"Luyag ka bala nga Bayawon pa Langit?"

Liturhiya sang Pulong

(Martes, Hulyo 16, 2019)

Ang Mahal nga Birhen Maria sang Carmelo

Ang Pagbasa gikan sa Libro sang:

Exodo 2:1-15

   May isa ka tawo sa tribo ni Levi nga nagpangasawa sa isa ka babayi sa amo man nga tribo. Nagbusong ang iya asawa kag nagbata sing lalaki. Sang makita niya nga ang bata guwapo, gintago niya ang bata sa sulod sang tatlo ka bulan. Sang indi na niya matago ang bata, nagkuha sia sang isa ka basket nga nahimo sa tabun-ak, kag iya ini ginbalaw. Ginsulod niya ang bata sa sini nga basket kag ginbutang niya sa bibi sang suba nga may matag-as nga hilamon. Ang iya utod nga babayi nagtindog sa uloonhan sa pagbantay kon ano ang mahanabo sa iya.

   Karon ang anak nga babayi ni Paraon nagkadto sa suba sa pagpaligo, samtang ang iya manug-atipan nga mga babayi nagdayan-dayan sa pangpang sang suba. Nakita niya ang basket sa mga hilamon, kag ginsugo niya ang iya ulipon nga babayi sa pagkuha sini. Ginbuksan ini sang anak nga babayi ni Paraon kag iya nakita ang lapsag nga lalaki nga nagahibi. Naluoy sia sa bata kag nagsiling, "Isa ini sang mga bata sang mga Hebreo." Ang utod nga babayi sang lapsag nagpamangkot sa iya, "Luyag mo bala nga malakat ako sa pagpangita sang isa ka babayi nga Hebreo nga magaatipan sa sining bata para sa imo?"

   Nagsabat sia, "Lakat ka." Naglakat ang bata nga babayi kag gintawag ang iloy sang bata. Ang anak nga babayi ni Paraon nagsiling sa iya, "Dalha ini nga bata kag saguron mo sia para sa akon, kay suholan ko ikaw." Gani ginkuha sang babayi ang bata kag ginsagod. Sang magdakudaku na ang bata, gindala niya ini sa anak nga babayi ni Paraon kag gin-ayop niya ini subong nga iya anak. Nagsiling ang anak ni Paraon, "Ginkuha ko ini sa tubig," gani hingalanan niya sia kay Moises.

   Isa sadto ka adlaw, sang daku na si Moises, nagduaw sia sa iya kasimanwa nga mga Israelinhon, kag iya nakita kon daw ano ang pagpilit sa ila sa mabug-at nga mga obra. nakita niya ang isa ka Egiptohanon nga nagpatay sang isa ka Hebreo, isa sang iya mga kasimanwa. Nagpanghulonghulong sia, kag sang wala sia sing may nakita, ginpatay niya ang Egiptohanon kag iya ginlubong ang bangkay sa balas. Sang madason nga adlaw nagbalik sia, kag iya na man nakita ang duha ka Hebreo nga naga-away. Nagsiling sia sa isa nga nakahimo sing sayop, "Ngaa bala ginasakit mo ang kapareho mo nga Hebreo?" Nagsabat sia, "Sin-o bala ang naghimo sa imo nga pangulo kag manughukom sa amon? Patyon mo man bala ako subong sang pagpatay mo sa isa ka Egiptohanon?" Kinulbaan si Moises kag nagpanghunahona, "Nahibal-an gali sang mga tawo ang akon ginhimo." Sang mabatian ini ni Paraon, gintinguhaan niya nga patyon si Moises, pero nagpalagyo si Moises, kag nagkadto sa Midian, sa diin sia nagpuyo. 

Salmo sa Pagsabat:

Mga Salmo 69:3, 14, 30-31, 33-34

(S) Pangitaa ninyo sing mapinauboson ang Dios kay sia magpuyo sa inyo tagipusoon.

Nakapoy na ako sang pagsinggit sing tabang, nagasakit na ang akon tutonlan; nagamulodlo ang akon mga mata sa pagpaabot sang imo bulig. (S)

Luwasa ako agod indi ako magsalop sa lunang; bantayi ako agod nga indi ako maano sa akon mga kaaway, kag sa madalom nga tubig. (S)

Dayawon ko ang Dios sa isa ka ambahanon, ibantala ko ang iya pagkagamhanan paagi sa pagpasalamat sa iya. Ini magalipay sa Ginoo labaw pa sang sa paghalad sa iya sang baka, labaw pa sang sa pagdulot sa iya sang toro nga baka. (S)

Ang Ginoo nagapamati sa mga imol, kag wala niya ginakalimti ang iya mga tawo nga nabilanggo. Dayawa ang Dios, O langit kag duta, O mga dagat kag ang tanan nga mga nagapuyo sa inyo! (S)

Aleluya:

Mga Salmo 95:8

Pamatii ninyo ang ginasiling sang Ginoo; "Indi kamo magpakatig-a sang inyo tagipusoon.

Ang Pagbasa sang Santos nga Ebanghelyo suno kay:

San Mateo 11:20-24

   Dayon ginpangbasol ni Jesus ang mga banwa sa diin naghimo sia sang kalabanan sang iya mga milagro kay ang mga tawo didto wala maghinulsol sang ila mga sala. “Kailo ka man Corazin! Kailo ka man Betsaida! Kay kon ang mga milagro nga ginhimo sa inyo ginhimo sa Tiro kag Sidon, dugay na kuntani ang mga tawo didto nagbayu sang sako kag nagbutang sing abo sa ila ulo sa pagpakita nga nagbiya sila sa ila mga sala! Gani dumdoma ninyo nga sa Adlaw sang Paghukom, sobra pa ang silot nga inyo pagabatunon sang sa Tiro kag Sidon. Kag ikaw man Capernaum luyag ka bala nga bayawon pa langit? Itagbong ka sa impiyerno! Kay kon ang mga milagro nga nahimo sa imo ginhimo sa Sodoma, kuntani ang Sodoma ara pa tubtob karon! Gani, dumdoma ninyo nga sa Adlaw sang Paghukom sobra pa ang silot nga batunon mo sang sa Sodoma!”

Hulyo 15 | Hulyo 17