Liturhiya sang Pulong
(Lunes, Abril 20, 2020)
Lunes sang Ikaduha nga Semana sang Pagkabanhaw
Ang Pagbasa gikan sa mga:
Binuhatan sang mga Apostoles 4:23-31
Sang mabuy-an si Pedro kag si Juan, nagbalik sila sa ila mga kaupdanan kag ginsugiran nila sila kon ano ang ginsiling sang pangulo nga mga pari kag sang mga katigulangan sang mga Judio. Sang pagkabati nila sini nagpangamuyo sila sing tingob sa Dios nga nagasiling, “Ginoo, ikaw ang nagtuga sang langit, sang duta, sang dagat kag sang tanan nga yara sa ila! Paagi sa Espiritu Santo naghambal ikaw sa imo alagad nga si David nga amon amay sa iya pagsiling:
‘Ngaa bala nagabalingaso
Ang kaakig sang mga Gentil,
Ngaa bala nagapahito ang mga tawo
Sang mga butang nga wala sing pulos?
Ang mga hari sang kalibutan
Nagapangaman,
Kag ang mga pangulo nagatingob
Sa pagsumpong sa Ginoo
Kag sa iya Cristo.’
Kay matuod gid, sa sini nga siyudad naghimbon si Herodes, si Poncio Pilato, ang mga Gentil kag ang mga taga-Israel batok kay Jesus nga imo balaan nga Alagad kag imo Cristo. Naghiliugyon sila sa paghimo sang tanan nga mga butang nga imo nga daan ginpat-od nga matabo suno sa imo gahom kag kabubot-on. Kag karon, O Ginoo, tan-awa bala ang ila pamahog. Hatagi kami nga imo mga alagad sing kaisog sa pagsugid sang imo mensahi. Untaya ang imo kamot sa pagpang-ayo, kag itugot nga madamo nga makatilingala nga mga buhat kag mga milagro ang mahimo paagi sa ngalan ni Jesus nga imo balaan nga Alagad.”
Sa tapos sila makapangamuyo, nag-uyog ang duog nga ila ginatipunan. Napun-an sila sang Espiritu Santo kag naghambal sila nga may kaisog sang mensahi sang Dios.
Salmo sa Pagsabat:
Mga Salmo 2:1-3, 4-7, 7-9
(S) O Ginoo, bulahan ang mga nagadangop sa imo.
Ngaa bala nga nagahimbon ang mga pungsod sa pagribok? Ngaa bala nagaplano ining mga tawo sing walay pulos? Ang ila mga hari nagaribok, ang ila mga pangulo nagahimbon sing tingob batok sa Ginoo kag sa iya pinili nga hari. Nagasiling sila, "Hilwayon ta ang aton kaugalingon sa ila paggahom, sikwayon ta ang ila pagdumala." (S)
Sa iya trono sa langit ang Ginoo nagakadlaw, kag nagayaguta sa ila. Nagahambal sia sa ila nga may kaakig, kag nagakurog sila sa iya kasingkal. Nagasiling sia, “Sa Sion, ang akon balaan nga bukid, ginpagahom ko ang akon hari." (S)
Ang hari nagasiling, "Ibantala ko ang ginpahayag sang Ginoo. Ang Ginoo nagsiling sa akon: ‘Ikaw ang akon anak. Karon nga adlaw mangin-amay mo ako. Pangayo ka, kag ihatag ko sa imo ang tanan nga mga kapungsoran, mangin-imo man ang bug-os nga duta. Gamhan mo sila sa kamot nga salsalon. Dugmokon mo sila subong sang kulon.'" (S)
Aleluya:
Colosas 3:1
Ginbanhaw kamo kaupod ni Kristo. Gani pangitaa ninyo ang mga butang nga yara sa langit, sa diin nagalingkod si Kristo sa iya trono sa tuo sang Dios.
Ang Pagbasa sang Santos nga Ebanghelyo suno kay:
San Juan 3:1-8
May isa ka tawo nga ginhingalanan kay Nicodemo, isa ka pangulo sang mga Judio, nga katapo sang partido sang mga Fariseo. Isa sadto ka gab-i, nagkadto sia kay Jesus kag nagsiling sa iya, “Rabbi, nahibaluan namon nga ikaw isa ka manunodlo nga ginpadala sang Dios. Wala sing makahimo sang gamhanan nga mga buhat nga imo ginahimo kon ang Dios wala nagaupod sa iya.”
Si Jesus nagsabat, “Nagasiling ako sa imo sang matuod: wala sing isa nga makakita sang Ginharian sang Dios kon indi sia matawo liwat.”
Si Nicodemo nagpamangkot, “Paano bala ang pagkatawo liwat sang tawo kon daku na sia? Makasulod pa bala sia sa tiyan sang iya iloy kag magpakatawo liwat?”
Si Jesus nagsabat, “Nagasiling ako sa imo sang matuod: wala sing isa nga makasulod sa Ginharian sang Dios, kon indi sia matawo sa tubig kag sa Espiritu. Ang gin-anak sang tawo, tawo, kag ang gin-anak sa Espiritu, espiritu. Indi ka magkatingala nga ako nagasiling sa imo, ‘Dapat kamo tanan matawo liwat.’ Ang hangin nagahuyop bisan sa diin ang luyag niya. Mabatian mo ang iya huni, pero indi ka makahibalo kon diin ini nagahalin kag kon diin nagapakadto. Subong man sini ang nagakatabo sa tagsatagsa nga natawo sa Espiritu.”
No comments:
Post a Comment