"Amo ini ang Akon Anak, ang Pinalangga - Pamatii ninyo sia!"

Liturhiya sang Pulong

(Martes, Agosto 6, 2019)

Ang Pagbalhin sang Dagway sang Ginoo

1. Ang Pagbasa gikan sa Libro ni:

Daniel nga Propeta 7:9-10, 13-14

   Samtang nagatan-aw ako, may ginbutang didto nga mga trono. Ang isa nga nagakabuhi sing walay katapusan nagpungko sa isa sang mga trono. Ang iya mga bayu maputi kaangay sang yelo kag ang iya buhok kaangay sang bulbol sang karnero. Ang iya trono makasililaw kag may mga rueda nga nagadabadaba nga kalayo kag ang kalayo nagakawigit gikan sa sini. May mga linibo ka mga tawo didto sa pag-alagad sa iya, kag mga minilyon ka mga tawo nagtindog sa atubangan niya. Ang paghukom nagsugod kag ang mga libro ginbuksan.
   Sa akon palanan-awon sa sadto nga gab-i, may nakita ako nga daw tawo. Nagapalapit sia sa akon nga ginalikupan sang panganod, kag nagkadto sia sa isa nga nagakabuhi sing walay katapusan kag gindala sia sa iya presensya. Dayon ginhatagan sia sing awtoridad, kadungganan, kag harianon nga gahom, agod nga ang mga tawo sang tanan nga mga pungsod, rasa, kag linggwahe maga-alagad sa iya. Ang iya gahom magapadayon sa walay katubtoban, kag ang iya ginharian wala sing katapusan.

Salmo sa Pagsabat:

Mga Salmo 97:1-2, 5-6, 9

(S) Ang Ginoo amo ang Hari, makagagahom sa bug-os nga duta.

Ang Ginoo amo ang hari! Magkalipay ka, O duta! Magkalipay kamo, tanan nga mga isla sang kadagatan! Ang mga panganod kag kadudolman yara sa palibot niya; ang iyaginharian napasad sa katarungan kag hustisya. (S)

Ang mga bakulod nagakatunaw subong sang kandila sa atubangan sang Ginoo, sa atubangan sang Ginoo sang bug-os nga duta. Ang kalangitan nagabantala sang iya pagkamatarong, kag ang tanan nga katawuhan nakakita sang iya himaya.

O Ginoo nga Makagagahom, ikaw ang nagagahom sang bug-os nga duta, gamhanan pa ikaw sa tanan nga mga dios. (S)

2. Ang Pagbasa gikan sa Ikaduha nga Sulat ni:

San Pedro 1:16-19

   Kay ang amon pagpakilala sa inyo sang gamhanan nga pagkari sang aton Ginoong Jesu-Cristo wala nasandig sa patupato nga mga sugilanon. Nakita gid sang amon mga mata ang iya pagkahalangdon! Didto kami sang ginhatagan sia sing kadungganan kag himaya sang Dios nga Amay. Nakabati kami sang tingog halin sa Harianon nga Himaya nga nagasiling, “Ini sia amo ang akon hinigugma nga Anak, nga sa iya nahamuot gid ako!” Kami gid nakabati sini nga tingog halin sa langit, sang didto kami upod sa iya sa balaan nga bukid.

   Gani nagasalig pa gid kami sa mga pulong nga ginbantala sang mga propeta. Maayo gid para sa inyo nga hatagan ninyo ini sang inyo igtalupangod, kay kaangay ini sang isa ka suga nga nagasiga sa madulom nga duog, tubtob nga ang Adlaw magbanagbanag kag ang kapawa sang kabugwason magsilak sa inyo mga tagipusoon.

Aleluya:

Mateo 17:5

   Ini amo ang akon hinigugma nga Anak nga nahamut-an ko gid. Pamatii ninyo sia!

Ang Pagbasa sang Santos nga Ebanghelyo suno kay:

San Lucas 9:28-36

   Mga isa ka simana sa tapos mahambal ni Jesus ini nga mga butang, gindala niya si Pedro, si Juan, kag si Santiago sa ibabaw sang isa ka bakulod sa pagpangamuyo. Sang nagapangamuyo sia, nagbalhin ang dagway sang iya nawong kag ang iya bayu nagputi kag nagsilaw. Sa hinali may duha ka tawo nga nagpakighambal sa iya. Ini sila amo si Moises kag si Elias, nga nagpakita sa dagway nga mahimayaon kag nagpakighambal kay Jesus nahanungod sang iya madali na lang nga pagkapatay sa Jerusalem sa pagtuman sang tinutoyo sang Dios. Si Pedro kag ang iya mga kaupdanan natulogan sing mahamuok, pero nakamata sila kag nakita nila ang himaya ni Jesus kag ang duha ka tawo nga nagatindog upod sa iya. Sang manughalin na ang duha ka tawo kay Jesus, si Pedro nagsiling sa iya, “Manunodlo, maayo gid kay yari kita diri. Mahimo kita sing tatlo ka tolda, isa para sa imo, isa para kay Moises kag isa para kay Elias.” (Wala sia makahibalo kon ano ang iya ginahambal.)

   Sang nagahambal pa sia, may isa ka panganod nga nag-abot kag naglikop sa ila, kag ang mga gintuton-an hinadlukan sang ginlikupan sila sang panganod. May tingog gikan sa panganod nga nagsiling, “Amo ini ang akon Anak nga akon ginpili! Pamatii ninyo sia!”

   Sang pag-untat sang tingog, isahanon na lang si Jesus. Ginhipsan lang ini sang mga gintuton-an, kag sadto nga mga inadlaw wala gid sila magpanugid bisan kay sin-o sang ila nakita. 

Agosto 5 | Agosto 7