"Ang Ginoo Naluoy gid sa Balo nga Babayi"

Liturhiya sang Pulong

(Martes, Setyembre 17, 2019)

San Roberto Belarmino, Obispo kag Doktor sang Simbahan

Ang Pagbasa gikan sa Nahauna nga Sulat ni San Pablo nga Apostol, kay:

Timoteo 3:1-13

   Matuod ini nga pulong: Kon ang isa ka tawo luyag mangin-isa ka pangulo sa iglesia, maayo nga hilikuton ang iya ginahandom. Kinahanglan nga ang pangulo sang iglesia isa ka tawo nga wala sing kasawayan, isa lang ang iya asawa, mahaganhaganon, makapugong sang iya kaugalingon kag but-anan, kinahanglan mabinatunon sia sa mga dumoluong sa iya puloy-an, sampaton sa pagpanudlo; indi palahubog ukon makiawayon, kundi nga malulo kag mahidaiton, kag indi makikuwarta. Kinahanglan makahibalo sia magdumala sing maayo sang iya panimalay, ginatuman kag ginatahod sia sang iya mga kabataan. Kay kon ang isa ka tawo indi gani makahibalo magdumala sang iya panimalay, paano karon ang pagdumala niya sang iglesia sang Dios? Indi sia bag-o pa lang nakonbertir, kay basi magpabugal sia kag pagasilutan man sia subong sang Yawa. Kinahanglan ginatahod sia sang mga tawo nga indi katapo sang iglesia, agod nga indi sia mahuy-an kag mahulog sa siod sang Yawa.

   Ang mga manugbulig sa iglesia kinahanglan maayo sing pamatasan kag sinsero. Kinahanglan indi sila palainom sing bino kag indi dalok. Kinahanglan nagapadayon sila sing malig-on sa napahayag nga kamatuoran sang pagtuo, nga may matinlo nga konsyensya. Kinahanglan tilawan anay sila, kag kon makapasar, mag-alagad na sila. Ang ila mga asawa kinahanglan may maayo man nga pamatasan kag wala nagakutsokutso. Maugdang sila kag masaligan sa tanan nga mga butang. Ang manugbulig sa iglesia kinahanglan may isa lang ka asawa kag makahibalo magtatap sing maayo sang iya mga kabataan kag panimalay. Ang mga manugbulig sa iglesia nga nagaalagad sing maayo ginatahod sang mga tawo kag sarang sila makahambal nga wala sing kahadlok nahanungod sang ila pagtuo sa kay Cristo Jesus.

Salmo sa Pagsabat:

Mga Salmo 101:1-2, 2-3, 5, 6

(S) Magakabuhi ako sing putli sa akon balay.

Ang akon ambahanon nahanungod sa pagkamainunongon kag pagkamatarong, kag ginakanta ko ini para sa imo, O Ginoo. Ang akon pagginawi mangindi-salawayon. San-o ka bala makari sa akon? (S)

Magakabuhi ako sing putli sa akon balay; indi ako magpasugot sa malaut. Kontra ko gid ang mga ginahimo sang mga tawo nga nagabiya sa Dios. (S)

Pagalaglagon ko ang tawo nga nagapanugidsogid sing malain nahanungod sa iya abyan; indi ko pagpasugtan ang tawo nga hambog kag bugalon. (S)

Pasulabihon ko ang mga tawo nga matutom sa Dios kag papuy-on ko sila sa akon palasyo; yadtong mga maminatud-on sing bug-os pahanugotan ko sa pag-alagad sa akon. (S)

Aleluya:

San Lucas 7:16

   Ang isa ka daku nga propeta nagpakita sa tunga naton, kag ang Dios nagkari sa pagluwas sang iya mga tawo.

Ang Pagbasa sang Santos nga Ebanghelyo suno kay:

San Lucas 7:11-17

   Sa tapos sini, si Jesus nagkadto sa banwa nga ginatawag Nain. Nag-upod sa iya ang iya mga gintuton-an kag ang madamo nga mga tawo. Sang nagahinampot sia sa puwerta sang banwa, may patay nga ginayayungan pa gwa kag madamo nga mga tawo sa banwa ang nagakompanyar. Ang patay nga tawo amo ang bugtong nga anak sang isa ka iloy nga balo. Sang pagkakita sang Ginoo sa balo naluoy gid sia kag nagsiling sa iya, “Indi ka maghibi.” Dayon nagpalapit sia sa lungon kag gintandog niya ini. Ang mga nagayayong nagdulog. Si Jesus nagsiling, “Noy, nagasiling ako sa imo, bangon ka.” Ang patay nagbangon kag naghambal, kag gintugyan sia ni Jesus sa iya iloy.

   Ang tanan hinadlukan gid kag nagdayaw sila sa Dios nga nagasiling, “Ang isa ka daku nga propeta nagpakita sa tunga naton, kag ang Dios nagkari sa pagluwas sang iya mga tawo.”

   Ining balita nahanungod kay Jesus naglapnag sa bug-os nga Judea kag sa palibot nga kadutaan.

Setyembre 16 | Setyembre 18