"Magabalos sa Imo sa Pagkabanhaw sang mga Matarong"

Liturhiya sang Pulong

(Lunes, Nobyembre 4, 2019)

San Carlos Borromeo, Obispo

Ang Pagbasa gikan sa Sulat ni San Pablo nga Apostol, sa mga:

Taga-Roma 11:29-36

   Kay ang Dios wala nagabaylo sang iya panghunahona nahanungod sa iya ginapili kag ginabendisyunan. Sang una kamo nga mga Gentil wala magtuman sa Dios, pero karon nabaton ninyo ang kaluoy sang Dios kay ang mga Judio wala magtuman. Sa amo man nga bagay, tungod sang kaluoy nga inyo nabaton, ang mga Judio karon wala nagatuman sa Dios, agod nga ila man mabaton karon ang kaluoy sang Dios. Kay ginhimo sang Dios ang tanan nga mga tawo nga binilanggo sang pagkadi-matinumanon, agod nga mapakita niya sa tanan ang iya kaluoy. Daw ano kadamo sang mga manggad sang Dios! Daw ano kadalom sang iya kaalam kag ihibalo! Sin-o bala ang makasaysay sang iya mga paghukom? Sin-o bala ang makahangop sang iya mga paagi? Ang kasulatan nagasiling: “Sin-o bala ang makahibalo Sang hunahona sang Ginoo? Sin-o bala ang makalaygay sa iya? Sin-o bala ang may ginhatag sa Dios, Nga ang Dios dapat magbayad sa iya?” Kay ang tanan nga mga butang naghalin sa Dios, kag ini tanan gintuga tungod sa iya kag para sa iya—sa iya ang himaya nga wala sing katapusan! Kabay pa.

Salmo sa Pagsabat:

Mga Salmo 69:30-31, 33-34, 36

(S) O Ginoo, sabta ako tungod sang imo daku nga gugma.

Pero imol ako kag nagaantos sa kasakit, itib-ong ako O Dios, kag luwasa ako! Dayawon ko ang Dios sa isa ka ambahanon, ibantala ko ang iya pagkagamhanan paagi sa pagpasalamat sa iya. (S)
Kon makita ini sang mga imol, magakalipay sila; ang nagasimba sa Dios mapalig-on. Ang Ginoo nagapamati sa mga imol, kag wala niya ginakalimti ang iya mga tawo nga nabilanggo. (S)
Luwason niya ang Sion, kag patindugon liwat ang mga banwa sang Juda. Ang iya mga tawo magapuyo didto kag magapanag-iya sang duta; ang mga kaliwat sang iya mga alagad magapanubli sini, kag ang mga nagahigugma sa iya magapuyo didto. (S)

Aleluya:

Juan 8:31-32

   Kon ginatuman ninyo ang akon mga ginatudlo, matuod gid nga mga gintuton-an ko kamo, kag makilala ninyo ang kamatuoran, kag ang kamatuoran magahilway sa inyo, siling sang Ginoo.

Ang Pagbasa sang Santos nga Ebanghelyo suno kay:

San Lucas 14:12-14

   Dayon si Jesus nagsiling sa nag-agda sa iya, “Kon ikaw nagahatag sing panyaga ukon panihapon, indi pag-agdaha ang imo mga abyan, ukon ang imo mga utod, ukon ang imo mga himata, ukon ang imo kasilingan nga manggaranon, basi sila man magaagda sa imo, kag mabaton mo na ang imo balos. Kon nagahiwat ka sing punsyon, agdaha ang mga imol, ang mga pingkaw, ang mga piang kag ang mga bulag. Manginbulahan ka kay indi sila makabalos sa imo. Ang Dios ang magabalos sa imo sa pagkabanhaw sang mga matarong.” 

Nobyembre 3 | Nobyembre 5