"Magtuo sa Akon - agod nga Indi ka Magpabilin sa Kadudolman"

Liturhiya sang Pulong

(Miyerkules, Mayo 6, 2020)

Miyerkules sang Ika-apat nga Semana sang Pagkabanhaw

Ang Pagbasa gikan sa:

Binuhatan sang mga Apostoles 12:24–13:5

   Nagpadayon ang paglapnag kag pagtubo sang pulong sang Dios.

   Gintapos ni Bernabe kag ni Saulo ang ila mga bulohaton kag nagbalik sila halin sa Jerusalem nga dala nila si Juan Marcos.

   May mga propeta kag mga manunodlo sa iglesia sa Antioquia nga amo sanday Bernabe, Simeon nga ginatawag Nigro, Lucio nga taga-Cirene, Manaen nga nagdaku kaupod ni Herodes nga Gobernador, kag Saulo. Sang nagaalagad sila sa Ginoo kag nagapuasa, nagsiling sa ila ang Espiritu Santo, “Paina para sa akon si Bernabe kag si Saulo, sa pagtuman sang hilikuton nga natigana ko sa ila.”

   Nagpuasa sila kag nagpangamuyo, kag sang matungtongan nila ang duha sang ila mga kamot, ila sila ginpalakat.

   Ti, si Bernabe kag si Saulo nga ginpadala sang Espiritu Santo nagkadto sa Seleucia, kag gikan didto nagpanakayon sila pakadto sa Cipre. Sang pag-abot nila sa Salamina ginwali nila ang pulong sang Dios sa mga sinagoga sang mga Judio. 

Salmo sa Pagsabat:

Mga Salmo 67:2-3, 5, 6 kag 8

(S) Kabay nga ang mga katawohan magdayaw sa Imo, O Dios.

Kaluoyi man kami, O Dios, kag bendisyuni kami, ipakita ang imo kaayo sa amon, agod mahibaluan sang bug-os nga kalibutan ang imo kabubot-on. (S)

Kabay nga magkasadya ang kapungsoran kag magkanta sa kalipay, tungod kay ikaw nagahukom sing matarong sa mga katawhan, kag nagatuytoy sa tanan nga mga kapungsoran sa duta. (S)

Kabay ang mga katawohan magdayaw sa imo, O Dios, kabay ang tanan nga mga katawohan magdayaw sa imo! Ang Dios naghatag sa aton sing mga kaayuhan, kabay nga ang tanan nga tawo bisan diin magpasidungog sa iya. (S)

Aleluya:

Juan 8:12

   Ako amo ang kapawa sang kalibutan, siling sang Ginoo, ang nagasunod sa Akon indi na gid maglakat sa kadudolman, kundi may kapawa sang kabuhi.

Ang Pagbasa sang Santos nga Ebanghelyo suno kay:

San Juan 12:44-50

   Si Jesus naghambal sa mabaskog nga tingog, “Ang nagatuo sa akon, indi lamang nagatuo sa akon, kundi nagatuo man sa nagpadala sa akon. Ang nakakita sa akon nakakita man sa nagpadala sa akon. Nagkari ako sa kalibutan subong kapawa, agod nga ang magtuo sa akon indi magpabilin sa kadudolman. Ang nagapamati sang akon mensahi kag wala nagatuman sini, indi ako ang magahukom sa iya. Nagkari ako indi sa paghukom sang kalibutan, kundi sa pagluwas sini. Ang nagasikway sa akon kag wala nagabaton sang akon mensahi, may magahukom sa iya. Ang pulong nga akon ginhambal amo ang magahukom sa iya sa katapusan nga adlaw! Kay ang akon ginhambal indi akon, kundi ang Amay nga nagpadala sa akon nagsugo sa akon kon ano ang akon isiling kag ihambal. Kag nahibaluan ko nga ang iya sugo nagadala sang kabuhi nga wala sing katapusan. Gani ang ginasiling ko, amo ang ginsiling sang Amay nga akon ihambal.”

Mayo 5 | Mayo 7