing mga kalautan.
20 Ang Ginoo naakig gid sa Israel, kag nagsiling, "Ini nga pungsod naglapas sang kasugtanan nga akon gintugyan nga tumanon sang ila mga katigulangan. Tungod kay wala sila magtuman sa akon,
21 indi ko na pagtabugon ang mga tawo sang bisan ano nga pungsod nga ginbilin ni Josue sa duta sang iya pagkapatay.
22 Sa sini nga paagi matilawan ko kon bala tumanon sang mga Israelinhon ukon indi ang akon mga sugo, subong sang ginhimo sang ila mga katigulangan.”
23 Gani ginbilin sang Ginoo ang mga tawo sang mga pungsod nga wala niya gintugyan sa paggahom ni Josue. Wala niya sila pagtabuga gilayon.
fAng iban nga dumaan nga pagbadbad manginkaaway; sa Hebreo manginkadampig.
gBOKIM: Ini nga ngalan sa Hebreo nagakahulogan "ang mga nagahinibi."
No comments:
Post a Comment