Si Herodes Nakonsensya

Liturhiya sang Pulong

(Biyernes, Pebrero 7, 2020)

Ang Pagbasa gikan sa Libro ni:

Sirac nga Propeta 47:2-11

   Subong nga ang sapay ginapain sa halad sa paghiusa, amo man si David ginpili sa tanan nga mga kaanakan ni Israel naghampang sia sa mga leon nga daw kaangay lang sang mga kanding kag sa mga uso nga daw mga cordero sila. Sang bata pa sia wala bala niya ginpatay ang higante kag ginluwas ang mga tawo sa ila kahuloy-an, paagi sa paggamit sang labyog nga nagpukan sang bugal ni Goliat? Kay nagpanawag sia sa Ginoo nga Labing Mataas, nga naghatag sing kusog sa iya tuo nga butkon sa pagpatay sang gamhanan nga hangaway, kag sa pagbayaw sang gahom sang
iya mga tawo, gani ginkabig nila sia nga mandadaug sang napulo ka libo, kag gindayaw nila sia samtang nagbendisyon sila sa Ginoo, paagi sa paghatag sa iya sang korona sang himaya; kay ginapamatay niya ang mga kaaway sa bug-os nga palibot, ginpapas niya ang iya mga kaaway nga Filistinhon, kag ginlaglag ang ila gahom tubtob sini gid nga adlaw.
   Sa tanan nga iya ginpanghimo nagpasalamat sia sa Balaan, ang Labing Mataas, sa mga pulong sang pagdayaw; nag-amba sia sa bug-os niya nga tagipusoon tungod sang iya paghigugma sa iya Manunoga. Nagpahamtang sia sing mga arpa sa atubangan sang altar agod magnami ang pagkanta nga ginaupdan sang paglanton sini, Ginpasadya niya ang ila mga piesta. Ang ila mga kasadyahan ginpasadya niya nga may pagkasolemne, sa bagay nga ginadayaw ang ngalan sang Ginoo kag ang santuaryo may nagatinukar sa kaagahon. Ginkuha sang Ginoo ang iya mga sala, ginhatagan sia sing daku nga gahom; ginhatagan niya sia sang isa ka harianon nga kasugtanan, kag isa ka mahimayaon nga trono sa Israel.

Salmo sa Pagsabat:

Mga Salmo 18:31, 47 kag 50, 51

(S) Ang Dios amo ang akon manlulowas! Ibantala ang iya pagkagamhanan!

Daw ano kahimpit sang mga binuhatan sini nga Dios, daw ano ka masaligan ang iya mga pulong! Kaangay sia sang taming sa tanan nga nagadangop sa iya. (S)
Buhi ang Ginoo! Dayawon ang akon Mangangapin! Ang Dios amo ang akon manlulowas! Ibantala ang iya pagkagamhanan! Gani, O Ginoo, sa tunga sang  mga kapungsoran magadayaw ako sa imo, magaamba ako sing mga pagdayaw sa imo. (S) 

Dalagku nga mga pagdaog ang ginahatag sang Dios sa iya hari, ginapakita niya ang iya mapinadayunon nga gugma sa iya pinili, sa kay David kag sa iya mga kaliwat sa walay katubtoban. (S)

Aleluya:

Lucas 8:15

   Bulahan ang mga nagapmati sang pulong sang Dios kag nagatipig sini sa maayo kag masinulondon nga tagipusoon tubtob nga magpamunga sila.

Ang Pagbasa sang Santos nga Ebanghelyo suno kay:

San Marcos 6:14-29

   Karon ini tanan nabatian ni Herodes nga hari tungod kay ginbantog si Jesus sa tanan nga duog. May mga tawo nga nagsiling, “Nabanhaw si Juan Bautista! Amo ini ang kabangdanan kon ngaa makatilingala ang ginahimo niya.”
   Pero ang iban nagsiling, “Si Elias sia.”
   Kag ang iban pa gid nagsiling, “Isa sia ka propeta subong sang mga propeta sang una anay.”
   Sang pagkabati ni Herodes sini nagsiling sia, “Si Juan Bautista sia! Ginpapugotan ko sia, pero karon nabanhaw!”
   Si Herodes mismo amo ang nagmando nga ipadakop si Juan, ipagapos kag ipabilanggo. Ginhimo niya ini tungod kay Herodias nga iya ginpangasawa bisan ini sia asawa sang iya utod nga si Felipe. Pirme lang sia ginahambalan ni Juan Bautista, “Indi matarong ang imo pagpangasawa sang asawa sang imo utod!”
   Gani gindumtan ni Herodias si Juan kag gintuyo niya nga patyon, pero indi sia makahimo sini tungod kay Herodes. Nahadlok si Herodes sa kay Juan tungod kay nahibal-an niya nga si Juan matarong kag balaan nga tawo. Gani, gin-apinan niya si Juan nga indi maano. Naluyag sia magpamati kay Juan wala sapayan nga nagakatublag sia sa kada pagpamati niya sa iya.
   Sang ulihi nag-abot gid ang kahigayunan nga ginahulat ni Herodias. Kaadlawan yadto ni Herodes kag naghiwat sia sing isa ka punsyon para sa mataas nga mga punoan sang banwa, mga opisyales sang mga soldado kag lutaw nga mga pumoluyo sang Galilea. Ang anak nga babayi ni Herodias nagsulod kag nagsaot, kag naglingaw sa kay Herodes kag sang iya mga dinapit. Gani ang hari nagsiling sa dalagita, “Pangayo ka sang bisan ano kay ihatag ko sa imo.” Kag nagsiling pa sia, “Ginasumpa ko nga ihatag ko sa imo ang bisan ano nga pangayuon mo, bisan pa ang katunga sang akon ginharian.”
   Tungod sini naggwa ang dalagita kag nagpamangkot sa iya iloy, “Ano bala ang pangayuon ko?”
   Ang iloy nagsabat, “Ang ulo ni Juan Bautista.”
    Gilayon nagdalidali sa pagbalik ang dalagita sa hari kag nagsiling, “Gusto ko nga ihatag mo sa akon sa gilayon ang ulo ni Juan Bautista sa isa ka bandihado!”
   Nagpasubo gid ini sa hari, pero indi na sia makabalibad tungod kay nagpanumpa sia sa atubangan sang iya mga dinapit. Gani ginsugo niya sa gilayon ang isa ka soldado sa pagdala sa iya sang ulo ni Juan. Nagkadto ang soldado sa prisuhan kag ginpugotan si Juan. Kag gindala niya ang ulo nga natungtong sa isa ka bandihado kag ginhatag ini sa dalagita nga amo ang naghatag sini sa iya iloy. Sang mabatian ini sang mga gintuton-an ni Juan, ginkadtuan nila kag ginkuha ang iya bangkay kag ginlubong.

Pebrero 6 | Pebrero 8