"Lakat Ka kag Himoa ang subong man"

Liturhiya sang Pulong

(Domingo, Hulyo 14, 2019)

1. Ang Pagbasa gikan sa Libro sang:

Deuteronomio 30:10-14

   Pero kinahanglan tumanon ninyo sia kag bantayan ang tanan niya nga mga sugo nga nasulat sa sini nga libro sang iya mga pagtulon-an. Kinahanglan magbalik kamo sa iya sa bug-os ninyo nga tagipusoon kag kalag.

   "Ang sugo nga akon ginahatag sa inyo karon nga adlaw indi tama kabudlay, ukon indi ninyo masarangan. Indi ini mataas pareho sang langit. Indi na kinahanglan nga magpamangkot kamo kon sin-o ang magsaka sa langit kag magkuha sini kag dalhon sa inyo, agod mabatian ninyo ini kag tumanon. Ukon yadto ini sa tabok sang dagat. Indi na kinahanglan nga magpamangkot kamo kon sin-o ang magatabok sa dagat kag dalhon ini sa inyo agod inyo mabatian kag tumanon. Yari ini sa inyo. Nahibaluan ninyo ini kag inyo ini nasaulo. Karon tumana ninyo ini.

Salmo sa Pagsabat:

Mga Salmo 69:14, 17, 30-31, 33-34, 36, 37

(S) Kamo nga mga mapainuboson pangitaa ninyo ang Dios kag magakabuhi kamo. 

Pero ako akon, magapangamuyo ako sa imo, O Ginoo, sabta ako, O Dios; sa tion nga luyag mo, tungod sang imo daku nga gugma, tungod kay ginatuman mo ang imo saad sa pagluwas. Sabta ako, O Ginoo, tungod sang kaayo sang imo mapinadayunon nga gugma, balikda ako! Suno sa imo daku nga kaluoy! (S)

Pero nagaantos ako kag nadulaan sang paglaom, itib-ong ako, O Dios, kag luwasa ako! Dayawon ko ang Dios sa isa ka ambahanon ibantala ko ang iya pagkagamhanan paagi sa pagpasalamat sa iya. Ini magalipay sa Ginoo labaw pa sang sa paghalad sa iya sang baka, labaw pa sang sa pagdulot sa iya sang toro nga baka. (S)
Kon makita ini sang mga ginapigos ang pagluwas sang Dios sa akon, magakalipay sila; ang nagasimba sa Dios mapalig-on. Ang Ginoo nagapamati sa mga imol, kag wala niya ginakalimti ang iya mga tawo nga nabilanggo. (S)
Luwason niya ang Sion, kag patindugon liwat ang mga banwa sang Juda. Ang iya mga tawo maga-estar didto kag magapanag-iya sang duta; ang mga kaliwat sang iya mga alagad magapanubli sini kag ang mga nagahigugma sa iya magapuyo didto. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Colosas 1:15-20

   Si Cristo amo ang makita nga laragway sang indi makita nga Dios, ang panganay nga Anak nga labaw sa tanan nga mga tinuga. Kay paagi sa iya gintuga sang Dios ang tanan nga mga butang sa langit kag sa duta, ang makita kag ang indi makita lakip ang espirituhanon nga mga gahom, mga hari, mga punoan kag mga gumalahom. Paagi sa iya kag para sa iya gintuga sang Dios ang tanan. Sa wala pa matuga ang tanan nga mga butang yara na sia, kag sa ila paghiusa sa iya, ang tagsa ka butang may iya nga naiguan nga lugar. Sia ang ulo sang lawas nga amo ang iglesia. Sia amo ang ginahalinan sang kabuhi sini nga lawas. Sia amo ang panganay nga Anak nga ginbanhaw gikan sa minatay, agod nga sia lamang ang manginnahauna sa tanan nga mga butang. Kay suno gid sa pagbuot sang Dios nga manginyara sa Anak ang bug-os nga kinaugali sang Dios. Gani, paagi sa Anak ginbuot sang Dios nga ipasag-uli sa iya kaugalingon ang bug-os nga kalibutan. Paagi sa pagkamatay sang iya Anak sa krus, gintigayon sang Dios ang paghidait, kag sa sini nga paagi ginpabalik niya sa iya kaugalingon ang tanan nga mga butang sa langit kag sa duta.

Aleluya:

Juan 6:63, 68

Ang imo mga pulong, O Ginoo, amo ang nagahatag sang kabuhi; yara sa imo ang mga pulong nga nagahatag sang kabuhi nga dayon.

Ang Pagbasa sang Santos nga Ebanghelyo suno kay:

San Lucas 10:25-37

   Dayon may isa ka manunodlo sang Kasugoan nga nagtindog sa pagdakupdakop kay Jesus paagi sa isa ka pamangkot, “Manunodlo, ano bala ang himuon ko agod maangkon ko ang kabuhi nga wala sing katapusan?” 

   Si Jesus nagsabat, “Ano bala ang ginasiling sang mga Kasulatan? Ano bala ang kahulogan sini sa imo?” 

   Ang tawo nagsabat, “ ‘Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, sa bug-os mo nga kusog, kag sa bug-os mo nga hunahona,’ kag, ‘Higugmaa ang imo isigkatawo subong sang imo kaugalingon.’” 

   Si Jesus nagsabat, “Husto ang imo sabat. Himoa ini kag magakabuhi ka.” 

   Pero ang manunodlo sang Kasugoan buot magpakamatarong sang iya kaugalingon, gani ginpamangkot niya si Jesus, “Sin-o bala ang akon isigkatawo?”

   Si Jesus nagsabat, “May isa ka tawo nga nagdulhog pakadto sa Jerico halin sa Jerusalem nga ginbanggaan sang mga buyong. Ginkuha nila ang iya tanan nga pagkabutang pati ang iya bayu, ginbakol sia kag ginbayaan nga daw sa patay na. May nag-agi nga isa ka pari sa sina nga dalan. Sang pagkakita niya sang tawo, naglikaw sia sa pihak sang dalan. Sa amo man nga dalan may nag-agi nga isa ka Levita, kag sang pagkakita niya sang tawo iya lang gintan-aw kag naglikaw sia sa pihak sang dalan. Pero may isa ka Samariahanon nga nakaagi sa amo nga dalan. Sang pagkakita niya sang tawo naluoy gid sia.

Sang pagkakita niya sang tawo naluoy gid sia. (10:33)

Ginpalapitan niya ang tawo, ginhaplasan niya sing lana kag bino ang iya sini mga pilas kag ginbugkosan. Dayon ginpasakay niya sia sa iya kaugalingon nga asno, gindala sa dalayunan kag gin-atipan niya sia. Sang madason nga adlaw nagkuha sia sing P40 kag ginhatag niya ini sa tag-iya sang dalayunan. Nagsiling sia sa iya, ‘Tatapa sia, kag sa akon pagbalik bayaran ko ikaw sang tanan nga magasto mo sa iya.’”

   Dayon si Jesus nagpamangkot, “Ti, sa imo abi, sin-o bala sa sining tatlo, ang nangin-isigkatawo sining tawo nga ginbanggaan sang mga buyong?”

   Nagsabat sia, “Yadtong nagkaluoy gid sa iya.” 

   Si Jesus nagsiling, “Ti, lakat ka kag himoa ang subong man.”

Hulyo 13 | Hulyo 15