"Ang Anak sang Tawo Ginoo sang Adlaw nga Inugpahuway"

Liturhiya sang Pulong

(Sabado, Setyembre 7, 2019)

Ang Pagbasa gikan sa Sulat ni San Pablo nga Apostol, sa mga:

Taga-Colosas 1:21-23

   Sang una anay malayo kamo sa Dios, kag nanginkaaway kamo niya tungod sang malaut nga mga butang nga inyo ginhimo kag ginpanghunahona. Pero karon, tungod sang lawasnon nga pagkamatay sang iya Anak, ginhimo kamo sang Dios nga mga abyan niya, agod madala niya kamo sa iya atubangan nga balaan, putli kag wala sing dagta. Kinahanglan gid man nga magpadayon kamo nga matutom sa malig-on kag masaligan nga sadsaran kag indi kamo magkalingkang sa paglaom nga inyo nabaton, sang mabatian ninyo ang Maayong Balita. Tungod sining Maayong Balita nga ginawali sa tanan sa bug-os nga kalibutan, ako, si Pablo, nangin-isa ka alagad.

Salmo sa Pagsabat:

Mga Salmo 54:3-4, 6 kag 8

(S) Tan-awa! Ang Dios nagabulig sa akon.

Pamatii man ang akon pangamuyo, O Dios, talupangda ang akon mga pulong! Ang bugalon nga mga tawo magakari sa pagsumpong sa akon, ang mapintas nga mga tawo nagahimulat sa pagpatay sa akon, mga tawo nga wala nagasapak sa Dios. (S) 

Kabay nga silutan sang Dios ang akon mga kaaway sang ila kaugalingon nga kalautan! Pagalaglagon niya sila kay matutom sia. Ginluwas mo ako sa tanan nga mga kabudlayan, kag nakita ko ang pagkalutos sang akon mga kaaway. (S)

Aleluya:

Juan 14:6

   Ako amo ang dalan, ang kamatuoran, kag ang kabuhi, siling sang Ginoo; wala sing may makakadto sa Amay kon indi paagi sa akon.

Ang Pagbasa sang Santos nga Ebanghelyo suno kay:

San Lucas 6:1-5

   Sang isa ka Adlaw nga Inugpahuway, si Jesus nag-agi sa kaumhan sang trigo. Ang iya mga gintuton-an nagpangutol sang mga uhay, ginkisikisi nila ini kag ginkaon. May mga Fariseo nga nagsiling, “Ngaa bala ginahimo ninyo ang ginadumilian sang aton Kasugoan sa Adlaw nga Inugpahuway?”

   Sinabat sila ni Jesus, “Wala bala ninyo mabasahi ang ginhimo ni David sang sia kag ang iya mga kaupdanan gingutom? Nagsulod sia sa balay sang Dios, ginkuha niya ang tinapay nga nahalad sa Dios, ginkaon ini, kag ginhatagan man niya ang iya mga kaupdanan, bisan indi tugot sa bisan kay sin-o ang pagkaon sini luas lamang sa mga pari.”

   Kag si Jesus nagsiling pa sa ila, “Ang Anak sang Tawo Ginoo sang Adlaw nga Inugpahuway.”

Setyembre 6 | Setyembre 8