Bulahan ang mga Nagatudlo kag Nagasunod sa mga Kasugoan

Liturhiya sang Pulong

(Domingo, Pebrero 16, 2020)

Ang Pagbasa gikan sa Libro ni:

Sirac nga Propeta 15:15-20

   Kon buot mo sarang mo matuman ang mga sugo; yara sa imo kaugalingon ang pagpamat-od kon bala buot ka magmatutom ukon indi.
   Ginbutang niya sa imo atubangan ang kalayo kag ang tubig; dab-ota kag kuhaa ang imo ginpili.
   Ang tawo nagaatubang sa kabuhi kag sa kamatayon, ang iya pilion mangin-iya.
   Kay daku ang kaalam sang Ginoo makagagahom sia kag makakita sang tanan.
   Ginabantayan niya ang mga nagatahod sa iya; wala sing binuhatan ang tawo nga indi niya makita.
   Wala gid sia magsugo sa tawo nga magmalaut, kag wala sia magtugot sa bisan sin-o sa pagpakasala.

Salmo sa Pagsabat:

Mga Salmo 119:1-2, 4-5, 17-18, 33-34

(S) Bulahan ang mga nagakabuhi sa kasugoan sang Dios.

Bulahan ang mga wala sing dagta sa ila kabuhi, nga nagakabuhi suno sa kasugoan sang Ginoo. Bulahan sila nga nagasunod sang iya mga sugo, nga nagatuman sa iya sa bug-os nila nga tagipusoon. (S)

O Ginoo, ginhatag mo sa amon ang imo mga kasugoan, kag nagsugo sa amon sa pagtuman sini sing matutom. Daku gid ang akon handom nga manginmatutom ako sa pagtuman sang imo mga pagsulondan! (S)

Magmaayo ka sa akon nga imo alagad, agod nga magkabuhi ako kag magtuman sang imo mga pagtudlo. Buksi ang akon mga mata, agod nga makakita ako sang makatilingala nga mga kamatuoran sa imo kasugoan. (S)

Tudloi ako, O Ginoo, sang kahulogan sang imo mga kasugoan, kag tumanon ko sila sa tanan nga tion. Isaysay sa akon ang imo kasugoan, kag akon ini tumanon; tipigan ko ini sa bug-os ko nga tagipusoon. (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 2:6-10

   Karon sa mga hamtong na sa espirituhanon nga kabuhi nagahambal ako sang kaalam. Pero indi ini kaalam nga iya sang kalibutan, ukon ila sang mga nagagahom sining kalibutan nga ang ila gahom nagakawala na. Ang kaalam nga akon ginahambal amo ang tinago nga kaalam sang Dios, nga ginlipdan sa mga tawo, pero gintigana na sang Dios para sa aton himaya, bisan sang wala pa matuga ang kalibutan.  Walay bisan sin-o sang mga nagagahom sining kalibutan ang nakahibalo sini nga kaalam. Kon nahibal-an nila ini, wala nila kuntani ginlansang sa krus ang Ginoo sang himaya. Pero suno sa ginasiling sang kasulatan,

     “Ang wala makit-i

     Kag mabatii sang tawo,

     Ang wala ginpanghunahonai

     Sang tawo nga matabo,

     Amo gid ang tin-aman sang Dios

     Para sa mga nagahigugma sa iya.”

   Pero sa aton ginpahayag sang Dios ang iya tinago paagi sa iya Espiritu. Ang Espiritu nagausisa sang tanan, bisan ang indi matungkad nga mga tinutoyo sang Dios.

Aleluya:

Mateo 11:25

   Nagapasalamat ako sa imo, O Amay, Ginoo sang langit kag sang duta, kay ginpahayag mo sa mga kabataan ang mga misteryo sang ginharian.

Ang Pagbasa sang Santos nga Ebanghelyo suno kay:

San Mateo 5:17-37

   “Indi kamo maghunahona nga nagkari ako sa pagdula sang Kasugoan ni Moises kag sang mga ginpanudlo sang mga propeta. Wala ako magkari sa pagdula sini, kundi sa pagpaathag sang ila matuod nga kahulogan.  Dumdoma ninyo ini! Samtang may langit pa kag duta, wala sing bisan isa ka kudlit ukon labing diutay nga bahin sang Kasugoan nga pagadulaon tubtob nga matuman ang tanan. Gani, ang bisan sin-o nga maglapas sang pinakadiutay sang mga Kasugoan kag magpanudlo sa iban sa paglapas man, manginlabing kubos sa Ginharian sang langit. Pero ang bisan sin-o nga magtuman sang Kasugoan kag magtudlo sa iban sa pagtuman man, mangindaku sa Ginharian sang langit. Gani ginasingganan ko kamo, nga sarang lang kamo makasulod sa Ginharian sang langit kon ang inyo katutom sa pagtuman sang ginapaabot sang Dios sa inyo maglabaw sa katutom sang mga manunodlo sang Kasugoan kag sang mga Fariseo.”

   “Inyo nabatian ang ginsiling sang una sa inyo mga katigulangan, ‘Indi ka magpatay sang tawo. Ang bisan sin-o nga makapatay pagadalhon sa hukmanan.’ Pero karon nagasiling ako sa inyo nga ang bisan sin-o nga nagakaakig sa iya utod, pagadalhon sa hukmanan; kag ang bisan sin-o nga nagapakalain sa iya utod, sa pagsiling sa iya, ‘Hoy, waay ka pulos!’ pagadalhon sa Pinakamataas nga Hukmanan; kag ang bisan sin-o nga nagasiling sa iya utod, ‘Hoy, buang!’ may katalagman nga magpaimpiyerno. Gani kon nagadala ikaw sang imo dulot sa Dios kag madumdoman mo nga ang imo utod may aligutgot sa imo, bayai anay ang imo dulot sa atubangan sang altar kag magpakighusay sa imo utod, kag ugaling magbalik ka kag maghalad sang imo dulot sa Dios.

   “Kon may tawo nga magsumbong sa imo sa hukmanan, magpakighusay ka sa iya samtang may tion pa kag wala pa kamo makakadto sa hukmanan, kay kon didto na kamo, iya ikaw itugyan sa hukom kag ang hukom magatugyan sa imo sa gwardya, kag isulod ka sa bilangguan. Nagasiling ako sa imo, magapabilin ka didto tubtob mabayaran mo ang tanan mo nga multa.”

   “Nabatian man ninyo ang ginsiling sang una, ‘Indi kamo magpanginbabayi ukon magpanginlalaki.’ Pero karon nagasiling ako sa inyo: ang bisan sin-o nga nagatulok sa babayi kag nagahandom sa pagpakighilawas sa iya, nakapakasala na sa sini nga babayi sa sulod sang iya tagipusoon. Gani kon ang imo maayo nga mata, manginkabangdanan sang imo pagpakasala lukata ini kag ihaboy! Maayo pa nga madula ang isa ka bahin sang imo lawas sang sa itagbong ang imo bug-os nga lawas sa impiyerno. Kon ang imo maayo nga kamot manginkabangdanan sang imo pagpakasala, utda ini kag ihaboy! Maayo pa nga madula ang isa ka bahin sang imo lawas sang sa itagbong ang imo bug-os nga lawas sa impiyerno.” “Nasiling pa gid, ‘Ang bisan sin-o nga magbulag sa iya asawa, kinahanglan maghatag sia sa iya asawa sang papeles sang pagbulagay.’ Pero karon nagasiling ako sa inyo: kon ang isa ka tawo magbulag sa iya asawa luas lamang sa kabangdanan nga ini sia nagpanginlalaki, may salabton sia tungod sang pagpanginlalaki sang iya asawa kon ang iya asawa magpamana liwat, kag ang magpangasawa sa sini nga babayi nagapanginbabayi man.”

   “Inyo man nabatian ang ginsiling sang una sa inyo mga katigulangan, ‘Indi ka magsumpa sang indi mo man lang pagtumanon, kundi tumanon mo ang imo ginsumpa sa Ginoo.’ Pero karon nagasiling ako sa inyo: indi kamo magpanumpa kon magsaad kamo. Indi gid kamo magsumpa nga nagasiling, ‘Saksi ko ang langit,’ kay amo ini ang trono sang Dios; ukon magsiling, ‘Saksi ko ang duta,’ kay amo ini ang tulongtongan sang iya mga tiil; ukon magsiling, ‘Saksi ko ang Jerusalem,’ kay amo ini ang siyudad sang gamhanan nga Hari. Indi ka man magpanumpa nga nagasiling, ‘Bisan utdan pa ako sang ulo,’ kay indi ikaw makapaputi ukon makapaitom sang bisan isa lang ka nahot nga buhok. Magsiling kamo ‘Huo’ ukon ‘Indi’ kay ang bisan ano pa nga dugang sini, nagagikan sa Yawa.”

Pebrero 15 | Pebrero 17