"Indi Sila Masaklaw sa Aton"

Liturhiya sang Pulong

(Lunes, Agosto 12, 2019)

Santa Juana Francisca de Chantal, Relihiyosa

Ang Pagbasa gikan sa Libro sang:

Deuteronomio 10:12-22

   "Karon, mga tawo sang Israel, magpamati kamo sang ginapangayo sa inyo sang Ginoo nga inyo Dios: Magtahod kamo sa Ginoo kag tumana ninyo ang iya tanan ginasugo. Higugmaa kag alagara ninyo sia sa bug-os ninyo nga tagipusoon kag kalag, kag tumana ang tanan niya nga mga kasugoan. Ginahatag ko ini sa inyo karon nga adlaw para sa inyo kaayuhan. Bisan ang pinakamataas nga langit iya sang Ginoo. Ang duta kag ang tanan nga yara sa sini iya man. Pero ang paghigugma sang Ginoo sa inyo mga katigulangan daku gid sa bagay nga ginpili niya kamo sa baylo sang iban nga mga tawo. Kamo pinili gihapon tubtob karon nga adlaw. Gani, sugod karon tumana ninyo ang Ginoo kag indi magpakatig-a. Ang Ginoo nga inyo Dios gamhanan sa tanan nga mga dios kag sa tanan nga mga gumalahom. Daku sia kag gamhanan, kag dapat sia pagakahadlukan. Wala sia sing ginapasulabi kag indi mahamhaman. Ginatatap niya sing nagakaigo ang mga ilo kag ang mga balo, ginahigugma niya ang mga dumoluong nga nagapuyo upod sa aton mga kasimanwa kag ginahatagan niya sila sing pagkaon kag mga bayu. Gani, higugmaa ninyo ang mga dumoluong, kay kamo mga dumoluong man anay sa Egipto. Tahura ninyo ang Ginoo nga inyo Dios kag sia lang ang simbaha. Magmatutom kamo sa iya kag magsaad kamo sa iya lamang ngalan. Dayawa ninyo sia, kay sia amo ang inyo Dios kag nakita sang inyo kaugalingon nga mga mata ang daku kag makatilingala nga mga butang nga iya ginhimo para sa inyo. Sang pagkadto sang inyo mga katigulangan sa Egipto, 70 lamang sila ka bilog. Pero karon ang GINOO nga inyo Dios nagpadamo sa inyo subong sang mga bituon sa langit.

Salmo sa Pagsabat:

Mga Salmo 147:12-13, 14-15, 19-20

(S) Dayawa ang Ginoo, O Jerusalem!

Dayawa ang GINOO, O Jerusalem! Dayawa ang imo Dios, O Sion! Ginabakod niya ang imo mga puwerta; ginahatagan niya sing mga kaayuhan ang imo mga tawo. (S)
Ginahilway niya sa mga katalagman ang imo mga dulonan kag ginabusog niya ikaw sang pinakamaayo nga trigo. Nagahatag sia sing mando, kag nagaabot ini gilayon sa duta. (S)
Nagahatag sia sang iya mensahi kay Jacob, sang iya mga pagtudlo kag kasugoan kay Israel. Wala niya ini ginhimo sa iban nga mga kapungsoran; wala sila makahibalo sang iya mga kasugoan. (S)

Aleluya:

2 Tesalonica 2:14

   Ginatawag kamo sang Dios paagi sa Maayong Balita nga amon ginwali sa inyo, agod makaambit kamo sang himaya sang aton Ginoong Jesu-Cristo.

Ang Pagbasa sang Santos nga Ebanghelyo suno kay:

San Mateo 17:22-27

   Sang pagtilipon sang mga gintuton-an sa Galilea, nagsiling si Jesus sa ila, “Ang Anak sang Tawo madali na lang itugyan sa kamot sang mga tawo nga magapatay sa iya, pero sa ikatlo nga adlaw pagabanhawon sia.” Ang mga gintuton-an nagkasubo gid.
   Sang pag-abot ni Jesus kag sang mga gintuton-an sa Capernaum, ang mga manugsokot sang buhis sang templo nagpalapit kay Pedro kag nagpamangkot, “Nagabayad man bala ang inyo manunodlo sang buhis sa templo?”
   “Huo, e!” ang sabat ni Pedro.
   Sang pagsulod ni Pedro sa balay, nag-una si Jesus hambal, “Sa imo abi, Simon, sin-o bala ang nagabayad sa mga hari sini nga kalibutan sang balayran sa adwana ukon mga buhis? Ang mga pumoluyo bala sang pungsod ukon mga dumoluong?”
   Nagsabat si Pedro, “Ang mga dumoluong.”
   Si Jesus nagsiling, “Kon amo nagakahulogan nga indi kinahanglan magbayad ang mga pumoluyo. Ugaling agod indi sila masaklaw sa aton, kadto ka sa dagat kag magpamunit kag ang una nga isda nga imo mahulik sa iya baba makita mo ang kuwarta nga metal nga sarang makabayad sang imo kag sang akon buhis sa templo. Kuhaa kag ibayad para sa aton buhis.”

Agosto 11 | Agosto 13