"Magkahadlok Kamo sa Dios nga Makalaglag sang Lawas kag Kalag didto sa Impiyerno"

Liturhiya sang Pulong

(Sabado, Hulyo 13, 2019)

San Enrique, Hari

Ang Pagbasa gikan sa Libro sang:

Genesis 49:29-32; 50:15-26

   Dayon si Jacob nagpamilinbilin sa ila, “Karon nga madali na lang ako mapatay kag magbuylog sa akon mga himata, ilubong ako upod sa akon mga ginikanan sa kuweba nga yara sa uma ni Efron nga Hethanon, sa Macpela, sa nasidlangan sang Mamre, sa duta sang Canaan. Si Abraham nagbakal sini nga kuweba kay Efron nga Hethanon agod himuon nga lulobngan. Didto nila ginlubong si Abraham kag ang iya asawa nga si Sara, si Isaac kag ang iya asawa nga si Rebeca, kag didto ginlubong ko si Lea. Ang uma kag ang kuweba sa sini ginbakal sa mga Hethanon. Ilubong ako ninyo didto.” Sang makatapos si Jacob pamilinbilin sa iya mga anak, naghigda sia liwat kag napatay sia.

   Sa tapos mapatay ang ila amay, ang mga utod ni Jose nagsiling, “Abi kon si Jose nagadumot pa sa aton, kag may tuyo sa pagtimalos sa aton tungod sa tanan nga kalainan nga ginhimo naton sa iya?” Gani, nagpadala sila sini nga mga pulong kay Jose, “Ang imo amay nagpamilinbilin sang wala pa sia mapatay nga singganon ikaw nga kon mahimo patawaron mo ang mga sala kag mga sayop nga nahimo sang imo mga utod sa imo. Gani, karon kon mahimo patawara kami nga mga ulipon sang Dios sang imo amay tungod sang malain nga amon nahimo.” Si Jose naghibi sang pagkabaton niya sini nga tugon.

   Dayon ang iya mga utod nagpalapit kag nagsaludo tubtob sa duta sa atubangan niya. Nagsiling sila, “Yari kami sa imo atubangan subong imo mga ulipon.”

   Pero si Jose nagsiling sa ila, “Indi kamo magkahadlok, indi ako makasalili sa Dios. Naghimbon kamo sa paghimo sing malain batok sa akon, pero ginhimo ini sang Dios para sa kaayuhan, agod maluwas ang kabuhi sang madamo nga mga tawo nga nagakabuhi pa karon tungod sang natabo. Gani, indi kamo magkahadlok. Tatapon ko kamo kag ang inyo magamay nga mga kabataan.” Gani, ginpasalig niya sila sa malulo nga mga pulong nga nagtandog sang ila mga tagipusoon.

   Si Jose nagpuyosa Egipto upod sa panimalay sang iya amay. Nagaedad sia sing 110 ka tuig sang pagkapatay nia. Nakakita pa sia sang mga bata kag mga apo ni Efraim. Sang pagpamata ni Maquir nga anak ni Manases, ang iya mga kabataan ginbaton ni Jose sa iya panimalay. Nagsiling sia sa iya mga utod, “Madali na lang ako mapatay, pero ang Dios magaatipan sa inyo, kag magapagwa sa inyo gikan sa sini nga duta pakadto sa duta nga ginsumpa niya nga ihatag kay Abraham, kay Isaac kag kay Jacob.” Dayon si Jose nagpasumpa sa mga anak ni Israel. Nagsiling sia, “Magasaad kamo nga kon ang Dios magdala sa inyo sa sadto nga duta, dalhon ninyo ang akon mga tul-an gikan sa sini nga duog.” Gani, si Jose napatay sa edad nga 110 ka tuig. 

Salmo sa Pagsabat:

Mga Salmo 105:1-2, 3-4, 6-7

(S) Pangitaa ninyo sing mapinauboson ang Dios kag magakabuhi kamo.

Magpasalamat kamo sa Ginoo, ibantala ninyo ang iya pagkagamhanan, kag ipakilala sa mga kapungsaran ang iya mga binuhatan! Mag-amba kamo sa iya, magkanta kamo sing pagdayaw sa iya; isugid ninyo ang tanan nga makatilingala nga mga binuhatan niya! (S)

Magakalipay kamo kay iya kita; ang tanan nga nagaalagad sa Ginoo magkalipay! Magdangop kamo sa Ginoo agod buligan; magpabilin kamo sa iya atubangan sa gihapon. (S)

Dumdoma ninyo ang iya gamhanan kag makatilingala nga mga milagro, kag ang mga paghukom sa iya ginhatag. Ang Ginoo amo ang aton Dios; ang iya mga sugo para sa bug-os nga kalibutan. (S)

Aleluya:

1 Pedro 4:14

Bulahan kamo kon ginapakahuy-an kamo tungod kay mga sumolunod kamo ni Cristo, kay ini nagakahulogan nga ang mahimayaon nga Espiritu, ang Espiritu sang Dios, yara sa inyo.

Ang Pagbasa sang Santos nga Ebanghelyo suno kay:

San Mateo 10:24-33

   “Wala sing eskuwela nga maglabaw sa iya maestro, ukon ulipon nga maglabaw sa iya agalon. Gani tuman na sa eskuwela nga manginpareho sa iya maestro, kag sa ulipon nga manginpareho sa iya agalon. Kon ang pangulo sang panimalay ginatawag Beelzebul, ano pa gid ayhan kalain ang pagtawag nila sang mga katapo sina nga panimalay!”

   “Gani, indi kamo magkahadlok sa mga tawo. Wala sing ginatabunan nga indi mabuksan, kag wala sing sekrito nga indi mabuyagyag. Ang ginasiling ko sa inyo sa madulom ihambal ninyo sa masanag, kag ang inyo mabatian sa hutik isinggit ninyo gikan sa atop sang mga balay. Indi kamo magkahadlok sa mga makapatay sang lawas pero indi makapatay sang kalag; sa baylo magkahadlok kamo sa Dios nga makalaglag sang lawas kag kalag didto sa impiyerno. Indi bala nga tagduha singko lang ang magamay nga pispis? Pero wala sing isa sa ila nga mahulog sa duta nga wala sing pahanugot sang inyo Amay. Kag kon nahanungod sa inyo, bisan pa ang mga buhok sa inyo ulo naisip tanan. Gani indi kamo magkahadlok, kay mahal pa kamo kaayo sa mga magamay nga pispis!”

   “Ang bisan sin-o nga magkilala sa akon sa atubangan sang mga tawo, kilalahon ko man sia sa atubangan sang akon Amay sa langit. Pero ang bisan sin-o nga indi magkilala sa akon sa atubangan sang mga tawo, indi ko man sia pagkilalahon sa atubangan sang akon Amay nga yara sa langit.”

Hulyo 12 | Hulyo 14