"Magtipon sing Manggad sa Langit"

Liturhiya sang Pulong

(Biyernes, Hunyo 21, 2019)

San Luis Gonzaga, Relihiyoso

Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 11:18, 21-30

   Pero tungod madamo ang nagapabugal sa tawuhanon lamang nga kabangdanan, amo man ang himuon ko. Nahuya ako sa pag-ako nga kami amon indi makahimo sina! 
   Pero kon may mangahas sa pagpabugal sang bisan ano—karon nagahambal ako nga daw buangboang—ako may amo man nga kakahas sa pagpabugal. Mga Hebreo bala sila? Ako amo man. Mga Israelinhon bala sila? Ako amo man. Mga kaliwat bala sila ni Abraham? Ako amo man. Mga alagad bala sila ni Cristo? Daw buang ako sa paghambal sini, pero mas maayo pa ako nga alagad sang sa ila! Nakapangabudlay ako sing labi pa sa ila, napriso ako sing madamo nga beses, ginhanot ako sing labi pa, kag pirme lang ako sa katalagman sang kamatayon. Kalima gid ako makaagi sing tag-39 ka lapdos sa kamot sang mga Judio. Katatlo gid ako makaagi sang pagbunal sang mga Romanhon, kag makaisa ako ginbato. Katatlo gid ako malunod, kag sa isa sini 24 ka oras gid ako sa tubig. Sa akon madamo nga pagpanglakaton masunson yara ako sa katalagman sang mga baha kag mga makawat, sa katalagman sa akon kapareho nga mga Judio kag sang mga Gentil, sa katalagman sa mga siyudad kag mga kagulangan, sa katalagman sa dagat kag sa di-matuod nga mga abyan. Madamo ang akon mabudlay nga ulobrahon kag masunson wala ako sing tulog. Gingutom ako kag gin-uhaw kag sa masunson wala ako sing tuman nga pagkaon, dalayunan, ukon bayu. Wala labot sini kag sang iban pa nga mga butang, ang akon kabalaka para sa tanan nga mga iglesia naghatag sa akon sing dugang nga palas-anon adlaw-adlaw. Kon may yara nga maluya, nagabatyag man ako sing kaluya. Kon may magpakasala, nagakalisod gid ako.

   Kon magpabugal gid man ako, magapabugal ako sang mga butang nga nagapakita kon daw ano ako kaluya.

Salmo sa Pagsabat:

Mga Salmo 34:2-3, 4-5, 6-7

(S) Ang Ginoo nagaluwas sa mga nadulaan sang paglaum.

Dayawon ko Sia tungod sang iya mga binuhatan; kabay nga ang mga ginapigos magpamati kag magkalipay! Isugid ta ang pagkadaku sang Ginoo; dayawon ta sing tingob ang Iya ngalan! (S)
Nagpangamuyo ako sa Ginoo; kag ginsabat niya ako; ginkuha niya ang tanan ko nga mga kahadlok, ang mga ginapigos nagasalig sa iya kag nagakalipay sila; indi gid sila mapaslawan. (S)
Ang mga makalulooy nagapanawag sa iya, kag nagasabat sia sa  ila; ginaluwas niya sila sa tanan nila nga kalalat-an. Ang anghel sang Ginoo nagabantay sa tanan nga nagapasidungog sa iya, kag iya sila ginaluwas sa katalagman. (S)

Aleluya:

Mateo 5:3

Bulahan ang mga nagakilala sang kinahanglanon sang ila kalag, kay ila ang Ginharian sang langit.

Ang Pagbasa sang Santos nga Ebanghelyo suno kay:

San Mateo 6:19-23

   “Indi kamo magtipon sing manggad para sa inyo kaugalingon diri sa duta, sa diin ang mga sapatsapat kag ang tuktok makaut-ot kag ang mga makawat makasulod sa pagpangawat. Sa baylo, magtipon kamo sing manggad sa langit, sa diin wala sing sapatsapat kag tuktok nga makaut-ot kag ang mga makawat indi makasulod sa pagpangawat. Kay kon diin ang inyo manggad didto man ang inyo tagipusoon.”

   “Ang mga mata kasubong sang suga sa lawas. Kon ang imo mga mata maayo, ang imo bug-os nga lawas may kapawa. Pero kon ang imo mga mata malain, ang imo lawas yara sa kadudolman. Gani kon ang kapawa nga yara sa imo manginkadudolman, daw ano pa gid kadulom ina nga kadudolman!”

Hunyo 20 | Hunyo 22