◇◇◇◇◇
Gindaog ni Gideon ang mga Midianhon
1 Si Jerubaal (nga amo ni Gideon) kag ang tanan niya nga mga tinawo nagbugtaw sing aga pa gid, kag naghimo sang ila kampamento sa luyo sang Tuboran sang Harod. Ang kampamento sang mga Midianhon yara sa kapatagan sa aminhan nila, sa luyo sang bakulod sang More.2 Ang Ginoo nagsiling kay Gideon, "Para sa akon, tama kadamo ang mga tawo nga kaupod mo sa paglutos sa mga Midianhon. Basi maghunahona sila nga sila ang naglutos sang mga Midianhon, kag indi na sila magkilala nga ako ang nagpadaog sa ila.
3 Singgana ang mga tawo nga kon sin-o ang nahadlok maghalin sa Bukid sang Gilboa kag magpauli." Gani 22,000 ang nagpauli, pero 10,000 ang nagpabilin.
4 Ang Ginoo nagsiling kay Gideon, “Tama pa gid kadamo ang mga tawo. Dalha sila sa tubig, kag painon ko sila didto para sa imo. Ang bisan sin-o nga isiling ko sa imo nga paupdon mo, paupda. Ang bisan sin-o nga isiling ko sa imo nga indi pagpaupdon, indi pagpaupda.”
5 Gindala ni Gideon ang mga tawo sa tubig, kag ginsingganan sia sang Ginoo, "Paina ang mga nagalaklak sang tubig pareho sang ido, gikan sa mga nagaduko kag nagaluhod sa pag-inom.”
 |
| "Paina ang mga nagalaklak sang tubig pareho sang ido." (7:5) |
7 Nagsiling ang Ginoo kay Gideon, “Pagaluwason ko kamo kag padag-on batok sa mga Midianhon paagi sa sining 300 ka mga tawo nga naglaklak sang tubig. Ang iban sa ila papaulia."
8 Ginpapauli ni Gideon ang tanan nga mga Israelinhon, luas lamang ang 300, pero ginhawiran niya ang ila mga baton kag mga budyong. Ang kampamento sang mga Midianhon yara sa ubos nila, sa kapatagan.
9 Sadto nga gab-i, nagsiling ang Ginoo kay Gideon, "Maghanda ka, salakaya ang kampamento kag padag-on ko ikaw batok sa ila.
10 Pero kon nahadlok ka sa pagsalakay sa ila, dulhog ka sa kampamento sang mga Midianhon upod sa imo suloguon nga si Pura.
11 Mabatian mo ang ila mga ginahambal, kag magaisog ka sa pagsalakay sang kampamento." Gani si Gideon kag ang iya suloguon nga si Pura nagdulhog pakadto sa malapit gid nga bahin sang kampamento sang mga kaaway.
12 Ang mga Midianhon, Amaleknon, kag ang mga tribo sa desierto nagalapta sa kapatagan subong sang nagadulom nga mga apan, kag may mga kamelyo sila nga subong kadamo sang mga balas sa baybayon.
13 Sang pag-abot ni Gideon, nabatian niya ang isa ka tawo nga nagasugid sa iya abyan nahanungod sang iya damgo. Nagsiling ang tawo, “Nagdamgo ako nga may isa ka bilog nga tinapay nga sebada nga nagligid sa aton kampamento. Nagbunggo ini sa tolda, kag ang tolda natumba, nagbaliskad, kag naghaplak sa duta."
14 Ang iya abyan nagsabat, "Espada ini ni Gideon, ang Israelinhon nga anak ni Joas! Wala na ini sing iban pa nga kahulogan! Padag-on sia sang Dios batok sa mga Midianhon, kag sa aton bug-os nga hangaway!"
15 Sang pagkabati ni Gideon nahanungod sang damgo kag sang kahulogan sini nagluhod sia. Dayon nagbalik sia sa kampamento sang mga Israelinhon kag nagsiling, "Maghanda kamo! Ang GINOO magapadaog sa inyo batok sa mga hangaway sang mga Midianhon!"
16 Ginpartida niya ang iya 300 ka mga tinawo sa tatlo ka grupo, kag ginhatagan niya ang tagsa ka tawo sing isa ka budyong kag isa ka tibod nga may mitsa sa sulod sini.
17 Ginsingganan niya sila, "Tan-awa ninyo ako, kag sunda ninyo kon ano ang himuon ko kon makaabot ako sa malapit gid nga bahin sang kampamento.
18 Kon ako kag ang akon grupo magpatunog sang amon mga budyong, patunoga man ninyo dayon ang inyo mga budyong sa tanan nga palibot sang kampamento kag magsinggit, ‘Para sa Ginoo kag kay Gideon!’”
19 Si Gideon kag ang isa ka gatos niya ka mga tinawo nagkadto malapit gid sa kampamento sang madali na lang magtungang gab-i sa tapos gid lang maislan ang gwardya. Dayon ginpatunog nila ang mga budyong kag ginpangbuong nila ang ila ginauyatan nga mga tibod.
20 Ang tanan nga tatlo ka grupo nagpatunog sang mga budyong kag ginpangbuong ang mga tibod. Gin-uyatan nila ang mga mitsa sa ila wala nga mga kamot, kag ang mga budyong sa ila tuo nga mga kamot, kag nagsinggit, "Ang espada sang Ginoo kag ni Gideon!"
21 Ang tagsa ka tawo nagtindog sa iya lugar sa palibot sang kampamento, kag ang bug-os nga hangaway nagdalagan sa pagpalagyo nga nagasinggit.
22 Samtang nagapatunog sang ila mga budyong ang 300 ka mga tawo, ginpaaway sang Ginoo ang mga lalaki sa kampo batok sa isa kag isa kag naglinab-anay sila. Nagpalagyo sila pakadto sa Serera, tubtob sa Betsita, tubtob sa dulonan sang banwa sang Abelmehola, malapit sa Tabat.
23 Gintipon sa pagpakig-away ang tanan nga mga lalaki sa mga tribo nanday Neftali, Aser, kag ang tanan sa tribo ni Manases, kag ila ginlagas ang mga Midianhon.
24 Nagpadala si Gideon sing mga mensahero sa tanan nga duog sa kabakuloran sang Efraim nga nagasiling, "Magdulhog kamo kag magpakig-away batok sa mga Midianhon. Bantayi ninyo ang Suba sang Jordan kag ang mga sapa tubtob sa Betbara, agod indi makatabok ang mga Midianhon." Gintipon sing tingob ang tanan nga mga kalalakin-an sang Efraim, kag ila ginbantayan ang Suba sang Jordan kag ang mga sapa tubtob sa Betbara.
25 Gindakop nila ang duha ka pangulo nga mga Midianhon, si Oreb kag si Seeb, kag ginpatay nila si Oreb sa daku nga Bato sang Oreb, kag si Seeb ginpatay nila sa pulogaan sang Ubas ni Seeb. Nagpadayon sila sa paglagas sa mga Midianhon, kag gindala nila ang mga ulo ni Oreb kag ni Seeb sa kay Gideon didto sa sidlangan sang Jordan.
No comments:
Post a Comment