Ang Matuod nga Bili sang Pagkagintuton-an

Liturhiya sang Pulong

(Domingo, Setyembre 8, 2019)

1. Ang Pagbasa gikan sa Libro sang:

Kaalam ni Salomon 9:13-18

   “Sin-o ang magatuon sang kabubot-on sang Dios? Ang tawhanon nga ihibalo dili tumbas sa paghibalo kag ang aton mga pangatarungan nagapatalang sa aton, tungod kay ang aton mamalatyon nga lawas nagapaluya sang aton kalag. Ang lawas umalagi nga palahuwayan nga nahuman sa duta, isa ka lulan sang mapagsik nga panghunahona. Ang aton mabuhat amo ang pagpakutpakot sang mga butang sa duta; aton tinguhaon ang pagsusi sang mga butang nga malapit sa aton. Sin-o ang sarang makalaom nga iya mahangpan ang langitnon nga mga butang? Wala sing bisan sin-o nga makahibalo sang imo binuboot, kon indi mo anay sia paghatagan sang Kaalam kag ipadala sa iya ang imo espiritu santo. Sa sini nga paagi, ang mga tawo sa kalibutan ginbutang sa matadlong nga dalan. Nakahibalo sila sang imo nahamut-an kag ginbantayan sila sang Kaalam."

Salmo sa Pagsabat:

Mga Salmo 90:3-4, 5-6, 12-13, 14 kag 17

(S) Ginoo, ikaw ang amon puloy-an halin sang una.

Ginamanduan mo ang mga tawo sa pagbalik sa ila ginhalinan, ginahimo mo sila liwat nga duta. Ang isa ka libo ka tuig para sa imo subong lang sang isa ka adlaw; kaangay lang sila sang kahapon nga nagligad na, subong sang isa kamalip-ot nga takna sa kagab-ihon. (S)

Ginaanod mo ang mga tawo subong sang baha; subong sila sang damgo nga wala nagadugay. Subong sila sang hilamon nga nagaulhot kon aga, nagatubo kag nagalagtom, pero pagkahapon nagakalaya kag nagakapatay. (S)

Tudloi kami kon daw ano kalip-ot sang amon kabuhi, agod nga manginmainandamon kami. O Ginoo, tubtob pa bala san-o ikaw malugpayan? Kaluoyi man ang imo mga alagad! (S)

Pun-a kami sa tagsa ka aga sang imo mapinadayunon nga gugma, agod magkanta kag magkalipay kami sa bug-os namon nga kabuhi. Ginoo nga amon Dios, kabay nga bendisyunan mo kami, kag hatagi kami sing kadalag-an sa tanan nga amon ginahimo! Huo, hatagi kami sing kauswagan sa tanan nga amon ginahimo! (S)

2. Ang Pagbasa gikan sa Sulat ni San Pablo nga Apostol, kay:

Filemon 1:9-10, 12-17

   Pero sa baylo sini, nagapangabay ako sa imo tungod sa gugma. Ginahimo ko ini bisan pa nga ako si Pablo, embahador ni Cristo Jesus, kag isa man karon ka binilanggo tungod sa iya. Gani nagapangabay ako sa imo tungod kay Onesimo nga akon gid anak kay Cristo. Kay sang nabilanggo ako, nangin-espirituhanon niya ako nga amay.

   Ginapabalik ko sia karon sa imo kag ang akon tagipusoon nagaupod sa iya. Luyag ko kuntani nga hawiran sia diri upod sa akon, samtang ginabilanggo ako tungod sang Maayong Balita, agod nga makabulig sia sa akon subong nga tal-os mo. Pero indi ako luyag magpilit sa imo sa pagbulig sa akon, kundi luyag ko kuntani nga imo ina himuon sa imo kaugalingon nga kabubot-on. Gani indi ako maghimo sang bisan ano kon indi ka magsugot.

   Ayhan nagpalayo sa imo si Onesimo sa malip-ot nga tion agod nga magbalik sia sa imo sing dayon. Kag karon indi lang sia isa ka ulipon, kundi labaw pa sa isa ka ulipon kay isa na sia ka hinigugma nga utod kay Cristo. Daw ano ang akon pagpakamahal sa iya! Kag daw ano pa gid ang imo pagpakamahal sa iya, subong isa ka ulipon kag isa ka utod sa Ginoo!

   Gani, kon ginakabig mo ako subong imo kaupod, batuna sia liwat subong sang imo pagbaton sa akon.

Aleluya:

Mga Salmo 119:135

   Mag-upod ka sa akon, kag tudloi ako sang imo mga kasugoan.

Ang Pagbasa sang Santos nga Ebanghelyo suno kay:

San Lucas 14:25-33

   May madamo gid nga mga tawo nga nag-upod kay Jesus. Nagliso sia kag nagsiling sa ila, “Ang bisan sin-o nga nagakari sa akon kag wala nagahigugma sa akon labi pa sa iya amay kag iloy, asawa kag kabataan, kautoran nga lalaki kag babayi, kag sa iya kaugalingon indi mangin-akon gintuton-an. Ang bisan sin-o nga wala nagapas-an sang iya kaugalingon nga krus kag nagasunod sa akon, indi mangin-akon gintuton-an. Kon ang isa sa inyo magpatindog sing tore, indi bala nga ginaisip niya anay ang bili, agod mahibaluan niya kon bala makaigo ang iya kuwarta sa pagpahuman sini? Kay basi sa tapos nga mapasad niya ang sadsaran, indi na sia makasarang sa pagpatapos sang tore, kag ang tanan nga makakita sini magayaguta sa iya. Magasiling sila, ‘Ini nga tawo nagpatindog sing tore kag indi makapatapos.’ Kon ang hari nga may 10,000 ka mga soldado magpakigsumpong sa isa ka hari nga may 20,000 ka mga soldado nga nagapadulong batok sa iya, magapungko anay sia kag magabinagbinag kon bala may tuman sia nga kusog sa pag-atubang sa nagapadulong nga hari. Kon indi sia makasarang, magapadala sia sing tiglawas sa pagsugata sang nagapadulong nga hari samtang malayo pa sia sa pagpangayo sang pagpakighusay.” Sa katapusan si Jesus nagsiling, “Sa amo man nga bagay, wala sing isa sa inyo nga mangingintuton-an ko kon indi sia magbiya sang tanan niya nga pagkabutang.”

Setyembre 7 | Setyembre 9