Tubtob nga Magapangibabaw ang Katarungan

Liturhiya sang Pulong

(Sabado, Hulyo 20, 2019)

San Apolinario, Obispo kag Martir

Ang Pagbasa gikan sa Libro sang:

Exodo 12:37-42

   Ang mga Israelinhon naglakat halin sa Rameses pakadto sa Sucot. Ang kadamuon sang mga lalaki nga naglakat mga 600,000, wala labot ang mga babayi kag mga kabataan. May madamo man nga iban nga mga tawo, madamo nga mga karnero, mga kanding, kag mga kabakahan man ang nag-upod sa ila. Naghimo sila sing tinapay nga wala sing lebadora gikan sa linamas nga ila gindala halin sa Egipto. Wala ini sing lebadora, kay gintabog sila sing hinali halin sa Egipto, kag wala sila sing tion sa pag-aman sang ila kaugalingon nga mga kalan-on.
   Ang mga Israelinhon nagpuyo sing 430 ka tuig sa Egipto. Sa amo gid nga adlaw, sa katapusan sang 430 ka tuig, ang tanan nga mga hangaway sang Ginoo naggwa sa Egipto. Amo ini ang gab-i nga ang Ginoo nagbantay sa ila agod makagwa sila sa Egipto. Amo manini ang gab-i nga ginpain para sa Ginoo, sa tanan nga mga kaliwatan sang mga lsraelinhon nga ila dapat saulogon.

Salmo sa Pagsabat:

Mga Salmo 136:1 kag 23-24, 10-12, 13-15

(S) Ang iya gugma nagapadayon sa gihapon.

Magpasalamat kamo sa Ginoo, kay sia maayo, kag ang iya gugma nagapadayon sa gihapon. Wala sia magkalipat sa aton sang nalutos kita, ang iya gugma nagapadayon sa gihapon, ginhilway niya kita sa aton mga kaaway, ang iya gugma nagapadayon sa gihapon. (S)
Ginpamatay niya ang panganay nga mga lalaki sang mga Egiptohanon; ang iya gugma nagapadayon sa gihapon. Gin-ubayan niya ang mga Israelinhon pa gwa sa Egipto; ang iya gugma nagapadayon sa gihapon; gin-ubayan niya sila sang iya makusog nga kamot kag gamhanan nga butkon; ang iya gugma nagapadayon sa gihapon. (S)
Ginpahawa niya ang Mapula nga Dagat; ang iya gugma nagapadayon sa gihapon; gin-ubayan niya ang iya mga tawo sa pagtabok sini; ang iya gugma nagapadayon sa gihapon; ginlumos niya ang hari kag ang iya mga hangaway; ang iya gugma nagapadayon sa gihapon. (S)

Aleluya:

2 Corinto 5:19

Ang Dios nagahimo sang tanan nga mga tawo nga iya mga abyan paagi kay Cristo; kag naghatag sia sa amon sang mensahi kon paano niya sila mahimo nga mga abyan.

Ang Pagbasa sang Santos nga Ebanghelyo suno kay:

San Mateo 12:14-21

   Ang mga Fariseo naglakat kag naghimbon sila sa pagpatay kay Jesus. Sang mahibaluan ini ni Jesus, naghalin sia sa sadto nga duog kag ginsunod sia sang madamo nga mga tawo. Gin-ayo niya ang tanan nga masakiton, kag ginpaandaman nga indi sila magpanugid bisan kay sin-o nahanungod sa iya, agod matuman ang ginsiling ni Isaias nga propeta:

“Yari ang akon alagad
Nga akon ginpili,
Siling sang Dios,
Ang akon hinigugma
Nga sa iya nahamuot ako.
Ang akon espiritu ibutang ko sa iya,
Kag sia magapahibalo
Sang akon paghukom
Sa mga kapungsoran.
Pero indi sia magbais
Ukon magsinggit,
Ukon mabatian ang iya hambal
Sa mga dalan.
Indi sia magbali
Bisan sang luma na nga tigbaw,
Ukon magpatay sang nagapiraw nga suga,
Tubtob nga magapangibabaw
Ang katarungan,
Kag ang tanan nga mga tawo
Magasalig sa iya.” 

Hulyo 19 | Hulyo 21