"Ang mga Tawo Nawili sa Pagpamati sa Iya"

Liturhiya sang Pulong

(Biyernes, Nobyembre 22, 2019)

Santa Cecilia, Birhen kag Martir

Ang Pagbasa gikan sa Nahauna nga Libro sang mga:

Macabeo 4:36-37, 52-59 

   Dayon si Judas nagsiling sa iya mga utod nga lalaki, "Karon nga ang aton mga kaaway nalutos na, makadto kita sa Templo kag aton tinloan kag ihalad ini." Gani, gintipon nila ang tanan nga mga hangaway kag nagtaklad sila sa bukid sang Sion.

   Sa ika-25 nga adlaw sang ikasiyam nga bulan, nga amo ang bulan sang Kisleb, sa ika-148 nga tuig nagbangon sila sing kaagahon pa, kag nagdulot sing halad, suno sa ginasiling sang Kasugoan, sa bag-o nga altar nga ginasunogan nga ila ginpatindog. Ginhalad nila ang altar nga may mga ambahanon kag tinukar sang mga lira, mga arpa, kag mga platilyos sa tion kag sa adlaw gid nga ginpasipad-an ini anay sang mga Gentil. Ang tanan nga mga tawo naghapa kag nagsimba nga nagadayaw sa langit nga naghatag sa ila sing pagdaog. Ginsaulog nila ang paghalad sang altar sa sulod sang walo ka adlaw, kag nagdulot sila sing mga halad nga sinunog nga may pagkinasadya. Nagdulot man sila sing mga halad sa paghiusa kag pagpasalamat. Gin-adornohan nila ang atubangan sang Templo sing mga korona kag magamay nga mga taming nga bulawanon. Ginkaayo nila ang mga puwerta kag mga kuwarto nga talaguan, kag ginbutangan ini sing mga sera. Wala sing untat ang pagkinasadya sa tunga sang mga tawo, kag ang kahuloy-an nga ila naagom sa mga Gentil nakuha na. Dayon si Judas kag ang iya mga utod nga lalaki kag ang bug-os nga katilingban sang Israel nagpamat-od nga sa tagsa ka tuig sa sini nga panahon saulogon ang mga adlaw sang paghalad sang altar nga may kinasadya kag kinalipay sa sulod sang walo ka adlaw, halin sa ika-25 nga adlaw sang bulan sang Kisleb. 

Kalantahon sa Pagsabat:

1 Mga Cronica 29:10, 11, 11-12, 12

(S) O Dios, nagadayaw kami sa imo mahimayaon nga ngalan.

Didto sa atubangan sang bug-os nga katilingban gindayaw ni David ang Ginoo. Nagsiling sia, “O Ginoo nga Dios sang amon ginikanan nga si Jacob, kabay nga dayawon ka sa walay katubtoban! (S)

Daku ka kag gamhanan, mahimayaon, halangdon, kag dalayawon. Ang tagsa ka butang sa langit kag sa duta imo. (S)

Ikaw hari, nga labi ka gamhanan sa tanan. Ang tanan nga kamanggaran kag kadungganan nagagikan sa imo; ginagamhan mo ang tagsa ka butang sa imo kusog kag gahom; kag mahimo mo nga gamhanan kag makusog ang bisan sin-o. (S)

Aleluya:

Juan 10:27

   Ang akon mga karnero nagapamati sa akon tingog, siling sang Ginoo; kilala ko sila kag nagasunod sila sa akon.

Ang Pagbasa sang Santos nga Ebanghelyo suno kay:

San Lucas 19:45-48 

   Si Jesus nagsulod sa templo kag iya ginpangtabog ang mga manugbaligya kag nagsiling sia sa ila, “Nasulat sa mga Kasulatan nga ang Dios nagsiling, ‘Ang akon balay manginbalay nga palangamuyoan.’ Pero ginhimo ninyo ini nga palanaguan sang mga makawat.”

   Adlaw-adlaw si Jesus nagpanudlo sa templo. Ang pangulo nga mga pari, ang mga manunodlo sang Kasugoan, kag ang mga pangulo sang banwa nagtinguha sa pagpatay sa iya, pero wala sila sing kahigayunan sa paghimo sini, kay ang mga tawo nawili sa pagpamati sa iya.

Nobyembre 21 | Nobyembre 23