◇◇◇◇◇
Si Debora kag si Barak
1 Sang mapatay si Ehud ang mga Israelinhon nagpakasala liwat batok sa Ginoo.2 Gani ginpalutos sila sang GINOO kay Jabin, ang hari nga Canaanhon nga nagagahom sa siyudad sang Hasor. Ang heneral sang iya mga hangaway amo si Sisera, nga nag-estar sa Haroset sang mga Hentil.
3 Si Jabin may 900 ka mga karuwahi nga salsalon, kag naggahom sa mga tawo sang Israel sing mapintas kag mapiguson sa sulod sang 20 ka tuig. Dayon ang mga tawo sang Israel nagpangayo sing bulig sa Ginoo.
4 Si Debora nga asawa ni Lapidot, isa ka propeta nga babayi, amo ang nagahukom sa mga Israelinhon sa sadto nga panahon.
5 Sa tungatonga sang Rama kag Betel sa kabakuloran sang Efraim, may palma sa diin nagalingkod si Debora sa idalom sini, kag ang mga tawo sang Israel nagakadto sa iya agod hukman niya.
6 Ginpatawag niya si Barak nga anak ni Abinoam halin sa siyudad sang Cades sa Neftali, kag ginsingganan, "Ang Ginoo, ang Dios sang Israel, nagsugo sa imo: ‘Kuha ka sing 10,000 ka mga tinawo sa tribo ni Neftali kag ni Sabulon kag dalha sila sa Bukid sang Tabor.
7 Pakadtuon ko si Sisera, ang heneral sang mga hangaway ni Jabin sa pagpakig-away batok sa inyo sa Suba sang Kison. May mga karuwahi sia kag mga soldado, pero padag-on ko kamo batok sa iya.'"
8 Si Barak nagsiling kay Debora, "Malakat ako kon mag-upod ka sa akon, pero kon indi ka mag-upod sa akon, indi man ako maglakat."
9 Nagsabat si Debora, "Sigi, updan ko ikaw, pero indi mangin-imo ang kadungganan sang pagdaog, kay itugyan sang Ginoo si Sisera sa kamot sang isa ka babayi." Gani nag-upod si Debora kay Barak pa Cades.
10 Ginpatawag ni Barak ang mga tribo nanday Sabulon kag Neftali sa Cades, kag 10,000 ka mga tawo ang nag-upod sa iya. Nag-upod man sa iya si Debora.
11 Karon si Heber nga Kenhanon nagpatindog sang iya tolda malapit sa Cades, malapit sa kahoy nga terebinto sa Sahanim. Nagbulag sia sa iban nga mga Kenhanon nga mga kaliwat ni Hobab, nga ugangan ni Moises.
12 Ginsugiran si Sisera nga si Barak nga anak ni Abinoam nagtaklad sa Bukid sang Tabor.
13 Gintipon ni Sisera ang iya 900 ka karuwahi nga mga salsalon kag ang tanan niya nga mga tinawo, kag ginpalakat sila halin sa Haroset sang mga Hentil pakadto sa Suba sang Kison.
14 Dayon si Debora nagsiling kay Barak, "Lakat ka! Amo ini ang adlaw nga padag-on ka sang Ginoo batok kay Sisera. Ang Ginoo magauna sa imo!" Gani nagdulhog si Barak sa Bukid sang Tabor upod sa iya 10,000 ka mga tinawo.
15 Sang magpakita si Barak upod sa iya mga hangaway, ginpasalasala sang Ginoo si Sisera, ang iya mga karuwahi kag mga tawo. Naglumpat si Sisera sa iya karuwahi kag nagdalagan sa pagpalagyo.
16 Ginlagas ni Barak ang mga karuwahi kag mga hangaway tubtob sa Haroset sang mga Hentil. Ang tanan nga mga hangaway ni Sisera nagkalamatay, kag wala gid sing isa nga nabilin.
17 Nagpalagyo si Sisera pakadto sa tolda ni Jael, nga asawa ni Heber nga Kenhanon, kay si Jabin, nga hari sang Hasor, kag ang panimalay ni Heber nagaayuhay.
18 Naggwa si Jael sa pagsugata kay Sisera, kag nagsiling sa iya, "Heneral, dayon ka kag magsulod sa akon tolda. Indi ka magkahadlok." Gani nagsulod si Sisera, kag gintago niya sia sa likod sang kurtina.h
19 Nagsiling si Sisera kay Jael, “Palihog hatagi ako sing tubig nga mainom ko, kay nauhaw ako." Gin-abrihan ni Jael ang panit nga nasudlan sang gatas kag ginpainom niya si Sisera, kag gintago sia liwat.
20 Dayon ginsingganan sia ni Sisera, "Tindog ka sa puwertahan sang tolda, kag kon may magkari kag magpamangkot kon may tawo diri, singganon mo nga wala."
21 Tungod kay kapoy gid kaayo si Sisera, natulogan sia sing hamuok gid. Dayon si Jael nagkuha sing martilyo kag isa ka palpal sang tolda, kag ginpalapitan niya sing hinayhinay si Sisera kag ginpalpalan niya ang dungandongan ni Sisera tubtob naglapos ini sa duta. Kag napatay si Sisera.
22 Sang pag-abot ni Barak nga nagapangita kay Sisera, naggwa si Jael sa pagsugata sa iya, kag nagsiling sa iya, "Dali, ipakita ko sa imo ang tawo nga imo ginapangita.” Gani nag-upod sia kay Jael sa sulod sang tolda, kag yadto didto si Sisera nga nagahamyang sa duta nga patay na nga ang palpal sang tolda naglapos sa iya ulo.
23 Sadto nga adlaw ginlutos sang Dios si Jabin, nga hari nga Canaanhon, tungod sa mga tawo sang Israel.
24 Gindusdos kag gindusdos sang mga Israelinhon si Jabin, tubtob nalutos nila sia.
hgintago niya sia sa likod sang kurtina; ukon gintabunan sia sang habol.
No comments:
Post a Comment