"Ginakilala ni Ana ang Pag-abot ni Kristo kag Nagpasalamat sa Dios"

Liturhiya sang Pulong

(Lunes, Disyembre 30, 2019)

Ang Pagbasa gikan sa Nahauna nga Sulat ni:

San Juan 2:12-17

   Nagasulat ako sa inyo, mga anak ko, kay ang inyo mga sala ginpatawad tungod sa ngalan ni Cristo. Nagasulat ako sa inyo, mga amay, kay kamo nakakilala sa iya nga amo na nga daan halin pa sa ginsugoran. Nagasulat ako sa inyo, mga pamatan-on nga lalaki, kay nadaog ninyo ang Yawa. 

   Nagasulat ako sa inyo, mga anak, kay nakilala ninyo ang Amay. Nagasulat ako sa inyo, mga amay, kay nakakilala kamo sa iya nga amo na nga daan halin pa sa ginsugoran. Nagasulat ako sa inyo, mga pamatan-on nga lalaki, kay mga mabakod kamo. Ang pulong sang Dios nagakabuhi sa inyo kag nadaog ninyo ang Yawa. 

   Indi ninyo paghigugmaa ang kalibutan ukon ang mga butang nga iya sang kalibutan. Kon ginahigugma ninyo ang kalibutan, wala kamo nagahigugma sa Amay. Kay ang tanan nga iya sang kalibutan—ang ginahandom sang makasasala nga kinaugali, ang ginakaibugan sang mata, kag ang tanan nga mga butang sa sining kalibutan nga ginapabugal sang mga tawo—ini sila wala nagagikan sa Amay, kundi sa kalibutan. Ang kalibutan kag ang tanan nga mga butang nga ginahandom sang mga tawo nagataliwan, pero ang nagatuman sang kabubot-on sang Dios nagakabuhi sa gihapon.

Salmo sa Pagsabat:

Mga Salmo 96:7-8, 8-9, 10

(S) Magkasadya kamo, O langit kag duta!

Dayawa ninyo ang Ginoo, tanan kamo nga katawuhan sang duta! Dayawa ninyo ang iya himaya kag gahom! Dayawa ninyo ang mahimayaon nga ngalan sang Ginoo! (S)

Magdala kamo sing dulot kag magsulod sa iya Templo. Magyaub kamo sa atubangan sang Balaan kon magpahayag sia; magkurog ka sa iya atubangan, O bug-os nga duta! (S)

Singgana ang tanan nga mga kapungsoran, “Ang Ginoo amo ang hari!” Ang duta napahamtang sing malig-on kag indi mauyog; sia magahukom sang tanan nga katawuhan sa katarungan. (S)

Aleluya:
   Isa ka balaan nga adlaw nagsanag sa aton; Kari kamo mga pungsod; magsimba kamo sa Ginoo. Kay karon nga adlaw isa ka daku nga kasanag ang nagbanaag sa duta.

Ang Pagbasa sang Santos nga Ebanghelyo suno kay:

San Lucas 2:36-40

   May propeta nga babayi nga si Ana nga anak ni Fanuel gikan sa tribo ni Aser. Ini sia isa ka tigulang nga pito ka tuig lang ang ila pagpuyo sang iya bana kag mabalo sia. Otsentay kuwatro na ka tuig nga nabalo sia kag sa sini nga kalawigon wala gid sia makagwa sa templo. Sa adlaw kag gab-i nagaalagad sia sa Dios kag nagapuasa kag nagapangamuyo. Sa sadto gid nga takna nag-abot sia kag nagpasalamat sa Dios, kag nagpanugid sia nahanungod sang bata sa tanan nga mga tawo nga nagahulat sang pagtubos sang Dios sa Jerusalem.

   Sang natuman na nila ang tanan nga ginasiling sang kasugoan sang Ginoo, nagbalik sila sa Galilea sa ila kaugalingon nga banwa nga Nazaret. Ang bata nagdaku kag nagbakod, nga napun-an sang kaalam, kag ang grasya sang Dios yara sa iya. 

Disyembre 29 | Disyembre 31