◇◇◇◇◇
Abimelec
1 Si Abimelec, anak ni Jerubaal, nagkadto sa Sikem sa diin nagapuyo ang mga kaparyentihan sang iya iloy. Ginsingganan niya sila2 sa pagpamangkot sa mga tawo sang Sikem, “Sa diin bala ang luyag ninyo sining duha: nga pagagamhan kamo sang 70 ka mga anak nga lalaki ni Jerubaal, ukon isa lang ang magagahom sa inyo? Dumdoma ninyo nga ako inyo kaugalingon nga unod kag dugo.”
3 Ang mga paryente sang iya iloy naghambal sa mga tawo sa Sikem nahanungod sini para kay Abimelec. Nagpamat-od sila sa pagsunod kay Abimelec, kay paryente nila sia.
4 Ginhatagan nila sia sing 70 ka bilog nga mga pilak gikan sa templo ni Baal-sang-Kasugtanan. Ini nga mga pilak ginsuhol niya sa mga hurong sa pagsunod sa iya.
5 Nagkadto sia sa balay sang iya amay sa Opra, kag sa ibabaw sang isa ka bato ginpamatay niya ang iya 70 ka mga utod nga lalaki nga mga kaanakan ni Jerubaal. Pero si Jotam, ang kamanghuran nga anak ni Jerubaal, nagpanago kag wala mapatay.
6 Dayon ang tanan nga mga tawo sang Sikem kag Betmilo nagtipon sing tingob, kag nagkadto sa balaan nga kahoy nga terebinto sa Sikem, sa diin ginhimo nila si Abimelec nga hari.
7 Sang pagkabati ni Jotam nahanungod sini, nagkadto sia kag nagtindog sa putokputokan sang Bukid sang Gerisim, kag nagsinggit sa ila, "Mga taga-Sikem, pamatii ninyo ako, kag kabay nga ang Dios magpamati sa inyo!
8 Sang una anay, ang mga kahoy nagtipon sa pagpili sang isa ka hari para sa ila kaugalingon. Nagsiling sila sa kahoy nga olibo, 'Maghari ka sa amon.'
9 Ang kahoy nga olibo nagsabat, 'Kinahanglan nga bayaan ko anay ang akon lana, nga ginagamit sa pagpadungog sa mga dios kag mga tawo, agod maggahom sa inyo.'
10 Ang mga kahoy nagsiling sa kahoy nga higera, 'Kari ka kag maghari sa amon.'
11 Pero nagsabat ang kahoy nga higera, 'Kinahanglan bayaan ko anay ang akon maayo kag matam-is nga bunga agod maggahom sa inyo.’
12 Gani ang mga kahoy nagsiling sa balagon sang ubas, 'Kari ka kag maghari sa amon.’
13 Pero nagsabat ang balagon sang ubas, 'Kinahanglan bayaan ko anay ang akon bino, nga nagalipay sa mga dios kag sa mga tawo agod maggahom sa inyo.'
14 Dayon nagsiling ang tanan nga mga kahoy sa talungon, ‘Kari ka kag maghari sa amon.'
15 Nagsabat ang talungon, 'Kon Iuyag gid ninyo nga ako ang iyo manginhari, kari kamo kag magpasilong sa akon landong. Kon indi kamo, magagwa ang kalayo sa talungon kag magasunog sang mga sedro sa Libano.'”
16 Nagpadayon si Jotam sa pagsiling, "Kag karon, sinsero kag matuod gid bala ang inyo paghimo kay Abimelec nga hari? Husto bala ang inyo ginhimo kay Jerubaal kag sa iya panimalay kag nakahimo bala kamo sa iya sing nagakabagay suno sa iya mga ginhimo?
17 Dumdoma ninyo nga ang akon amay nagpakig-away para sa inyo. Gintaya niya ang iya kabuhi sa katalagman sa pagluwas sa inyo sa mga Midianhon.
18 Pero karon ginkontra ninyo ang panimalay sang akon amay. Ginpamatay ninyo ang iya 70 ka mga anak nga lalaki sa isa ka bato, kag ginhimo ninyo nga hari sang Sikem si Abimelec nga anak niya sa iya ulipon nga babayi, kay sia inyo paryente.
19 Gani karon, kon sinsero kag husto ang inyo ginhimo kay Jerubaal kag sa iya panimalay karon nga adlaw, gani magmalipayon kamo sa kay Abimelec, kag sia man magmalipayon sa inyo.
20 Pero kon indi, kabay maggwa ang kalayo kay Abimelec kag sunogon ang mga tawo sang Sikem kag Milo. Kabay maggwa ang kalayo sa mga tawo sang Sikem kag Betmilo kag sunogon si Abimelec."
21 Dayon nagdalagan si Jotam sa pagpalagyo. Nagkadto sia sa Beer kag didto nagpuyo kay nahadlok sia sa iya utod nga si Abimelec.
22 Gingamhan ni Abimelec ang Israel sa sulod sang tatlo ka tuig.
23 Dayon ginpalain sang Dios ang kaangtanan ni Abimelec kag sang mga tawo sang Sikem, kag nagrebelde sila batok kay Abimelec.
24 Nahanabo ini agod si Abimelec kag ang mga tawo sang Sikem, nga nagpaisog sa iya sa pagpamatay sang 70 ka mga anak nga lalaki ni Jerubaal, magbayad tungod sang ila sala.
25 Ang mga tawo sang Sikem nagbutang sing mga tawo sa mga putokputokan sang bukid sa paglambat kay Abimelec, kag gin-ati nila ang tagsatagsa nga nagaagi didto. Ginsugiran si Abimelec nahanungod sini.
26 Si Gaal nga anak ni Ebed nag-abot sa Sikem upod sa iya mga utod nga lalaki, kag nagsalig sa iya ang mga tawo sang Sikem.
27 Nagkadto sila sa uma kag nagpamupo sing ubas sa katamnan sang ubas kag naghimo sila sing bino, kag naghiwat sila sing piesta. Nagsulod sila sa templo sang ila dios, sa diin nagkinaon sila kag nag-ininom, kag ginyaguta nila si Abimelec.
28 Nagsiling si Gaal, “Ngaa bala nagaalagad kita kay Abimelec? Ano bala kita nga klase sang mga tawo sa Sikem? Kag sin-o gid bala sia? Anak sia ni Jerubaal kag nagaalagad sa iya si Sebul! Ngaa dapat kita mag-alagad sa iya? Mag-unong kamo sa inyo tigulang nga si Hamor, nga amo ang ginhalinan sang inyo mga kabaranggayan!
29 Kon ako lang kuntani ang nagapangulo sini nga mga tawo, tapuson ko gid ini si Abimelec! Silingon ko sia,r ‘Kon may madamo ka nga mga hangaway, maggwa ka kag magpakig-away!'''
30 Si Sebul, ang pangulo sang siyudad, naakig sang mabatian niya ang ginsiling ni Gaal.
31 Nagpadala sia sing mga mensahero kay Abimelec sa Aruma nga nagasiling, "Si Gaal nga anak ni Ebed, kag ang iya mga utod nga lalaki nagkari sa Sikem, kag indi ka nila pagpasudlon sa siyudad.
32 Gani karon, ikaw kag ang imo mga tinawo maglakat sa gab-i, kag magpanago sa mga kaumhan.
33 Bangon ka sa pagbutlak sang adlaw buas sa aga, kag salakaya sing kibot ang siyudad. Nian kon magbato si Gaal kag ang iya mga tinawo sa inyo, himoa ang tanan nga masarangan ninyo batok sa ila!"
34 Gani si Abimelec kag ang tanan niya nga mga tinawo nagbangon sa kagab-ihon, kag nagpanago sila sa gwa sang Sikem sa apat ka grupo.
35 Naggwa si Gaal kag nagtindog sa puwertahan sang siyudad. Si Abimelec kag ang iya mga tinawo naggwa sa ila mga ginapanaguan.
36 Sang makita sila ni Gaal, nagsiling sia kay Sebul, "Tan-awa! May mga tawo nga nagadulhog halin sa mga putokputokan sang bukid!" Nagsabat si Sebul, "Mga landong lamang ina sa mga kabukiran, kag indi mga tawo."
37 Nagsiling liwat si Gaal, "Tan-awa! May mga tawo nga nagadulhog sa gin-utlan sang bukid, kag ang isa ka grupo nagapakari halin sa balaan nga kahoy nga terebinto!"
38 Dayon nagsiling si Sebul sa iya, "Diin na karon yadtong dalagku mo nga mga sugid? Ikaw ang nagsiling kon ngaa mag-alagad kita sa sining tawo nga si Abimelec. Amo ini nga mga tawo ang imo ginhikayan. Lakat na, kag awaya sila."
39 Ginpangulohan ni Gaal ang mga kalalakin-an sang Sikem, kag gin-away nila si Abimelec.
40 Ginlagas sia ni Abimelec, kag nagpalagyo si Gaal. Madamo ang napilasan, bisan sa may puwerta sang siyudad.
41 Nagbalik si Abimelec pakadto sa Aruma, kag gintabog ni Sebul si Gaal kag ang iya mga kautoran pa gwa, agod nga indi sila makapuyo sa Sikem.
42 Sang madason nga adlaw ang mga pumoluyo sang Sikem naggwa pakadto sa mga kaumhan, kag ginsugiran si Abimelec nahanungod sini.
43 Gindala niya ang iya mga tinawo, ginpartida sa tatlo ka grupo, kag nagpanago sila sa mga kaumhan sa paghulat. Sang makita niya ang mga tawo nga nagapagwa sa siyudad, naggwa sia sa iya ginapanaguan kag ginpamatay sila.
44 Si Abimelec kag ang iya grupo nagdalidali pakadto sa puwerta sang siyudad kag ginbantayan ini. Ang duha ka grupo nagsalakay sa mga tawo sa kaumhan kag ginpamatay sila tanan.
45 Nagpakig-away si Abimelec sa mga tawo sang siyudad sa bug-os sadto nga adlaw. Gin-agaw niya ang siyudad kag ginpamatay ang mga tawo. Ginlaglag niya ang banwa, kag ginsab-ugan sing asin ang duta.
46 Sang pagkabati sang tanan nga mga kinilala nga mga tawo sang Tore sang Sikem nahanungod sini, nagkadto sila sa tore sang templo ni Baal-sang-Kasugtanan agod indi sila maano.
47 Ginsugiran si Abimelec nga nagtipon sila sing tingob.
48 Nagtaklad sia sa Bukid sang Salmon upod sa iya mga tinawo. Nagdala sia sing wasay, nag-utod sang sanga sang kahoy, kag iya ini ginpas-an. Ginsingganan niya ang iya mga tinawo nga magdalidali kag maghimo sing amo man.
49 Gani ang tagsatagsa nag-utod sang sanga sang kahoy, nagsunod sila kay Abimelec kag gintumpok nila ini sa tore. Gintutdan nila ini samtang ang mga tawo yadto didto sa sulod, kag ang tanan nga mga tawo sang Tore sang Sikem nagkalamatay. Ang ila kadamuon mga 1,000 tanan ka mga lalaki kag mga babayi.
50 Dayon nagkadto si Abimelec sa Tebes, ginkibon niya ini, kag gin-agaw.
51 May mapag-on didto nga tore, kag ang tagsa ka lalaki kag babayi sa siyudad, lakip ang ila mga pangulo, nagpanago sa tore. Ginsirahan nila ini sang makasulod sila, kag nagkadto sila sa atop.
52 Nag-abot si Abimelec kag ginsalakay ang tore. Nagkadto sia sa puwertahan agod tutdan ang tore.
53 Pero may babayi nga naghulog sang galingan nga bato sa iya ulo kag naglitik ang iya ulo.
54 Dayon gintawag niya sing dali-dali ang pamatan-on nga lalaki nga nagadala sang iya mga armas kag ginsingganan, "Gabuta ang imo espada kag patya ako. Indi ako gusto nga sugiron nga ang isa ka babayi nagpatay sa akon." Gani ginbuno sia sang pamatan-on nga lalaki kag napatay sia.
55 Sang makita sang mga Israelinhon nga patay na si Abimelec nagpauli sila tanan.
56 Gani ginpabayad sang Dios si Abimelec tungod sang sala nga iya ginhimo batok sa iya amay sa iya pagpamatay sang iya 70 ka mga utod nga lalaki.
57 Ginpaantos man sang Dios ang mga tawo sang Sikem tungod sang ila mga kalautan, suno sa ginsiling ni Jotam, nga anak nga lalaki ni Jerubaal, sang iya pagpakamalaut sa ila.
rSa isa ka dumaan nga pagbadbad Silingon ko sia; sa Hebreo Nagsiling sia.
No comments:
Post a Comment